2 Timothi 4

1Ka kupɛnkintiyande ku ka Masaala iŋ Kraist Yisɔs, wo si kɔnsɔŋɔŋ bipethɔy beŋ mɛnɛ bitukɛ beŋ, saathɛ ba ka tɔŋinɔkɔ hukɛnama haŋ iŋ Hugbakine nama haŋ, yaŋ gbakite yina 2ba yi be ni huseri haŋ kɛwandi lɔkɔiŋ fooma. Wu niyɔiŋ nthɔŋ ka lɔkɔ bayɔhɔy maa ka lɔkɔ banɛnɔy, niya kɛwandi. Tepe bindɛ banɛnɔy namɛŋ baŋ e yi bindɛ pinda, awa e yi bindɛ niya kuthɔnthɔ nɔŋ na yi thanani bindɛ iŋ muyuŋ. 3Malɔkɔ maŋ mɛ kɔŋ see ma sa nda biyamɛti poniye kuiha mathanani mayɔhɔy maŋ. Kɛrɛ bi kɔŋ yeŋ ŋafiyoiŋ ŋakɛnamɛŋ ŋaŋ. Awa bi kɔŋ key kaŋ sɛkitha karimɔkɔiŋ bi bindɛ tepe ba thimo bindɛ ba yuyɛ. 4Bi kɔŋ sikiŋ sɔkɔrɔ mathanani manɔndi maŋ, awa e bindɛ poniyɛ kuiha thabɔrɔiŋ tha yeheni wɔmɛti thahothi. 5Kɛrɛ yi, yɔkɔŋ yi be punku ba kɛriŋiyɛ yɛthɛ bakɛnda baŋ ka gboŋɛŋ fooma. Thunkuteke nambarɛŋ baŋ. Niya wali ba ka kukɛwandi ku ka Huseri Huyɔhɔy haŋ. Niya fooma waliŋ ba dunkuno yi baŋ nɔŋ bawali wo ka Masaala. 6Mɛnɛ ba yaŋ, malɔkɔ maŋ tɛŋ ma sii niŋ baŋ dunkuno nɔŋ munkii ka Masaala. Malɔkɔ maŋ tɛŋ ma yaŋ pene maŋ. 7Yaŋ dekiyɔkɔy wukahɛ; yaŋ thankaŋ kugbakande koŋ; yaŋ bohitɔkɔy lanɛya baŋ. 8Ka tete nda, yando dɛŋiyɔy nda nɛmu wo ka mathumbɛ wo yama Mariki, wo bakɔnsɔŋɔŋ wothumbɛ woŋ, ba dunkune ka malɔkɔ mabɛina, ba punka hupunke yaŋ kugbankande koŋ haŋ. Wuŋ ka hɔkɔŋ yaŋ wuntheŋ nde, kɛrɛ ka bindɛ fooma bi niŋ yumbu iŋ mathimo ba tɔŋinɔkɔ hukɛnama haŋ. 9Yɔla ba saa kiyaŋ do yako. 10Demasi yeme ka faywoŋ. Ndɛ fuŋ ka yɔnkɔ niŋ. Ndɛ key ka Thɛsalonaika. Kɛrɛsɛnsi key ka Kaletiya. Awa Taitɔsi key ka Dalamɛsa. 11Yɔkɔŋ Luku nagbɛti, wundɛ na iŋ yaŋ dondo. Naa yi kɔ see, diŋa Maki na ka saa, baa wundɛ kɔŋ yama punku mase ka wali baŋ. 12Yaŋ ŋindi Taikikɔsi na ka Ɛfɛsɔsi. 13Naa yi kɔ see, diŋiyɛ yama yaba niŋ ba ka haka haŋ baŋ ba peye yaŋ Kapɔsi na baŋ ka Torowasi. Diŋiyɛ hɛlɛŋ yama bukuiŋ niŋ beŋ, yameŋ ntiŋ bɛy bi kahɛ mɔlɔŋ beŋ bi yehinuwo ka ŋathagba ŋatakɛŋ ŋaŋ beŋ. 14Alɛsanda wo bakurɛ woŋ yole yama niya thɔrɔ, kɛrɛ Mariki woŋ kɔŋ niŋ thunkuŋ ba ba thanki ndɛ niya baŋ. 15Tute thukuma yo, ba niŋ pitɔkɔ baa wɔ na wo thambo huseri ntuŋ haŋ. 16Wɔ yo ka wo kooye yama mahɛŋ ka lɔkɔ bamayoŋ ba kɔɔyɛ yaŋ ka kɔtɔkɔy ka bakɔnsɔŋɔni beŋ ba gbonkiya ba yɛthɛ bakiyaŋ. Bindɛ fooma baŋinɔkɔy yama. Haliko Masaala pɛniyɛ bindɛ wuŋ. 17Kɛrɛ ka bɛyiniŋ baŋ baŋ fooma, Mariki woŋ niyɔi iŋ yaŋ, awa wundɛ dunkune yama sɛmbɛ ba yaŋ punku koyiŋe Huseri Huyɔhɔy haŋ fooma, ba haliko biya beŋ beŋ bi ka siyani bahɛna baŋ beŋ bi be yuyɛ. Awa e wundɛ hɛlɛŋ yama niya kisi e yaŋ thana thonkino ba koro. 18Awa Mariki woŋ kɔŋ yama ni kisi ka bɛyiniŋ banɛnɔy fooma haaŋ e yaŋ nɔŋ tɛŋa ka Hugbakine hukɛnama haŋ ka ariana. Miŋ dunkuneŋ niŋ yiki ba kɔy yo kɔy! Amiina. 19Yaŋ maaŋ Pirisila na mɛnɛ Akuwila, mɛnɛ mpoo ki ka Onisifɔrɔsi kiŋ. 20Irasatɔsi pɛyɛ ka Kɔrinthi, awa yaŋ pɛy Torofimɔsi na ka Mailitɔsi baa wundɛ pethɔita kɔtɔ. 21Yɔla ba yama pɛnka saanuŋ thamɔ baŋ ba thɔɔ. Yubiyulɔsi, Pudɛnsi, Lainɔsi, mɛnɛ Kulɔdiya maaŋ yina iŋ mbɛnda ntuŋ beŋ fooma ka Mariki woŋ. 22Haliko Mariki woŋ niyɔiŋ iŋ yina nda woŋ. Haliko makutiyɛ ma ka Masaala maŋ ma niyɔiŋ iŋ beŋ fooma.

will be added

X\