2 biKɔrinthi beŋ 8

1Bendo mbɛnda ntuŋ, miŋ thimoŋ ba beŋ kɔthɔ ba ni munkii mu ka mathimo mu dunkuŋ Masaala ka makɔmandeŋ ma ka biya nama beŋ ka kuyɛkɛŋ ku ka Masidoniya koŋ. 2Bindɛ thanki gberiŋino wumandiŋ ŋaye ka thɔrɔiŋ ba thankɛ bindɛ daŋande baŋ; kɛrɛ yehitɔkɔ hukɛnamɛŋ haŋ abɔyi nde nda wumandiŋ-mandiŋ, wuna biyɛ nde bindɛ dunkuna wubɔyɛ, hali na bindɛ bamɔnɛŋ na. 3Yaŋ kɔŋ bena tepe ba dɔma na bindɛ dunkuŋ ti bindɛ punku ba dunkune e wuŋ yama ba ti nde bindɛ punku ba dunkune te. Ŋaye ka thathukuma namɛŋ thayɔhɔi thaŋ, 4bindɛ theteke mina wumandiŋ haliko bi be dunkuno hɛɛra ba niyɔ iŋ kufɛŋ ba mase biya bi ka Masaala bi ka kuyɛkɛŋ ku ka Yudiya beŋ. 5Bindɛ dunkuŋ wuyamɛ ba ti tute miŋ bindɛ thukuma te! Bindɛ yenke nde dunkuna yɛthɛ namɛŋ baŋ ka Mariki woŋ; naa daŋande wuŋ kɛndɛ, ŋaye ka mathimo ma ka Masaala maŋ, bindɛ dunkuŋ yɛthɛ namɛŋ baŋ kɛntuŋ. 6Huna gbakite miŋ Taitɔsi na, wundɛ wo sɛsuwɛ wali baŋ baŋ woŋ, ndɛ be kei ka kɔtɔkɔi iŋ bɛŋ e bena mase ba thankina wali bathɔɔkɔ ba iŋ mathimo baŋ baŋ. 7Bananhuluiŋ bina beŋ ka mu iŋ beŋ muŋ fooma: ka lanɛya, ka magbonkoi, ka makɔthɔ, ka niyɔ ndeŋ iŋ sɔbɛ ka thathukuma ba mase haŋ, mɛnɛ ka mathimo ma iŋ beŋ maŋ ba miŋ. Huna miŋ thimoŋ ba beŋ dunkuna hɛlɛŋ wubɔyɛ-bɔyɛ ka wali ba iŋ mathimo baŋ baŋ. 8Yamari kutɛ yaŋ bena ni ye, kɛrɛ yaŋ thimoŋ ba gbɛriŋina ba kɔthɔ ti peye mathimo makendeŋ maŋ maŋaye ka thubutande mɛŋ iŋ sɔbɛ ba iŋ biya binɔndi ka thathukuma baŋ ba mase. 9Beŋ kɔthɛŋ makutiyɛ ma ka Mariki ntuŋ woŋ Yisɔs Kraist maŋ, wo hali na nde wundɛ dinhaŋi na, wundɛ niyɔi bamɔnɛ saathɛ ba kendeŋ, huna maŋaye ka mɔnɛ nama baŋ beŋ be niyɔ dinhaŋiŋ. 10Masiyi niŋ maŋ ka bɛyiniŋ baŋ baŋ mɛna maŋ maŋ: wu kɔŋ niyɔ hita ba beŋ thankina te ba sɛsi beŋ manheŋ baŋ. Bena biya bimayoŋ beŋ ka dunkuna haŋ awa wuŋ ka hɔkɔŋ ba wuŋ niya kɛrɛ ba niyɔ kufiyo ba wuŋ niya. 11Ka tete thankinaŋ wali baŋ. Beŋ niyɔi nde kufiyo ba bɛŋ niya ka dɛɛnka ba bɛŋ. Ka gboŋa banthe babɛina thankinaŋ bɛŋ ti beŋ punke. 12Mɛnɛ beŋ kiŋ kufiyo ba dunkuna, Masaala kɔŋ yerɔkɔ munkii mukendeŋ muŋ e wundɛ muŋ thubutande iŋ mu iŋ beŋ ba dunkuna muŋ, wuŋ ka ka mu ka iŋ beŋ ba dunkuna muŋ. 13Yaŋ yoleta ba yɛkidinta binɔndi kaŋ tuta bena doniŋ badimbɔi; kɛrɛ saathɛ ba na beŋ iŋ wubɔyɛ ka lɔkɔ baŋ baŋ, wu kɔŋ sisande ba beŋ mase bipankɛ beŋ. Huna, naa beŋ panke e bindɛ niyɔ iŋ wubɔyɛ, bi kɔŋ nɛnɛ bena mase. Ka gboŋa baŋ baŋ, bendo biye beŋ diŋo nanthe. 15Nɔŋ na tepe nthɔŋ magbali ma ka Masaala maŋ na. Mɛŋ tepe ba dɔma, na “Wo kɔminuwande wubɔyɛ woŋ ka iŋ wudankande, awa wo kɔminande wuthahuwɔi woŋ sa panki.” 16Miŋ thiyi Masaala na maamo, wo niyɛ ba Taitɔsi niyɔ iŋ kufiyo kumandiŋ ba bena mase, nɔŋ na miŋ na! 17Wundɛ tha hɔkɔŋ yɛrɔkɔ hu thɔnthɔŋɔŋ miŋ niŋ haŋ huthɔ ye, kɛrɛ wundɛ niyɔi kufiyo wumandiŋ ba mase haaŋ maŋaye ka thukuma nama haŋ wundɛ tutunuwande ba kaa kendeŋ ka. 18Miŋ kɔŋ niŋ ŋindi iŋ wɛnda ntuŋ wo thiyɔi yiki wumandiŋ woŋ iŋ makɔmandeŋ ma ka biya bi ka Masaala beŋ maŋ fooma ba wali nama ba ka niya kɛwandi Huseri Huyɔhɔi haŋ. 19Awa naa wuŋ ŋaye kɛndɛ, wundɛ yetho nde e toŋino iŋ makɔmandeŋ maŋ ba kaande iŋ miŋ naa miŋ kati ka kɔtɔkɔi wali ba iŋ mathimo baŋ baŋ, wali ba tɔŋɔŋ yiki ba ka Mariki woŋ baŋ, haliko ba tɔŋina ba dɔma na miŋ thimoŋ ba mase. 20Miŋ kɔŋ ni kuthɛgbɛ haliko wɔ be tha mina thara-tharani naa miŋ katiteke munkii muyɔhɔi mu iŋ miŋ muŋ. 21Sɔbɛ bakɛntuŋ baŋ bɛna ba niya bɛyi bathumbɛ, wuŋ ka hɔkɔŋ ka thaaya tha ka Mariki woŋ thaŋ, kɛrɛ hɛlɛŋ nɛŋ ka thaaya tha ka wɔmɛti. 22Huna miŋ ba ŋinde wɛnda ntuŋ woŋ iŋ bindɛ; miŋ gbɛrɛŋɛŋ niŋ lɔkɔiŋ babɔyɛ, awa lɔkɔiŋ fooma miŋ kute niŋ wo kufiyo wumandiŋ ba mase. Awa ka wukɔɔyɛ wuŋ kɛna yame ntiŋ ndɛ bena thimo, awa ndɛ yame ntiŋ niyɔ iŋ kufiyo ba mase. 23Naa yaŋ see ka gbonkiya ba Taitɔsi, ndɛ na kaande iŋ yaŋ e miŋ niya wali ka tha banthe ba bena mase; ba mbɛnda ntuŋ bibintheŋ beŋ nɛnɛ bi kei iŋ wundɛ beŋ, bindɛ bina kooye ba makɔmandeŋ ma ka biya bi ka Masaala beŋ maŋ e bindɛ sisa yiki ka Kraist. 24Toŋineŋ bindɛ ti peye beŋ bindɛ thimo, wuna biya bi ka Masaala beŋ fooma kutiyɔkɔ e bindɛ kɔthɔ ba dɔma na wuŋ asisande miŋ ba gbuŋunɔkɔ ba beŋ.

will be added

X\