Baseriŋ Bithɔɔkɔ beŋ 22

1“Biyaŋ bibiyɛthɛŋ mɛnɛ bintɔni niŋ beŋ, poniyaŋ nuŋ kuiha. Yaŋ kɔŋ gbonkiyiyɔkɔ ka kɔtɔkɔy kendeŋ!” 2Naa yuye bindɛ niŋ si bindɛ gbonkitiyande ka huyuŋ namɛŋ haŋ, bindɛ yame daanɔkɔ nayeŋ, awa Pɔli yame ntiŋ gbonkiya. 3“Yaŋ kiŋ woYu, wo mpoo ka Tasɔsi ba ka Silisiya, kɛrɛ yaŋ dinko ka Yɛrusalɛmi do ka hukarandeŋ ka yɔnkɔ hu ka Kameliyɛli. Yaŋ thaninuwo natharaŋ ka Siraŋ ba ka mbembɛŋ ntuŋ beŋ baŋ, awa yaŋ kiŋ nde wodunkunɔkɔy wukahɛ ka Masaala nɔŋ na nthɔŋ beŋ na bendo hɛ dondo beŋ. 4Yaŋ ni thɔrɔ bibɔyɛ haaŋ e yaŋ kɔra biya bi yeŋ Gboŋa baŋ baŋ beŋ. Yaŋ bohe biyɛthɛŋ mɛnɛ yɛrɛmɛŋ awa e yaŋ bindɛ thiya ka yeeli. 5Bafode Womandiŋ woŋ mɛnɛ biya bi ka Kaama woŋ beŋ fooma tɔŋɔŋ ba dɔma na nɔndi bɛna yaŋ tɛpi baŋ. Yaŋ dunkuno kuthagba maŋaye kɛnamɛŋ ba biYusu bi ka Damasakɔsi beŋ, awa yaŋ key kɛndɛ ba ka boohuwa biya beŋ kɛndɛ e yaŋ bindɛ sisa bilɔŋɔy ka Yɛrusalɛmi do ba bi be si gbasiŋita. 6“Naa nde yaŋ key, yaŋ thuriye ka Damasakɔsi. Awa bɛrɛ ba hatɔ teete kɛna see waŋ bamandiŋ maŋaye ka kuthahinɛ koŋ. Ka thagbɛmgbɛŋ thabɛina waŋ babɛina pɛnkande yama. 7Kɛna ŋɔti yaŋ ka kuyɛkɛŋ koŋ e yaŋ yuyɛ thampa tha tepe yama, na ‘Sɔli, Sɔli! Mbɛ ba yi yama niye thɔrɔ?’ 8Kɛna thɔnthɔŋɔŋ yaŋ, na ‘Mbɛ yina Mariki?’ Wundɛ tepe, na ‘Yama Yisɔs wo ka Nasarɛthi wo yi ni thɔrɔ woŋ.’ 9Biya bi nde iŋ yaŋ beŋ kute waŋ baŋ, kɛrɛ bindɛ tha yuyɛ thampa tha ka wo nde yama gbonkitiyande woŋ thaŋ. 10Kɛna thɔnthɔŋɔŋ yaŋ, na ‘Mbɛ mu thimo yi ba yaŋ niya, Mariki?’ Awa Mariki woŋ tepe kiyaŋ, na ‘Ŋayi ka kɔɔ awa e yi kaa ka Damasakɔsi, awa yi kɔŋ kɛndɛ ka tepo bɛyiniŋ fooma ba thanki Masaala dɛɛnka ba yi ba niya.’ 11Yaŋ mankɔy nde thaaya maŋaye ka waŋ bamandiŋ baŋ baŋ, awa bi nde iŋ yaŋ ka biyasi haŋ beŋ bohe yama kugbeke e bindɛ yama kata ka Damasakɔsi. 12“Ka mɛti babɛina wɔ wunthe kiŋ nde kɛndɛ keŋ nama kuna dɔma Ananaiyasi, wɔ na nde wothumbɛ wo putiyɔy Siraŋ ntuŋ baŋ awa wundɛ kiŋ nde wo thiyɔy yiki womandiŋ iŋ biYusu bi kɛndɛ beŋ fooma. 13Wundɛ see kiyaŋ, e wundɛ yama thuriye wuyɔhɔy e tɛpa, na ‘Wɛndaŋ woŋ Sɔli, pɛthɔ thaaya.’ Ka thagbɛmgbɛŋ thabɛina yaŋ pɛthɔy thaaya e yaŋ niŋ detha. 14Ananaiyasi tepe yama, na ‘Masaala wo ka mbembɛŋ ntuŋ beŋ woŋ thanki yina yɛtha ba yi be kɔthɔ mathimo nama maŋ, ba kuta Bawali nama Wothumbɛ woŋ, awa iŋ ba niŋ poniyɛ kuiha naa wundɛ gbonkoy. 15Yi kɔŋ niyɔ baseri ba wundɛ ba tepe wɔ yo wɔ bɛyiniŋ fooma ba thanki yi kuta baŋ iŋ ba yuye yi baŋ. 16Awa ka tete, mbɛ ba hɛlɛŋ yi yumbe? Ŋayi ka kɔɔ e yi biyo biye hu ka Masaala haŋ awa wuna hakɛŋ nda baŋ mɛthina fooma maŋaye ka niya kuraminɛ ka keŋ nama koŋ.’ 17“Yaŋ key hɛlɛŋ ka Yɛrusalɛmi, awa naa nde hintiŋ yaŋ ni kuraminɛ ka banka bamandiŋ ba ka Masaala baŋ, kɛna kute yaŋ Mariki woŋ ka maniyɔ mathɔɔkɔ nɔŋ mandɛ e wundɛ tɛpa kiyaŋ, na ‘Niya yagba e yi fuŋa ka Yɛrusalɛmi do yako, bɛy bahɛna kutɛ biya beŋ beŋ dondo baŋ sa yɛrɔkɔ maseri ma yi ni maŋ ba yaŋ.’ 19“Yaŋ tha bohinande iŋ wundɛ awa huna niye yaŋ yaabi, na ‘Kɛrɛ, Mariki, biya bi ka Yɛrusalɛmi beŋ beŋ bi kɔthɛŋ nagberekethe ba dɔma na yaŋ gbeeŋ yama kaayɛ ka bankɛŋ bathuŋuyande baŋ e yaŋ ka bohuwa bi niyɛ yina lanɛya beŋ e yaŋ bindɛ gbuduŋa. 20Awa mɛnɛ naa nde baseri wokɛnda woŋ Sitifɛŋ kɔra, yaŋ gbeeŋ yaŋ kiŋ nde kɛndɛ, e yaŋ yɛrɔkɔ ba koro nama haŋ, awa yama nde dethiteke yabɛŋ ba ka bikɔrɛ niŋ beŋ baŋ.’ 21“Kɛrɛ Mariki woŋ tepe yama, na ‘Kaa, yaŋ kɔŋ yina ŋindi wuthokiye ka siyani bahɛna baŋ.’ ” 22Biya beŋ poniyɛ Pɔli na kuiha haaŋ e wundɛ gbonkiya sɔkɔ humankɛ haŋ haŋ baŋ. Kɛna sɛsi bindɛ ba thiya masɔnkɔ wumandiŋ-mandiŋ, na “Daŋinandeŋ niŋ! Kɔraŋ niŋ! Wundɛ sisandeta nda ba niyɔ wohɛmɛ!” 23Ka lɔkɔ na bi kɔŋ nde thiyi masɔnkɔ, e bindɛ kɔ ŋuta yabɛŋ namɛŋ baŋ, awa e bindɛ kɔ yɛla kuligbi koŋ ka thinthi ba tɔŋina ba bindɛ thɔɔ ka mathoŋ. 24Bayaha womandiŋ wo ka kurugbani beŋ woŋ ni yamari lamgbeŋ nama beŋ ba kata Pɔli na kaake, awa wundɛ tepe lamgbeŋ nama beŋ ba gbuduŋa Pɔli na haliko na wundɛ kothiye maŋaye kɛnama saabu ba dɔmɛ biYusu beŋ thɔɔ ka mathoŋ wumandiŋ ma sɔkinɔkɔ niŋ. 25Kɛrɛ naa thanki bindɛ niŋ yuka ba kuta ma gbuduŋe niŋ, Pɔli tepe ka bayaha wo kɔɔyɛ kɛndɛ kuwaŋ woŋ, na “E wu kiŋ ka siraŋ baŋ ba gbuduŋa lasiri wo ka Romaŋ wo be hɛ kɔnsiŋina?” 26Naa yuye huŋ bayaha woŋ, wundɛ key ka bayaha womandiŋ woŋ e thɔnthiŋina niŋ, na “Mbɛ mu yi ba niya? Hati lamgba woŋ baŋ lasiri wo ka Romaŋ na!” 27Bɛna bayaha womandiŋ woŋ key ka Pɔli ka e niŋ ka thɔnthiŋina, na “Tepe hɛ yama. E na lasiri wo ka Romaŋ na yi?” Pɔli mɛyiyɛ niŋ, na “Ndo.” 28Bayaha woŋ tepe, na “Yaŋ thunkuŋ kɔbiri womandiŋ ba niyɔ lasiri wo ka Romaŋ.” Pɔli mɛyiyɛ niŋ, na “Kɛrɛ yaŋ, yaŋ kiŋ lasiri gbeeŋ ŋaye ka mpoo hukiyaŋ.” 29Ka thagbɛmgbɛŋ thabɛina biya bi nde ba thɔnthiŋinuwa Pɔli na beŋ yɔsɔkɔy kɛndɛ, awa bayaha woŋ thooyo payɔ humandiŋ na ŋee wundɛ ba dɔma na Pɔli kiŋ lasiri wo ka Romaŋ, awa mɛnɛ ba na lɔŋ wundɛ niŋ. 30Bayaha womandiŋ wo ka kurugbani beŋ woŋ kiŋ nde ba kɔthɔ gbeeŋ mu dɔmɛ biYusu beŋ sɔkinɔkɔ Pɔli na. Bɛna ka gbɛɛŋ wo yemɛ woŋ, wundɛ ni ba Pɔli peeko yɔlɔnkɔiŋ baŋ e niya bafodeni bimandiŋ beŋ mɛnɛ Kaama wo ka biYusu beŋ woŋ fooma thuŋande ka tha banthe. Kɛna ni wundɛ ba Pɔli kɔɔ ka kɔtɔkɔy kɛnamɛŋ.

will be added

X\