2 biKɔrinthi beŋ 10

1Yaŋ Pɔli yama bena theteke, yando domo woŋ na yaŋ athɛbi e yaŋ niyɔ wuthathinɔkɔi naa yaŋ niyɔi iŋ beŋ, kɛrɛ yaŋ niyɔ wothunkɛ naa yaŋ thɔkiyande iŋ beŋ. Maŋaye ka thathinɔkɔ mɛnɛ bayɔhɔi ba ka Kraist baŋ, yaŋ theteke bena 2beŋ be tha ni haaŋ na yaŋ niiye wothunkɛ naa yaŋ see; ba yaŋ kɔthɛŋ ba dɔma na yaŋ kɔŋ niyɔ wothunkɛ iŋ bi dɔmɛ beŋ na miŋ kɔŋ ni bɛyi o bɛyi ka maniyɔ ma ka faido maŋ. 3Hunɔndi huna yaathi miŋ kiŋ ka faido, kɛrɛ miŋ dekiyeta ka maniyɔ ma ka faido maŋ. 4Mudekiye mu miŋ dekiye muŋ ka nɔŋ mudekiye mu ka faido muŋ, kɛrɛ mu kiŋ mudekiye musɛmbɛ mu ka Masaala mu miŋ teetuwe thathɛŋ ba ka hadeni ntuŋ beŋ baŋ. Mindo teeti ŋagbakali; 5miŋ kɔŋ thathaŋ bukuyinɔkɔ o bukuyinɔkɔ hu ŋati ma sɔkinɔkɔ kɔthɔ hu ka Masaala haŋ; tima o tima mindo sɛkɛthi masiyi o masiyi ma ka ba Kraist e miŋ niya ba mɛŋ putiyɔ Kraist na. 6Awa naa beŋ thanki tɔŋina putiyɔ ndeŋ huthankinuwɛ haŋ, miŋ kɔŋ kɔsinɔkɔ ba gbasiŋita maniyɔ o maniyɔ ma tha putɔ wuthankinuwɛ. 7Bendo yɛrɔkɔ ntha beŋ ka na beŋ wuŋ kute na. E wɔ kiŋ kɛndɛ wo tɛpiyɔkɔ ba dɔma na wo biiyo iŋ Kraist na wundɛ? Wundɛ siyuwɛŋ ba dɔma na mindo biiyo iŋ Kraist bina na nthɔŋ wundɛ na. 8Ba yaŋ ka kuyaahu hali hintiŋ agbuŋunɔkɔi na yaŋ wubɔyɛ-bɔyɛ ba mayoho ma dunkune mina Mariki woŋ maŋ, mayoho ma ba bena niya kuthɔnthɔ, wuŋ ka ba bena teetuwa thathukuma. 9Yaŋ thimota ba beŋ siyuwa ba dɔma na yɔla na yaŋ yɔli ba bena payinɔkɔ ka kuthagba niŋ koŋ. 10Wɔ nɔndi kɔŋ tɛpi ba dɔma, na “Ŋathagba ŋa ka Pɔli ŋaŋ athoŋ tindɛ ka thukuma awa ŋɛŋ akahi. Kɛrɛ naa wundɛ see e wundɛ si dɔŋɔ ka tha banthe iŋ miŋ, wokɔɔyuwɛ na wundɛ, awa thampɛŋ nama thaŋ ka munahaŋ!” 11Yɔkɔŋ wɔ bɛina woŋ baŋ be kɔthɔ ba dɔma na mahakande yo ka kɛndɛ mateete ma ka mu thanki miŋ gbala muŋ ka ŋathagba ntuŋ ŋaŋ naa nde miŋ bithokiye awa iŋ ba nɔŋ miŋ ni baŋ naa miŋ niyɔi kɛndɛ iŋ beŋ. 12Miŋ tha hintiŋ nthɔŋ thɔyintande yɛthɛ bakɛntuŋ baŋ iŋ biya binɔndi bi sɔlɔkɔ beŋ. Naa bindɛ thubutande bindɛ bithɔ, awa e bindɛ thɔyintande bindɛ bithɔ, bindɛ niyɔ biya bi ka iŋ makɔthɔ. 13Miŋ tha gbuŋunɔkɔ wuŋ daŋande ba ti miŋ ba gbuŋuneke te; gbuŋunɔkɔ ntuŋ haŋ hu kɔŋ hɔkɔŋ niyɔ ka wali ba deŋiye mina Masaala baŋ. Awa ba kɔŋ thiiti wali ba ni miŋ mateete makendeŋ baŋ. 14Awa miŋ tha daŋande wali ba deŋiye mina Masaala baŋ naa kei nde miŋ kendeŋ ka ba kata Huseri Huyɔhɔi haŋ ba Kraist, baa miŋ kɔthɛŋ ba beŋ niyɔ ka wali babɛina. 15Huna miŋ tha gbuŋunɔkɔ ba wali ba thanki biya bihɛna niya baŋ ba ka ka kufɛŋ ku ka wali ba deŋiye mina Masaala baŋ. Kɛrɛ miŋ kiŋ iŋ kukahe thukuma ba wuŋ niyɔ na lanɛya bakendeŋ baŋ ba kɔŋ kei ka kɔtɔkɔi, awa miŋ kɔŋ punku yama niya wali bamandiŋ-mandiŋ ka mateete makendeŋ, lɔkɔiŋ fooma kaake ka wali ba deŋiye mina Masaala baŋ. 16Kɛna miŋ punku niya kɛwandi Huseri Huyɔhɔi haŋ ka ŋakuyɛkɛŋ ŋahɛna ŋa bena ka kɔtɔkɔi ŋaŋ, awa miŋ sa gbuŋunɔkɔ ba wali ba thankɛ niyo ka dumgbu ba ka wɔ hɛna. 17Kɛrɛ nɔŋ na tepe nthɔŋ magbali ma ka Masaala maŋ na. Magbali maŋ tepe, na “Wɔ o wɔ wo thimo ba gbuŋunɔkɔ, yɔkɔŋ ndɛ be gbuŋunɔkɔ ba ba thanki Mariki woŋ niya baŋ.” 18Naa Mariki woŋ siyi ba wɔ niyɔ woyɔhɔi, wɔ bɛina kɔŋ tɔŋina ba wundɛ niyɔ wɔ yɔhɔi, awa wuŋ ka naa wundɛ siyiyɔkɔi ka yɛthɛ nama ba ndɛ niyɔ wɔ yɔhɔi.

will be added

X\