1 Pita 1

1Yama Pita na, baseri wothɔɔkɔ wo ŋindi Yisɔs Kraist woŋ. Yama tɔŋitɛ kuthagba koŋ koŋ ka biya bi ka Masaala beŋ, bi key dɔŋɔ huthahinɛya ka ŋakuyɛkɛŋ ŋa ka Pɔntɔsi, Kaletiya, Kapadosiya, Esiya, mɛnɛ ka Bithiniya. 2Fanda ntuŋ woŋ Masaala yɛthi nde bena maŋaye ka madɛɛnki nama maŋ. Yina wo ka Masaala woŋ ni nde bena ba beŋ niyɔ biya bi ka Masaala haliko beŋ be putiyɔ Yisɔs Kraist na mɛnɛ ba methino iŋ wasi nama baŋ, naa tuku ndɛ ba beŋ. Haliko Masaala toŋine bena mathimo fooma e dunkune bena thɛbina thukuma. 3Miŋ thiyɛŋ Masaala na maamo, Fanda ka Mariki ntuŋ woŋ Yisɔs Kraist. Masaala kutiye mina, huna ndɛ mpuu mina wuŋama ba niyɔ mpati nama maŋaye ka ŋayina Yisɔs Kraist na ka tuka haŋ. Wuna biyɛ miŋ kɔŋ nda niyɔ iŋ kukahe thukuma timo tima. 4Mindo dethi ba biyɔ nanhulu ba kɔsiniyɛ mina Masaala ka ariana baŋ. Nanhulu babɛina bɛŋ sa tuunu, bɛŋ sa teetuwɔ, awa bɛŋ sa piriŋ. 5Sɛmbɛ ba ka Masaala baŋ kɔsɔŋ bena wuthɛbinɛ thukuma maŋaye ka lanɛya ndeŋ baŋ, ba niyo kisi naa Masaala tɔŋɔŋ na wundɛ niye biya kisi ka malɔkɔ mamankɛ maŋ. 6Bɛyiniŋ baŋ baŋ ba niyɛŋ haliko beŋ be niyɔ iŋ mayehitɔkɔ hali hintiŋ lɔkɔ banɔndi beŋ kɔŋ teetuwɔ thathukuma ba lɔkɔ bathurɔy ba nambarɛŋ bahakuwande babɔyɛ ba bena gbɛrɛŋɛŋ baŋ. 7Saabu baŋ ba kiŋ ba tɔŋina ba wuŋ niyɔ na beŋ ni Kraist na lanɛya iŋ lanɛya bagbeeŋ baŋ. Ba hali boyi buŋ, bu punku ba teetuwɔ buŋ, bu kɔŋ gbɛriŋina ka buu ba kɔthɔ mɛnɛ bugbeeŋ buna; nɛna hɛlɛŋ lanɛya bakendeŋ baŋ ka Kraist. Ba yameŋ kaha mɔlɔŋ ayaŋ ba boyi, kɛrɛ ba kɔŋ hɛlɛŋ gbɛriŋina ba kɔthɔ mɛnɛ bagbeeŋ bɛna, wuna beŋ gbuŋunuwa e niyo yiki ka malɔkɔ ma Yisɔs Kraist tɔŋina. 8Beŋ thimo niŋ, hali na ba hɛ beŋ niŋ kutu na; awa beŋ ni niŋ lanɛya, hali na ba beŋ niŋ kutu na. Huna beŋ kiŋ iŋ mayehitɔkɔ mamandiŋ haaŋ wɔ ka wo punku tɛpa mayehitɔkɔ maŋ maŋ. 9Beŋ kiŋ iŋ mayehitɔkɔ baa beŋ niyo nda kisi. Wuŋ, wuna saabu ba ka lanɛya bakendeŋ baŋ. 10Banabiŋ beŋ gbonkoy nde ba munkii mu si niyɔ mukendeŋ muŋ. Bindɛ dethe nde bathurɔy, awa e bindɛ thɔnthiŋina ba kisi baŋ baŋ. 11Banabiŋ beŋ yole nde ba kɔthɔ ti bɛyiniŋ baŋ baŋ niiye mɛnɛ na bɛŋ niiye. Yina wo ka Kraist kiŋ nde bindɛ kaake, awa wundɛ kɔŋ nde tɔŋɔŋ ti bɛyiniŋ baŋ baŋ niiye, naa ndɛ ni hunabi ba nambarɛŋ ba nɔŋ Kraist niyɔ baŋ mɛnɛ ba yiki ba yeŋ kahɛŋ baŋ. 12Masaala toŋine banabiŋ beŋ beŋ ba bindɛ thana niya wali ba yɛthɛ namɛŋ, kɛrɛ bindɛ niyiyɛ nde bena wali, na nde bindɛ gbonkoy ba bɛyiniŋ ba thanki nda beŋ yuyɛ maŋaye ka baseriŋ bi koyiŋɛ nde Huseri Huyɔhɔy haŋ, bi niyɛ wali iŋ sɛmbɛ ba ka Yina wo ka Masaala, wo ŋindo maŋaye ka ariana woŋ. Hali hintiŋ malekɛŋ beŋ bi thimoŋ ba methino bɛyiniŋ baŋ baŋ. 13Siyuwaŋ bathurɔy ba bɛyiniŋ ba beŋ ba niya baŋ. Niyɔŋ biya bi kɛriŋiyɛ yɛthɛ bakɛnamɛŋ. Kukahe ndeŋ thukuma kunthe ku niyɔiŋ thaduba tha beŋ si dunkuno thaŋ ti Yisɔs Kraist tɔŋina. 14Niyɔŋ biya bi mɛyiyɛ yamari ka Masaala, Fanda ndeŋ woŋ, awa baŋ mɛkɛŋ ba siini ndeŋ baŋ keriŋiyo iŋ ŋafiyoiŋ ŋa nde iŋ beŋ ŋaŋ naa nde hintiŋ beŋ biya bi be kɔthɔ Huseri Huyɔhɔy haŋ ba Yisɔs Kraist. 15Kɛrɛ, niyɔŋ biya bi kathiŋɔkɔy ka bɛyiniŋ fooma banɛnɔy ba niya, nɔŋ na Masaala wo thiyɛ bena woŋ na wo kathiŋɔkɔy ka bɛyiniŋ fooma banɛnɔy. 16Magbali ma ka Masaala maŋ tepe, na “Niyɔŋ bendo kathiŋɔkɔy ka banɛnɔy baa wɔ na yaŋ wo kathiŋɔkɔy ka banɛnɔy.” 17Naa beŋ kɔ ni kuraminɛ ka Masaala, beŋ kɔŋ niŋ dɔŋ na Fanda ntuŋ woŋ. Wundɛ na kɔnsɔŋɔŋ biya fooma, awa wundɛ hakinandeta ka kɔnsiŋina haŋ; wundɛ kɔŋ kɔnsɔŋɔŋ womo woma maŋaye ka ba thanki wundɛ niya baŋ. Huna, na hintiŋ beŋ kafaydo, payɔŋ niŋ wuseŋa. 18Beŋ kɔthɛŋ ti thunkuno wuŋ ba bena bakiŋa maŋaye ka maniyɔ mamayɛini ma ka siini ndeŋ ma peyo nde beŋ maŋ iŋ mbembɛŋ ndeŋ beŋ. Awa ntha kutɛ ki punku teetuwɔ, nɔŋ na siliba maa boyi teetuwɔ na. 19Saraka bɛna nde ba kahɛ mɔlɔŋ ba ka Kraist, wo thɔyande nde woŋ nɔŋ taka wohatiyɛ wo ka iŋ kɛrɛ maa tɛmpɛ. 20Wundɛ thanki nde yetho iŋ Masaala saanuŋ ka fay woŋ ba yehinuwo, awa wundɛ toŋino ka malɔkɔiŋ mamankɛ maŋ maŋ saathɛ ba kendeŋ. 21Maŋaye ka Kraist beŋ ni Masaala na lanɛya, wo ŋayinɛ niŋ ka tuka haŋ woŋ e niŋ dunkune yiki; wuna biyɛ beŋ nda niya Masaala na lanɛya awa beŋ nda niyɔ iŋ kukahe thukuma ba bɛyiniŋ ba ndɛ ni lahiri baŋ. 22Beŋ thanki putiyɔ mathanani maseŋa maŋ ba Yisɔs Kraist, awa wuna niyɛ ba beŋ mɛthinɔkɔ ŋaye ka hakɛŋ bakendeŋ baŋ. Wuna biyɛ beŋ thimo mbɛnda ndeŋ bi beŋ ka lanɛya baŋ wubɔyɛ-bɔyɛ. Thimiyandeŋ iŋ thathukuma ndeŋ thaŋ fooma. 23Thampa tha ka Masaala thapethɔy thaŋ, thaseŋa thaŋ kɔy yo kɔy, ni ba beŋ mpoo hɛlɛŋ wuŋama, nɔŋ mpati bi iŋ komisa wowathe wo sa tuku, wɔ kutɛ wo tuku nɔŋ na wɔmɛti tuku na. 24Nɔŋ na tepe magbali ma ka Masaala maŋ na, na “Biyamɛti fooma athɔyande iŋ hande haŋ, awa yiki namɛŋ baŋ fooma athɔyande iŋ ŋawumbɛ ŋa ka hande haŋ ŋaŋ. Hande haŋ hu kɔŋ thithi, awa ŋawumbɛ ŋaŋ fooma ayayi, 25kɛrɛ thampa tha ka Mariki woŋ thaŋ tha kiŋ thaseŋa timo tima.” Thampa thaŋ thaŋ thɛna Huseri Huyɔhɔy hu beŋ niya kɛwandi haŋ.

will be added

X\