3 Yɔni 1

1Maŋaye ka bakalaŋ woŋ. Yama gbali kuthagba koŋ koŋ ka Keiyusi wo thimo yaŋ woŋ mathimo maseŋa maŋ. 2Wɛndaŋ wo thimo yaŋ woŋ, yaŋ ni kuraminɛ haliko wuyɔhɔi wu be niyɔ iŋ yi, e yi niyɔ iŋ kɔtɔ kupethɔi. Yaŋ kɔthɛŋ ba dɔma na yindo pethɔi na ka yina. 3Yaŋ yehitɔkɔi nde wumandiŋ naa see mbɛnda ntuŋ binɔndi beŋ, e bindɛ mina si tepe na yehe yi niyo lanɛya ka bohitɔkɔ nɔndi baŋ, nɔŋ na bare nɔŋ yi bɛŋ bohe na. 4Ntha kihɛna kutɛ niyɛ ba yaŋ yehitɔkɔ nɔŋ ba yuyɛ ba dɔma na mpati bikiyaŋ beŋ bi yemeŋ gboŋa baseŋa baŋ. 5Wɛndaŋ woŋ, yi ayɔhɔ niyo lanɛya ka wali bakɛnda ba yi ni ba mbɛnda biKristɛni beŋ, hali na niyɔi wuŋ na yi kɔthɛta bindɛ. 6Bindɛ tepe mina dondo baŋ ka mathuŋande ntuŋ maŋ ba mathimo makɛnda maŋ. Yaandi, mase bindɛ ba kaa ka kɔtɔkɔi iŋ biyasi namɛŋ haŋ naa yehe wuŋ Masaala na. 7Ba bindɛ kei biyasi namɛŋ haŋ ba ka niya wali ba ka Masaala baŋ, awa bindɛ tha yɛrɔkɔ ntha o ntha maŋaye ka biya bi be ni lanɛya beŋ. 8Awa mindo Kristɛni beŋ, miŋ kiŋ ba mase biya beŋ beŋ baŋ, haliko miŋ be ni kufɛŋ kukɛntuŋ ka wali namɛŋ ba gboŋa baseŋa baŋ. 9Yaŋ gbale nde kuthagba kuthurɔi ka mathuŋande nda maŋ, kɛrɛ Dayaturɔfisi, wo thimo ba niyɔkɔ bayaha woŋ, wundɛ tha yama poniyɛ kuiha. 10Huna, naa yaŋ see, yaŋ kɔŋ si gbonkoi ba bɛyiniŋ fooma ba thanki wundɛ niya baŋ. Wundɛ kɔŋ kei kaŋ tɛpa bɛyiniŋ banɛnɔi e ndɛ kɔ kaa kaŋ kɛrinkiyɛ mina hothi. Kɛrɛ wuŋ kutɛ thankɛ hɔkɔŋ ba wundɛ; ndɛ yereketa mbɛnda ntuŋ biKristɛni beŋ naa bindɛ see. Wundɛ kɔŋ pindi biya bi thimo ba bindɛ yɛrɔkɔ beŋ, e ndɛ kɔ yɔla ba bindɛ funkuta ka mathuŋande nda maŋ. 11Wɛndaŋ wo thimo yaŋ, ba yemitɔ bɛyiniŋ banɛnɔi, kɛrɛ yemitɔ bɛyiniŋ bayɔhɔi. Wɔ o wɔ wo ni bɛyi bayɔhɔi, ndɛ na kɔthɛ Masaala na; kɛrɛ wo ni bɛyi banɛnɔi, wɔ bɛina kutiyeketa hɛ Masaala na. 12Biya beŋ fooma bi kɔŋ gbonkoi wuyɔhɔi ba Dɛmitirɔsi; nɔndi baŋ gbeeŋ bɛŋ gbonkoi wuyɔhɔi ba wundɛ. Awa miŋ hɛlɛŋ miŋ gbonkoi wuyɔhɔi ba wundɛ. Yi kɔthɛŋ magbonkoi makɛntuŋ maŋ, ma kiŋ maseŋa. 13Yaŋ kiŋ iŋ bɛyiniŋ babɔyɛ ba yina tepe, kɛrɛ yaŋ sa thimo ba wuŋ niya ka kuthagba. 14Ba yaŋ tuteŋ thukuma ba yina kuta ka wuthurɔi wuŋ baŋ. Miŋ be gbonkoi bɛŋ ka tha banthe. 15Haliko mathɛbɛ ma niyɔ iŋ yi. Binyathikiŋ nda beŋ fooma maaŋ yina, awa maaniyɛ yama binyathikiŋ bikiyaŋ beŋ fooma.

will be added

X\