2 biKɔrinthi beŋ 6

1Ka wali ba miŋ ni ka nanthe baŋ iŋ Masaala, miŋ theteke bendo thankɛ kuta makutiyɛ ma ka Masaala maŋ beŋ haliko beŋ be tha mɛŋ boho gbothontiŋ. 2Yuyɛ hu tepe Masaala haŋ: Wundɛ tepe, na “Naa tɛŋ lɔkɔ baŋ ba bena poniyɛ kuiha, yaŋ yuye bena; naa fuŋande lɔkɔ baŋ ba bena niya kisi, yaŋ mase nde bena.” Awa yaŋ tepe bena, lɔkɔ baŋ bɛna baŋ baŋ ba wɔ ba kute nkinikiniŋ ki ka Masaala kiŋ; lɔkɔ bahɛ baŋ bɛna wɔ ba niyo kisi. 3Miŋ thimota ba wɔ o wɔ bɔha thɛkɛ wali bakɛntuŋ baŋ, huna miŋ yole ba thana dɛŋa ntha ki ni ba wɔ thuŋɔ ka gboŋa ba ka wɔ o wɔ. 4Wuna biyɛ, bɛyi o bɛyi ba miŋ ni miŋ kɔŋ tɔŋɔŋ ba wuŋ niyɔ na bawaliŋ bi ka Masaala bina miŋ ka thunkuteke thɔrɔiŋ, wukahɛ, mɛnɛ nambarɛŋ. 5Miŋ gbuduŋo nde, miŋ thiyo ka yeeli, e miŋ dekiyo; miŋ ni wali wukahɛ-kahɛ haaŋ miŋ hura gbele iŋ kɔnthɔ. 6Ka mɛtha hukɛntuŋ haŋ, ka hakiyando, ka muyuŋ, mɛnɛ ka niya bayɔhɔi, kɛna toŋine miŋ yɛthɛ bakɛntuŋ ba miŋ niyɔ bawaliŋ bi ka Masaala, maŋaye ka Yina wo ka wundɛ Masaala woŋ, ŋaye ka thimo ntuŋ huseŋa haŋ, 7ka huseri ntuŋ huseŋa haŋ, mɛnɛ ŋaye ka sɛmbɛ ba ka Masaala baŋ. Miŋ kiŋ iŋ mathumbɛ nɔŋ mudekiye, mu miŋ sɛkɛthi ba dekiye iŋ ba pamɔkɔ. 8Mindo niya yiki e miŋ hɛlɛŋ kɔ thiminuwo dɛkuiŋ; mindo yaka e miŋ hɛlɛŋ kɔ gbuŋunuwo. Mindo diŋo nɔŋ bahothiŋ bina miŋ, kɛrɛ miŋ kɔ gbonkiya nɔndi baŋ; 9mindo diŋo nɔŋ miŋ kothiyota, kɛrɛ miŋ kothiyoŋ iŋ biya fooma; miŋ kiŋ nɔŋ biya bitukɛ bina miŋ, kɛrɛ miŋ kiŋ iŋ sii, nɔŋ na kute nthɔŋ nda beŋ na. Hali na miŋ gbasiŋita na, miŋ tha kɔra; 10hali na miŋ teetuwa thathukuma na, lɔkɔiŋ fooma mindo yehitɔkɔi; mindo detha nɔŋ bamɔnɛŋ, kɛrɛ miŋ ni biya bibɔyɛ dinhaŋiŋ; mindo detha nɔŋ miŋ ka iŋ ntha, kɛrɛ mina biyɛ ntha o ntha. 11Bendo binyathikiŋ ntuŋ bi thimo miŋ ka mɛti ba ka Kɔrinthi! Miŋ gbonkiye nde bena nagberekethe; awa miŋ deŋiye nde bena thathukuma ntuŋ thaŋ sansɛŋ naya. 12Miŋ kutɛ huthɛ thathukuma ntuŋ thaŋ ba beŋ; bena huthɛ thathukuma ndeŋ thaŋ ba miŋ. 13Ka tete, yaŋ kɔŋ nda bena gbonkiye nɔŋ mpati bikiyaŋ: toŋineŋ mina makutɔkɔ mamanthe ma miŋ kutɔkɔ maŋ ba beŋ. Dɛŋaŋ thathukuma ndeŋ thaŋ sansɛŋ ba miŋ! 14Baŋ yɔli ba niya wali ka tha banthe iŋ wɔ wo be ni Kraist na lanɛya, baa wuŋ sa ŋɛnɔ hali. Nama thumba iŋ sikɔ thankine sɔkɔ? Nama waŋ baŋ iŋ huntuma haŋ niiye ka tha banthe? 15Nama Kraist iŋ Wayi Womandiŋ woŋ Sithani thankine sɔkɔ? Nama wɔ wo niyɛ Kraist na lanɛya niiye hunthe iŋ wɔ wo be ni Kraist na lanɛya? 16Nama banka ba Masaala niyo kubatho baŋ thankine sɔkɔ iŋ banka ba dekɛŋ niyo kubatho baŋ? Mina banka ba Masaala wopethɔi woŋ niyo kubatho baŋ. Nɔŋ na tepe nthɔŋ wundɛ Masaala na, na “Yaŋ kɔŋ ni yikiya bakiyaŋ iŋ biya bikiyaŋ beŋ e yaŋ niyɔ mateete makɛnamɛŋ; Yaŋ kɔŋ niyɔ Masaala wokɛnamɛŋ, awa bi kɔŋ niyɔ biya bikiyaŋ.” 17Huna dome Mariki woŋ, na “Yɔkɔŋ beŋ be bindɛ peneke awa kathiŋɔŋ bindɛ ka kugbaŋ. Baŋ boheke ntha o ntha kipothuwɛ, awa yaŋ kɔŋ bena yɛrɔkɔ. 18Yaŋ kɔŋ niyɔ fanda ndeŋ, awa beŋ kɔŋ niyɔ mpatiŋ bibiyɛthɛŋ mɛnɛ biyɛrɛmɛŋ, Mariki wo nthɔŋ nda ka thinthi woŋ fooma ndɛ na tɛpɛ neŋ.”

will be added

X\