2 biKɔrinthi beŋ 2

1Huna tutunuwande yaŋ masiyi makiyaŋ maŋ ba nda hɛlɛŋ thana kaa kendeŋ ka haliko beŋ be tha teetuwɔ thathukuma. 2Mɛnɛ yaŋ teeti bena thathukuma, nkaana pɛyɔ ba yama yehina thukuma? Yɔkɔŋ bi ni yaŋ ba bindɛ teetuwɔ thathukuma beŋ bindɛ bina wuŋ ni. 3Wuna biyɛ yaŋ kɔŋ nde gbali kuthagba kubɛina kendeŋ. Yaŋ tha nde thimo ba kaa kendeŋ ka ba ka teetuwo thukuma iŋ biya bi ba yama yehina thukuma beŋ. Yaŋ kutɔkɔi ba dɔma na mɛnɛ yaŋ niyɔi iŋ mayehitɔkɔ, beŋ fooma beŋ kɔŋ yehitɔkɔ hɛlɛŋ nɛŋ. 4Yaŋ gbalite bena iŋ thukuma niŋ huteetuwɔi wumandiŋ mɛnɛ ka manɛɛni ka teete; yaŋ tha bena gbalite ba beŋ teetuwɔ thathukuma, kɛrɛ yaŋ gbalite bena ba beŋ kɔthɔ ti peye yaŋ bena thimo fooma. 5Mɛnɛ wɔ o wɔ ni ntɔ nama na bɛyi ba niŋ teeti thukuma, wɔ bɛina tha wuŋ ni kiyaŋ hɔkɔŋ, kɛrɛ ndɛ ni wuŋ wuyete-yete ka beŋ fooma. Yaŋ tepe haŋ haŋ baŋ baa yaŋ thimota ba tindɛ niŋ thonkine. 6Wuŋ atɛŋ ba nde nɔŋ wɔ bɛina woŋ baŋ gbasiŋito ka gboŋa baŋ baŋ iŋ bendo bibɔyɛ. 7Nama o nama, pɛniyaŋ niŋ e beŋ niŋ thaayuwa, haliko wundɛ be tha tindɛ bɔŋ teetuwɔ thukuma. 8Huna, yaŋ theteke bena ba beŋ niya ba wundɛ kɔthɔ ba dɔma na beŋ athimo niŋ wumandiŋ. 9Yaŋ gbalite nde bena kuthagba kubɛina baa yaŋ thimoŋ nde ba kɔthɔ na kooye beŋ iŋ kugbɛrɛŋɛŋ koŋ mɛnɛ bendo kɔsinɔkɔi bina beŋ ba putiyɔ mathanani niŋ maŋ. 10Naa beŋ pɛniyɛ wɔ ba bɛyi ba thanki ndɛ niya baŋ, yaŋ hɛlɛŋ nɛŋ yaŋ kɔŋ niŋ pɛniyɛ. Mɛnɛ yaŋ pɛniyɛ nde wɔ, yaŋ ni nde wuŋ ka kupɛnkintiyande ku ka Kraist koŋ saathɛ ba kendeŋ, 11haliko ba pinda Sithani na be tha mina kɛriŋiyɛ, baa miŋ kɔthɛŋ madɛɛnki nama maŋ. 12Naa tɛŋ yaŋ ka mɛti ba ka Torowasi baŋ ba niya kɛwandi Huseri Huyɔhɔi haŋ ba Kraist, yaŋ kute ba dɔma na Mariki woŋ pɛthiyɛ yama gboŋa ba niya wali baŋ kɛndɛ. 13Kɛrɛ thukuma niŋ haŋ hu kiŋ nde ka kuyaagba wumandiŋ, baa yaŋ tha punku kutiyɔkɔ wɛnda ntuŋ Taitɔsi na. Huna sankine yaŋ biya beŋ kɛndɛ e yaŋ kaa ka kuyɛkɛŋ ku ka Masidoniya. 14Yaŋ thiyi Masaala na maamo! Maŋaye ka yɔnkɔ hu ka Kraist, lɔkɔiŋ fooma wundɛ kɔŋ mina katitɔkɔ biyukɔi thɛnkɔ nɔŋ biya bi punkɔi iŋ wundɛ. Masaala niye mina wali haliko kothiyo hu ka Kraist haŋ hu be gbanthande kama o kama nɔŋ huruthimɔi. 15Ba miŋ athɔyande iŋ gbomgbo bathimɔi huru ba Kraist fuŋuŋ saraka ka Masaala, ba gbanthande huru ka mateete ma ka bi ba niyo kisi beŋ mɛnɛ bi ba piriŋa beŋ. 16Ba bi ba piriŋa beŋ, mina huru tukɛ hu kɔri haŋ; kɛrɛ ka bi ba niyo kisi beŋ, mina nɛnɛ huruthimɔi hu sisi sii. Nkaana punku niya bɛyiniŋ baŋ baŋ? 17Miŋ thɔyandeta iŋ biya binɔndi bibɔyɛ, bi kutɛ huseri hu ka Masaala haŋ beŋ nɔŋ ntha ki ba niyo gbɔŋ kina; kɛrɛ ba na ŋindi mina Masaala, miŋ gbonkoi maŋaye ka thathukuma thakɛntuŋ thaŋ ka kupɛnkintiyande nama koŋ, nɔŋ bawaliŋ bi ka Kraist.

will be added

X\