Baseriŋ Bithɔɔkɔ beŋ 24

1Naa daŋande wuŋ hura kasɔhi, Bafode Womandiŋ woŋ Ananaiyasi key ka mɛti ba ka Sɛsariya baŋ iŋ bakalani bibayahɛŋ mɛnɛ wɔ wo kɔthɛ sirani ba ka biRomaŋ beŋ baŋ wo dɔma na Tɛtolɔsi. Bindɛ key kɔɔ ka kɔtɔkɔy ka bakɛrɛŋ woŋ Filisi haliko ba ka fuŋutuyɛ Pɔli na. 2Kɛna thiyo Pɔli kaake, e Tɛtolɔsi sɛsuwa ba gbonkiya ba dɔma, na “Bayiki niŋ woŋ Filisi, yindo yamɛ nthɔŋ nda biya fooma woŋ. Kele hukɛnda haŋ sisiyɛ mina mathɛbɛ ba wuthɔɔkuwɛ, mɛnɛ bɛyiniŋ babɔyɛ ba thankɛ sikinando ba wuyɔhɔy wu ka kuyɛkɛŋ ntuŋ koŋ. 3Wu kɔŋ mina yehe timo tima ka kuyɛkɛŋ ntuŋ koŋ, awa wuŋ bukuye mina wumandiŋ ba yi. 4Yaŋ thimota ba sɛkitha lɔkɔ bakɛnda baŋ ka gbonkiya, wuna yaŋ theteke yina ba yi poniyɛ kuiha wuyɔhɔy sɔkɔ ntuŋ haŋ. 5Miŋ kute ba hati wowathe woŋ baŋ niyɔ maama wonɛnɔy, awa e wundɛ thɛrina sokisoki ka mateete ma ka biYusu beŋ fooma kafay woŋ. Bakɔtɔkɔ wunthe na ka kiki ba ka hati wowathe wo ka Nasarɛthi woŋ. 6Wundɛ yole ba pothinuwa banka bamandiŋ ka miŋ niye Masaala na kubatho ka, kɛrɛ miŋ bohe niŋ. [ Miŋ dɛɛnki ba niŋ kɔnsiŋina ka na tepe Siraŋ ntuŋ baŋ na. 7Kɛrɛ bayaha wo ka kurugbani beŋ woŋ Lisiyasi see iŋ sɛmbɛ bamandiŋ e kanita mina niŋ. 8Lisiyasi ni yamari ba biya bi fuŋutuyɛ Pɔli na beŋ bi be si kɔɔ ka kɔtɔkɔy kɛnda.] Mɛnɛ yi kɔŋ niŋ thɔnthiŋiniyɔkɔ, yi kɔŋ punku ba metho bɛyiniŋ ba tepe miŋ baŋ fooma ba wundɛ.” 9BiYusu beŋ mɛy hu tepo haŋ e bindɛ dɔma na bɛyiniŋ baŋ baŋ fooma banɔndi bɛna. 10Kɛna tepe bayaha woŋ Pɔli na ba wundɛ gbonkiya, awa huna tepe Pɔli, na “Yaŋ kɔthɛŋ ba yi niyɔ bakɔnsɔŋɔŋ ba kuyɛkɛŋ koŋ koŋ baŋ fooma ba thaninɛŋ thabɔyɛ, wuna wuŋ ayehe yama ba gbonkiyiyɔkɔ ka kɔtɔkɔy kɛnda. 11Yi kɔŋ tete punku ba kɔthɔ ba dɔma na wuŋ daŋandeta hɛ hura kɔhi iŋ kaye naa key yaŋ ka Yɛrusalɛmi ka niya kubatho. 12BiYusu beŋ tha yama pɛnki yaŋ si yuŋande iŋ wɔ o wɔ ka banka bamandiŋ ba ka Masaala baŋ. Bindɛ tha yama pɛnki yaŋ si hɛŋɛti biya beŋ ka bankɛŋ bathuŋuyande baŋ maa kamo kama ka mɛti baŋ. 13Bindɛ sa punku tɔŋina maseri ma tɔŋɔŋ nagberekethe ka hu tepiye bindɛ yama haŋ ba huŋ niyɔ nɔndi. 14Yaŋ kɔŋ meyeke bɛy banthe baŋ baŋ kɛnda: Yando ni kubatho Masaala wo ka mbembɛŋ ntuŋ beŋ ka yema Gboŋa ba dome bindɛ ba bɛŋ niyɔ hothi baŋ. Kɛrɛ yaŋ niyeŋ hɛlɛŋ lanɛya bɛy yo bɛy ba gbalo ka Siraŋ ba ka Musa baŋ mɛnɛ ŋathagba ŋa ka banabiŋ beŋ ŋaŋ. 15Yaŋ kiŋ iŋ kukahe thukuma kunthe ka Masaala nɔŋ na nthɔŋ bindɛ na, ba dɔma na biya fooma, biyɔhɔy yo mɛnɛ binɛnɔy, bi boheŋ nɔŋ ba ŋaye ka tuka haŋ. 16Wuna yaŋ kɔŋ yɔli timo tima ba niyɔ iŋ thukuma humɛthɛ ka kɔtɔkɔy ka Masaala mɛnɛ ka biyamɛti. 17“Naa fuŋ nde yaŋ ka Yɛrusalɛmi ba thaninɛŋ thanɔndi, yaŋ key kɛndɛ ba kata kɔbiri ka bamɔnɛŋ beŋ mɛnɛ ba fuŋuna saraka. 18Naa yaŋ ka niya wali baŋ baŋ kɛna penke bindɛ yama ka banka bamandiŋ ba ka Masaala baŋ naa thanki yaŋ mɛthinɔkɔ. Yaŋ tha nde kɛndɛ diŋ biya bibɔyɛ. Poro ka nde kɛndɛ. 19Kɛrɛ biYusu binɔndi bi ŋaye ka kuyɛkɛŋ ku ka Esiya koŋ bi kiŋ nde kɛndɛ. Bindɛ hɛlɛŋ bi kiŋ ba kɔɔ ka kɔtɔkɔy kɛnda e bindɛ gbonkiya mɛnɛ bi kiŋ iŋ bɛy yo bɛy ba sɔkinɔkɔ yama. 20Maa biya bi dondo beŋ bi tɛpɛŋ hɛ banɛnɔy ba kute bindɛ yaŋ si ni naa kɔɔyɛ yaŋ ka kɔtɔkɔy ka Kaama wo ka biYusu beŋ woŋ, 21yɔkɔŋ ba bɛy banthe ba tepe nde yaŋ naa kɔɔyɛ yaŋ ka kɔtɔkɔy kɛnamɛŋ: na ‘Fuŋutuyo yaŋ hɛ iŋ beŋ ba na ni yaŋ lanɛya ba bitukɛ beŋ kɔ ŋaye ka tuka haŋ.’ ” 22Awa Filisi, wo kɔthɛ nde nda woŋ nagberekethe ba Gboŋa ba ka Mariki woŋ Yisɔs baŋ, bohe sɔkɔ haŋ thampa. Wundɛ tepe bindɛ, na “Naa Lisiyasi see, bayaha wo ka kurugbani beŋ woŋ, yaŋ kɔŋ gbonkoy sɔkɔ ndeŋ haŋ.” 23Wundɛ tepe bayaha wo dethiteke Pɔli na woŋ ba niŋ kɔsina, kɛrɛ wundɛ ka ba niŋ lɔŋa iŋ yɔlɔnkɔiŋ, awa wundɛ kiŋ ba mɛkina ba binyathiki bi ka Pɔli sisiyɛ niŋ ntha yo ntha ki thimo bindɛ ba sisa. 24Naa daŋande wuŋ hura hukɔndande, Filisi see iŋ wɔtɔ nama Durusila. Durusila woYu na nde wundɛ. Filisi ŋindiyɛ Pɔli na e wundɛ niŋ si poniyɛ kuiha naa Pɔli gbonkoy ba niya lanɛya ka Kraist Yisɔs haŋ. 25Kɛrɛ naa Pɔli gbonkoy ba niya bayɔhɔy, madinkɔkɔ, mɛnɛ malɔkɔ ma see ba kukɔnsɔŋɔŋ koŋ maŋ, Filisi payɔy e wundɛ tepe Pɔli na, na “Kaa nda. Yaŋ kɔŋ yina manke thiya naa yaŋ kute hɛɛra. 26Ka tute thukuma ba Pɔli niŋ kɔ dunkune kɔbiri, wuna biyɛ wundɛ kɔŋ thiyi Pɔli na timo tima ba niŋ gbonkitiyande. 27Naa daŋande wuŋ thaninɛŋ thaye, Pɔsiɔsi Fɛsɛtɔsi see nda niyɔ bakɛrɛŋ wo ka kuyɛkɛŋ koŋ woŋ. Filisi thimoŋ nde ba kuta keŋ kuyɔhɔy ka biYusu beŋ huna dɔmɛ wundɛ pɛya Pɔli na ka yeeli woŋ.

will be added

X\