2 biKɔrinthi beŋ 11

1Yaŋ thimoŋ ba beŋ yama niya muyuŋ iŋ thɔkɔ niŋ huyete haŋ. Yaandi bena, niyaŋ yama muyuŋ! 2Yaŋ kiŋ iŋ hunaŋ ba beŋ, nɔŋ na nthɔŋ Masaala iŋ hunaŋ ba beŋ na; beŋ athɔyande iŋ hati bɛthɔ womɛthɛ wohatha wo thanki yaŋ niya lahiri ba yento iŋ wathe wunthe napethi, ndɛ Kraist gbeeŋ, ka yɛthɛ nama ndɛ na wowathe woŋ. 3Yaŋ payɔi thampo beŋ kɔŋ thiika thɔkɔ e beŋ baŋinɔkɔ dunkunɔkɔ ndeŋ fooma humɛthɛ haŋ ka Kraist. Ka gboŋa banthe babɛina bɛna thiiko nde Mbemba Mahawa thɔkɔ iŋ wokɛkɛŋ woŋ ka thakeleŋ nama thahothi thaŋ. 4Tima o tima bendo yehitɔkɔ wumandiŋ ba yɛrɔkɔ wɔ o wɔ wo see kendeŋ e ndɛ si niya kɛwandi huseri huhakande ba Yisɔs, wuŋ ka hu ni nde miŋ kɛwandi kendeŋ haŋ; awa beŋ yɛrɔkɔi yina wohɛna mɛnɛ huseri huhakande wumandiŋ iŋ Yina wo ka Masaala mɛnɛ Huseri Huyɔhɔi hu kute beŋ ŋaye kɛntuŋ haŋ! 5Yaŋ siyuweta ba dɔma na yama yamɛ niyɔ ka pothi ba bi dɔmɔkɔ beŋ na “baseriŋ bithɔɔkɔ” bina bi sisɛ huseri kendeŋ beŋ. 6Thampo yaŋ kɔŋ ni thana dinkɔ ka gbonkiya, kɛrɛ wuŋ ka nɛŋ ka kɔthɔ hukiyaŋ haŋ; lɔkɔiŋ fooma mɛnɛ ka maniyɔiŋ fooma mindo nde bena huŋ toŋine nagberekethe. 7Yaŋ tha nde bena lɔpi mɔlɔŋ ba yama dunkune ntha naa ni nde yaŋ Huseri Huyɔhɔi hu ka Masaala haŋ kɛwandi kendeŋ; yaŋ thathaŋ nde yɛthɛ bakiyaŋ ka pothi haliko ba bena niya biya biwaŋ. E yaŋ ni nde wunɛnɔi ba nɛŋ niya? 8Naa nde yaŋ ni wali ka mateete makendeŋ, makɔmandeŋ mahɛna ma ka biya bi ka Masaala mɛna nde yama thunkuŋ. Wuŋ thɔyande ba dɔma na tuuta na nde yaŋ bindɛ tuutu haliko ba bena mase. 9Awa ka lɔkɔ ba nde yaŋ iŋ beŋ baŋ, yaŋ tha nde bena thɔnthɔŋɔŋ ba yama mase naa nde yaŋ wo thimo kɔbiri; mbɛnda ntuŋ bi sɛɛ nde beŋ ŋaye ka kuyɛkɛŋ ku ka Masidoniya beŋ diŋiye yama ntha o ntha ki thimo yaŋ. Nɔŋ na nthɔŋ ka malɔkɔiŋ ma thankɛ daŋande maŋ na, nɛna wuŋ niyɔ ka masee maŋ! Yaŋ sa niyɔ doni kendeŋ! 10Ŋaye ka nɔndi ba ka Kraist ba yama kaake baŋ, yaŋ ni lahiri ba gbuŋunɔkɔ hukiyaŋ haŋ hu be tha niyɔ nayeŋ kama o kama ka kuyɛkɛŋ ku ka Kirisi koŋ. 11E yaŋ kɔŋ nde wuŋ ni mɛnɛ yaŋ thimota bena? Masaala kɔthɛŋ ba yaŋ bena thimo! 12Yaŋ kɔŋ kei ka kɔtɔkɔi ba niya ba yaŋ ni ka tete baŋ haliko na sa bi dɔmɔkɔ beŋ na “baseriŋ bithɔɔkɔ” bina bindɛ niiye iŋ saabu ba bindɛ gbuŋuneke e bindɛ dɔma na bindɛ niye wali ka gboŋa banthe ba niye miŋ wali baŋ. 13Biya beŋ beŋ baŋ ka baseriŋ bithɔɔkɔ biseŋa. Baseriŋ bithɔɔkɔ bibahothiŋ bina bindɛ, bi kɛrɛŋ hothi ba wali bakɛnamɛŋ baŋ e bindɛ niyɔkɔ nɔŋ baseriŋ bithɔɔkɔ biseŋa bi ka Kraist bina bindɛ. 14Wuŋ ka mina kuthɛrɛnaŋ! Ba hali Sithani ndɛ niyɔkɔi ka yɛthɛ nama nɔŋ maleka wo ka waŋ baŋ na wundɛ! 15Huna, wuŋ ka bɛyi bamandiŋ mɛnɛ bawaliŋ nama beŋ niyɔkɔi ka yɛthɛ namɛŋ nɔŋ bawaliŋ bi ka mathumbɛ bina bindɛ. Ka wumankɛ wuŋ bi kɔŋ kutu mu sisande maniyɔ namɛŋ maŋ ba kuta muŋ. 16Yaŋ kɔŋ hɛlɛŋ huŋ duu ka tɛpa: wɔ bɛiŋ siyi ba dɔma na wɔ thɔkɔi na yaŋ. Kɛrɛ mɛnɛ beŋ ni wuŋ, yɛrɔkɔŋ yama nɔŋ wɔ thɔkɔi na yaŋ, wuna yaŋ niyɔ iŋ bɛyi bayete ba yaŋ gbuŋuneke. 17Ba yaŋ tɛpi baŋ ka tete bɛŋ kutɛ thimo yama Mariki woŋ ba yaŋ tɛpa; ka kufɛŋ ku ka gbuŋunɔkɔ haŋ koŋ, yando gbonkoi nɔŋ wɔ thɔkɔi na yaŋ yaathi. 18Kɛrɛ na niyɔi wuŋ biya bibɔyɛ bi kiŋ kɛndɛ bi gbuŋunɔkɔ ka maniyɔ ma ka huwɔmɛtiya haŋ maŋ, yaŋ kɔŋ nɛnɛ nɛŋ ni. 19Beŋ, ka yɛthɛ bakendeŋ, beŋ akele tindɛ, wuna biyɛ beŋ yehitɔkɔi wumandiŋ ba sarita biya bithɔkɔi! 20Ba bendo sarati mɛnɛ wɔ o wɔ diŋe bena nɔŋ mbaayiŋ, maa wundɛ bena niya sɛmbɛ, maa wundɛ bena bɔha ka kansuŋ, maa wundɛ bena detha ka pothi, maa wundɛ bena thorina ka kuwaabu koŋ. 21Miŋ akɔɔyi nde nda tindɛ ba niya bɛyiniŋ baŋ baŋ siiya. E yaŋ ba niyɔ kuyaahu ba huŋ? Kɛrɛ mɛnɛ wɔ o wɔ kiŋ iŋ bɛyi ba wundɛ gbuŋuneke, yaŋ kɔŋ see ka gbonkiya nɔŋ wɔ thɔkɔi ba dɔma na yaŋ hɛlɛŋ nɛŋ yaŋ kiŋ iŋ bɛyi ba yaŋ gbuŋuneke. 22E biYusu bina bindɛ? Yaŋ woYu na yaŋ. E biIsirɛli bina bindɛ? Yaŋ woIsirɛli na yaŋ. E ka bɔnsɔŋ ba ka Ebrahim baŋ ŋaye na bindɛ? Yaŋ, kɛna ŋaye yaŋ. 23E bawaliŋ bi ka Kraist bina bindɛ? Yaŋ kɔŋ gbonkoi nɔŋ baso na yaŋ naa yaŋ tɛpi na yaŋ yameŋ niyɔ bawali wowaŋ ayaŋ ba bindɛ. Yaŋ yame niya wali wukahɛ ayaŋ ba bindɛ, yaŋ thiyo ka yeeli wubɔyɛ-bɔyɛ ayaŋ ba bindɛ, yaŋ gbuduŋo wubɔyɛ-bɔyɛ ayaŋ ba bindɛ, awa wuŋ pɛyɛ nde nalɛpɛɛ-lɛpɛɛ yaŋ ba tuka ayaŋ ba bindɛ. 24Dɔŋɔ kasɔhi yaŋ si gbusuŋa, awa gbusuŋo o gbusuŋo yaŋ kɔŋ yikisa kɔnthɔ kataati iŋ kasɔŋ-kanaŋ iŋ biYusu beŋ. 25Dɔŋɔ kataati yaŋ si tawa iŋ biRomaŋ beŋ; awa yaŋ loopuwo nde hanthe. Yaŋ niyɔi nde dɔŋɔ kataati ka gbe ba teetuwɔi ka mankɔ mamɛɛti mamandiŋ maŋ, awa lɔkɔ banthe yaŋ pɛyɔi nde ka mandi mamɛɛti maŋ ka teete gbɛɛŋ iŋ pii. 26Ka kaande niŋ hubɔyɛ haŋ yaŋ niyɔi nde ka masibo ka teete ka mandiŋ matɛnkɛ, ka batuwani, ka masiboiŋ ŋaye ka bintɔni niŋ biYusu mɛnɛ ŋaye ka biya bi ka siyani bahɛna baŋ; masiboiŋ niyɔi nde ka mɛtiŋ babukuyuwɛ baŋ, masiboiŋ ka wulani baŋ, masiboiŋ ka mankɔ mamɛɛti maŋ, mɛnɛ ka thayathikiyani thahothi. 27Yaŋ ni nde wali wukahɛ-kahɛ; yaŋ kɔŋ nde kɔ huru gbele yako-yako; yaŋ kaho nde kɔnthɔ iŋ kumbɛ; lɔkɔ banɔndi yaŋ sa nde kɔ thimbɔ; yaŋ kaho nde haka awa yaŋ ka nde iŋ muthɔɔ. 28Awa yaŋ sa nda tɛpi ba bɛyiniŋ bahɛna baŋ. Tima o tima yaŋ kiŋ makutɔkɔ mamandiŋ ka thukuma niŋ haŋ ba makɔmandeŋ ma ka biya bi ka Masaala beŋ maŋ fooma. 29Naa wɔ nɔndi kɔɔyi, yaŋ kutɔkɔi wokɔɔyuwɛ hɛlɛŋ nɛŋ; naa wɔ nɔndi thiiko e wundɛ niya hakɛ, wu kɔŋ yama thoŋ ka thukuma wumandiŋ-mandiŋ. 30Mɛnɛ yaŋ kiŋ ba gbuŋunɔkɔ, yaŋ kɔŋ gbuŋunɔkɔ ba bɛyiniŋ ba tɔŋɔŋ ti peye kɔɔyuwa niŋ haŋ. 31Masaala wo Fanda ka Mariki woŋ Yisɔs Kraist, keŋ nama koŋ ku kiŋ iŋ thaduba ba kɔi o kɔi, wundɛ kɔthɛŋ ba dɔma na yaŋ keriŋeta hothi. 32Naa nde yaŋ ka mɛti ba ka Damasakɔsi, wo niyo nde bakɛrɛŋ woŋ ka pothi ka gbaku wo dɔma woŋ na Aritasi deŋe nde banini kantha ka thabiyo tha ba biyande ka mɛti baŋ ba yama bɔha. 33Kɛrɛ yaŋ fuŋuntando ka mahenkeya manthe ka thatha baŋ e yaŋ thuhuno nde ka pothi ka debe e yaŋ kita.

will be added

X\