Baseriŋ Bithɔɔkɔ beŋ 16

1Pɔli key ka Dabi mɛnɛ ka Lisitira. Kɛna penke wundɛ kɛndɛ bakarandeŋ wunthe wo dɔma Timothi. Nandama woŋ hɛlɛŋ wo niyɛ lanɛya awa woYu na wundɛ. Kɛrɛ fandama woŋ woKiriki na wundɛ. 2Mbɛnda bi ka Timothi bi ka kulanɛya koŋ beŋ fooma ka Lisitira mɛnɛ ka Ikoniɔmi gbonkoy wuyɔhɔy ba Timothi. 3Pɔli thimoŋ nde ba diŋa Timothi na ka kaa, wuna biyɛ wundɛ nde niŋ thiya ka bintɔni nama. Wundɛ ni wuŋ bɛyi bahɛna kutɛ biYusu beŋ fooma bi nde kɛndɛ beŋ kɔthɛŋ ba dɔma na fanda ka Timothi woŋ woKiriki na wundɛ. Awa Timothi tha nde thiya ka bintɔni nama nɔŋ na nde biYusu beŋ thiyo na. 4Naa bindɛ dankande mɛtiŋ baŋ, bindɛ key kaŋ pɛya sirani ba thankɛ denko baŋ iŋ baseriŋ bithɔɔkɔ beŋ mɛnɛ bakalani bibayahɛŋ beŋ ka Yɛrusalɛmi. Awa e bindɛ tepe bindɛ ba putiyɔ sirani babɛina. 5Wuna biyɛ makɔmandeŋ ma ka balanɛyani beŋ maŋ fooma yama niya lanɛya ka Mariki woŋ, awa biya beŋ nɛnɛ andintɔ timo tima. 6Bindɛ kaande ka ŋakuyɛkɛŋ ŋa ka Firaikiya mɛnɛ ka Kaletiya, baa Yina wo ka Masaala woŋ tha mɛyi ba bindɛ niya kɛwandi huseri haŋ ka kuyɛkɛŋ ku ka Esiya koŋ. 7Naa tɛŋ bindɛ ka magbansi ma ka kuyɛkɛŋ ku ka Maisiya koŋ maŋ, bindɛ yole ba kaa ka kuyɛkɛŋ ku ka Bithiniya koŋ, kɛrɛ Yina wo ka Yisɔs woŋ tha mɛyi ba bindɛ kɛndɛ kaa. 8Huna bindɛ kɛriŋande ka Maisiya e bindɛ thatha ka mɛti ba ka Torowasi baŋ. 9Ka huyɛ babɛina Pɔli kute ka maniyɔ mathɔɔkɔ nɔŋ mandɛ wɔ ka kuyɛkɛŋ ku ka Masidoniya kooye si niŋ theteke, na “Yaandi, thuhande ka Masidoniya do ba mina si mase!” 10Ka wuthurɔy wu kute Pɔli bɛyi baŋ baŋ, miŋ kɔsinɔkɔy ba kaa ka Masidoniya, bɛyi bahɛna kutɛ miŋ kutɔkɔy ba dɔma na Masaala thanki mina thiya ba niya kɛwandi Huseri Huyɔhɔy haŋ ka biya beŋ beŋ kɛndɛ. 11Miŋ thɔɔyɛ ka gbe bamandiŋ baŋ maŋaye ka mɛti ba ka Torowasi e miŋ thuhande ka thiki hu ka Samotharesi haŋ. Ka gbɛɛŋ wo yemɛ woŋ, miŋ key ka mɛti ba ka Niapɔlisi. 12Maŋaye kɛndɛ miŋ kɔɔyɛ ba thithɛ ba kaa ka Filipay, ka mɛti bamandiŋ bamayoŋ baŋ ka kufɛŋ kubɛina ka kuyɛkɛŋ ku ka Masidoniya, ba nde hɛlɛŋ kɛriŋiya iŋ biRomaŋ beŋ. Miŋ niyɔ kɛndɛ ba mandɛni makɔndande. 13Ka Malɔkɔ Mahemuwe maŋ, miŋ ŋaye ka mɛti ka. Miŋ key ka mankɔ maŋ kuwaŋ, ka siyuwe nde miŋ ba dɔma na kɛna biYusu beŋ kɔmiyande ba niye kuraminɛ. Miŋ dɔŋɔy kɛndɛ e miŋ gbonkitiyande yɛrɛmɛŋ bi kɔmande nde kɛndɛ beŋ. 14Wunthe wo yuyɛ mina woŋ ka mateete makɛnamɛŋ ndɛ na dɔma Lidiya wo ŋaye ka mɛti ba ka Thaiataira, wɔ na nde wo ni gbɔŋ thikɛŋ bapothinɔi ba kahɛ mɔlɔŋ. Wɔ yɛrɛmɛ na nde wo ni Masaala na kubatho, awa Mariki woŋ mase niŋ ba pona kuiha wuyɔhɔy ka ba nde Pɔli tɛpi baŋ. 15Naa thanki wundɛ biyo biye hu ka Masaala haŋ iŋ biya bi nde ka banka nama baŋ beŋ fooma, wundɛ tepe mina, na “Saaŋ, awa e beŋ si niyɔ ka banka bakiyaŋ baŋ mɛnɛ beŋ kɔthɛ ba yaŋ niya lanɛya hunɔndi ka Mariki woŋ.” Awa wundɛ punke mina ba kaa ka banka nama baŋ ka. 16Lɔkɔ banthe, naa nde miŋ key ka tha ka ka niye kuraminɛ ka, miŋ pɛnkande iŋ hati bɛthɔ wunthe wo nde ka huwaayinɛ. Wundɛ kiŋ nde wo boho iŋ wayi wonɛnɔy wo ni ba wundɛ punka tɛpa bɛyiniŋ ba see ka niyɔ. Wundɛ kɔŋ nde kutu kɔbiri womandiŋ ba bi biyɛ niŋ beŋ maŋaye ka bɛyiniŋ ba see ka niyɔ ba wundɛ tɛpi baŋ. 17Wundɛ yeme Pɔli na mɛnɛ miŋ kaŋ thiya masɔnkɔ ba dɔma, na “Biya beŋ beŋ baŋ bi kiŋ bawaliŋ bi ka Masaala wo ka thinthi-ka thinthi woŋ nthɔŋ nda fooma! Bi kɔŋ bena tepe nɔŋ na beŋ niyiye kisi!” 18Wundɛ ni wuŋ baŋ ba mandɛni mabɔyɛ, yɔkɔŋ na see nda wuŋ thoŋ Pɔli na. Huna sikiyeke Pɔli mahɛŋ e wundɛ tɛpa ka wayi wonɛnɔy woŋ baŋ, na “Ka keŋ ku ka Yisɔs Kraist koŋ, yaŋ ni yina yamari ba yi fuŋa ka hati bɛthɔ woŋ baŋ!” Ka thagbɛmgbɛŋ thabɛina wayi wonɛnɔy woŋ fuŋ ka hati bɛthɔ woŋ baŋ. 19Naa see wuŋ bi biyɛ hati bɛthɔ woŋ baŋ beŋ kɔthɔ ba dɔma na hɛɛra ba bindɛ kute kɔbiri woŋ baŋ teetuwo, bindɛ bohe Pɔli na mɛnɛ Sailasi e bindɛ bindɛ bɔɔlande ka gbanthaŋ haŋ, awa e bindɛ ntiŋ bindɛ kɔ kata ka bayahɛŋ beŋ. 20Bindɛ sisi bindɛ ka bayahɛŋ bi ka biRomaŋ beŋ e bindɛ tɛpa kɛnamɛŋ, na “Biya beŋ beŋ baŋ biYusu bina, awa bi kɔŋ ni ba mɛti baŋ niyɔ yagba wumandiŋ. 21Bi kɔŋ thanani mathananini ma sɔkinɔkɔ sirani ntuŋ baŋ. Miŋ, miŋ kiŋ biRomaŋ awa miŋ sa yɛrɔkɔ mathanani maŋ maŋ baŋ, maa ba niya ba bindɛ tɛpi baŋ.” 22Awa sɛthɛ baŋ fooma thɔɔtɔy nda ma sɔkinɔkɔ Pɔli na mɛnɛ Sailasi. Bɛna bayahɛŋ beŋ thɔɔyɛ ka mathoŋ e bindɛ ŋututa Pɔli na mɛnɛ Sailasi yabɛŋ namɛŋ baŋ e bindɛ niya yamari ba Pɔli iŋ Sailasi gbadiŋo. 23Naa thanki bindɛ gbadiŋo wumandiŋ-mandiŋ, bindɛ thiyo ka yeeli woŋ, awa bayaha wo ka yeeli woŋ niyo yamari ba lɔŋita bindɛ kaake wuyɔhɔy. 24Naa thanki wundɛ niyo yamari, wundɛ biiti bindɛ ka yeeli woŋ kaake e wundɛ ka lɔŋa ŋathaki namɛŋ ŋaŋ gbɔlɔŋ. 25Naa tɛŋ wuŋ huyɛ teete, Pɔli mɛnɛ Sailasi bi kɔŋ nde ni kuraminɛ e bindɛ kɔ sɔnkita Masaala na, awa biloŋo nde kɛndɛ bihɛna beŋ bi kɔŋ nde bindɛ poniyɛ kuiha. 26Ka wuthurɔy wubɛina, kuyɛkɛŋ koŋ thɛŋɛŋ wumandiŋ-mandiŋ, wuŋ ŋɛŋ yeeli woŋ fooma. Ka thagbɛmgbɛŋ thabɛina thabiyo thaŋ pɛɛthuwɔy fooma ka yeeli woŋ, awa yɔlɔnkɔiŋ baŋ thenkɔy fooma ka biloŋo beŋ e bɛŋ ŋɔta. 27Naa thɔhɔy bayaha wo ka yeeli woŋ e wundɛ kuta ba dɔma na thabiyo thaŋ fooma ka yeeli woŋ thanki pɛɛthuwɔ, wundɛ siyi ba dɔma na biloŋo beŋ thanki kita fooma, huna wundɛ sekithe silanhi nama baŋ e wundɛ bathɔ ba kɔrɔkɔ. 28Kɛrɛ Pɔli yele thampa ba dɔma, na “Ba niyɔkɔ masibo! Miŋ kiŋ dondo baŋ fooma.” 29Kɛna thiyi bayaha woŋ baŋ ba mumɔɔli mu be sisa, awa wundɛ thara kaake kaŋ thɛna e wundɛ ka ŋɔta ka ŋathaki ŋa ka Pɔli ŋaŋ mɛnɛ Sailasi. 30Wundɛ fuŋutu bindɛ ka gbada awa e thɔnthiŋina bindɛ ba dɔma, na “Biyaŋ beŋ, nama yaŋ ni na yaŋ niyiye kisi?” 31Bindɛ mɛyiyɛ niŋ ba dɔma, na “Niya lanɛya ka Mariki woŋ Yisɔs, awa yi kɔŋ niyɔ kisi mɛnɛ kubɔri nda koŋ fooma.” 32Kɛna ni bindɛ kɛwandi thampa tha ka Mariki woŋ thaŋ kɛnama mɛnɛ ka bindɛ fooma bi nde ka banka nama ka beŋ. 33Ka thagbɛmgbɛŋ thabɛina, bayaha wo ka yeeli woŋ looki mathimɔiŋ ma ka Pɔli maŋ mɛnɛ Sailasi. Awa bayaha woŋ mɛnɛ kubɔri nama koŋ fooma bindɛ biyo biye hu ka Masaala haŋ kɔɔ hanthe. 34Kɛna diŋe wundɛ Pɔli na iŋ Sailasi ka banka nama ka e wundɛ bindɛ ka nkaa muthɔma. Wundɛ iŋ kubɔri nama koŋ fooma yehitɔkɔy wumandiŋ bɛyi bahɛna kutɛ wundɛ thanki niya lanɛya ka Masaala. 35Naa puthɔy kaŋ woŋ, bayahɛŋ bi ka biRomaŋ beŋ ŋindi baseriŋ iŋ yamari woŋ baŋ, na “Niyaŋ ba biya beŋ beŋ baŋ kaa.” 36Awa bayaha wo ka yeeli woŋ tepe Pɔli na huseri haŋ ba dɔma, na “Bayahɛŋ beŋ ni yamari ba beŋ peyeno. Huna kaaŋ iŋ mathɛbɛ.” 37Kɛrɛ Pɔli tepe ka baseriŋ beŋ, na “Bindɛ tha mina kututu mathonko yo mathonko, kɛrɛ bindɛ gbuduŋe mina ka gbanthaŋ haŋ awa e bindɛ mina thiya ka yeeli woŋ. Awa miŋ, miŋ kiŋ lasiriŋ bi ka Romaŋ! Kɛrɛ ka tete bindɛ thimoŋ ba mina mɔitɔkɔ. Miŋ sa mɛyi hali. Bayahɛŋ beŋ bi saaiŋ mina fuŋutiyɔkɔ.” 38Baseriŋ beŋ key tɔŋ kuna koŋ koŋ baŋ ka bayahɛŋ beŋ, awa naa yuye bindɛ ba dɔma na Pɔli mɛnɛ Sailasi na lasiriŋ bi ka Romaŋ bina, bindɛ thooyo payɔ. 39Bɛna bindɛ key e bindɛ ka theteke Pɔli na iŋ Sailasi, e fuŋuta bindɛ ka yeeli woŋ, awa bindɛ thɔnthɔŋɔŋ Pɔli na iŋ Sailasi ba fuŋa ka mɛti baŋ. 40Pɔli iŋ Sailasi pɛyɛŋ yeeli woŋ e bindɛ kaa ka banka ba ka Lidiya ka. Kɛna penke bindɛ mbɛndamɛŋ bi ka kulanɛya koŋ beŋ e bindɛ bindɛ niya kuthɔnthɔ ka magbonkoy, awa e bindɛ kɔ kaa.

will be added

X\