Baseriŋ Bithɔɔkɔ beŋ 18

1Naa daŋande wuŋ kɛndɛ, Pɔli pɛyɛŋ ka Athɛnisi e wundɛ kaa ka mɛti ba ka Kɔrinthi. 2Wundɛ penke kɛndɛ woYu wo keŋ nama kuna dɔma Akuwila, wo mpoo ka mɛti ba ka Pɔntɔsi, wo dɔy ŋaye ka kuyɛkɛŋ ku ka Itali iŋ wɔtɔ nama Pirisila, baa gbaku womandiŋ wo dɔma Kulɔdiyɔsi woŋ daŋitande siraŋ ba dɔma na biYusu beŋ fooma bi be fuŋ ka mɛti ba ka Romaŋ baŋ kɛndɛ. Pɔli key ba bindɛ ka kuta. 3Awa wundɛ niyɔy kɛndɛ iŋ bindɛ e wundɛ niya wali iŋ bindɛ ka tha banthe, bɛy bahɛna kutɛ Pɔli wɔ na nde wo kute muthɔma nama maŋaye ka thera thikɛŋ ba thoyo bankɛŋ nɔŋ na nde nthɔŋ biya beŋ beŋ na. 4Wundɛ kɔŋ nde gbonkoy iŋ biya beŋ ka banka bathuŋuyande ba ka biYusu beŋ baŋ ka lɔkɔ yo lɔkɔ bahemuwe baŋ, ba yɔla ti punke wundɛ ba sikinande biYusu beŋ mɛnɛ biya bihɛna bi dɔma biKiriki beŋ. 5Naa see Sailasi mɛnɛ Timothi maŋaye ka Masidoniya, Pɔli dunkunɔkɔy ba niya kɛwandi huseri haŋ, e kɔ tepe biYusu beŋ nagberekethe ba dɔma na Yisɔs na Banikisi woŋ. 6Naa sɔkinɔkɔy niŋ biYusu beŋ e bindɛ gbonkiya bɛyiniŋ banɛnɔy ba wundɛ, wundɛ kɔɔyɛ e bindɛ yela kaŋ konka kuligbi ku ka yaba nama baŋ koŋ ba wu be niyɔ maseri kɛnamɛŋ e tɛpa, na “Mɛnɛ beŋ teeti lanɛya ndeŋ baŋ, bena biyɛ gbɛthɛŋ babɛina. Gbɛthɛŋ babɛina sa niyɔ kiyaŋ hali. Maŋaye nda hɛ yaŋ kɔŋ key ka biya bi ka siyani bahɛna baŋ beŋ.” 7Bɛna wundɛ fuŋ kɛndɛ e wundɛ kaa ba ka niyɔ ka banka ba ka wɔ ka woYu, keŋ nama kuna dɔma Taitiyɔsi Yɔsɔtɔsi, wundɛ wo nde ni Masaala na kubatho woŋ; banka nama baŋ ba kiŋ nde wuthuriye banka bathuŋuyande ba ka biYusu beŋ baŋ. 8Kirisipɔsi woYu woŋ wo nde bayaha ka banka bathuŋuyande babɛina woŋ ni lanɛya ka Mariki woŋ, mɛnɛ kubɔri nama koŋ fooma, awa biya bibɔyɛ ka mɛti ba ka Kɔrinthi bi yuyɛ huseri haŋ beŋ ni lanɛya awa e bindɛ biyo biye hu ka Masaala haŋ. 9Huyɛ banthe Mariki woŋ tɔŋinɔkɔy Pɔli na ka maniyɔ mathɔɔkɔ nɔŋ mandɛ e niŋ tepe ba dɔma, na “Ba payɔ, kaa ka kɔtɔkɔy kaŋ gbonkiya awa ba daanɔkɔ, 10baa yaŋ kɔŋ yina mase. Wɔ yo wɔ sa yina punku ba niya masibo baa biya bibɔyɛ bikiyaŋ bi kiŋ ka mɛti baŋ baŋ.” 11Bɛna Pɔli niyɔy kɛndɛ ba nina hunthe iŋ sɛnkɛni bisɔŋ-wunthe, e kɔ thaninuwa biya beŋ thampa tha ka Masaala thaŋ. 12Naa niyo nde Kaliyo bakɛrɛŋ wo ka kuyɛkɛŋ ku ka Kirisi koŋ iŋ gbaku womandiŋ woŋ ka Romaŋ, biYusu beŋ kɔmande ka tha banthe e bindɛ bɔha Pɔli na, awa e bindɛ niŋ kata ka kaama wo ka mɛti baŋ woŋ. 13Bindɛ tepe, na “Hati lamgba woŋ baŋ kɔŋ yɔli ti punke wundɛ ba sikinande biya beŋ ba niya Masaala na kubatho ka maniyɔ mahɛna ba sɔkinɔkɔ siraŋ baŋ!” 14Pɔli si nthɔŋ ŋayi ba gbonkiya, Kaliyo tepe ka biYusu beŋ ba dɔma, na “Mɛnɛ wu kiŋ nde ba dɔma na sɔkɔ huna hu ba mathonko, maa banɛnɔy ba thankɛ niyo baŋ, wu kɔŋ nde niyɔ wuyɔhɔy ba yaŋ bena niya muyuŋ bendo biYusu beŋ beŋ. 15Kɛrɛ na niyɔy wuŋ ba dɔma na gbakila huna beŋ gbakali ba magbonkoyni mɛnɛ ba ŋakeni iŋ siraŋ ndeŋ baŋ, beŋ gbeeŋ, ka yɛthɛ bakendeŋ, beŋ kiŋ ba huŋ dɛɛnkiyɔkɔ. Yaŋ sa niyɔ bakɔnsɔŋɔŋ ba bɛyiniŋ baŋ baŋ!” 16Kɛna kanthe wundɛ bindɛ ka kaama woŋ. 17Bindɛ fooma bohe Sosɛthɛnisi na, wo bayaha wo ka banka bathuŋuyande baŋ woŋ e bindɛ niŋ gbuduŋa ka kɔtɔkɔy ka kaama woŋ. Kɛrɛ Kaliyo tha huŋ bohi sɛmbɛ hali. 18Pɔli niyɔy iŋ mbɛndama bi ka kulanɛya koŋ beŋ ba mandɛni mabɔyɛ. Kɛna pɛyɛŋ ndɛ bindɛ e thuhande iŋ Pirisila mɛnɛ Akuwila ba kaa ka kuyɛkɛŋ ku ka Siriya. Wundɛ tha niye thuhuyande maŋaye ka mɛti ba ka Sɛnkiya, wundɛ ni ba wundɛ gborino ba tɔŋina ba wundɛ niya Masaala na lahiri. 19Bindɛ biyande ka mɛti ba ka Ɛfɛsɔsi, ka key Pɔli pɛyi Pirisila na mɛnɛ Akuwila. Wundɛ key ka banka bathuŋuyande ba ka biYusu beŋ baŋ e wundɛ ka gbakila iŋ bindɛ kɛndɛ. 20Biya beŋ thɔnthɔŋɔŋ niŋ ba wundɛ be niyɔ iŋ bindɛ ba wunambɛ, kɛrɛ wundɛ tha kutu hɛɛra. 21Naa bathɔy wundɛ ba kaa, wundɛ tepe bindɛ ba dɔma, na “Mɛnɛ Masaala mɛy, yaŋ kɔŋ hɛlɛŋ see kendeŋ do.” Awa wundɛ thɔɔyɛ ka gbe ba nde pɛyɛŋ ka Ɛfɛsɔsi. 22Naa biyande wundɛ ka Sɛsariya, wundɛ key ka Yɛrusalɛmi e ka maana makɔmande ma ka bi niyɛ lanɛya beŋ ka Mariki woŋ, awa e wundɛ kaa ka Antiyɔkɔ. 23Naa wundɛ kɛndɛ ba malɔkɔ mathurɔy, wundɛ fuŋ kɛndɛ e kaa ka ŋakuyɛkɛŋ ŋa ka Kaletiya mɛnɛ ka Firaikiya kaŋ kahina balanɛyani beŋ thathukuma. 24Ka lɔkɔ babɛina woYu wunthe wo dɔma na Apɔlɔsi, wo mpoo nde ka mɛti ba ka Alɛsandiya, see ka Ɛfɛsɔsi. Wɔ na nde wo thɔyi gbonkiya awa e wundɛ niyɔ wo kɔthɛ-kɔthɛ magbali ma ka Masaala maŋ. 25Wɔ na nde wo thankɛ thaninuwo ba Gboŋa ba ka Mariki woŋ baŋ, awa wundɛ kiŋ nde iŋ kele humandiŋ mɛnɛ sɛmbɛ ba niya kɛwandi mɛnɛ ba thaninuwa wuyɔhɔy bɛyiniŋ ba ka Yisɔs baŋ. Hali na niyɔy nde wuŋ na wundɛ kɔthɛŋ hɔkɔŋ ba biye hu ka Yɔni haŋ nagbɛti. 26Wundɛ sɛsi ba gbonkiya ka banka bathuŋuyande ba ka biYusu beŋ baŋ iŋ thunka humandiŋ. Naa yuye niŋ Pirisila mɛnɛ Akuwila, bindɛ diŋe niŋ ka banka namɛŋ ka e bindɛ niŋ ka methine wuyɔhɔy ba Gboŋa ba ka Masaala baŋ. 27Apɔlɔsi dɛɛnki ba kaa ka kuyɛkɛŋ ku ka Kirisi, bɛna balanɛyani beŋ ka Ɛfɛsɔsi mase niŋ maŋaye ka gbala kuthagba ka balanɛyani beŋ ka Kirisi, ba bindɛ tepe ba bindɛ ka yɛrɔkɔ Apɔlɔsi na. Naa biyande wundɛ, wundɛ key niyɔ kɛndɛ bamase womandiŋ ka biya bi niyɛ lanɛya Yisɔs na beŋ baa Masaala thanki bindɛ kutiyɛ nkinikiniŋ. 28Punka nama gbonkiya haŋ ni ba wundɛ punka biYusu beŋ ka biya, maŋaye ka methine bindɛ magbali ma ka Masaala maŋ nagberekethe ba dɔma na Yisɔs na Banikisi woŋ.

will be added

X\