2 Timothi 1

1Yama Pɔli na, baseri wothɔɔkɔ wo ŋindi Kraist Yisɔs woŋ, baa mathimo ma ka Masaala maŋ mɛna. Yaŋ ŋindo ba koyiŋa sii ba niyo lahiri baŋ ka mindo iŋ mabɔhande iŋ Kraist Yisɔs beŋ. 2Yama gbalitɛ yina kuthagba koŋ koŋ, Timothi, baa hatiŋ na nda yi, wo thimo yaŋ. Haliko yi toŋino mathimo iŋ Masaala, Fanda ntuŋ woŋ, iŋ Kraist Yisɔs, Mariki ntuŋ woŋ. Haliko yi kutiyo nkinikiniŋ mɛnɛ mathɛbɛ. 3Yando thiyi Masaala na maamo, wo yaŋ niyiyɛ wali woŋ ka thana kutɔkɔ mathonko ka thukuma hukiyaŋ haŋ nɔŋ na nde mbembɛŋ bikiyaŋ beŋ ni na. Yando hɛlɛŋ niŋ thiyi maamo naa yaŋ kɔ ni kuraminɛ ba yi gbɛɛŋ iŋ piri-piri. 4Yando siyi berina hukɛnda haŋ, awa yaŋ thimoŋ ba yina kuta nda wuna yaŋ niyɔ iŋ mayehitɔkɔ. 5Yando siyi lanɛya bakɛnda baŋ athɔyande iŋ ba ka mɔnda Loisi mɛnɛ nanda Yunisi. Yaŋ simekeŋ ba wuŋ niyɔ na yi kiŋ iŋ lanɛya babanthe babɛina. 6Ba kolo baŋ baŋ huna yaŋ yina simine ba yi be kɔsɔŋ wupethɔy munkii mu dunkune yina Masaala muŋ ka malɔkɔ ma tute yaŋ yina thɛnkɔ niŋ thaŋ. 7Baa Masaala tha mina dunkune Yina wo ni ba miŋ payɔ, kɛrɛ Yina wokɛnama woŋ thiŋiŋ mina iŋ sɛmbɛ mɛnɛ mathimo, awa ndɛ ni ba miŋ punka kɛriŋiyɛ yɛthɛ bakɛntuŋ. 8Huna, ba niyɔ kuyaahu ba niya maseri ba Mariki wokɛntuŋ woŋ. Ba hɛlɛŋ yama niyɔ kuyaahu, yando loŋo woŋ ba saathɛ ba kɛnama. Yɔkɔŋ yi be sɛkɛthi kufɛŋ ba niyɔ thɔrɔ ba Huseri Huyɔhɔy haŋ nɔŋ na thanki Masaala dunkune yina sɛmbɛ ba wuŋ punka niya. 9Ndɛ ni mina kisi e ndɛ hɛlɛŋ mina thiya ba niyɔ bikɛnama. Wuŋ ka ba wali ba thanki miŋ niya baŋ, kɛrɛ ndɛ ni mina kisi maŋaye ka madɛɛnki nama mɛnɛ makutiyɛ nama maŋ. Miŋ kute makutiyɛ nama maŋ saathɛ ba Kraist Yisɔs saanuŋ malɔkɔ ma ka dunia baŋ ba therino. 10Kɛrɛ ka tete kɛna tɔŋinɔkɔy wuŋ nagberekethe kɛntuŋ ka saa hu ka Banikisi wokɛntuŋ woŋ haŋ, Kraist Yisɔs. Ndɛ na see thankaŋ sɛmbɛ ba ka tuka haŋ, e wundɛ tɔŋina sii ba kɔy yo kɔy maŋaye ka Huseri Huyɔhɔy haŋ. 11Masaala tɔŋɔŋ nde yama ba niyɔ baseri wothɔɔkɔ mɛnɛ bathanani ba koyiŋa Huseri Huyɔhɔy haŋ. 12Awa ba kolo baŋ baŋ, huna yaŋ niye nambarɛŋ. Kɛrɛ haaŋ hɛ yaŋ kiŋ iŋ madekinteke mathiŋɛ baa yaŋ kɔthɛŋ wo piteke yaŋ woŋ. Awa yaŋ kɔthɛŋ ba dɔma na ndɛ punkeŋ niya kantha mu dunkune ndɛ yama muŋ haaŋ lɔkɔ bathɔɔkɔ baŋ tɛŋa. 13Bohitɔkɔ wukahɛ thampɛŋ thanɔndi tha thanki yaŋ yina thaninuwa thaŋ. Wuŋ, wu kɔŋ niyɔ mathɔyande ma yi yeŋ. Awa niyɔ ka lanɛya iŋ mathimo ma iŋ miŋ maŋ ka Kraist Yisɔs. 14Maŋaye ka sɛmbɛ ba ka Yina wo ka Masaala wo mina kaake woŋ, kɔsina bɛyiniŋ bayɔhɔy fooma ba thanki yi dunkuno ba niya kantha baŋ. 15Yi kɔthɛŋ ba wuŋ niyɔ na biya fooma bi ka kuyɛkɛŋ ku ka Esiya, thiitaŋ Faiyɛlɔsi mɛnɛ Hɛmakɛnɛsi, baŋinɔkɔy yama e bindɛ yama sikina sɔkɔrɔ. 16Haliko Mariki woŋ kutiyɛ mpoo ki ka Onisifɔrɔsi na nkinikiniŋ, baa ndɛ mase yama tima o tima, awa ndɛ tha niyɔ kuyaahu loŋo hukiyaŋ haŋ. 17Kɛrɛ naa ndɛ tɛŋ nthɔŋ ka Romaŋ, ndɛ kɔŋ dethi ba yaŋ haaŋ yɔkɔŋ ndɛ kute yama. 18Haliko Mariki woŋ kutiyɛ niŋ nkinikiniŋ naa lɔkɔ bathɔɔkɔ baŋ tɛŋ. Yi gbeeŋ, yi kɔthɛŋ ba thanki ndɛ niya ba yaŋ ka Ɛfɛsɔsi.

will be added

X\