1 biKɔrinthi beŋ 9

1E yaŋ ka wɔ ka sako nama? E yaŋ ka baseri wothɔɔkɔ? E yaŋ tha nde kutiyɔkɔ Yisɔs na, Mariki ntuŋ woŋ? E beŋ kutɛ kuna ku ka wali bakiyaŋ ba ka Mariki woŋ? 2Yaathi beŋ na baa siini bakendeŋ baŋ ba kiŋ nda mabɔhande iŋ Mariki woŋ, awa beŋ, beŋ na nda maseri makiyaŋ ba dɔma na yaathi, yaŋ kiŋ baseri wothɔɔkɔ wo ka Mariki woŋ. 3Naa biya tharani yama, bɛyiniŋ baŋ baŋ bɛna yaŋ bindɛ kɔ thɔnthɔŋɔŋ haliko ba fuŋunuwa yɛthɛ bakiyaŋ: na 4E yaŋ ka iŋ mayoho ba dunkuno muthɔma iŋ muthiiye ba wali bakiyaŋ baŋ? 5E yaŋ ka iŋ mayoho ba yema mathɔyande ma ka baseriŋ bithɔɔkɔ bibintheŋ beŋ iŋ mbɛnda bi ka Mariki woŋ mɛnɛ Pita, ba yɛnta yɛrɛmɛ wo niyɛ lanɛya e diŋa niŋ ka thabiyasi niŋ thaŋ? 6Maa e ba hɔŋ Banabasi iŋ yaŋ mina thankɛ mindo ba niyiyɔkɔ wali muthɔma mukɛntuŋ? 7Mbɛ kurugba wobɛina wo yɔkɔŋ ndɛ niyiyɔkɔ muthɔma nama wali ka hukurugba haŋ? Mbɛ bamahi wobɛina wo sa thɔŋ muthuu mu ka yiya nama haŋ? Mbɛ batɔli wobɛina wo sa thɔŋ manɔnɔ ma ka ndansi nama kiŋ? 8Yaŋ sa peye ka mathɔyande ma ka bɛyiniŋ ba niyɔ tima o tima baŋ, baa Siraŋ baŋ gbonkoi sɔkɔ hunthe hubɛina. 9Miŋ ni karaŋ ka Siraŋ ba ka Musa baŋ, na “Ba yuku hothi hu ka manaŋ woŋ haŋ naa ndɛ kɔ yina sɔkiyiyɛ paka nda baŋ.” E ba hɔŋ ba manani bɛna bohe nde Masaala hɔkɔŋ sɛmbɛ nagbɛti? 10E ba hɔŋ miŋ kutɛ nde ndɛ dɔŋ na gbonkoi nɛŋ wundɛ? Nɛna huŋ yaathi; huŋ gbalo nde ba miŋ. Bathɛɛli woŋ iŋ baŋɔŋ woŋ kiŋ ba niya wali iŋ matute yima ba kuta kufɛŋ ŋaye ka paka baŋ. 11Miŋ paye munkiŋ mu ka Masaala muŋ ka mateete makendeŋ. E wu kɔŋ yaŋ ba mɛnɛ miŋ kute munkiŋ mu ka dunia baŋ baŋ muŋ maŋaye kendeŋ? 12Mɛnɛ biya bihɛna niyɔi iŋ mayoho ba tute thukuma ba kuta munkiŋ muŋ muŋ maŋaye kendeŋ, e miŋ, miŋ yameta niyɔ iŋ mayoho ba dethiteke ba kuta muŋ muŋ maŋaye kendeŋ? Kɛrɛ miŋ, miŋ tha niye wali mayoho maŋ maŋ. Miŋ mɛyi niya kuthithi bɛyi o bɛyi haliko na sa miŋ yinthiniyande kuyeŋ ka gboŋa ba ka Huseri Huyɔhɔi hu ba Kraist haŋ. 13Yaathi beŋ kɔthɛŋ ba dɔma na biya bi ni wali ka banka ba ka Masaala baŋ beŋ kɔŋ kute muthɔma namɛŋ ŋaye kɛndɛ, awa bi dunkuŋ saraka baŋ beŋ ka bɛsɛ baŋ kɔŋ kutu niŋ bakɛnama ka saraka babɛina. 14Nanthe nathesi, Mariki woŋ ndɛ na niyɛ yamari na wɔ o wɔ wo ni kɛwandi Huseri Huyɔhɔi haŋ kiŋ ba kute muthɔma kɛndɛ. 15Kɛrɛ mayohoni maŋ maŋ fooma yaŋ tha mɛŋ niye wali, ba hintiŋ tɛpa na gbale bɛyiniŋ baŋ baŋ ba haliko na yaŋ kute mayohoni maŋ maŋ ba yɛthɛ niŋ. Yaŋ yenkeŋ tuka saanuŋ wɔ ba yama kanita bɛyi ba yaŋ ba gbuŋuneke. 16Yaŋ ka iŋ mayoho ba niyɔkɔ kaba ba na yaŋ ni kɛwandi Huseri Huyɔhɔi haŋ. Mahɛŋ mabɛina hintiŋ nthɔŋ aniyo na yaŋ yamari ba huŋ niya kɛwandi. Wuŋ sa yɔhɔ ba yaŋ mɛnɛ yaŋ tha ni kɛwandi Huseri Huyɔhɔi haŋ. 17Mɛnɛ yaŋ ni wali nɔŋ mayɛthi, ba dɔma na naa yaŋ thimo yaŋ niya wali, naa yaŋ tha thimo yaŋ dɔŋɔ, yaŋ kɔŋ nde dethiteke ba thunkuno. Kɛrɛ yaŋ boheŋ ba wuŋ niya nɔŋ gbɛthɛŋ bakiyaŋ, baa Masaala thanki yama dunkune gbɛthɛŋ babɛina. 18Mbu mbɛ ntiŋ nda kuthunkuŋ kukiyaŋ? Kuthunkuŋ kukiyaŋ kuna ba niyɔ iŋ hɛɛra ba ka niya kɛwandi wu ka mɔlɔŋ, iŋ ba thana niye mayohoni niŋ maŋ wali ka wali bakiyaŋ baŋ ba Huseri Huyɔhɔi haŋ. 19Yaŋ kiŋ iŋ sako; yaŋ ka waayi wo ka wɔ. Kɛrɛ yaŋ sikinɔkɔ waayi wo ka wɔ o wɔ haliko yaŋ be kutu na yaŋ yoseke biya bibɔyɛ ti bi yaŋ punku yɔsa. 20Naa yaŋ kɔ ni wali iŋ biYusu beŋ, yaŋ kɔŋ niyɔkɔ nɔŋ woYu ba haliko ba bindɛ yoseke, hali na niyɔi wuŋ na yaŋ ka ka pothi ka Siraŋ ba ka Musa baŋ. Yaŋ kɔŋ niyɔkɔ nɔŋ bindɛ mɛnɛ kɔ ni wali iŋ bindɛ ba haliko ba bindɛ yoseke. 21Nɛna hɛlɛŋ naa yaŋ kɔ ni wali iŋ siyani bahɛna baŋ, yaŋ kɔŋ niyɔkɔ nɔŋ siya bahɛna, nɔŋ wɔ wo ka ka pothi ka Siraŋ ba ka Musa baŋ, ba haliko ba yoseke siyani bahɛna baŋ. Wuŋ, wuŋ ka ye na yaŋ putiyeta Siraŋ ba ka Masaala baŋ, baa, yaathi, yaŋ kiŋ ka pothi ka Siraŋ ba ka Kraist baŋ. 22Ka bikɔɔyuwɛ ka lanɛya baŋ beŋ, yaŋ niyɔkɔi nɔŋ wɔ kɔɔyuwɛ, ba haliko ba bindɛ yoseke ka Kraist. Bɛna yaŋ sikiyɔkɔi ntha o ntha ka biya fooma, ba haliko gboŋa o gboŋa yaŋ be punku niya kisi biya binɔndi. 23Bɛyiniŋ baŋ baŋ fooma yaŋ ni bɛŋ ba saathɛ ba Huseri Huyɔhɔi haŋ, ba haliko yaŋ be kutu kufɛŋ ka thaduba tha ka Huseri Huyɔhɔi haŋ thaŋ. 24Yaathi beŋ kɔthɛŋ ba dɔma na biya bibɔyɛ bi kɔŋ sɛkɛthi kufɛŋ ka kugbakande, kɛrɛ wɔ wunthe nape ka bindɛ ndɛ na kutu kuthunkuŋ ku ka kugbakande koŋ. Bɛna tharaŋ, ba haliko beŋ be kutu kuthunkuŋ ku ka kugbakande koŋ koŋ. 25Wɔ o wɔ wo kɔsinɔkɔ ba kugbakande, ndɛ kɔŋ kutunɔkɔ ka thanuwa haŋ, ba haliko ndɛ be punku kuta nɛmu wobompa wo ba lɔkɔ bathurɔi woŋ. Kɛrɛ miŋ, miŋ kɔŋ kutunɔkɔ ba kuthunkuŋ ku kɔi o kɔi. 26Huna biyɛ e yaŋ kɔ thara toloŋ ba pɛnka mapeye maŋ. Yaŋ ka nɔŋ wɔ thani kuthunkande ba kɔ thunka kufenaŋ koŋ. 27Yaŋ kɔŋ thunkɔkɔ haliko ba kahinuwa kɔtɔ niŋ koŋ iŋ ba kuŋ punka kɛriŋiyɛ wubunthu, haliko yaŋ be tha dɔma na yaŋ teŋeta ba kugbakande koŋ mahɛŋ ma na thanki nda yaŋ thiya biya bibɔyɛ ba si thɔɔtɔ ka kugbakande koŋ.

will be added

X\