1 biThɛsalonaika 2

1Mbɛnda ntuŋ, beŋ gbeeŋ beŋ kɔthɛŋ ba dɔma na maana hu key miŋ kendeŋ ka haŋ tha niyɔ ba gboŋ. 2Beŋ kɔthɛŋ nɔŋ na niyo miŋ nambara awa e miŋ thiminuwo dɛkuiŋ ka Filipay saanuŋ miŋ kɔ tɛŋa kendeŋ ka. Awa hali na niyɔy wuŋ na miŋ pɛnkande iŋ bi thambo mina, kɛrɛ Masaala ni ba miŋ kaha thukuma ba bena tepe Huseri Huyɔhɔy hu ŋaye kɛnama haŋ. 3Naa thɔnthɔŋɔŋ nde miŋ bena ba yɛrɔkɔ huseri hu ka Masaala haŋ, miŋ tha nde bena tepe ŋasɔkɛ, awa thathukuma thakɛntuŋ thamɛthɛ nde. Miŋ yoleta nde ba thɔkina wɔ yo wɔ. 4Kɛrɛ lɔkɔiŋ fooma mindo gbonkoy hu thimo Masaala haŋ, baa ndɛ gbɛrɛŋɛŋ mina awa ndɛ kute ba dɔma na miŋ ayɔhɔ niyo lanɛya iŋ Huseri Huyɔhɔy haŋ. Miŋ yoleta ba yehinuwa biyamɛti thathukuma, kɛrɛ ba yehinuwa Masaala na thukuma, wo kɔthɛ thathukuma thakɛntuŋ thaŋ woŋ. 5Beŋ kɔthɛŋ nagberekethe ba dɔma na miŋ tha see kendeŋ kaŋ thiminɔkɔ maa, ba hintiŋ nthɔŋ dɔma na miŋ gbonkoy thampɛŋ tha ba pututa milɛ wokɛntuŋ woŋ. Masaala na maseri makɛntuŋ. 6Miŋ yoleta ba gbuŋunuwo iŋ wɔ yo wɔ, kentiŋ kooye beŋ maa biya bihɛna. 7Hali na miŋ baseriŋ bithɔɔkɔ bi ka Kraist, miŋ tha niyɔ doni kendeŋ, kɛrɛ miŋ niyɔy bamuyuni naa nde miŋ iŋ beŋ, nɔŋ na komisa woyɛrɛmɛ dethiteke mpati bikɛnama. 8Saathɛ ba na thimo miŋ bena, mindo kɔsinɔkɔy ba miŋ be hanande iŋ beŋ wuŋ ka hɔkɔŋ Huseri Huyɔhɔy hu ka Masaala haŋ, kɛrɛ hali siini bakɛntuŋ baŋ, baa miŋ athimo bena wumandiŋ. 9Mbɛnda ntuŋ, beŋ kɔthɛŋ nɔŋ na niye miŋ wali wukahɛ. Miŋ ni wali gbɛɛŋ iŋ piri-piri ba haliko miŋ be tha bena ni thɔrɔ naa miŋ ni kɛwandi Huseri Huyɔhɔy hu ŋaye ka Masaala haŋ. 10Bena maseri makɛntuŋ, nɔŋ na nthɔŋ Masaala maseri makɛntuŋ na, ba wuŋ niyɔ na maniyɔ makɛntuŋ mateete makendeŋ, bendo niyɛ lanɛya beŋ, mɛŋ ayɔhɔ, mathumbɛ, awa mɛŋ ka iŋ ka mɛŋ boho thɛkɛ. 11Beŋ kɔthɛŋ ba dɔma na miŋ diŋe bena nɔŋ na komisa wowathe diŋe mpati bikɛnama. 12Miŋ ni bena kuthɔnthɔ, miŋ thaayi bena, awa miŋ gbonkiye bena kaye-kaye ba haliko siini bakendeŋ baŋ ba be niyɔ ba yehinuwɛ Masaala na thukuma, wo thiyɛ bena woŋ ba beŋ niyɔ iŋ kufɛŋ ka Hugbakine nama haŋ mɛnɛ yiki nama baŋ. 13Awa saabu bahɛna ba kiŋ hɛlɛŋ kɛndɛ ba dɔmɛ miŋ kɔŋ thiyi Masaala na maamo lɔkɔiŋ fooma. Naa sisiyɛ nde miŋ bena huseri hu ka Masaala haŋ, beŋ yuye huŋ, awa e beŋ huŋ yɛrɔkɔ. Beŋ tha huŋ yɛrɔkɔ nɔŋ huseri hu ka wɔmɛti, kɛrɛ nɔŋ huseri hu ka Masaala. Huna ntiŋ nɛnɛ gbeeŋ. Baa Masaala kiŋ ka niya wali kaake ka siini bakendeŋ, bendo niyɛ lanɛya beŋ. 14Mbɛnda ntuŋ bi ka lanɛya baŋ beŋ, ba pɛnkɛ bena baŋ, bɛŋ niyɔy ka makɔmande ma ka bi niyɛ lanɛya beŋ ka Yudiya, ka biya bi kɛndɛ bi ka Kraist Yisɔs beŋ. Beŋ niyɔy thɔrɔ banthe babɛina maŋaye ka bi beŋ kuyɛkɛŋ kunthe beŋ, nɔŋ na niyo nde bindɛ iŋ biYusu beŋ na, 15bi kɔrɛ Mariki Yisɔs na beŋ, iŋ banabiŋ beŋ, awa e bindɛ mina niya thɔrɔ. Bindɛ ni ba Masaala thɔɔ ka mathoŋ. Bindɛ kiŋ nda hadeni bi ka wɔ yo wɔ. 16Bindɛ yole nde gboŋa yo gboŋa ba mina pinda ba niya kɛwandi huseri hu ni kisi haŋ ka siyani bahɛna baŋ. Ka gboŋa baŋ baŋ kɛna see bindɛ ka thiŋine hakɛŋ ba bare bindɛ niya baŋ fooma. Bɛna biyɛ nɛnɛ Masaala kɔŋ niyɔ iŋ mathoŋ ba bindɛ ka lɔkɔ baŋ baŋ hɛ. 17Mbɛnda ntuŋ, mɛnɛ ba ka yɛthɛ bakɛntuŋ, hali thɔkiyande hu thɔkiyande miŋ iŋ beŋ ba wuthurɔy wuŋ, mathimo makɛntuŋ kutɛ. Ti nɔndi ka kɔtɔ koŋ thɔkiyande na miŋ hɔkɔŋ, kɛrɛ mindo siyi ba beŋ timo tima. Miŋ ka nda iŋ beŋ ka tha banthe kɛrɛ hiŋ mindo yɔli wukahɛ ba hɛlɛŋ bena kutiyɔkɔ. 18Miŋ thimoŋ nde ba dapiyɔkɔ kendeŋ ka. Yaŋ gbeeŋ yole nde ba kɛndɛ kaa, wuŋ ka hɔkɔŋ maŋ hanthe, kɛrɛ Sithani tha mina dunkune hɛɛra. 19Mbɛ kukahe kukɛntuŋ, mbɛ mayehitɔkɔ makɛntuŋ, maa mbɛ mu miŋ gbuŋuneke ka Mariki woŋ Yisɔs ti ndɛ see? Bena! 20Yaathi beŋ kɔŋ ni ba miŋ gbuŋunuwo, awa beŋ kɔŋ ni ba miŋ yehitɔkɔ.

will be added

X\