1 biThɛsalonaika 3

1Wuna miŋ sa nda punku ba yumba wunambɛ ba bena kutiyɔkɔ. Bɛna miŋ tutunuwande ba pɛyɔ ka Athɛnisi, 2awa e miŋ ŋinda Timothi na kendeŋ ka. Wɛnda ntuŋ na wo miŋ ni wali ka nanthe ba Masaala woŋ ba niya kɛwandi Huseri Huyɔhɔy haŋ ba Kraist. Miŋ ŋindi niŋ ba haliko ba niya na beŋ kooye wukahɛ iŋ ba bena mase ka lanɛya bakendeŋ baŋ. 3Wuna sa wunthe ka beŋ gbɔnina ka Kraist saathɛ ba ka thɔrɔiŋ baŋ baŋ. Beŋ kɔthɛŋ ba dɔma na mamɛyi ma ka Masaala mɛna. 4Naa nde miŋ hintiŋ iŋ beŋ, miŋ tepe nde bena ba miŋ kɔ niyo thɔrɔ ba lanɛya ntuŋ baŋ. Awa nɔŋ na kɔthɛ beŋ nɛnɛ huŋ na nda, wuna niyɔ wuŋ gbeeŋ. 5Wuna dɔmɛ yaŋ kɔŋ ŋindi Timothi na. Yaŋ sa nda punku thunkuteke, huna yaŋ niŋ ŋinde ba detha ti peye lanɛya bakendeŋ baŋ. Yaŋ payɔy nde thampo Wayi Womandiŋ woŋ Sithani thiiki nde bena, awa e wali ntuŋ baŋ niyɔ ba gboŋ. 6Ka tete Timothi dapiyɔkɔy, awa ndɛ diŋiye nde mina kuna kuyɔhɔy ka yuyɛ ba lanɛya iŋ mathimo makendeŋ maŋ. Ndɛ tepe mina ba dɔma na bendo siyi wuyɔhɔy ba miŋ timo tima, awa beŋ thimoŋ ba mina kuta nɔŋ na thimo miŋ nda ba bena kuta na. 7Mbɛnda ntuŋ ka lanɛya baŋ, lanɛya bakendeŋ baŋ ni mina kuthɔnthɔ ka thɔrɔiŋ iŋ nambarɛŋ bakɛntuŋ baŋ. 8Wuna miŋ niyɔ iŋ mayehitɔkɔ ba niyɔ ka faido, mɛnɛ beŋ kɔɔyɛ wukahɛ ka lanɛya ba ni beŋ Mariki woŋ baŋ. 9Ka tete nda miŋ punkeŋ ba thiya Masaala ntuŋ woŋ maamo ba beŋ, mɛnɛ ba mayehitɔkɔ ma iŋ miŋ maŋ ka kupɛnkintiyande kukɛnama koŋ ba saathɛ ba kendeŋ. 10Gbɛɛŋ iŋ piri-piri mindo ni kuraminɛ wukahɛ ba bena kutiyɔkɔ, haliko ba bena dunkune mu pɛyɛ beŋ ba kuta ka lanɛya bakendeŋ baŋ. 11Haliko Masaala, wo Fanda ntuŋ woŋ, mɛnɛ Mariki ntuŋ woŋ Yisɔs pɛthiyɛ mina gboŋa ba miŋ kaaye kendeŋ ka, 12awa e Mariki woŋ niya ba thimiyande hukendeŋ haŋ iŋ biya bihɛna hu kaa ka kɔtɔkɔy, e huŋ doŋe nanthe iŋ mathimo ma thimo miŋ bena maŋ. 13Huna Masaala ni ba beŋ punka kɔɔ wukahɛ, awa e beŋ niyɔ biya bi ka Masaala bi pankɔy bɛyi ka kɔtɔkɔy ka Masaala, Fanda ntuŋ woŋ, ti Mariki ntuŋ woŋ Yisɔs see iŋ bikɛnama beŋ fooma.

will be added

X\