1 biKɔrinthi beŋ 3

1Kɛrɛ, mbɛndaŋ beŋ, yaŋ tha nde bena punku gbonkitiyande nɔŋ biya bi kɛriŋiya iŋ Yina wo ka Masaala woŋ. Kɛrɛ yaŋ gbonkitiyande nde bena nɔŋ biya bi ka dunia baŋ, baa beŋ kiŋ nde nɔŋ malɛɛthɛŋ ka niya ndeŋ lanɛya haŋ ka Kraist. 2Yaŋ thanani nde bena mathanani mamayoŋ maŋ ma thɔyande maŋ nɔŋ mabiini. Yaŋ tha bena thaninuwe nɔŋ ka yaŋ bena biiŋ muthɔma mukaahuwɛ, baa beŋ kosineketa nde ba muŋ ŋuna. Awa hali ka tete beŋ kosineketa hɛ ba muŋ, 3baa beŋ kiŋ nthuŋ ka maniyɔ ma ka biya bi ka dunia baŋ beŋ. Ŋahɔti iŋ ŋayuŋande ŋa kiŋ ka mateete makendeŋ. E wuŋ, wuŋ tha tɔŋɔŋ ba dɔma na beŋ kiŋ hintiŋ ka maniyɔ ma ka dunia baŋ maŋ? E beŋ tha ni nɔŋ na biya bihɛna bi ka dunia baŋ beŋ ni na? 4Wunthe ka mateete makendeŋ tepe, na “Yaŋ kiŋ ba Pɔli.” Woŋ ŋaye, na “Yaŋ, yaŋ kiŋ ba Apɔlɔsi.” E beŋ tha ni nɔŋ biya bi ka dunia baŋ beŋ? 5Naa yi dethe kɛndɛ kaake fooma, nkaana Apɔlɔsi? Nkaana Pɔli? Miŋ fooma miŋ kiŋ hɔkɔŋ bawaliŋ bi ka Masaala, bi niye wundɛ wali beŋ ba beŋ be ni lanɛya. Wɔ o wɔ ka mindo biye beŋ beŋ baŋ ni kufɛŋ ku dunkune niŋ Mariki woŋ ba wundɛ niya. 6Yama thuuwɛ, Apɔlɔsi see thɔnɔni, kɛrɛ Masaala ndɛ na niyɛ ba thaa hubɛina muka. 7Yaathi, bathuu woŋ iŋ bathɔnɔni woŋ kutɛ ka bɛyi; Masaala na ka bɛyi, baa ndɛ na niyɛ ba thaa haŋ muka. 8Mahakande ka mateete ma ka bathuu woŋ iŋ bathɔnɔni woŋ. Masaala kɔŋ thunkuŋ wɔ o wɔ nɔŋ na niye wundɛ wali. 9Miŋ kiŋ ka tha banthe ka niya wali ba Masaala, awa beŋ, bena yiya hu ka Masaala haŋ. Beŋ, bena hɛlɛŋ banka ba ka Masaala baŋ. 10Naa niye yaŋ wali sɛmbɛ ba dunkune yama Masaala baŋ, yaŋ ni wali nɔŋ bathoyi wokɔthɛ. Yaŋ sɛɛsi diŋ haŋ; wɔ hɛna see ba huŋ si ŋatina. Kɛrɛ wɔ o wɔ kiŋ ba niya kuthɛgbɛ na wundɛ huŋ ŋatine. 11Baa Masaala deŋe nda Yisɔs na ba wundɛ niyɔ mathere ma ka banka baŋ maŋ nape, awa mathɛrɛŋ mahɛna ka nda ma wɔ dɛŋ daŋandeŋ Yisɔs. 12Binɔndi bi kɔŋ thoye boyi, maa siliba, maa tharaka tha kahɛ mɔlɔŋ ka mathɛrɛŋ ma thanki Masaala dɛŋa maŋ. Binɔndi nɛnɛ bi kɔŋ thoye ŋayeŋ, maa hande huthithɛ, maa buyotho. 13Awa maniyɔ kolo ma ka wali ba ka wɔ o wɔ ma kɔŋ kuta ka Malɔkɔ ma Kraist see, baa ka malɔkɔ mabɛina buu buna gbɛrɛŋɛŋ wali ba ka wɔ o wɔ ba tɔŋina nagberekethe si pee bɛŋ niyɔ kolo. 14Mɛnɛ muthoye muŋ tha punku toonuwo iŋ buu buŋ, bathoyi wobɛina kɔŋ kutu kuthunkuŋ. 15Kɛrɛ mɛnɛ wali ba ka wɔ tɔɔki, wundɛ kɔŋ piriŋiŋ kuthunkuŋ nama koŋ. Kɛrɛ wundɛ kɔŋ niyɔ kisi, wu kɔŋ hɔkɔŋ niyɔ niŋ nɔŋ wɔ niyɔi kisi ŋaye ka buu. 16Yaathi, beŋ, beŋ kɔthɛŋ ba dɔma na bena banka ba Masaala niyo kubatho kɛ baŋ, e Yina nama woŋ niyɔ kaake kendeŋ. 17Huna, mɛnɛ wɔ o wɔ teeti banka babɛina, Masaala kɔŋ niŋ teeti, baa banka ba ka Masaala baŋ ba kiŋ badɛŋɔi kuwaŋ thɔɔkɔ ba wundɛ, awa beŋ, bena banka babɛina. 18Baŋ thɔkinɔkɔ. Mɛnɛ wɔ siyi ba dɔma na wundɛ kiŋ wokele ka bɛyiniŋ ba ka dunia baŋ baŋ, wundɛ kiŋ ba thɔkɔ haliko ndɛ be kutu kele hugbeeŋ haŋ. 19Ba kele hu dunia baŋ baŋ simɔkɔ ba huŋ niyɔ kele haŋ, Masaala dethe huŋ mayɛini nɔŋ na tepe magbali nama maŋ na, na “Masaala kɔŋ dikine bikele beŋ ŋaye ka makɔthɔ namɛŋ maŋ.” 20Magbali mahɛna tepe hɛlɛŋ, na “Mariki woŋ kɔthɛŋ ba dɔma na masiyi ma ka biya bikele beŋ maŋ ka kolo.” 21Huna wɔ bɛiŋ ŋatinɔkɔ ba ba biyamɛti ni. Baa bena biyɛ ntha o ntha: 22Pɔli yo, Apɔlɔsi yo, Pita yo, ka fai woŋ do, sii baŋ do, hutuka yo, bɛyiniŋ bahɛ iŋ ba see yo; muŋ muŋ fooma bena biyɛ. 23Awa Kraist nɛnɛ bena biyɔ; e Masaala biyɔ Kraist na.

will be added

X\