1 biKɔrinthi beŋ 5

1Ka tete, wuŋ tepo yaathi na ŋabɛi ŋanɛnɔi ŋa kiŋ mateete makendeŋ ŋa hali hintiŋ biya bi be kɔthɔ nɔndi baŋ beŋ ba Masaala, bindɛ sa ŋɛŋ ni. Ba yaŋ tepo ba dɔma na wɔ kɔŋ kei kaŋ ŋɔɔkɔ iŋ wɔtɔ wo ka fandama. 2Mbɛ ba beŋ niyeke kaba ka thinthi ka bɛina? Beŋ kiŋ nde ba huŋ ŋuriyɛ wumandiŋ, awa wɔ wo niyɛ wuŋ woŋ, wundɛ kiŋ ba fuŋuto ŋaye ka makɔmande ndeŋ maŋ. 3Hali na niyɔi wuŋ na yaŋ tha penkitiye, kɛrɛ ka thukuma niŋ haŋ kaake yaŋ kiŋ iŋ beŋ. Awa, nanthe nthuŋ nɔŋ yaŋ kiŋ nde kɛndɛ, yaŋ thanki nda kɛriŋa kithi baŋ baŋ ka keŋ ku ka Mariki wokɛntuŋ woŋ Yisɔs ba wɔ bɛina wo niyɛ bɛyi baŋ baŋ woŋ. Naa beŋ thuŋande ka tha banthe, awa e beŋ siyuwa nɔŋ na nde yaŋ keriŋe kithi baŋ baŋ mɛnɛ yaŋ kiŋ nde kɛndɛ, awa e sɛmbɛ ba ka Mariki wokɛntuŋ woŋ Yisɔs Kraist baŋ niyɔ iŋ beŋ, 5sɛkithaŋ wɔ wobɛina e beŋ niŋ dunkuna ka Sithani, haliko na kɔtɔ nama koŋ teetuwo, e yina wokɛnama woŋ niyo kisi ka malɔkɔ ma nɔŋ Mariki woŋ see. 6Wuŋ thumbeta ba beŋ niyɔkɔ kaba. Beŋ kɔthɛŋ nɔŋ magbonkoi maŋ, na “Yisithi woyetenaŋ ndɛ kɔŋ ni ba kutoŋ koŋ ŋata fooma.” 7Fuŋunaŋ hakɛ babɛina ba nɔŋ yisithi wotiyɔ ba haliko beŋ be niyɔ biya bimɛthɛ. Awa ka lɔkɔ babɛina, beŋ kɔŋ niyɔ kutoŋ kuŋama ku ka iŋ yisithi, nɔŋ na kɔthɛ nda yaŋ na ba dɔma na nɛna beŋ. Ba Kraist wo taka ntuŋ wo koro nde woŋ ba simɔkɔ malɔkɔ ma puntiyando nde biya ntuŋ beŋ maŋ ka Iyipiti thanki nda niyo saraka. 8Bɛna miŋ simɔkɔiŋ malɔkɔ maŋ maŋ, wuŋ ka ye na iŋ kutoŋ ku iŋ yisithi wotiyɔ wo ka hakɛ iŋ banɛnɔini bahakuwande, kɛrɛ iŋ kutoŋ kuŋama ku ka iŋ yisithi, kutoŋ ku ka mɛtha mɛnɛ nɔndi baŋ koŋ. 9Ka kuthagba ku gbalite nde yaŋ bena koŋ, yaŋ tepe nde bena ba beŋ be tha tikitande iŋ babɛini beŋ. 10Yaŋ tha ntiŋ dɔŋ biya bi be kɔthɔ Masaala na beŋ nde bi babɛini beŋ, maa bamilɛŋ beŋ, maa batuwani beŋ, maa bi ni kubatho dekɛŋ beŋ, baa ba thana tikitande iŋ bindɛ, yɔkɔŋ beŋ be fuŋ napoŋ ka dunia baŋ. 11Kɛrɛ wɔ o wɔ wo dɔmɔkɔi ba wundɛ niyɔ wɛnda ndeŋ ka lanɛya baŋ kɛrɛ e wundɛ niyɔ ka ŋabɛi ŋaŋ, ka milɛŋ beŋ, ka niya kubatho dekɛŋ beŋ, ka teetuwa biya ŋakeŋ haŋ, ka thiiye haŋ haaŋ e wundɛ yilɔ, maa ka ŋatuwaŋ ŋaŋ, wɔ nɔŋ woŋ baŋ, baŋ hintiŋ nthɔŋ dɔŋɔ ka tha banthe ba thɔma iŋ wundɛ. 12Sɔkɔ niŋ kutɛ hintiŋ hali hu ka kɔnsiŋina biya bi ka gbada ka beŋ, bi ka ka makɔmande ntuŋ maŋ beŋ; Masaala na bindɛ kɔnsɔŋɔŋ. Kɛrɛ e beŋ, beŋ ka iŋ gbɛthɛŋ ba kɔnsiŋinande? Magbali ma ka Masaala maŋ tepe, na “Fuŋutaŋ wɔ nɛnɔi woŋ ka mateete ndeŋ.”

will be added

X\