1 biThɛsalonaika 5

1Mbɛnda ntuŋ, miŋ ka nda hɛlɛŋ ba gbalita bena ba bena tepe malɔkɔ magbeeŋ ma bɛyiniŋ baŋ baŋ niiye. 2Baa beŋ gbeeŋ, beŋ kɔthɛŋ ba dɔma na malɔkɔ ma Mariki woŋ see maŋ ma kɔŋ niyɔ nɔŋ batuwaŋ wo see ka tuwe huyɛ. 3Ti nthɔŋ biya dɔŋ, na “Wuthɛbɛ napɛthɛ; mindo niyɔy kantha,” ka lɔkɔ babɛina, tɛna bindɛ teetuwa. Wu kɔŋ thɔyande nɔŋ yɛrɛmɛ wo dɔŋɔy ka kugbomgboki ku ka mpaa, awa makite yo sa niyɔ. 4Kɛrɛ beŋ, bendo mbɛnda ntuŋ beŋ, beŋ ka nda ka huntuma. Malɔkɔ maŋ maŋ sa nda hɛlɛŋ bena pɛnki kuthurunɔ nɔŋ batuwaŋ. 5Baa beŋ fooma nda biya bina beŋ bi ka waŋ baŋ; miŋ ka nda biya bi ka huntuma haŋ. 6Huna, miŋ bɛiŋ niyɔ biya bi nine nɔŋ na biya binɔndi na. Miŋ kiŋ ba niyɔ biya bi thɔhɔy malɔkɔiŋ maŋ maŋ, awa e miŋ niyɔ biya bi siyɔkɔi. 7Huyɛ na biya nine, awa huyɛ na biya yilɔ. 8Na nda miŋ ka waŋ baŋ, miŋ kiŋ ba niyɔ biya bi siyɔkɔi. Miŋ kiŋ ba niyɔ iŋ lanɛya mɛnɛ mathimo. Naa miŋ niyɔ iŋ muŋ, wuŋ thɔyande nɔŋ ka thɔɔyɛ miŋ yaba bathawɛ ba pama kankɛŋ bakɛntuŋ baŋ. Awa kukahe ntuŋ thukuma ba kisi bakɛntuŋ baŋ, kuna kuhaka kuthawɛ ku miŋ tutɔkɔ ba pama thankaha thakɛntuŋ thaŋ. 9Masaala tha mina yɛthi ba miŋ niyɔ thɔrɔ ka mathoŋ nama maŋ, kɛrɛ ndɛ yɛthi mina ba miŋ niyɔ kisi maŋaye ka Mariki wokɛntuŋ woŋ Yisɔs Kraist, 10wo tukɛ ba miŋ woŋ ba haliko miŋ be niyɔ ka tha banthe iŋ wundɛ ti wundɛ tɛŋ, miŋ thanaŋ niye tuke, maa miŋ niyeŋ tuke. 11Huna niyandeŋ kuthɔnthɔ, awa e beŋ masiyande nɔŋ na nthɔŋ beŋ ni na. 12Mbɛnda ntuŋ, miŋ theteke bena ba beŋ dunkuna yiki bamandiŋ ka bi ni wali wukahɛ mateete makendeŋ, bayahɛŋ ndeŋ beŋ ka makɔmande ma ka Mariki woŋ maŋ, awa e bindɛ bena kɔ thaninuwa nɔŋ na beŋ ba niiye. 13Dunkuneŋ bindɛ yiki bamandiŋ, awa e beŋ bindɛ thimo, ba saathɛ ba wali ba bindɛ ni baŋ. Niyaŋ ba mathɛbɛŋ niyɔ mateete makendeŋ. 14Mbɛnda ntuŋ, miŋ gbakite bena ba beŋ yela bi dɔŋɔy kɛndɛ bi ka ba niya wali beŋ, kahinaŋ bi payɔy beŋ thathukuma, maseŋ bi ba punku yɛthɛ namɛŋ beŋ, niyandeŋ muyuŋ. 15Wɔ bɛiŋ tɛnkɛŋ banɛnɔy ka banɛnɔy, kɛrɛ lɔkɔiŋ fooma yɔlaŋ ba niyande bayɔhɔy mateete makendeŋ mɛnɛ ka biya fooma. 16Niyɔŋ iŋ mayehitɔkɔ timo tima. 17Niyaŋ kuraminɛ timo tima. 18Niyɔŋ biya bi thiyi maamo ka bɛy yo bɛy ba bena pɛnki, baa wuŋ, wuna thimo Masaala ba beŋ be ni baa beŋ kiŋ nda biya bi ka Kraist Yisɔs. 19Baŋ pindi Yina wo ka Masaala woŋ; 20baŋ yethitɔ maseriŋ ma ka biya bi dɔmɛ beŋ na maseriŋ namɛŋ maŋ ŋaye ka Masaala, 21kɛrɛ yenkeŋ gbɛriŋina maseri yo maseri ma bena pɛnki mɛnɛ manɔndi mɛna. Kɔsinaŋ wu kute beŋ wuyɔhɔy wuŋ. 22Gbɔnɔkɔŋ mahɛŋ bɛy yo bɛy ba kɔthɛ beŋ banɛnɔy. 23Haliko Masaala wo dunkune mina thɛbina thukuma woŋ niya ba beŋ niyɔ bithumbɛ nagbaraŋ. Awa haliko ndɛ kɔsina yɛthɛŋ bakendeŋ, yinɛŋ bikendeŋ, siini bakendeŋ, mɛnɛ ŋakɔtɔ ŋakendeŋ ŋaŋ wu pankɔy bɛy maŋaye ka ntha yo ntha kinɛnɔy haaŋ saa hu ka Mariki woŋ Yisɔs Kraist haŋ. 24Ndɛ wo thiyɛ bena woŋ ndɛ kɔŋ wuŋ ni, baa ndɛ ayɔhɔ niyo lanɛya. 25Mbɛnda ntuŋ, niyiyaŋ mina kuraminɛ. 26Maaniyaŋ mina mbɛnda ntuŋ beŋ nɔŋ biya bihuwɛndiya ka Kraist. 27Yaŋ gbakite bena maŋaye ka yamari wo ka Mariki woŋ ba beŋ niya karaŋ kuthagba koŋ koŋ ka bi niyɛ lanɛya beŋ fooma. 28Haliko mathimo ma ka Mariki wokɛntuŋ woŋ Yisɔs Kraist ma niyɔ iŋ beŋ.

will be added

X\