2 Yɔni 1

1Maŋaye ka bakalaŋ woŋ. Yama gbali kuthagba koŋ koŋ ka mɔɔŋ wo yetho iŋ Masaala woŋ, mɛnɛ mpati bikɛnama beŋ fooma, bi thimo yaŋ huseŋa beŋ. Awa yaŋ wuntheŋ kutɛ thimo hɔkɔŋ bena ye, kɛrɛ fooma bi kɔthɛ nɔndi baŋ beŋ bindɛ athimo hɛlɛŋ bena, 2baa nɔndi baŋ ba kiŋ iŋ miŋ awa ba kɔŋ niyɔ iŋ miŋ ba kɔi o kɔi. 3Haliko Masaala Fanda ntuŋ woŋ, mɛnɛ Yisɔs Kraist, Hati ka Masaala woŋ thimo mina, kutiyɛ mina nkinikiniŋ, e dunkune mina thɛbina thukuma. Haliko miŋ niyɔ biya bi kɔthɛ nɔndi baŋ e miŋ thimiyande. 4Wuŋ yehe nde yama wumandiŋ ba na yuye yaŋ ba dɔma na mpati bikendeŋ binɔndi yeme gboŋa baseŋa baŋ, nɔŋ na tepe nde mina Masaala ba miŋ niya na. 5Ka tete yaŋ kɔŋ yina thɔnthɔŋɔŋ ba niya bɛyi banthe. Yaŋ gbaliteta bena siraŋ baŋama, kɛrɛ siraŋ ba yuye nde beŋ there ka masɛsi maŋ. Bɛna baŋ baŋ: miŋ thimiyandeŋ. 6Mathimo maŋ mɛna maŋ maŋ baŋ: miŋ kiŋ ba putiyɔ sirani ba ka Masaala baŋ. Awa siraŋ ba yuye nde beŋ fooma baŋ there ka masɛsi maŋ bɛna ba beŋ yema gboŋa ba ka mathimiyande maŋ baŋ. 7Biya bibɔyɛ bi thɔkɔŋ biya pinthi ka fai woŋ. Bindɛ bina biya bi sa dɔŋ beŋ na Yisɔs Kraist see ka faido nɔŋ wɔmɛti. Wɔ nɔŋ woŋ baŋ bathiiki biya thɔkɔ na, awa Hadeŋ wo ka Kraist na. 8Awa tuteŋ thukuma haliko beŋ be tha piriŋiŋ wu thanki beŋ niyiyɛ wali wuŋ, wuna beŋ kutu kuthunkuŋ kuthiŋɛ. 9Wɔ o wɔ wo tha kahati ka mathanani ma ka Kraist maŋ, kɛrɛ ndɛ ndinta ka mɛŋ, wɔ bɛina ka iŋ Masaala. Wɔ o wɔ wo kahitɛ ka mathanani ma ka Kraist maŋ, ndɛ kiŋ iŋ Masaala mɛnɛ Hati nama woŋ. 10Mɛnɛ wɔ o wɔ kei kendeŋ ka, ndɛ tha bena katiyɛ mathanani ma ka Kraist maŋ, baŋ niŋ yɛrɔkɔ ka bankɛŋ bakendeŋ baŋ, awa baŋ hintiŋ nthɔŋ niŋ maaŋ. 11Ba wɔ o wɔ wo niŋ maaŋ, wɔ bɛina mase niŋ ka niya banɛnɔi baŋ. 12Hali na niyɔi wuŋ na yaŋ kiŋ iŋ bɛyiniŋ babɔyɛ ba bena tepe, yaŋ sa thimo ba wuŋ niya ka kuthagba, baa yaŋ tuteŋ thukuma ba bena kaa ka maana, haliko miŋ be ka gbonkoi ka tha banthe. Ka malɔkɔ mabɛina miŋ kɔŋ niyɔ iŋ mayehitɔkɔ mathankinuwɛ. 13Mpati bi ka wɛnda woyɛrɛmɛ woŋ, wo yetho nde iŋ Masaala woŋ, maaŋ yina.

will be added

X\