2 Timothi 3

1Tute thukuma ba wuŋ niyɔ na ka malɔkɔ mamankɛ maŋ nambarɛŋ ba kɔŋ nɔŋ niyɔ. 2Biya bi kɔŋ nɔŋ thimo yɛthɛ namɛŋ baŋ, bi kɔŋ niyɔ bithɔnkɔy, iŋ bagbuŋunɔkɔiŋ, mɛnɛ bi gbonkoy wubukuyuwɛ. Bi kɔŋ nɔŋ niyɔ binɛnɔy thahothi, bi kɔŋ nɔŋ niyɔ bi baŋinɛ yamari ka biya namɛŋ, bi kɔŋ nɔŋ niyɔ dankathɔini, mɛnɛ ba thana niyɔ ba Masaala. 3Bindɛ sa nɔŋ niyɔ iŋ mathimo ba biya bihɛna. Bindɛ sa nɔŋ niyɔ iŋ nkinikiniŋ ka thathukuma namɛŋ. Bi kɔŋ gbonkoy wunɛnɔy ba ntɔni namɛŋ. Bi kɔŋ nɔŋ niyɔ bakalabantheni, e bindɛ kɔ gbuduŋa biya biyɔhɔy beŋ. Bi kɔŋ nɔŋ thambo bayɔhɔy. 4Bindɛ sa nɔŋ niyɔ bi yɔhɔy niyo lanɛya ka bintɔni namɛŋ. Bi kɔŋ ni bɛy banɔndi mahɛŋ ma bindɛ sa niye siyuwe. Bi kɔŋ piriŋita iŋ masiyi ma ba yɛthɛ namɛŋ. Bi kɔŋ thimo ba thiŋina mathimo namɛŋ maŋ haaŋ bindɛ sa nda thimo Masaala na. 5Bi kɔŋ niyɔkɔ nɔŋ bi bɔhɛ dina wokɛntuŋ woŋ, kɛrɛ mahɛŋ mabɛina bi buuhuwɛ sɛmbɛ babɛina. Gbɔnɔkɔ biya beŋ beŋ mahɛŋ. 6Binɔndi ka bindɛ bi kɔŋ biyande bankɛŋ ba ka biyɛŋ ba kaa kaŋ tɛpa bɛyiniŋ ba thɔkina yɛrɛmɛŋ bi ba siyi ba niya bɛy bawaŋ beŋ, bi kutɔkɔ mathonko ba hakɛŋ namɛŋ baŋ, awa e bindɛ kɔ katitoko iŋ ŋafiyoiŋ ŋahakuwande. 7Yɛrɛmɛŋ bina bi thimo ba thanuwa lɔkɔiŋ fooma, kɛrɛ bindɛ sa punku ba kɔthɔ nɔndi baŋ. 8Nɔŋ na sɔkinɔkɔy nde nthɔŋ Yanesi iŋ Yambaresi Musa na, nɛna sɔkinɔkɔy biya beŋ beŋ nɔndi baŋ. Masimɔkɔ ma ka biya beŋ beŋ kaayeta ka kɔtɔkɔy, awa lanɛya bakɛnamɛŋ baŋ kaayeta ka kɔtɔkɔy. 9Bindɛ kaayeta ka kɔtɔkɔy baa wɔ yo wɔ kɔŋ kutu thɔkɔ hukɛnamɛŋ haŋ. Nɛna niyɔy nde wuŋ ka lamgbeŋ bibiye bi sɔkinɔkɔy nde Musa na beŋ. 10Kɛrɛ mɛnɛ ba yi, yi thanki nda yema mathanani makiyaŋ maŋ, maniyɔ niŋ maŋ, iŋ sɔbɛ ba iŋ yaŋ ka thukuma baŋ. Yi thanki nda kɔthɔ ti peye lanɛya niŋ baŋ, muyuŋ niŋ baŋ, mathimo niŋ maŋ, iŋ thunkuteke niŋ haŋ, 11nɔŋ na niyo yaŋ thɔrɔ na iŋ biya bihɛna. Yi kɔthɛŋ fooma ba thankɛ yama daŋande baŋ ka Antiyɔkɔ, Ikoniɔmi, mɛnɛ ka Lisitira, nɔŋ na niyo yaŋ thɔrɔ na kɛndɛ saathɛ ba mathumbɛ. Kɛrɛ Mariki woŋ ni yama kisi ka thɔrɔiŋ baŋ baŋ fooma. 12Wɔ yo wɔ wo thimo ba niyɔ wɔ ka Masaala ba haliko na ndɛ niye iŋ mabɔhande iŋ Kraist Yisɔs, yɔkɔŋ ndɛ be kutu thɔrɔ ŋaye ka biya bi ka faido beŋ. 13Biya binɛnɔy iŋ biya bi niyɔkɔ na ka bindɛ, bi kɔŋ key ka kɔtɔkɔy kaŋ nɛnɔ. Bi kɔŋ thɔkɔŋ biya, awa bindɛ hɛlɛŋ bi kɔŋ thɔkina iŋ biya bihɛna. 14Kɛrɛ mɛnɛ ba yi, kaa ka kɔtɔkɔy ka nɔndi ba thaninuwo yi baŋ, awa e yi bɛŋ niya lanɛya. Yi kɔthɛŋ bikarimɔkɔiŋ nda bi thaninuwɛ yina beŋ. 15Siyuwa ba wuŋ niyɔ na there yi kiŋ hatiyɛ e yi kɔthɔ magbali ma ka Masaala maŋ, ma punkɛ ba yina dunkune kele e yi niyɔ kisi, saathɛ ba na ni yi Kraist Yisɔs na lanɛya. 16Masaala na niyɛ ba magbali nama maŋ fooma gbalo. Huna ma kɔŋ thanani nɔndi baŋ. Awa ma kɔŋ hɛlɛŋ tɔŋɔŋ banɛnɔy. Ma kɔŋ tɔŋɔŋ bayɔhɔy ba ba niyo, awa ma kɔŋ dinki wɔmɛti ba niyɔ wɔ thumbɛ. 17Huna wɔ yo wɔ wo niyiyɛ Masaala na wali, wundɛ niyɔiŋ wɔ kosinoko gboŋa yo gboŋa ba niya bɛyiniŋ bayɔhɔy fooma.

will be added

X\