Baseriŋ Bithɔɔkɔ beŋ 23

1Pɔli dethe biya bi ka Kaama woŋ beŋ natiŋ e wundɛ dɔma, na “Mbɛndaŋ, thukuma niŋ haŋ hu kiŋ humɛthɛ nagbaraŋ ka Masaala ka malɔkɔ mahɛ maŋ maŋ.” 2Bafode Womandiŋ woŋ Ananaiyasi ni yamari bi kɔɔyɛ wuthuriye Pɔli na beŋ ba niŋ thorina ka hothi. 3Pɔli tepe kɛnama, na “Masaala kɔŋ nɛnɛ thoroŋ yina, yindo nɔŋ diŋ hu gbokilo hiro huhuhɛ woŋ! Yi dɔŋɔy ba yama kɔnsiŋina nɔŋ na tepe Siraŋ baŋ na, kɛrɛ e kɔ thinka Siraŋ baŋ ka gbakita bindɛ ba yama thorina!” 4Biya bi thuriye Pɔli na beŋ tepe kɛnama, na “Yi yaki Bafode Womandiŋ wo ka Masaala woŋ!” 5Huna tepe Pɔli, na “Mbɛndaŋ, yaŋ kɔthɛta ba dɔma na wundɛ na Bafode Womandiŋ woŋ. Magbali ma ka Masaala maŋ tepe, na ‘Yi ka ba gbonkiya wunɛnɔy ba bakɛrɛŋ wo ka biya nda beŋ woŋ.’ ” 6Naa kute Pɔli ba dɔma na binɔndi bi kiŋ ka mathuŋande maŋ bi dɔma na kiki ba ka biSadusini, binɔndi biFaresini, wundɛ thiyi bakaamani beŋ, na “Mbɛndaŋ! Yaŋ yando woFaresi, awa hati wowathe wo ka woFaresi na yaŋ. Yaŋ kiŋ dondo baŋ ka fuŋutuyo ba kukahe niŋ thukuma, ba bitukɛ beŋ ba ŋayi ka tuka haŋ!” 7Ka wuthurɔy wu tepe wundɛ nɛŋ wuŋ, biFaresini beŋ mɛnɛ biSadusini beŋ thɛrɛŋ ba yuŋande, e mathuŋande maŋ hakande mateete, 8ba na tepe biSadusini beŋ na biya sa nɔŋ ŋayi ka tuka haŋ, e bindɛ tɛpa hɛlɛŋ na malekɛŋ mɛnɛ mbayiŋ ka hali, kɛrɛ biFaresini beŋ bi niyeŋ bɛyiniŋ bataati baŋ baŋ lanɛya. 9Bindɛ bohe thiya masɔnkɔ wutɔɔkɛ, awa karimɔkɔiŋ binɔndi bi ka Siraŋ baŋ beŋ bi ka kiki ba ka biFaresini beŋ baŋ kɔɔyɛ wukahɛ ka tɛpa, na “Miŋ tha kutu bɛyiniŋ banɛnɔy ba ni hati wowathe woŋ baŋ! Thampo wayi maa maleka na gbonkitiyande niŋ!” 10Kuyuŋande kutɔɔkɛ-tɔɔkɛ see nda niyɔ, haaŋ bayaha womandiŋ wo ka kurugbani beŋ woŋ see niyɔ ŋayaŋ ba Pɔli kɔ yominuwo. Huna gbakite wundɛ kurugbani beŋ ba biyande ka Kaama woŋ e bindɛ ka fuŋuta kɛndɛ Pɔli na e bindɛ niŋ kata ka banka namɛŋ ka. 11Ka huyɛ babɛina Mariki woŋ tepe Pɔli na, na “Kaha thukuma. Yi thanki niya maseri ba yaŋ ka Yɛrusalɛmi do, awa yi kɔŋ hɛlɛŋ ni maseri ba yaŋ ka mɛti ba ka Romaŋ baŋ.” 12Naa puthɔy kaŋ sanka biYusu binɔndi thuŋande ka tha banthe e bindɛ yuka yanfa. Bindɛ gbiŋe ba dɔma na bindɛ sa thɔŋ ntha yo ntha awa bindɛ sa thiiye yɔkɔŋ na bindɛ kore Pɔli na. 13Bi kiŋ nde bi yamɛ kɔnthɔ kanaŋ bi yukɛ yanfa baŋ baŋ beŋ ka tha banthe. 14Bindɛ key ka bafodeni bimandiŋ beŋ ka mɛnɛ bakalani bibayahɛŋ beŋ e bindɛ tɛpa, na “Miŋ thanki gbiŋa ba thana thɔma e miŋ thana thiiye yɔkɔŋ na miŋ kore Pɔli na. 15Ka tete, beŋ ndo mɛnɛ Kaama ndeŋ woŋ tɔŋitaŋ thampa ka bayaha wo ka kurugbani beŋ woŋ ba sisa Pɔli na e beŋ niya nɔŋ ka beŋ yɔli ba deethuwa kuna kuseŋa ba wo ka Pɔli wuna miŋ niŋ kɔri ka gboŋa.” 16Kɛrɛ sesa wo ka Pɔli wowathe wo mpuu wɛndama woyɛrɛmɛ yuye yanfa baŋ baŋ. Huna kaaye wundɛ ka banka ba ka kurugbani beŋ baŋ e tepe Pɔli na. 17Kɛna thiyi Pɔli wɔ wunthe ka kurugbani beŋ e tepe niŋ, na “Kata hati woŋ baŋ ka bayaha nda woŋ, baa wundɛ kiŋ iŋ hu wundɛ ba niŋ tepe.” 18Kurugba woŋ sekithe niŋ e wundɛ niŋ kɔtiyɔkɔ ka bayaha woŋ, e tepe niŋ, na “Pɔli na thiyɛ yama e wundɛ yama tepe ba sisa hati woŋ baŋ kɛnda do, baa wundɛ kiŋ iŋ hu ndɛ ba yina tepe.” 19Bayaha woŋ bohe niŋ kugbeke, e sakitɔkɔ niŋ. Wundɛ thɔnthɔŋɔŋ niŋ, na “Mbɛ hu yi yama ba tepe?” 20Hati woŋ tepe, na “Bayahɛŋ bi ka biYusu beŋ thanki yɛrɔkɔ hɛ ba yina thɔnthiŋina ba sisa Pɔli na ka Kaama woŋ, wu be niyɔ nɔŋ Kaama woŋ thimoŋ ba kuta kuna kuseŋa ba Pɔli. 21Kɛrɛ ba poniyɛ bindɛ kuiha, baa mɔlɔŋ ba biya kɔnthɔ kanaŋ nunɔkɔy e bindɛ kɔ yumba Pɔli na. Bindɛ gbiŋe ba thana thɔma e bindɛ thana thiiye na yɔkɔŋ bindɛ kore Pɔli na. Bindɛ thanki nda kɔsinɔkɔ e bindɛ kɔ yumba ba hu yi tɛpi haŋ.” 22Bayaha woŋ tepe niŋ, na “Ba tepe wɔ yo wɔ ba dɔma na yi tepe yama bɛyiniŋ baŋ baŋ.” Wundɛ tepe niŋ ba wundɛ duwa. 23Bayaha womandiŋ wo ka kurugbani beŋ woŋ thiyi bayahɛŋ nama biye e wundɛ bindɛ tepe, na “Fuŋuna kurugbani kɛmɛŋ biye ba kaa ka Sɛsariya, iŋ kurugbani kɔnthɔ kasɔŋ-kaye bi tutɔ ka sooni, mɛnɛ kurugbani kɛmɛŋ biye bi iŋ ŋasuŋɔ, e beŋ kɔsinɔkɔ ba pɛyɛna ka wakathi wotaati woŋ naa kaŋ woŋ thɔɔyɛ, 24awa e beŋ dunkune Pɔli na sooni binɔndi ba niŋ kata wuthɛbinɛ thukuma ka bakɛrɛŋ wo ka kuyɛkɛŋ koŋ woŋ Filisi.” 25Kɛna gbale bayaha wo ka kurugbani beŋ woŋ kuthagba ku tɛpɛ nanaŋ baŋ: na 26“Yama Kulɔdiyɔsi Lisiyasi. Yaŋ maaŋ yina. Yama gbali kuthagba koŋ koŋ baŋ ka bakɛrɛŋ woŋ Filisi, bayiki wokiyaŋ woŋ. 27BiYusu beŋ bohe hati wowathe wo yaŋ tɔŋɔti kɛnda ka woŋ baŋ e bindɛ yɔla ba niŋ kɔra. Yaŋ see manke kɔthɔ ba wundɛ niyɔ lasiri wo ka Romaŋ. Huna key yaŋ niŋ niye kisi iŋ kurugbani niŋ beŋ. 28Yaŋ thimoŋ nde ba kɔthɔ ba bindɛ niŋ fuŋutuye, wuna biyɛ yaŋ niŋ pɛyɛta ka Kaama namɛŋ woŋ. 29Yaŋ kute ba dɔma na wundɛ tha ni bɛy yo bɛy ba sisande wundɛ ba koro maa ba loŋo. Bindɛ fuŋutuyɛ niŋ maŋaye ka sirani bakɛnamɛŋ baŋ. 30Yaŋ tepo nde ba dɔma na bindɛ thanki niŋ yukuyɛ yanfa, wuna biyɛ yaŋ niŋ kɔ tɔŋita kɛnda ka. Yaŋ tepe biYusu beŋ ba kaa kɛnda ka iŋ ŋafuŋutu namɛŋ ŋaŋ.” 31Kurugbani beŋ ni nɔŋ na tepo bindɛ na. Bindɛ fuŋutu Pɔli na huyɛ babɛina haaŋ e bindɛ niŋ kata ka mɛti ba ka Antipatirisi baŋ. 32Ka gbɛɛŋ wo yemɛ woŋ, kurugbani biyathiyɔkɔ beŋ duu, awa bindɛ bi iŋ sooni beŋ key ka kɔtɔkɔy iŋ Pɔli. 33Bindɛ kati niŋ ka Sɛsariya e bindɛ ka dunkuna kuthagba koŋ mɛnɛ Pɔli ka bakɛrɛŋ wo ka kuyɛkɛŋ koŋ woŋ. 34Bakɛrɛŋ woŋ ni kuthagba koŋ karaŋ e thɔnthiŋina Pɔli na kuyɛkɛŋ ku ka ŋaye wundɛ. Naa kɔthɛ wundɛ ba wundɛ ŋaye ka kuyɛkɛŋ ku ka Silisiya, 35wundɛ tepe, na “Yaŋ kɔŋ yina manke yuyɛ naa bi fuŋutuyɛ yina beŋ see.” Kɛna ni wundɛ yamari ba wundɛ be kɔsina ka banka ba thoyiyo nde Gbaku woŋ Hɛrɔdi baŋ.

will be added

X\