1 Yɔni 4

1Mbɛndaŋ beŋ, baŋ hɛ ni lanɛya biya bi tɛpi beŋ ba dɔma na bi kiŋ iŋ Yina wo ka Masaala woŋ, kɛrɛ gbɛriŋinaŋ hintiŋ bindɛ mɛnɛ Yina wo ŋaye ka Masaala na iŋ bindɛ, baa banabiŋ bibahothiŋ bibɔyɛ pinthi hɛ ka fay woŋ. 2Wɔ yo wɔ wo tɛpi ba dɔma na Yisɔs Kraist see ka faido iŋ kɔtɔ ku ka wɔmɛti, wundɛ na iŋ Yina wo ŋaye ka Masaala ka woŋ. Nɛna beŋ kothiye ba dɔma na wɔ bɛina kiŋ iŋ Yina wo ka Masaala woŋ. 3Kɛrɛ wɔ yo wɔ wo buuhuwɛ ba dɔma na Yisɔs tha see ka faido iŋ kɔtɔ ku ka wɔmɛti, ndɛ ka iŋ Yina wo ka Masaala woŋ. Yina wo ka Hadeŋ wo ka Kraist woŋ na iŋ wɔ bɛina. Beŋ yuye nde ba yina wobɛina kɔ saa, awa ka tete ndɛ kiŋ nda ka fay woŋ. 4Mpatiŋ beŋ, beŋ kiŋ mpati bi ka Masaala, e beŋ thanka punka banabiŋ bibahothiŋ beŋ; baa Yina wo ni wali kaake kendeŋ woŋ, ndɛ kiŋ iŋ sɛmbɛ ayaŋ ba yina wo ni wali kaake ka biya bi ka fay woŋ beŋ. 5Banabiŋ bibahothiŋ beŋ beŋ baŋ, bi kɔŋ gbonkoy ba bɛyiniŋ ba ka fay woŋ, awa biya bi ka fay woŋ beŋ bi kɔŋ bindɛ poniyɛ kuiha, baa bindɛ hɛlɛŋ nɛŋ bi kiŋ biya bi ka fay woŋ. 6Kɛrɛ miŋ, miŋ kiŋ biya bi ka Masaala, bɛna wɔ o wɔ wo ka Masaala ndɛ kɔŋ mina poniyɛ kuiha. Kɛrɛ wɔ wo ka wo ka Masaala woŋ, wundɛ sa mina poniyɛ kuiha. Kɛna miŋ kothiye mahakande ma ka Yina wo ka Masaala woŋ iŋ yina wo thɔkɔŋ biya woŋ. 7Mbɛndaŋ beŋ, miŋ thimiyandeŋ, baa ka Masaala kɛna ŋaye mathimiyande. Wɔ yo wɔ wo thimo biya bihɛna, Masaala na mpɛɛ niŋ, awa ndɛ kɔthɛŋ Masaala na. 8Wɔ yo wɔ wo sa thimo biya bihɛna, ndɛ kɔita Masaala na, baa Masaala wɔ na wo iŋ mathimo. 9Awa Masaala tɔŋɔŋ mathimo nama maŋ ba miŋ ka tɔŋita Hati nama wowunthe woŋ napethi ka faido haliko miŋ be kutu sii maŋaye kɛnama. 10Wuŋ baŋ wuna dɔma mathimo: miŋ kutɛ thimo Masaala na ye, kɛrɛ Masaala na thimo mina e tɔŋita Hati nama woŋ ba si niyɔ saraka ba mina pɛniyɛ hakɛŋ ba thanki miŋ niya baŋ. 11Mbɛndaŋ beŋ, mɛnɛ Masaala thimo mina wumandiŋ nɔŋ nanaŋ baŋ, miŋ nɛnɛ yɔkɔŋ miŋ be thimiyande. 12Wɔmɛti yo ka hɛ wo kutɛ Masaala na. Mɛnɛ miŋ thimiyande, Masaala bɔhande iŋ miŋ, awa mathimo nama maŋ niyɔy mathankinuwɛ kɛntuŋ. 13Miŋ kɔthɛŋ ba dɔma na miŋ bɔhande iŋ Masaala, awa wundɛ hɛlɛŋ ndɛ bɔhande iŋ miŋ, baa ndɛ dunkune mina Yina wokɛnama woŋ. 14Awa miŋ kute nde ba dɔma na Fanda ntuŋ woŋ ŋindi nde Hati nama woŋ ba si niyɔ Banikisi wo ka biya bi ka faido beŋ, huna miŋ tepe biya haŋ. 15Wɔ yo wɔ wo tɛpi ba dɔma na Yisɔs na Hati ka Masaala woŋ, wɔ bɛina bɔhande iŋ Masaala awa Masaala bɔhande iŋ wɔ bɛina. 16Awa miŋ kɔthɛŋ nagberekethe e miŋ niya lanɛya ba dɔma na Masaala thimo mina. Masaala wɔ na wo iŋ mathimo, awa wɔ yo wɔ wo key ka kɔtɔkɔy iŋ thimo, wɔ bɛina kɔŋ bɔhande iŋ Masaala, awa Masaala kɔŋ bɔhande iŋ wɔ bɛina. 17Mathimo nama maŋ niyɔy mathankinuwɛ kɛntuŋ haliko miŋ be nɔŋ niyɔ iŋ kaha thukuma ka malɔkɔ ma ka kukɔnsɔŋɔŋ koŋ maŋ. Awa miŋ kɔŋ niyɔ iŋ kaha thukuma haŋ haŋ baa siini bakɛntuŋ baŋ ka faido ba kɔŋ nda niyɔ nɔŋ na ba ka Kraist baŋ na. 18Kama yo kama ka mathimo, payɔ ka kɛndɛ, baa mathimo mathankinuwɛ mɛna kanthi payɔ. Payɔ haŋ hu kɔŋ see ka malɔkɔ ma biya gbasiŋito maŋ. Wuna biyɛ wɔ yo wɔ wo niyɔ iŋ payɔ, ndɛ ka iŋ mathimo mathankinuwɛ. 19Miŋ thimiyande baa Masaala yenke mina thimo. 20Mɛnɛ wɔ tepe ba dɔma na wundɛ athimo Masaala na, kɛrɛ wundɛ thambo wɛndama na, wɔ bɛina bahothi na wundɛ. Mɛnɛ wundɛ tha thimo wɛndama na, wo ndɛ kutiyɔkɔ woŋ, nama wundɛ punku thimo Masaala na, wo ba ndɛ kutu woŋ? 21Kraist dunkune mina siraŋ baŋ ba dɔma, na wɔ yo wɔ wo thimo Masaala na kiŋ hɛlɛŋ ba thimo wɛndama na.

will be added

X\