1 Pita 4

1Ba na niyo Kraist nambara ka kɔtɔ nama koŋ, huna beŋ hɛlɛŋ nɛŋ gbeeŋ beŋ kiŋ ba kahinɔkɔ ka yɛthɛ bakendeŋ iŋ masiyi mamanthe ma nde iŋ wundɛ maŋ; baa wɔ yo wɔ wo niya nambara ka kɔtɔ koŋ, wundɛ sa nda thɔɔtɔ ka niya hakɛ. 2Maŋaye nda hɛ, yɔkɔŋ beŋ be ni ba siini bakendeŋ baŋ kafaydo keriŋiyo iŋ mathimo ma ka Masaala maŋ, awa wuŋ ka ba keriŋiyo iŋ ŋafiyoiŋ ŋa ka huwɔmɛtiya haŋ ŋaŋ. 3Beŋ thanki nde teetuwa malɔkɔiŋ mabɔyɛ ka niya ba thimo bi be ni Masaala na kubatho beŋ ba niya baŋ. Siini bakendeŋ baŋ teetuwɔy nde ba gboŋ ka niya bɛyiniŋ banɛnɔy, ka kufiyo ba niya kubɛi, ka yilɔ iŋ mampa, ka malɔkɔiŋ mathɔɔkɔ ma biya thuŋande ba thiiyuwe mampani haaŋ bindɛ yilɔ e bindɛ niya bɛyiniŋ baŋayaahu, mɛnɛ ba niya dekɛŋ kubatho, bɛy bakuyaahu baŋ nthɔŋ nda ba bɛŋ niya, 4Awa ka tete biya bi be ni Masaala na kubatho beŋ niyɔy thɛrɛnaŋ ba na tha nda beŋ bindɛ thɔɔtɔ ka niya bɛyiniŋ banɛnɔy ba be bindɛ kɔthɔ na bindɛ wuŋ thanke, awa wuna biyɛ bindɛ yaka bena. 5Kɛrɛ bi boheŋ ba tɔŋiyɔkɔ kuna ka Masaala, wo kɔsinɔkɔy ba kɔnsiŋina bipethɔy beŋ mɛnɛ bitukɛ beŋ. 6Wuna biyɛ nde Huseri Huyɔhɔy haŋ niyo kɛwandi ka bitukɛ beŋ hɛlɛŋ, ka bindɛ bi thankɛ nde thonkino beŋ awa yɔkɔŋ siini namɛŋ baŋ tɛŋ ka mapeye maŋ nɔŋ ba ka wɔ yo wɔ; huŋ niyo nde kɛwandi kɛnamɛŋ wuna bindɛ niyɔ iŋ sii ka yinɛŋ namɛŋ beŋ nɔŋ na Masaala niyɔ iŋ sii na. 7Mapeye ma ka bɛy yo bɛy thuriye, huna yɔkɔŋ beŋ be kiyi thankaha ndeŋ thaŋ natoloŋ e beŋ niyɔ biya bi punku kɛriŋiyɛ yɛthɛ namɛŋ, wuna beŋ punku niya kuraminɛ. 8Ka thinthi ka bɛy yo bɛy, thimiyandeŋ maŋaye ka thathukuma ndeŋ thaŋ, baa mathimo ma kɔŋ puntuntande thaaya bɛyiniŋ banɛnɔy fooma. 9Yɛritandeŋ bathurɔy wu ka iŋ gbonkiyɔkɔ. 10Niyiyandeŋ ka munkii mu dunkuno beŋ muŋ, haliko na beŋ niiye badethitekeŋ biyɔhɔi bi dunkune Masaala munkii nama muhakuwande muŋ. 11Wɔ yo wɔ wo ni kɛwandi, yɔkɔŋ ndɛ be ni kɛwandi huseri hu ka Masaala haŋ; wɔ yo wɔ wo mase biya bihɛna, ndɛ niyɛŋ wuŋ iŋ sɛmbɛ ba dunkune niŋ Masaala baŋ ba wuŋ niya. Huna Masaala gbuŋunuwa ka bɛy yo bɛy maŋaye ka Yisɔs Kraist, wo iŋ yiki woŋ mɛnɛ sɛmbɛ kɔy yo kɔy. Amiina. 12Bendo biyaŋ bi thimo yaŋ, baŋ niyɔ thɛrɛnaŋ ba ŋagbɛrɛŋɛŋ ŋathoonɛ-thoonɛ ŋa bena pɛnki ŋaŋ. Baŋ siyi ba dɔma na bɛy bathɛrɛnaŋ bɛna baŋ baŋ. 13Kɛrɛ yehitɔkɔŋ ba na beŋ niya nambara nɔŋ na niyo nde Kraist nambara na, wuna beŋ nɔŋ yehitɔkɔ wumandiŋ naa yiki nama baŋ tɔŋinɔkɔy. 14Yehitɔkɔŋ mɛnɛ beŋ yako ba na beŋ biya bi ka Kraist; wuŋ tɔŋɔŋ ba dɔma na Yina wo iŋ sɛmbɛ woŋ, Yina wo ka Masaala woŋ, tutɔi bena. 15Mɛnɛ wɔ yo wɔ ka beŋ niyo nambara, wu bɛiŋ niyɔ na bakɔri na wundɛ, maa batuwaŋ, maa wɔ wo tha putiyɔ siraŋ, maa banahiki. 16Mɛnɛ beŋ niyo nambara ba na beŋ Kristɛni, baŋ niyɔ kuyaahu ba huŋ, kɛrɛ thiyaŋ Masaala na maamo ba na beŋ iŋ keŋ ku ka Kraist koŋ. 17Malɔkɔ maŋ tɛŋ ma kukɔnsɔŋɔŋ ku ka Masaala koŋ sesuwe maŋ, awa biya bi ka Masaala beŋ bina yenke konsiŋino. Mɛnɛ Masaala sesuwe kukɔnsɔŋɔŋ nama koŋ kɛntuŋ, wu kɔŋ yaŋ niyɔ kɔnthɔhili ba bi tha ni lanɛya Huseri Huyɔhɔy hu ŋaye ka Masaala haŋ. 18Nɔŋ na tepe magbali ma ka Masaala maŋ na, na “Mɛnɛ wuŋ niyɔi wukahɛ ba wɔ thumbɛ ba niyo kisi, mbu ntiŋ nda ba bahakɛŋ bi tha putiyɔ Masaala na beŋ?” 19Huna, beŋ hɛlɛŋ, bendo niya nambara beŋ ba na thimo Masaala ba beŋ niyo nambara, pitekeŋ niŋ awa e beŋ kɔ niya bayɔhɔy. Beŋ punkeŋ ba niŋ piteke wo yehinuwɛ bena woŋ.

will be added

X\