1 Yɔni 3

1Siyuwaŋ hɛ nɔŋ na thimo mina Fanda ntuŋ woŋ wumandiŋ na. Thimo nama humandiŋ haŋ ba miŋ ni ba miŋ domo mpati bikɛnama, awa nɛna miŋ yaathi. Biya bi ka fay woŋ beŋ kɔita Masaala na; wuna biyɛ bindɛ kɔita mina. 2Biya bi thimo yaŋ beŋ, miŋ kiŋ nda mpati bi ka Masaala, kɛrɛ wuŋ toŋineketa hɛ nagberekethe na miŋ si niiye. Kɛrɛ miŋ kɔthɛŋ ba dɔma, naa Kraist tɔŋinɔkɔy, miŋ kɔŋ niyɔ nɔŋ na wundɛ na, baa miŋ kɔŋ niŋ kutu nɔŋ na wundɛ na gbeeŋ. 3Wɔ yo wɔ wo iŋ kukahe thukuma koŋ koŋ ka Kraist, ndɛ kiŋ ba niyɔ wɔ mɛthɛ nɔŋ na Kraist wɔ mɛthɛ na. 4Wɔ yo wɔ wo ni hakɛ, ndɛ thinke Siraŋ ba ka Masaala baŋ; baa ba niya hakɛ huna thinka Siraŋ ba ka Masaala baŋ. 5Beŋ kɔthɛŋ ba dɔma na Kraist tɔŋinɔkɔy ba si sɛkitha hakɛŋ baŋ, awa beŋ kɔthɛŋ ba dɔma na wundɛ tha ni hakɛ hali. 6Huna wɔ yo wɔ wo bɔhande iŋ Kraist ndɛ sa nda key ka kɔtɔkɔy ka niya hakɛ; kɛrɛ wɔ yo wɔ wo key ka kɔtɔkɔy ka niya hakɛ, ndɛ kutiyeketa hɛ niŋ awa ndɛ kɔita niŋ. 7Mpatiŋ beŋ, baŋ mɛkɛŋ ba wɔ yo wɔ bena thɔkina. Wɔ yo wɔ wo ni bɛyi bathumbɛ wɔ thumbɛ na wundɛ, nɔŋ na Kraist wɔ thumbɛ na. 8Wɔ yo wɔ wo key ka kɔtɔkɔy ka niya hakɛ ndɛ kiŋ ka Wayi Womandiŋ woŋ ka, baa Wayi Womandiŋ woŋ ni nde hakɛ there ka masɛsi maŋ. Saabu ba toŋineke Hati ka Masaala woŋ baŋ bɛna ba teetuwa wali ba ka Wayi Womandiŋ woŋ baŋ. 9Mɛnɛ wɔ niyɔy hati ka Masaala, ndɛ sa nda key ka kɔtɔkɔy ka niya hakɛ, baa maniyɔ ma ka Masaala maŋ gbeeŋ ma kiŋ iŋ wundɛ. Awa wundɛ sa nda punku kaa ka kɔtɔkɔy ka niya hakɛ, baa Masaala mpuu nda niŋ. 10Wɔ yo wɔ wo tha ni bɛyiniŋ bayɔhɔy, maa ndɛ tha thimo wɛndama na, wɔ bɛina hati ka Masaala kutɛ. Mahakande maŋ mɛna maŋ maŋ nagberekethe mateete ma ka mpati bi ka Masaala beŋ mɛnɛ bi ka Wayi Womandiŋ woŋ beŋ. 11Huseri hu yuye nde beŋ haŋ there ka masɛsi maŋ huna ba miŋ thimiyande. 12Miŋ bɛiŋ niyɔ nɔŋ Keni. Wundɛ kiŋ nde ka Wɔ Nɛnɔy woŋ ka, awa wundɛ kore nde wɛndama na Ebɛli. Mbɛ hu kore ndɛ niŋ? Ndɛ kore nde niŋ baa bɛyiniŋ ba ni nde wundɛ baŋ bɛŋ anɛnɔ, awa ba ni nde Ebɛli baŋ bɛŋ ayɔhɔ. 13Mbɛndaŋ beŋ, baŋ niyɔ thɛrɛnaŋ mɛnɛ biya bi ka faido beŋ thambo bena. 14Miŋ kɔthɛŋ ba dɔma na miŋ pɛyɛŋ tuka haŋ, awa miŋ saa ka sii baŋ. Miŋ kɔthɛ huŋ, baa miŋ thimo mbɛnda ntuŋ beŋ. Wɔ yo wɔ wo ka iŋ mathimo, haaŋ hɛ wundɛ kiŋ ka pothi ka sɛmbɛ ba ka tuka haŋ baŋ. 15Wɔ yo wɔ wo thambo wɛndama na, bakɔri na wundɛ; awa beŋ kɔthɛŋ ba dɔma na bakɔri woŋ ka iŋ sii ba kɔy yo kɔy kaake kɛnama. 16Kraist see dunkuŋ sii nama baŋ ba mina toŋine na mathimo. Awa miŋ hɛlɛŋ nɛŋ yɔkɔŋ miŋ be dunkuŋ siini bakɛntuŋ baŋ ba mbɛnda ntuŋ beŋ. 17Mɛnɛ bananhulu kute wɛndama na wo pankɛ si kaande wu ka iŋ ntha, awa ndɛ tha niŋ mase, nama wundɛ toŋine ba dɔma na wundɛ athimo Masaala na? 18Mpatiŋ beŋ, miŋ bɛiŋ hɔkɔŋ thimo biya beŋ ka magbonkoy, kɛrɛ miŋ thimoyŋ bindɛ thimo hugbeeŋ haŋ hu tɔŋinɔkɔ haŋ ka mani. 19Thimo haŋ haŋ ni ba miŋ kɔthɔ ba dɔma na miŋ kiŋ biya bi ka nɔndi baŋ, awa miŋ sa nɔŋ payɔ ba kutiyɔkɔ Masaala na. 20Awa mɛnɛ thathukuma thakɛntuŋ thaŋ thonkine mina, miŋ kɔthɛŋ ba dɔma na Masaala yameŋ bukuya ba thathukuma thakɛntuŋ thaŋ, awa ndɛ kɔthɛŋ bɛyi yo bɛyi. 21Mbɛndaŋ bi thimo yaŋ, mɛnɛ thathukuma thakɛntuŋ thaŋ tha mina thonkine, miŋ kiŋ iŋ kaha thukuma ka kɔtɔkɔy ka Masaala. 22Miŋ kɔŋ kutu ntha yo ntha ki miŋ thɔnthɔŋɔŋ Masaala na, baa miŋ yɛrɔkɔy sirani nama baŋ, e miŋ kɔ niya bɛyiniŋ ba niŋ yehe. 23Sirani nama baŋ bɛna baŋ baŋ: ba miŋ niya lanɛya ka Hati nama woŋ Yisɔs Kraist, e miŋ thimiyande, nɔŋ na tepe nde wundɛ mina na. 24Wɔ yo wɔ wo putiyɔ sirani nama baŋ, ndɛ bɔhande iŋ Masaala, awa Masaala bɔhande iŋ wundɛ. Awa Yina wo dunkune mina Masaala woŋ ni ba miŋ kɔthɔ ba dɔma na miŋ bɔhande iŋ Masaala.

will be added

X\