1 Pita 5

1Yaŋ, yando bakalaŋ, yaŋ theteke bakalani bibayahɛŋ beŋ ka mateete makendeŋ. Wɔ na yaŋ wo kutiyɔkɔy nambarɛŋ ba ka Kraist baŋ, awa yaŋ kɔŋ niyɔ iŋ kufɛŋ ka yiki ba nɔŋ tɔŋina baŋ. Yaŋ theteke bena 2ba beŋ niyɔ nɔŋ batɔliŋ kubɛri ku dunkune bena Masaala koŋ ba kuŋ dethiteke iŋ thathukuma ndeŋ thaŋ fooma, nɔŋ na thimo Masaala ba beŋ wuŋ niya na; baŋ wuŋ ni ba panka naniya. Niyaŋ wali bakendeŋ baŋ; baŋ bɛŋ niye ba kuthunkuŋ hɔkɔŋ nagbɛti, kɛrɛ niyaŋ bɛŋ iŋ kufiyo kumandiŋ ba bɛŋ niya. 3Baŋ yɔli ba kɛriŋiyɛ ka sɛmbɛ bi dunkuno beŋ ba dethiteke beŋ, kɛrɛ niyɔŋ mathɔyande mayɔhɔy ka kubɛri koŋ. 4Awa naa Batɔli Wobayaha woŋ tɔŋinɔkɔy, beŋ kɔŋ dunkuno nɛmu wo ka yiki wo sa piriŋiŋ bɛnda nama haŋ. 5Ka gboŋa babanthe babɛina, bendo lamgbeŋ beŋ mɛyaŋ yamari ka bakalani bibiyɛthɛŋ beŋ. Awa beŋ fooma yɔkɔŋ beŋ be thathinɔkɔ ba niyiyande; baa magbali ma ka Masaala maŋ tepe, na “Masaala kɔŋ sɔkinɔkɔ bibukuinɔkɔy beŋ, kɛrɛ ndɛ kɔŋ thiyiyɛ thaduba bithathinɔkɔy beŋ.” 6Thathinɔkɔŋ ka pothi ka yɔnkɔ hu ka Masaala hu iŋ sɛmbɛ haŋ, wuna ndɛ bena ŋataŋ ka thinthi ka lɔkɔ nama bayɔhɔy baŋ. 7Pɛnkitaŋ niŋ fooma yaagbani ndeŋ beŋ, baa ndɛ atute bena thukuma. 8Kiyaŋ thankaha ndeŋ thaŋ natoloŋ e beŋ niyɔ biya bithɔhɔy! Hadeŋ wokendeŋ woŋ, wo Wayi Womandiŋ woŋ, ndɛ na pɛnkande kaŋ kunkura woŋ nɔŋ yaadi wo deethi wɔ wo ndɛ thɔŋ. 9Kɔɔŋ wukahɛ ka lanɛya ndeŋ baŋ awa e beŋ niŋ sɔkinɔkɔ, baa beŋ kɔthɛŋ ba dɔma na mbɛnda ndeŋ beŋ ka lanɛya baŋ ka fay woŋ fooma bi kɔŋ pɛnkande iŋ nambarɛŋ banthe baŋ baŋ siiya. 10Kɛrɛ naa thanki beŋ niyɔ nambara ba wuthurɔy, Masaala wo kutiyɛ mina wukunthɛ woŋ, wo thiyɛ bena ba niyɔ iŋ kufɛŋ ka yiki ba kɔy yo kɔy baŋ ka bɔhande ndeŋ haŋ ka Kraist, ndɛ kɔŋ bena kiyi wukahɛ hɛlɛŋ awa wundɛ kɔŋ ni ba beŋ thana teetuwa lanɛya ndeŋ baŋ. Wundɛ kɔŋ bena dunkune sɛmbɛ ka thathukuma ndeŋ thaŋ, awa ndɛ kɔŋ ni ba beŋ kɔɔ wukahɛ ba Kraist. 11Haliko kɛriŋa nama haŋ hu niyɔ kɔy yo kɔy. Amiina. 12Sailasi, wo bohe yaŋ woŋ nɔŋ wɛndaŋ, mase yama ba gbalita bena kuthagba kuthurɔy koŋ koŋ baŋ. Yaŋ thimoŋ ba bena niya kuthɔnthɔ mɛnɛ ba niya maseri ba dɔma na makutiyɛ manɔndi ma ka Masaala mɛna maŋ maŋ. Kɔɔŋ wukahɛ ka mɛŋ. 13Makɔmande ma ka biya bi ka Masaala beŋ maŋ ka Babilɔŋ, ma nɔŋ wɛnda ndeŋ woyɛrɛmɛ maŋ, toŋite bena ŋamaaŋ, awa hatiŋ wowathe woŋ Maki ni hɛlɛŋ nɛŋ. 14Maanuwandeŋ nɔŋ biya bihuwɛndiya ka Kraist. Haliko beŋ fooma bendo biiyo iŋ Kraist beŋ bi niyɔ iŋ thathukuma thathɛbɛ.

will be added

X\