2 biKɔrinthi beŋ 7

1Bendo binyathikiŋ ntuŋ bi thimiyande miŋ, mina niyo lahiriŋ baŋ baŋ fooma. Huna miŋ mɛthinɔkɔiŋ natharaŋ ŋaye ka bɛyi o bɛyi ba pothoni ŋakɔtɔ ntuŋ ŋaŋ maa yinɛŋ bikɛntuŋ beŋ, awa miŋ niyɔiŋ biya bi putiyɔ Masaala na ka bɛyiniŋ fooma baa miŋ apayɔ niŋ. 2Deethiyaŋ mina makonko ka thathukuma ndeŋ thaŋ. Miŋ tha nde ni wɔ o wɔ wunɛnɔi; miŋ tha nde teeti wɔ o wɔ, maa ba thiika wɔ o wɔ thɔkɔ. 3Yaŋ tepeta haŋ haŋ baŋ ba bena thonkine yo; nɔŋ na tepe hɛ nthɔŋ yaŋ mayoŋ na, beŋ athimiyande iŋ miŋ wumandiŋ wuna biyɛ miŋ nda niyɔ ka tha banthe iŋ beŋ lɔkɔiŋ fooma, miŋ niyɔiŋ nthɔŋ iŋ sii maa miŋ tuka nthɔŋ. 4Yaŋ akahe bena thukuma wumandiŋ; awa yando nda bukuyinɔkɔ ba beŋ! Haaŋ hɛ yando kahɛ thukuma ka thɔrɔiŋ ntuŋ baŋ fooma; awa yando yehitɔkɔi wumandiŋ-mandiŋ. 5Hali naa tɛŋ miŋ ka kuyɛkɛŋ ku ka Masidoniya, miŋ tha kɛndɛ kutu kuhemuwe hali. Thɔrɔiŋ penke mina kɛndɛ ŋaye kama o kama; biya bihɛna deethi mina kɛndɛ thɛkɛŋ, awa miŋ thooyo nde payɔ wumandiŋ. 6Kɛrɛ Masaala wo thaayi bi teetuwɔ thathukuma beŋ, wundɛ na thaayuwɛ nde mina naa see Taitɔsi. 7Saa hukɛnama haŋ kutɛ yehinɛ mina thathukuma huŋ huthɔ ye, kɛrɛ kuna kuyɔhɔi ku diŋiye hɛlɛŋ ndɛ mina ku tɔŋinɛ na thaayuwe beŋ niŋ na kuna yamɛ mina yehina thathukuma. Wundɛ tepe mina nɔŋ na beŋ iŋ kufiyo kumandiŋ ba nda yama kuta, beŋ kiŋ ka nkinikiniŋ ba yaŋ, awa beŋ kɔsinɔkɔi ba yama gbonkiyiyɛ; awa yaŋ yame ntiŋ yehitɔkɔ wumandiŋ. 8Ba hali na teeti kuthagba ku gbalite yaŋ bena koŋ thathukuma na, wuŋ teetuweta yama thukuma ba na gbale yaŋ kuŋ. Wu kɔŋ nde yama punku niyɔ nkinikiniŋ naa yaŋ kute nde ba beŋ teetuwɔ thathukuma ba wuthurɔi. 9Kɛrɛ ka tete yaŋ yehitɔkɔi wumandiŋ, awa wuŋ ka ba dɔma na ba na ni yaŋ ba beŋ teetuwɔ thathukuma ye, kɛrɛ ba na ni teetuwɔ ndeŋ thathukuma haŋ ba beŋ thikipa gboŋɛŋ ndeŋ baŋ. Wuŋ yehe Masaala na ba teetuwɔ ndeŋ thathukuma haŋ, huna tha miŋ bena niyɛ bɛyi o bɛyi banɛnɔi hali, 10baa teetuwɔ thukuma hu Masaala niye wali haŋ hu kɔŋ sisi kuthikipi ka thukuma hu kati wɔ ka ndɛ niiye kisi—awa wuŋ, wuŋ sa teeti wɔ thukuma hali! Kɛrɛ teetuwɔ thukuma hu ka faido haŋ hu kɔŋ sisiyɛ wɔ tuka. 11Dethaŋ hɛ ba ni Masaala iŋ teetuwɔ ndeŋ thathukuma haŋ: beŋ niyɔi biya bi iŋ sɔbɛ ka thathukuma, beŋ niyɔi kufiyo ba tɔŋina ba beŋ pankɔ bɛyi, beŋ baŋɔi nde bɛyi awa beŋ payɔi nde ba ba thankɛ niyɔ baŋ, beŋ niyɔi nde iŋ makutɔkɔ mamandiŋ, beŋ kɔsinɔkɔi ba yama gbonkiyiyɛ, beŋ kiŋ nde kufiyo ba gbasiŋita biya bi niyɛ nde wunɛnɔi beŋ. Beŋ tɔŋɔŋ yɛthɛ bakendeŋ ba beŋ niyɔ bipankɔi bɛyi ka bɛyiniŋ baŋ baŋ fooma. 12Huna, hali na gbale yaŋ kuthagba kubɛina na, wuŋ ka ba dɔma na ba wo niyɛ wunɛnɔi woŋ bɛna maa wo thankɛ nde nda niya wunɛnɔi woŋ. Yaŋ gbale kuŋ ba bena methine nagberekethe, ka kupɛnkintiyande ku ka Masaala koŋ, ti peye beŋ mina thimo. 13Wuŋ baŋ wuna kahinɛ mina thukuma. Miŋ thaayuwo nde; kɛrɛ ka thinthi ka bɛina Taitɔsi ni ba miŋ yehitɔkɔ wumandiŋ naa tepe wundɛ mina nɔŋ na mase beŋ niŋ fooma na ba wundɛ yɔhɔ thukuma! 14Yaŋ gbuŋunu bena kɛnama, awa beŋ tha yama thɔmɔni kuyaahu. Lɔkɔiŋ fooma miŋ kɔŋ bena tepe nɔndi baŋ, awa ka gboŋa banthe babɛina gbuŋunuwa hu miŋ gbuŋunu bena haŋ ka Taitɔsi niyɔi seŋa. 15Awa thimo hu thimo ndɛ bena haŋ kei ka kɔtɔkɔi wumandiŋ-mandiŋ, nɔŋ na siyi ndɛ na kɔsinɔkɔi beŋ fooma ba putiyɔ mathanani nama maŋ na, nɔŋ na yɛrɔkɔi nde beŋ niŋ kaŋ payɔ iŋ thɛna. 16Yaŋ yehitɔkɔi wumandiŋ baa yaŋ punkeŋ nda bena ŋoye wukunthɛ.

will be added

X\