2 biKɔrinthi beŋ 13

1Haŋ haŋ baŋ huna tɛŋinɛ dɔŋɔ kataati yaŋ ba bena kaa ka yekiyɔkɔ. Siyuwaŋ hu tepe magbali ma ka Masaala maŋ haŋ. Magbali mabɛina tepe, na “Kufuŋutu o kufuŋutu ku niyɔiŋ iŋ maseriŋ maye maa mataati.” 2Yaŋ thimoŋ ba gbonkiya ka bendo thankɛ niya hakɛ ka malɔkɔ ma thankɛ daŋande maŋ beŋ, mɛnɛ ka bibintheŋ beŋ fooma; yaŋ tepe nde huŋ saanuŋ kaa niŋ ka yekiyɔkɔ bena hukaye haŋ, kɛrɛ yaŋ kɔŋ hɛlɛŋ huŋ duu ka tɛpa na thɔkiyande yaŋ iŋ beŋ na: lɔkɔ ba yaŋ kei kɛndɛ, wɔ yo sa niyɔ wo buthurɔ kugbasaŋati. 3Beŋ kɔŋ kutu fooma mu tɔŋinɛ ba dɔma muŋ na Kraist na gbonkoi maŋaye kiyaŋ. Wundɛ ka wɔ kɔɔyuwɛ naa ndɛ kɔ bena gbasaŋati; kɛrɛ ndɛ kiŋ iŋ sɛmbɛ ka thinthi kendeŋ. 4Hali na niyɔi nde wuŋ na ka kɔɔyuwa kɛna koro wundɛ ka kuyeŋ kubariŋande koŋ, kɛrɛ sɛmbɛ ba ka Masaala baŋ bɛna niyɛ hɛlɛŋ ba ndɛ niyɔ iŋ sii. Maŋaye ka bɔhande ntuŋ haŋ iŋ Kraist miŋ niyɔi hɛlɛŋ nɛŋ bikɔɔyuwɛ; kɛrɛ ka na miŋ bena diŋe na, miŋ iŋ Kraist, miŋ kɔŋ niyɔ iŋ kufɛŋ ka sɛmbɛ ba ka Masaala baŋ. 5Gbɛriŋinaŋ hɛ yɛthɛ bakendeŋ e beŋ kɔnsiŋinɔkɔ, ba kɔthɔ mɛnɛ beŋ kiŋ thuŋ ka niya Kraist na lanɛya haŋ. Yaathi beŋ kɔthɛŋ ba dɔma na Kraist Yisɔs kiŋ kaake ka siini ndeŋ baŋ—yɔkɔŋ ba wuŋ pɛnka ba dɔma na beŋ tha punku gberiŋino haŋ. 6Yaŋ piteke ba wuŋ niyɔ na beŋ kɔŋ nɔŋ kɔthɔ ba dɔma na miŋ thanki punka gberiŋino haŋ. 7Miŋ ni kuraminɛ ka Masaala haliko beŋ be tha ni bɛyi basikɔi, wuŋ ka ba tɔŋina ba biya bi be kutu ba wuŋ niyɔ na miŋ punke kɔɔ wukahɛ-kahɛ ka kugbɛrɛŋɛŋ koŋ, kɛrɛ haliko beŋ be ni bɛyi bathumbɛ, hali na miŋ kuta na nɔŋ biya bi tha punku gberiŋino haŋ bina miŋ. 8Miŋ sa punku niya bɛyi ma sɔkinɔkɔ nɔndi baŋ, kɛrɛ miŋ kɔŋ ni bɛyi banɔndi baŋ. 9Miŋ yehitɔkɔi wumandiŋ ba na miŋ bikɔɔyuwɛ kɛrɛ beŋ niyɔ bikahuwɛ. Huna miŋ niye kuraminɛ haliko beŋ be niyɔ bithankinuwɛ. 10Wuna biyɛ yaŋ kɔŋ gbali haŋ haŋ baŋ naa hintiŋ yaŋ wothɔkiyande iŋ beŋ na; haliko ba naa yaŋ tɛŋ kɛndɛ, yaŋ be tha bena thooye ka mathoŋ wumandiŋ-mandiŋ naa yaŋ niye wali mayoho ma dunkune yama Mariki woŋ maŋ ba bena kahitina ka lanɛya baŋ, wuŋ ka ba bena teetuwa. 11Mbɛndaŋ beŋ, naa nda yaŋ see ka gbanthina, nyiŋaŋ. Yɔlaŋ ba niyɔ bithankinuwɛ; poniyaŋ kuiha hu yaŋ bena theteke haŋ; bohinandeŋ; dɔŋɔŋ wuthɛbinɛ thukuma. Awa Masaala wo iŋ mathimo woŋ mɛnɛ mathɛbɛ, wundɛ kɔŋ niyɔ iŋ beŋ. 12Maanandeŋ iŋ maanande hu ka huwɛndiya. Biya bi ka Masaala beŋ fooma maaŋ bena. 13Makutiyɛ ma ka Mariki woŋ Yisɔs Kraist maŋ, mɛnɛ mathimo ma ka Masaala maŋ, mɛnɛ bohinande hu ka biya bi ka Masaala beŋ haŋ, mu niyɔiŋ iŋ beŋ fooma.

will be added

X\