2 biThɛsalonaika 3

1Mbɛnda ntuŋ, saanuŋ yaŋ be kɔ see ka gbanthina, yaandi bena niyiyaŋ mina kuraminɛ, ba haliko huseri hu ka Mariki woŋ haŋ hu be gbanthande yako-yako awa e huŋ yeroko ka yiki, nɔŋ na yɛrɔkɔy nde beŋ huŋ na. 2Niyaŋ hɛlɛŋ kuraminɛ ba haliko Masaala be mina ni thanka ka banɛnɔy mɛnɛ ka biya binɛnɔy, baa biya fooma kutɛ niyɛ huseri haŋ lanɛya. 3Kɛrɛ Mariki woŋ ayɔhɔ niyo lanɛya, awa ndɛ kɔŋ ni ba beŋ kɔɔ wukahɛ e bena pama ka Wɔ Wonɛnɔy woŋ. 4Awa Mariki woŋ ni ba miŋ bena kahe thukuma, awa miŋ ani lanɛya ba wuŋ niyɔ na beŋ kɔŋ key ka kɔtɔkɔy ba niya ba tepe miŋ bena baŋ. 5Haliko Mariki woŋ sisa bena ka beŋ kothiye wumandiŋ ti peye Masaala bena thimo, mɛnɛ thunkuteke hu dunkuno beŋ iŋ Kraist haŋ. 6Mbɛnda ntuŋ beŋ, miŋ gbakite bena ka keŋ ku ka Mariki wokɛntuŋ woŋ Yisɔs Kraist, ba beŋ thana thankina sɔkɔ iŋ wɛnda yo wɛnda wo ka ba niya wali, awa mɛnɛ bi tha yeŋ mathanani ma thanani miŋ bena maŋ beŋ. 7Beŋ gbeeŋ ka yɛthɛ bakendeŋ, beŋ kɔthɛŋ wuyɔhɔy ba dɔma na beŋ kiŋ ba niya na ni miŋ na. Miŋ ka nde biya bimayɛini naa nde miŋ iŋ beŋ. 8Miŋ tha nde bohi muthɔma ka wɔ yo wɔ mahɛŋ ma miŋ tha muŋ thunkuniyɛ. Miŋ yole nde wukahɛ ka yɛthɛ bakɛntuŋ ba niya wali wukahɛ. Miŋ ni nde wali gbɛɛŋ iŋ piri-piri ba haliko doni bakɛntuŋ ba be tha bena dimbe. 9Wuŋ ka ba dɔma na miŋ ka nde iŋ mayoho ba beŋ mina thɛriyɛ, kɛrɛ miŋ ni nde wali ba haliko ba bena peye mathɔyande ma beŋ yemitɔ. 10Naa nde miŋ iŋ beŋ, miŋ bareŋ nde bena kɔ tepe ba dɔma, na “Wɔ o wɔ wo baŋinɛ ba niya wali, wɔ bɛina bɛiŋ thɔŋ.” 11Babiyɛ miŋ tɛpa huŋ, miŋ yuye ba dɔma na biya bi kiŋ mateete makendeŋ bimayɛini, bi be ni bɛyi o bɛyi yɔkɔŋ ba hunahiki. 12Ka keŋ ku ka Mariki woŋ Yisɔs Kraist, miŋ gbakite biya beŋ beŋ iŋ kaŋ yela bindɛ ba bi be niyɔ nɔŋ na sisande bindɛ ba niiye ka siini bakɛnamɛŋ baŋ, awa bi niyɛŋ wali ba haliko bi be kutu mu bindɛ thɔŋ. 13Kɛrɛ beŋ, bendo mbɛnda ntuŋ beŋ, baŋ thamɔ ba niya bayɔhɔy. 14Thampo wɔ kɔŋ niyɔ ka beŋ wo sa yɛrɔkɔ huseri hu toŋite miŋ bena ka kuthagba koŋ koŋ haŋ. Mɛnɛ wuŋ niye nɛŋ, dɛŋaŋ wɔ bɛina thɛnkɛi, awa e beŋ thankina ba wundɛ, wuna ndɛ niyɔ kuyaahu. 15Kɛrɛ baŋ niŋ diŋe nɔŋ hadeŋ wokendeŋ, kɛrɛ yelaŋ niŋ nɔŋ wɛnda ndeŋ. 16Haliko Mariki woŋ ndɛ gbeeŋ, wo ka there mathɛbɛ woŋ, dunkune bena mathɛbɛ lɔkɔiŋ fooma, iŋ gboŋɛŋ fooma. Haliko Mariki woŋ niyɔ iŋ beŋ fooma. 17Yaŋ gbeeŋ yama gbaliyɔkɔ ŋamaaŋ ŋaŋ ŋaŋ iŋ yɔnkɔ hukiyaŋ haŋ. Kuthagba yo kuthagba ku yaŋ gbali, nɛna yaŋ kɔ thankine kuŋ nanaŋ ba haliko wu be kothiyo ba dɔma na kiyaŋ ŋaye na kuŋ, baa nɛna yaŋ kɔ gbale. 18Haliko mathimo ma ka Mariki wokɛntuŋ woŋ Yisɔs Kraist ma niyɔ iŋ beŋ fooma.

will be added

X\