2 biKɔrinthi beŋ 9

1Yaŋ kahota nda hɛlɛŋ ba bena gbalita kuthagba ba kumase ku ba toŋito ka biya bi ka Masaala beŋ ka kuyɛkɛŋ ku ka Yudiya. 2Yaŋ kɔthɛŋ ba dɔma na lɔkɔiŋ fooma bendo thimo ba mase bina beŋ, awa yaŋ gbuŋunɔkɔi ba beŋ ka biya bi ka kuyɛkɛŋ ku ka Masidoniya. Yaŋ tepe bena, “Mbɛnda ntuŋ beŋ ka Kirisi, bindɛ kɔsinɔkɔi ba mase there manheŋ.” Kufiyo ndeŋ kumandiŋ koŋ ŋɛnɛti bibɔyɛ ka bindɛ. 3Kɛrɛ yaŋ kɔŋ ŋindi mbɛnda ntuŋ beŋ beŋ, wuna sa gbuŋunɔkɔ ntuŋ haŋ ba beŋ ka bɛyi baŋ baŋ niyɔ thampɛŋ thamayɛini. Kɛrɛ nɔŋ na thanki nthɔŋ tete yaŋ tɛpa na, beŋ kɔŋ kɔsinɔkɔ munkii ndeŋ muŋ. 4Mɛnɛ biya binɔndi bi ŋaye ka Masidoniya beŋ see iŋ yaŋ e bindɛ si kuta ba dɔma na beŋ kosineketa hɛ munkii muŋ, wu kɔŋ mina niyɔ kuyaahu baa bena dekinteke nɔŋ miŋ wukahɛ, awa beŋ hɛlɛŋ nɛŋ wu kɔŋ bena niyɔ kuyaahu. 5Huna yaŋ siyi ba dɔma na wu kɔŋ yɔhɔ ba gbakita mbɛnda ntuŋ beŋ beŋ ba yama kɔtiyɔkɔ kendeŋ ka ba kɔsinɔkɔ munkii mu ni beŋ lahiri ba dunkuna muŋ saanuŋ yaŋ kɔ tɛŋa. Wuna yaŋ muŋ pɛnki mukosinoko naa yaŋ tɛŋ, awa wu kɔŋ tɔŋɔŋ ba dɔma na beŋ nkee baa beŋ thimoŋ ba wuŋ niya, wuŋ ka ba dɔma na pithito na beŋ ba wuŋ niya. 6Siyuwaŋ ba dɔma na wɔ wo payi paka bathahuwɔi woŋ, wundɛ na niyɔ iŋ ŋɔna huthahuwɔi; wɔ wo payi paka babɔyɛ woŋ; wundɛ na niyɔ iŋ ŋɔna hubɔyɛ. 7Woma o woma dunkunɛŋ nɔŋ na tutunuwande ndɛ ka thukuma nama haŋ na, wuŋ ka ka panka na niya maa ba pithito ba bɛŋ niya; Masaala thimoŋ wɔ dunkuŋ ka yɔhɔ thukuma. 8Awa Masaala punkeŋ ba bena dunkune wuyamɛ ba mu panke beŋ muŋ wuna beŋ niyɔ iŋ mu panke beŋ muŋ lɔkɔiŋ fooma ba yɛthɛ bakendeŋ awa beŋ kɔŋ niyɔ iŋ mu beŋ pɛɛtɔ ba dunkune biya bihɛna. 9Nɔŋ na tepe magbali ma ka Masaala maŋ na, na “Wundɛ paye munkii nama muŋ ka bamɔnɛŋ beŋ; bayɔhɔi nama baŋ ba kɔŋ nambi ba kɔi o kɔi.” 10Awa Masaala, wo dunkuŋ paka baŋ ka bapayi woŋ mɛnɛ muthɔma muŋ ba thomo, wundɛ kɔŋ bena dunkune paka fooma ba panke beŋ baŋ awa wundɛ kɔŋ ni ba bɛŋ muka e bɛŋ sisa ŋɔna hubɔyɛ ŋaye ka bayɔhɔi ndeŋ baŋ. 11Lɔkɔiŋ fooma wundɛ kɔŋ ni ba beŋ niyɔ dinhaŋiŋ bi tɛŋɛ ba dunkuna iŋ thukuma huyɔhɔi tima o tima. Wuna nɔŋ biya bibɔyɛ thiyi Masaala na maamo ba munkii mukendeŋ mu kute bindɛ muŋ ŋaye ka thɛnkɔ ntuŋ thaŋ. 12Wali ba ni beŋ baŋ baŋ tha hɔkɔŋ niyɔ ba panka hu ka biya bi ka Masaala beŋ huthɔ, kɛrɛ huŋ sisi hɛlɛŋ nɛŋ kuthiyi maamo kumandiŋ ka Masaala. 13Awa saathɛ ba na tɔŋɔŋ wali bakendeŋ baŋ na beŋ, biya bibɔyɛ bi kɔŋ thiyi Masaala na yiki saathɛ ba dunkunɔkɔ ndeŋ haŋ ka Huseri Huyɔhɔi hu ka Kraist haŋ, hu beŋ gbonkiyiyɛ haŋ, iŋ saathɛ ba na dunkuŋ beŋ iŋ thathukuma thayɔhɔi ka bindɛ mɛnɛ ka wɔ o wɔ wohɛna. 14Awa ka ŋaraminɛ ŋa bindɛ ni ba beŋ ŋaŋ, thathukuma namɛŋ thaŋ tha kɔŋ kei kendeŋ, saathɛ ba munkii mumandiŋ mu ka thimo mu dunkuŋ Masaala kendeŋ muŋ. 15Miŋ thiyɛŋ Masaala na maamo ba munkii mu sa punku boyo muŋ muŋ!

will be added

X\