1 Timothi 3

1Hu tepo haŋ nɔndi, ba wuŋ niyɔ na mɛnɛ wɔ thimoŋ makooye ma ka bakɔtɔkɔ ka makɔmande ma ka biya bi ka Masaala beŋ, ndɛ siyi ba niya wali bayɔhɔy. 2Wuna, bakɔtɔkɔ ka ba niyɔ ka wundɛ boho thɛkɛ ba wumɛɛsɛ. Yɛrɛmɛ wunthe nape na ba niyɔ iŋ wundɛ. Ndɛ ka ba niyɔ wɔ yilɔy. Ndɛ kiŋ ba punka kɛriŋiyɛ yɛthɛ bakɛnama. Wundɛ kiŋ ba niyɔ wɔ thiyɔy yiki. Ndɛ kiŋ ba niyɔ wɔ yɛrɔkɔ thahinɛŋ ka banka nama. Ndɛ kiŋ ba niyɔ wɔ punkɛ ba thaninuwa. 3Wundɛ bɛiŋ yilɔ iŋ mampa, bɛiŋ niyɔ badekey, kɛrɛ niyɔiŋ wɔ thiyi mathɛbɛ. Bɛiŋ niyɔ ba sisi ŋayuŋande, bɛiŋ thimo kɔbiri wudankande. 4Ndɛ niyɔiŋ wɔ punkɛ tututɔ banka bakɛnama wuyɔhɔy. Ndɛ niyɔiŋ wɔ dinki mpati nama ba mɛyiyɛ niŋ yamari, iŋ ba niŋ dunkune yiki gboŋa yo gboŋa. 5Baa mɛnɛ wɔ tha punku tututɔ banka nama baŋ, nama ndɛ punke tututiye makɔmande ma ka Masaala maŋ? 6Ndɛ ka ba niyɔ wɔ dɔy sikiyɔkɔ ka Masaala. Mɛnɛ huŋ kutɛ, ndɛ kɔŋ niyɔ wɔ ŋatinɔkɔy awa wundɛ kɔŋ thonkino nɔŋ na Wayi Womandiŋ woŋ Sithani thonkino na. 7Ndɛ niyɔiŋ wɔ thiyɔy yiki iŋ biya bihɛna. Mɛnɛ huŋ kutɛ, ndɛ kɔŋ pɛnkɔ ka mudikiŋ mu ka Wayi Womandiŋ woŋ muŋ, e wundɛ kuta yarabi. 8Bamaseŋ beŋ hɛlɛŋ bi kiŋ ba niyɔ biya bi iŋ sɔbɛ ka thathukuma. Bindɛ ka ba niyɔ iŋ thahiliŋ thaye. Bindɛ ka ba tuta yaha ka thiiye mampa. Bindɛ ka ba thimo kɔbiri wudankande. 9Bi kiŋ ba yɛrɔkɔ mathanani manɔndi maŋ ma toŋino miŋ maŋ iŋ thathukuma tha iŋ mathɛbɛ. 10Saanuŋ bindɛ ba niyo bamaseŋ, bi yenkeŋ hintiŋ gberiŋino. Naa bindɛ niyɔy bi pankɔi bɛy, e bindɛ ntiŋ kɔ niyo bamaseŋ. 11Yɛrɛmɛŋ beŋ hɛlɛŋ gbeeŋ, bi kiŋ ba niyɔ iŋ sɔbɛ ka thathukuma. Bindɛ ka ba gbonkiya wunɛnɔy ba ntɔni namɛŋ. Bi niyɔiŋ bi punkɛ kɛriŋiyɛ yɛthɛ namɛŋ. Bi niyɔiŋ bi yɔhɔy niyo lanɛya ka bɛy yo bɛy. 12Hanimaa bamase, ndɛ kiŋ ba niyɔ iŋ yɛrɛmɛ wunthe nape, wundɛ kiŋ ba niyɔ wɔ tututɔy mpati nama iŋ yikiya nama. 13Bindɛ bamaseŋ bi ni wali bayɔhɔy beŋ, bi kɔŋ kutu makooye mayɔhɔy iŋ kaha thukuma ba lanɛya namɛŋ baŋ ka Kraist Yisɔs. 14Yaŋ kiŋ ba kaa kɛndɛ kayeŋ baŋ, kɛrɛ yaŋ kɔŋ hintiŋ yina yenke gbalita kuthagba koŋ koŋ ba yina toŋine yamariŋ beŋ beŋ. 15Mɛnɛ yaŋ sa peyeŋ kaa, ba haliko yi be kɔthɔ na wɔ ba niiye ka kubɔri ku ka Masaala koŋ. Kubɔri ku ka Masaala koŋ kuna makɔmande ma ka biya bi ka Masaala wopethɔy woŋ beŋ. Makɔmande maŋ mɛna sinka haŋ iŋ kukahataŋ ku ka nɔndi baŋ koŋ. 16Bɛy ba toŋino iŋ dina wokɛntuŋ woŋ, bɛy bamandiŋ bagbundu bɛna: Wundɛ tɔŋinɔkɔŋ kɛntuŋ ka huwɔmɛtiya, Yina woŋ kute ba dɔma na wɔ thumbɛ na wundɛ, malekɛŋ kute niŋ. Ndɛ niyo kɛwandi ka siyani baŋ, ndɛ niyo lanɛya iŋ kafay woŋ, ndɛ ŋatito ka yiki.

will be added

X\