1 Timothi 1

1Yama Pɔli na, baseri wothɔɔkɔ wo ŋindi Kraist Yisɔs woŋ maŋaye ka yamari wo ka Masaala, Banikisi wokɛntuŋ woŋ, mɛnɛ Kraist Yisɔs wo kahe miŋ thukuma woŋ. 2Yama gbalitɛ yina kuthagba koŋ koŋ, Timothi, baa hatiŋ na nda yi saathɛ ba na yɛrɔkɔy yi mathanani ma ka Kraist maŋ. Haliko yi toŋino mathimo iŋ Masaala, Fanda ntuŋ woŋ, iŋ Kraist Yisɔs, Mariki ntuŋ woŋ. Haliko yi kutiyo nkinikiniŋ mɛnɛ mathɛbɛ. 3Yaŋ thimoŋ ba yi pɛyɔ ka Ɛfɛsɔsi, nɔŋ na gbakite nde yaŋ yina na wusɔbɛ-sɔbɛ, yaŋ si key ka Masidoniya, ba yi be pɛyɔ ka Ɛfɛsɔsi haliko yi be bindɛ pindi bi thanani kɛndɛ mathanani mahothi maŋ beŋ. 4Tepe bindɛ ba bi be pɛy tɛpa thabɔrɔiŋ tha yeheni wɔmɛti thahothi mɛnɛ ba kɔnda ŋakeni ŋa ka mbembɛŋ kiŋ ŋaŋ, baa wu kɔŋ sisi ŋagbakali. Wuŋ sa mase madɛɛnki ma ka Masaala maŋ ma yɛroko ka lanɛya maŋ. 5Saabu babiyɛ yamari woŋ baŋ wu kiŋ ba bena mase ba beŋ niyɔ iŋ mathimo ma ŋaye ka thathukuma thamɛthɛ, iŋ ba thana kutɔkɔ mathonko baa beŋ ni wuyɔhɔy, iŋ ba piteke Masaala na wukahɛ-kahɛ. 6Biya bibɛina beŋ beŋ bindɛ sikiŋ sɔkɔrɔ maŋaye ka bɛyiniŋ baŋ baŋ e bindɛ thooyo wuruwanda ba gbonkiya thasɔkɔiŋ tha ka kolo. 7Bindɛ simɔkɔy ba niyɔ bathananini bi ka Siraŋ ba ka Masaala baŋ, kɛrɛ bindɛ kɔita thampɛŋ tha bindɛ tɛpi iŋ bɛyiniŋ ba bindɛ gbonkoy baŋ ka kaha thukuma. 8Miŋ kɔthɛŋ ba wuŋ niyɔ na Siraŋ ba ka Masaala baŋ ayɔhɔ mɛnɛ wɔ thanani bɛŋ ka gboŋa bayɔhɔy. 9Tute thukuma ba wuŋ niyɔ na siraŋ ndo siraŋ tha deŋo ba bithumbɛ beŋ, kɛrɛ bɛŋ deŋo ba bi thinki bɛŋ beŋ iŋ bi be dinkɔ beŋ, ba biya bi ka bi ka Masaala beŋ iŋ bahakɛŋ beŋ, bi ka biyɔhɔy beŋ iŋ bi gbonkoy wunɛnɔy ba dina woŋ beŋ, bi kɔri bifandamɛŋ iŋ binandamɛŋ, iŋ ba bakɔriŋ beŋ fooma. 10Sirani baŋ ba kiŋ hɛlɛŋ ba bi ni ŋabɛy beŋ, iŋ bi taititɔkɔ ntɔni namɛŋ bibiyɛthɛŋ beŋ, bi tuwe biyamɛtiŋ beŋ e bindɛ bindɛ niya gbɔŋ, batɛpiŋ ŋasɔkɛ beŋ mɛnɛ bi ni maseri mahothi ba ntɔni namɛŋ beŋ, iŋ bɛy yo bɛy ba sɔkinɔkɔ mathanani manɔndi maŋ. 11Mathanani maŋ maŋ mɛŋ ŋaye ka huseri hu iŋ yiki hu dunkuno yaŋ haŋ iŋ Masaala wo iŋ yiki mɛnɛ mayehitɔkɔ fooma woŋ. Ndɛ ni yama lanɛya ba huŋ niya kɛwandi. 12Yaŋ thiyi Kraist Yisɔs na maamo, Mariki ntuŋ woŋ, baa ndɛ dunkune yama sɛmbɛ ba punka niya wali niŋ baŋ. Baa ndɛ dethe yama wundɛ kute ba wuŋ niyɔ na yaŋ ayɔhɔ niyo lanɛya, awa ndɛ tɔŋɔŋ yama ba niya wali nama baŋ. 13Hali na nde yaŋ gbonkoy wunɛnɔy ba wundɛ, e yaŋ niŋ niya thɔrɔ, e yaŋ niŋ yaka. Kɛrɛ ka tete ndɛ kutiye yama nkinikiniŋ baa yaŋ niyeta nde lanɛya awa huna biyɛ yaŋ kɔita nde ba yaŋ ni. 14Awa yaŋ kutiyo nkinikiniŋ iŋ Mariki ntuŋ woŋ awa makutiyɛ mabɛina ni yama ba yaŋ piteke Kraist Yisɔs na iŋ ba thimo biya bihɛna. 15Magbonkoy maŋ maŋ ma kiŋ nɔndi, awa asisande ba mɛŋ yɛrɔkɔ ba wuŋ niyɔ na Kraist Yisɔs see kafaydo ba niya bahakɛŋ kisi. Awa yama bahakɛ wo yamɛ nɛnɔ woŋ nthɔŋ nda fooma. 16Kɛrɛ yaŋ kutiyo nkinikiniŋ iŋ Masaala, yando bahakɛ wo yamɛ nthɔŋ nda nɛnɔ woŋ fooma. Wundɛ ni wuŋ ba haliko Kraist Yisɔs be tɔŋɔŋ muyuŋ nama baŋ fooma kiyaŋ. Wuŋ, wu kɔŋ niyɔ mathɔyande ma bi niŋ ni lanɛya beŋ yeŋ ba kuta sii ba kɔy yo kɔy. 17Haliko yiki bamandiŋ ba dunkuno kɔy yo kɔy ka Gbaku wo niyɔ kɔy yo kɔy woŋ, wo sa tuku woŋ, wo sa kuta woŋ, wo Masaala woŋ wunthe nape! Amiina. 18Timothi, hatiŋ woŋ, yaŋ piteke yina iŋ yamari wo ni yaŋ yina woŋ. Yamari woŋ baŋ amɛyiyande iŋ hunabi hu dunkuno nde yi haŋ. Haliko hu be yina dunkune sɛmbɛ ba dekiya wusɔbɛ-sɔbɛ. 19Niyɔ iŋ lanɛya nda baŋ awa e yi niya bayɔhɔy ba yina thukuma nda haŋ tepe baŋ. Baa biya binɔndi tha yɛrɔkɔ ba thathukuma namɛŋ thaŋ bindɛ tepe baŋ. Biya bibɛina beŋ beŋ bindɛ teeti lanɛya namɛŋ baŋ fooma. 20Biya bibɛina bindɛ bina beŋ beŋ: Haimɛniyɔsi iŋ Alɛsanda. Bindɛ bina dunkuŋ yaŋ ka yɔnkɔ hu ka Sithani ba haliko bi be pɛy gbonkiya wunɛnɔy ba Masaala.

will be added

X\