1 Timothi 2

1Ka yenke, yaŋ gbakite bena ba beŋ be thɔnthɔŋɔŋ Masaala na ndɛ be dunkune biya fooma mu thimo bindɛ, e beŋ niya kuraminɛ ba bindɛ, e beŋ gbonkiye Masaala na saathɛ ba kɛnamɛŋ, e beŋ thiya Masaala na maamo saathɛ ba kɛnamɛŋ. 2Mɛnɛ hɛlɛŋ ba gbakuiŋ iŋ bi ka makooyeŋ maŋatɛ ka thinthi beŋ, haliko na miŋ doŋe iŋ thɛbina thukuma, e miŋ niya ba tepe mina dina ntuŋ woŋ baŋ iŋ maniyɔ mayɔhɔy. 3Wuŋ ayɔhɔ, awa wu kɔŋ yeroko iŋ Masaala, Banikisi wokɛntuŋ woŋ. 4Masaala athimo ba wɔ yo wɔ niyo kisi e wundɛ kɔthɔ nɔndi baŋ. 5Baa Masaala wunthe na iŋ miŋ, iŋ baŋathɔ wunthe mateete ma ka Masaala iŋ biyamɛti ba sisa mathɛbɛ, ndɛ na Kraist Yisɔs. 6Wundɛ dunkunɔkɔy ba bakiŋa biyamɛti fooma. Wuŋ niyo nde maseri ka lɔkɔ bagbeeŋ baŋ ba tɔŋina ba Masaala thimo ba biyamɛti fooma niyo kisi. 7Ba haŋ haŋ huna niyo yaŋ baseri wothɔɔkɔ iŋ bathanani ka siyani bahɛna baŋ, ba niya kɛwandi maseri manɔndi maŋ ma yɔhɔy ba niyo lanɛya maŋ. Yando bena tepe nɔndi baŋ; yaŋ tepeta ŋasɔkɛ. 8Huna yaŋ thimo ba kamo kama biyɛthɛŋ beŋ bi be ni kuraminɛ, awa e bindɛ yenthiŋina thɛnkɔ namɛŋ thaŋ ka thinthi ka Masaala wu ka ka mathoŋ iŋ ŋagbakali. 9Yaŋ thimoŋ nɛnɛ ba yɛrɛmɛŋ beŋ gbɛkitɔkɔ muthɔɔ mu ba kahi mɔlɔŋ, bi be tha daŋinuwande tindɛ. Bi be tha daŋinuwande ka yehinuwa bɔɔyɛŋ namɛŋ buŋ, maa ba pitha boyi, iŋ tharaka tha hakɛ mɔlɔŋ, iŋ mupithi mu kahɛ mɔlɔŋ. 10Kɛrɛ bi niyɛŋ maniyɔ mayɔhɔy ma sisande nɔŋ biya bi dɔŋ beŋ na bi kɔŋ ni Masaala na kubatho. 11Yɛrɛmɛŋ bi thanuwɛŋ ba daanɔkɔ nayeŋ iŋ ba thathinɔkɔ. 12Yaŋ sa mɛkɛŋ ba yɛrɛmɛŋ thaninuwa biyɛthɛŋ beŋ maa ba bindɛ tuta sɛmbɛ. Bindɛ kiŋ ba daanɔkɔ nayeŋ, 13baa mbemba Adama na yenke yehinuwo, e Mahawa ntiŋ manke yehinuwo. 14Awa mbemba Adama kutɛ thokino nde, kɛrɛ wo yɛrɛmɛ woŋ na thonkino nde e ndɛ niya hakɛ. 15Yɛrɛmɛ kɔŋ nɔŋ niya kisi saathɛ ba na wuŋ yɛrɛmɛŋ bina mpuu, mɛnɛ wundɛ piteke Masaala na, e wundɛ thimo biya bihɛna, e wundɛ niyɔ wɔ yeheni Masaala na thukuma, iŋ maniyɔ mayɔhɔy.

will be added

X\