Baseriŋ Bithɔɔkɔ beŋ 2

1Naa tɛŋ malɔkɔ ma dɔma maŋ na Pɛntikɔsi, malɔkɔ ma nde bindɛ yehiteke ba thaŋɔna thaŋ maŋ, balanɛyani beŋ bi kiŋ nde bi kɔmande ka tha banthe. 2Ka wuthurɔy wubɛina masɔnkɔ mamandiŋ ŋaye ka kuthahinɛ koŋ ma thɔyande iŋ huru humandiŋ, awa mɛŋ thiŋe ka banka baŋ fooma ka doŋe nde bindɛ ka. 3Kɛna kute bindɛ ŋalampitha ŋa ka buu ŋa thɔyande iŋ thahiliŋ e wɔ yo wɔ ka bindɛ ka tutuyo iŋ hunthe. 4Bindɛ fooma thiŋo iŋ Yina wo ka Masaala woŋ awa bindɛ sɛsi ba gbonkiya thayuni thahɛna nɔŋ ti peye punka hu dunkuno bindɛ iŋ Yina woŋ haŋ. 5BiYusu bibɔyɛ bi kiŋ nde ka Yɛrusalɛmi, awa beŋ beŋ biya bina nde bi ni Masaala na kubatho bi sɛɛ maŋaye ka ŋakuyɛkɛŋ ŋaŋ fooma kafaydo. 6Naa yuye bindɛ masɔnkɔ maŋ maŋ baŋ, biya bibɔyɛ thuŋande. Bindɛ fooma ni kukabanɛ, bɛyi bahɛna kutɛ wɔ yo wɔ yuye na balanɛyani beŋ gbonkoy ka huyuŋ nama haŋ. 7Naa ni bindɛ ŋakabanɛ e bindɛ gbuŋunuwa, bindɛ tepe ba dɔma, na “Biya beŋ beŋ baŋ bi gbonkoy nanaŋ beŋ, e biKalili kutɛ? 8Mbu nama dɔmɛ miŋ fooma bindɛ yuyɛ na bindɛ gbonkoy ka thayuni thakɛntuŋ thaŋ na? 9Ka mindo dondo baŋ beŋ, binɔndi bi kiŋ dondo baŋ bi ŋaye ka ŋakuyɛkɛŋ ŋahakuwande. Binɔndi ŋaye ka Pathiya, Midiya, ka Ilami, ka Mɛsopotemiya, Yudiya, ka Kapadosiya, ka Pɔntɔsi, mɛnɛ ka Esiya, 10ka Firaikiya, Pamfiliya, ka Iyipiti, mɛnɛ ka kirinkiri hu ka Libiya wuthuriye ka Sairini. Binɔndi ŋaye nde ka Romaŋ, 11biYusu beŋ ndo mɛnɛ bɔnsɔni bahɛna baŋ fooma ba thankɛ sikiyɔkɔ ba niyɔ ka dina wo ka biYusu beŋ woŋ, awa binɔndi ŋaye ka Kiriti mɛnɛ ka Arebiya. Kɛrɛ miŋ fooma miŋ yuye na bindɛ gbonkoy ka thayuni thakɛntuŋ thaŋ ba bɛyiniŋ bamandiŋ ba thanki Masaala niya baŋ. 12Biya beŋ ni ŋakabanɛ e bindɛ thooyo kɔnthɔhili, awa bindɛ bohe thɔnthiŋinuwande, na “Mbɛ saabu ba dɔmɛ wuŋ baŋ wu be niyɔ?” 13Kɛrɛ biya binɔndi bohe thiminuwa balanɛyani beŋ dɛkuiŋ, e bindɛ tɛpa, na “Biya beŋ beŋ baŋ ayilɔy mɛŋ iŋ mampa.” 14Kɛna kɔɔyɛ Pita iŋ baseriŋ bithɔɔkɔ bikɔhi iŋ wunthe bihɛna beŋ, e wundɛ sɛsuwa ba gbonkiya iŋ thampa tha ŋatɛ ka thinthi ka biya beŋ, na “Biyaŋ biYusu mɛnɛ beŋ fooma bendo hɛ ka Yɛrusalɛmi ndo beŋ, poniyaŋ nuŋ kuiha awa yaŋ be bena tepe saabu ba dɔmɛ wuŋ baŋ wu kɔŋ niyɔ. 15Biya beŋ beŋ baŋ yilɔita iŋ mampa nɔŋ na siyuwe beŋ na, baa wakathi wosɔŋ-binaŋ na hintiŋ woŋ baŋ ka sanka baŋ. 16Kɛrɛ wuŋ baŋ niyɔy nɔŋ na tepe nde banabi woŋ Yowɛli na: 17Masaala tepe nde, na ‘Nanaŋ nɛna nɔŋ yaŋ ni ka malɔkɔ mamankɛ maŋ: Yaŋ kɔŋ nɔŋ thiyi Yina wokiyaŋ woŋ ka wɔ yo wɔ. Mpati ndeŋ bibiyɛthɛŋ mɛnɛ biyɛrɛmɛŋ bi kɔŋ nɔŋ ni hunabi ba yaŋ, Masaala kɔŋ nɔŋ toŋine mpati ndeŋ bilamgbeŋ beŋ bɛyiniŋ ka maniyɔ mathɔɔkɔ, awa bakalani ndeŋ beŋ bi kɔŋ nɔŋ kɔɔ mandɛni. 18Hali ka bawaliŋ bikiyaŋ bibiyɛthɛŋ iŋ biyɛrɛmɛŋ ka lɔkɔ babɛina, yaŋ kɔŋ bindɛ thiyi Yina wokiyaŋ woŋ, awa bi kɔŋ ni hunabi ba yaŋ. 19Yaŋ kɔŋ nɔŋ ni bɛyiniŋ bathakaba ka kuthahinɛ koŋ ka thinthi awa mɛnɛ bɛyiniŋ babukuyuwɛ kafaydo ka pothi. Wu kɔŋ nɔŋ niyɔ wasi, buu, mɛnɛ hiti humandiŋ, 20kaŋ woŋ kɔŋ nɔŋ niyɔ huntuma, awa sɛnkɛ woŋ kɔŋ nɔŋ pothoŋ nɔŋ wasi, saanuŋ malɔkɔ mawaŋ mamandiŋ ma ka Mariki woŋ maŋ kɔ saa. 21Awa ka malɔkɔ mabɛina wɔ yo wɔ wo thiyi Mariki woŋ ba maso, wundɛ kɔŋ niya kisi.’ ” 22Pita key ka kɔtɔkɔy ba tɛpa, na “Poniyaŋ kuiha huseri haŋ haŋ baŋ, biyaŋ biIsirɛli! Yisɔs wo ka Nasarɛthi wundɛ ŋindo iŋ Masaala. Awa wuŋ toŋino kendeŋ nagberekethe maŋaye ka bɛyiniŋ bathakaba, mɛnɛ babukuyuwɛ, mɛnɛ lamanthoni ba thanki Masaala niya maŋaye kɛnama. Beŋ, ka yɛthɛ bakendeŋ baŋ gbeeŋ, beŋ kɔthɛŋ wuŋ, baa wuŋ niyɔy dondo ka mateete makendeŋ. 23Saathɛ ba madɛɛnki makɛnama maŋ Masaala thanki nde dɛɛnka ba Yisɔs be dunkuna kendeŋ; awa beŋ ni ba bahakɛŋ niŋ yanta ka kuyeŋ kubariŋande koŋ, e beŋ niya ba wundɛ koro. 24Kɛrɛ Masaala ŋayaŋ niŋ ka tuka haŋ, e niŋ pɛya ka yɛthɛ bakɛnama maŋaye ka nambara ba ka tuka haŋ, bɛy bahɛna kutɛ, tuka haŋ tha niŋ punku kahiteke. 25Dauda tepe ba wundɛ, na ‘Yaŋ kuteŋ Mariki woŋ ka kɔtɔkɔy kiyaŋ lɔkɔiŋ fooma, awa wundɛ kiŋ wothuriye yama, bɛna yaŋ sa payɔ. 26Awa bɛna yaŋ kiŋ iŋ mayehitɔkɔ, awa thampa thakiyaŋ thaŋ tha kiŋ iŋ mayehitɔkɔ. Bɛna yaŋ, hali na yaŋ wɔmɛti wo tuku nɔŋ na yaŋ na, yaŋ kɔŋ dɔŋɔ ka thɛbina thukuma baa yaŋ kiŋ iŋ kukahe thukuma, 27bɛy bahɛna kutɛ, yi sa yama sikiŋ sɔkɔrɔ ka tiyɛ. Yi sa mɛy ba bawali wokɛnda womɛthɛ woŋ ba tuunuwa ka yoma haŋ. 28Yi thanki yama toŋine gboŋɛŋ ba ka sii baŋ; awa bɛna kupɛnkintiyande nda koŋ ku kɔŋ ni ba yaŋ yehitɔkɔ wumandiŋ.’ ” 29Pita key ka kɔtɔkɔy hɛlɛŋ ba tɛpa, na “Mbɛndaŋ beŋ, yɔkɔŋ yaŋ gbonkiye bena nagberekethe ba mbemba ntuŋ wokothiyo woŋ Dauda. Wundɛ tuku nde e mankuwo, awa yoma nama haŋ hu kiŋ iŋ miŋ dondo baŋ ka malɔkɔ mahɛ maŋ. 30Wundɛ kiŋ nde banabi, awa wundɛ kɔthɛŋ nde ba thanki Masaala niŋ niya lahiri: ba dɔma na wundɛ kɔŋ ni ba wunthe ka bɔnsɔŋ ba ka Dauda baŋ niyɔ gbaku nɔŋ na nde nthɔŋ Dauda na. 31Dauda kute nde ba nɔŋ Masaala si ni, wuna wundɛ gbonkoy ba ŋayi hu ka tuka hu ka Banikisi wo niyo nde miŋ lahiri woŋ ba dɔma na Masaala sa sikiŋ niŋ sɔkɔrɔ ka tiyɛ, awa kɔtɔ nama koŋ sa tuunu ka yoma haŋ. 32Masaala ŋayaŋ Yisɔs wobɛina gbeeŋ ka tuka haŋ. Miŋ fooma kute niŋ awa banini maseriŋ bina miŋ. 33Wundɛ thanki nda ŋayino ka yɔnkɔ huthome hu ka Masaala haŋ, awa wundɛ kute Yina wo ka Masaala wo niyo nde miŋ lahiri woŋ maŋaye ka Fandama woŋ, awa ba thanki nda beŋ kuta baŋ awa e beŋ yuyɛ, munkii nama muŋ muna thanki wundɛ mina thiya muŋ. 34Wuŋ ka ba dɔma na Dauda na ŋatɛ ka ariana, kɛrɛ wundɛ Dauda tepe, na ‘Mariki woŋ tepe ka Mariki niŋ woŋ: na Dɔŋɔ dondo ka yɔnkɔ niŋ huthome haŋ, ka madoŋe mayiki maŋ, 35haaŋ yaŋ thanka sisa bihadeni bikɛnda beŋ fooma ka pothi ka ŋathaki nda ŋaŋ.’ 36“Bendo biya bi ka Isirɛli fooma, beŋ kiŋ ba kɔthɔ nagberekethe ba dɔma na Yisɔs woŋ baŋ, wo kore beŋ ka kuyeŋ kubariŋande koŋ woŋ, Masaala ni niŋ Mariki mɛnɛ Banikisi!” 37Naa thanki biya beŋ yuyɛ wuŋ baŋ, thathukuma namɛŋ thaŋ kɛriŋande wumandiŋ awa bindɛ tepe ka Pita mɛnɛ ka baseriŋ bithɔɔkɔ beŋ fooma, na “Mbɛnda ntuŋ beŋ, nama nda miŋ ni?” 38Kɛna tepe Pita kɛnamɛŋ, na “Yɔkɔŋ wɔ yo wɔ ka beŋ sikiyɔkɔy maŋaye ka hakɛŋ nama baŋ awa e wundɛ biyo biye hu ka Masaala haŋ ka keŋ ku ka Yisɔs Kraist koŋ, huna beŋ pɛniya hakɛŋ bakendeŋ baŋ, awa beŋ kɔŋ kutu munkii mu ka Masaala muŋ, muna Yina wokɛnama woŋ. 39Masaala ni nde lahiri kendeŋ mɛnɛ ka mpati bikendeŋ beŋ, awa mɛnɛ ka biya fooma bi wuthokiye beŋ, bindɛ fooma bi thiyi Mariki woŋ, Masaala wokɛntuŋ woŋ, ka yɛthɛ nama.” 40Pita gbanthaŋ gbonkiya nama haŋ iŋ bɛyiniŋ babɔyɛ bahɛna ba bindɛ yela e tɛpa, na “Niyɔkɔŋ kisi ka yɛthɛ ndeŋ maŋaye ka kugbasaŋati ku ba saa ka bi ni wunɛnɔy wuŋ beŋ.” 41Biya bibɔyɛ ka bindɛ ni kulanɛya ka maseri makɛnama maŋ awa bindɛ biyo biye hu ka Masaala haŋ awa mɔlɔŋ ba biya wuluiŋ bitaati bi ndintɔy ka bi niyɛ lanɛya beŋ ka malɔkɔ mabɛina. 42Bindɛ sekithe lɔkɔiŋ bakɛnamɛŋ ba ka thanuwa maŋaye ka baseriŋ bithɔɔkɔ beŋ, e bindɛ sɛkitha kufɛŋ ka mabohinande maŋ, iŋ ka hanande kutoŋ koŋ ka tha banthe, mɛnɛ ka ŋaraminɛ. 43Bɛyiniŋ bathakaba mɛnɛ babukuyuwɛ babɔyɛ thanki niyo maŋaye ka baseriŋ bithɔɔkɔ beŋ, awa wɔ yo wɔ ni kukabanɛ. 44Balanɛyani beŋ fooma key ka kɔtɔkɔy ka mabohinande mɛnɛ kaŋ hanuwande munkiŋ mukɛnamɛŋ fooma. 45Bi kɔŋ nde ni ŋakuyɛkɛŋ ŋa boye bindɛ ŋaŋ gbɔŋ mɛnɛ munkiŋ namɛŋ muŋ, awa e bindɛ kɔ hanuwande kɔbiri wobɛina ka mateete makɛnamɛŋ nɔŋ na makaho ma ka wɔ yo wɔ. 46Malɔkɔ yo malɔkɔ bi kɔŋ pɛnkande ka banka bamandiŋ ba ka Masaala baŋ, e bindɛ kɔ thɔma ka tha banthe maŋaye ka bankɛŋ namɛŋ baŋ, awa bi kɔŋ nde thɔŋ iŋ mayehitɔkɔ mɛnɛ thathukuma thathathinɔkɔy, 47e bindɛ kɔ thunkunuwa Masaala na, e wuŋ bindɛ kɔ yehe ba wuyɔhɔy wu mateete makɛnamɛŋ maŋ wuŋ. Awa timo tima Mariki woŋ kɔŋ ndinti biya bi thankɛ niyo kisi beŋ kɛnamɛŋ.

will be added

X\