2 biKɔrinthi beŋ 5

1Miŋ kɔthɛŋ ba dɔma na naa lele ntuŋ ba niye miŋ yikiya baŋ thinko, lele ba ŋakɔtɔ ntuŋ ŋaŋ ka faido, Masaala kɔŋ niyɔ iŋ banka ka ariana ka miŋ ka niyɔ. Wundɛ gbeeŋ ka yɛthɛ nama ndɛ na thoyɛ bɛŋ, awa ba kɔŋ niyɔ ba kɔi o kɔi. 2Ka tete mindo daŋitɔkɔ, baa miŋ kiŋ kufiyo wumandiŋ ba miŋ be te nda thɔɔ yikiya ntuŋ baŋ ka ariana. 3Naa miŋ thɔɔyɛ bɛŋ, miŋ sa nda niyɔ bi ka iŋ mupithi. 4Naa hintiŋ miŋ kaake ka lele baŋ baŋ ka faido, mindo daŋitɔkɔ ba na miŋ dimbo doniŋ ba miŋ kati baŋ; wuŋ ka ba dɔma na miŋ kiŋ nda ba thankina ba kɔtɔ ku ka faido koŋ, kɛrɛ miŋ thimoŋ nda te ba thiyo kɔtɔ ku ka ariana koŋ, wuna ŋakɔtɔ ntuŋ ŋa ka faido ŋa tuku ŋaŋ ŋuna iŋ sii. 5Masaala na kɔsinɔkɔi nde mina ba thikipo haŋ haŋ, awa wundɛ dunkune nde mina Yina nama woŋ nɔŋ malɔŋ ma tɔŋɔŋ ba wundɛ kɔ thiŋina lahiriŋ nama baŋ. 6Bɛna lɔkɔiŋ fooma miŋ kiŋ iŋ kaha thukuma. Miŋ kɔthɛŋ ba dɔma na hanimaa miŋ kiŋ ka yikiya ba kɔtɔ koŋ koŋ baŋ, mindo thokiye bina yikiya ba ka Mariki woŋ baŋ. 7Lanɛya bɛna mina katitɔkɔ ka siini ntuŋ baŋ ka faido; bɛyiniŋ ba miŋ kutiyɔkɔ baŋ kutɛ katitɔkɔ mina. 8Miŋ kiŋ iŋ kaha thukuma humandiŋ awa wu kɔŋ nda mina yaŋ niyɔ hita wumandiŋ ba fuŋa ka yikiyani ntuŋ ba kɔtɔ baŋ e miŋ nda niyɔ yikiya banthe iŋ Mariki woŋ. 9Nama o nama na wuŋ niiye, miŋ kiŋ ba niŋ yehina thukuma, miŋ niyɔiŋ ka yikiya ntuŋ baŋ ka faido, maa kɛnama ka ka ariana. 10Ba miŋ fooma miŋ boheŋ ba ka tɔŋinɔkɔ ka kɔtɔkɔi ka Kraist, ba konsiŋino iŋ wundɛ. Wɔ o wɔ kɔŋ kutu wu sisande wundɛ ba kuta, maŋaye ka bɛyi o bɛyi ba thanki ndɛ niya ka kɔtɔ nama koŋ ka faido, ba niyɔiŋ nthɔŋ bayɔhɔi maa banɛnɔi. 11Miŋ kɔthɛŋ mu domo ba payɔ Mariki woŋ, awa miŋ yole ba yoseke biya bihɛna. Kɛrɛ Masaala kɔthɛŋ natharaŋ na miŋ, awa yaŋ niyeŋ lanɛya ba wuŋ niyɔ na kaake ka thathukuma ndeŋ thaŋ nɛna kɔthɛ beŋ mina wuyɔhɔi. 12Miŋ yoleta nda hɛlɛŋ ba tɔŋɔkɔ kuna kendeŋ; kɛrɛ yɔla huna miŋ yɔli ba bena toŋine saabu gbeeŋ ba beŋ bukuyineke mina, wuna beŋ punku niya yaabi bi gbuŋuneke wɔmɛti ka detha niŋ ka makooye nama maŋ, wuŋ ka ka maniyɔ ma ka sii nama baŋ maŋ. 13Mɛnɛ miŋ thooyo thɔkɔ, miŋ thooyo huŋ saathɛ ba Masaala. Mɛnɛ miŋ niyɔi biya bi iŋ masiyi mapethɔi, miŋ niyɔi iŋ mɛŋ saathɛ ba kendeŋ. 14Mindo nda kɛriŋiya iŋ thimo hu ka Kraist haŋ, baa miŋ ŋee ntiŋ ba wuŋ niyɔ na wɔ wunthe tuku nde ba woma o woma, huna mɛnɛ ba nda tɛpa, miŋ fooma thanki tuka. 15Wundɛ tuku nde ba biya fooma, wuna sa nda biya bi be hɛ tuku beŋ niyɔ ba yɛthɛ bakɛnamɛŋ, kɛrɛ ba niyɔ ba wundɛ nagbɛti, wundɛ wo tukɛ woŋ e ndɛ ŋayino ka tuka haŋ ba niyɔ iŋ sii saathɛ ba kɛnamɛŋ. 16Miŋ sa nɔŋ nda kɔnsɔŋɔŋ wɔ o wɔ na biyamɛti konsiŋine na. Hali na niyɔi nde wuŋ na miŋ thanki nde kɔnsiŋina Kraist na na biyamɛti konsiŋine na, miŋ sa nɔŋ nda wuŋ ni hali. 17Naa wɔ o wɔ bɔhande iŋ Kraist, wɔ bɛina niyɔi nda wɔ ŋama; wɔ tiyɔ woŋ daŋande, awa wɔ ŋama woŋ na sɛɛ nda. 18Masaala na ni muŋ muŋ baŋ fooma, wundɛ wo mina thikipi woŋ mindo hadeni nama beŋ ba niyɔ binyathikiŋ nama maŋaye ka Kraist. Wundɛ dunkune mina wali ba ka niya biya bihɛna binyathikiŋ nama hɛlɛŋ nɛŋ. 19Huseri ntuŋ haŋ huna ba dɔma na Masaala kiŋ nde ka niya biyamɛti fooma binyathikiŋ nama maŋaye ka Kraist. Masaala tha nde kɔsɔŋ hakɛŋ namɛŋ baŋ ka thukuma nama haŋ awa wundɛ dunkune mina huseri hu tepe biya na wundɛ niye bindɛ binyathikiŋ nama. 20Huna kooye miŋ dondo ba gbonkiya ba Kraist, nɔŋ wundɛ Masaala na theteke maŋaye kɛntuŋ. Miŋ theteke bena yɔkɔŋ ba Kraist: mɛkinaŋ Masaala be bena thikipi maŋaye ka hadeni ba niyɔ binyathikiŋ nama! 21Kraist kiŋ nde ka faido kɛrɛ wundɛ tha ni hakɛ, kɛrɛ saathɛ ba kɛntuŋ Masaala ni ba ndɛ kɔɔ ka makooye ma ka hakɛŋ bakɛntuŋ baŋ, haliko ka bɔhande ntuŋ haŋ iŋ Kraist, miŋ be niyɔ iŋ kufɛŋ ka mathumbɛ ma ka Masaala maŋ.

will be added

X\