1 biKɔrinthi beŋ 2

1Mbɛndaŋ, naa see nde yaŋ kendeŋ do ba bena si niya kukɛwandi gbundu banɔndi ba ka Masaala baŋ, yaŋ tha nde bena niye kukɛwandi thayimbɛŋ thabukuyuwɛ maa karaŋ bamandiŋ-mandiŋ. 2Ba na nde yaŋ iŋ beŋ, yaŋ dɛɛnki ka thukuma niŋ haŋ ba piitɔ bɛyi o bɛyi bahɛna, yɔkɔŋ Yisɔs Kraist nagbɛti, yameŋ ntiŋ bɛyi ba tɛpa ba tuka nama haŋ ka kuyeŋ kubariŋande koŋ. 3Huna, naa see nde yaŋ kendeŋ, yando thathinɔkɔi iŋ thɛna hubɛina ka payɔ ka teete. 4Awa mathanani makiyaŋ maŋ mɛnɛ maseri makiyaŋ maŋ, yaŋ tha mɛŋ niye ka thampɛŋ tha thimɔi ka yuyɛ ka kele hu ka wɔmɛti hɔkɔŋ nagbɛti, kɛrɛ yaŋ niye mɛŋ ka sɛmbɛ ba ka Yina wo ka Masaala woŋ baŋ. 5Haliko lanɛya bakendeŋ baŋ ba be tha dekinteke ka kele hu ka wɔmɛti haŋ, kɛrɛ ka sɛmbɛ ba ka Masaala baŋ. 6Halisa, yaŋ kɔŋ ni kɛwandi huseri hu ka kele ka biya bi nda bitewɛ beŋ ka kuwaŋ ku ka Masaala koŋ, kɛrɛ wuŋ ka hɔkɔŋ kele hu ka dunia baŋ baŋ haŋ nde, maa hu ka biya bibasɛmbɛŋ bi kɛriŋiyɛ dunia baŋ baŋ beŋ, bi iŋ sɛmbɛŋ ba bɔhɛ ba daŋande baŋ beŋ. 7Kele hu yaŋ ni kɛwandi haŋ huna kele hu ka gbundu ba ka Masaala baŋ haŋ, hu nunɔkɔi ŋaye ka biyamɛti haŋ. Kɛrɛ e nde nda huŋ yɛtha kabi ka mathɛrɛŋ maŋ ba yiki bakɛntuŋ. 8Wɔ wunthe ndɛ ka ka mateete ma ka bakɛrɛni bi ka dunia baŋ baŋ bi kɔthɛ kele hubɛina haŋ haŋ; baa mɛnɛ bindɛ kɔthɛŋ nde huŋ, bindɛ sa nde nɔŋ kɔri Mariki wo bayiki woŋ ka kuyeŋ kubariŋande koŋ. 9Kɛrɛ gboŋa o gboŋa, nɔŋ na tepe nthɔŋ magbali ma ka Masaala maŋ na, na “Bɛyi ba be hɛ nɔŋ wɔ o wɔ kutiyɔkɔ maa yuyɔkɔ, bɛyi ba be hɛ nɔŋ wɔ o wɔ simɔkɔ ba bɛŋ kɔ niyɔ, bɛyi babɛina gbeeŋ bɛna thanki Masaala kɔsinɔkɔ ba biya bi thimo niŋ beŋ.” 10Kɛrɛ kɛntuŋ kɛna toŋine Masaala gbundu nama baŋ maŋaye ka Yina nama woŋ. Yina woŋ kɔŋ dethi bɛyi o bɛyi, hali hintiŋ madɛɛnki ma ka Masaala ma nunɔkɔi maŋ nthɔŋ nda fooma. 11Yɔkɔŋ thukuma hu iŋ wɔ kaake huna punku kɔthɔ bɛyi o bɛyi ba wundɛ siyi; nɛna hɛlɛŋ Masaala, yɔkɔŋ Yina nama woŋ nagbɛti, ndɛ na punku kɔthɔ ba iŋ wundɛ ka thukuma fooma. 12Miŋ tha nde dunkuno yina wo ka dunia baŋ baŋ woŋ, kɛrɛ miŋ dunkuno Yina wo ŋindi Masaala woŋ, haliko na miŋ metho fooma mu dunkune mina Masaala muŋ. 13Huna, miŋ gbonkiyeta ka thayimbɛŋ tha thanani kele hu ka wɔmɛti, kɛrɛ ka thayimbɛŋ tha thanani Yina wo ka Masaala woŋ ka mɛthina nɔndi ba ka Yina woŋ baŋ ka biya bi iŋ Yina wo ka Masaala woŋ beŋ. 14Wɔ o wɔ wo be kɛriŋiya iŋ Yina wo ka Masaala woŋ, wundɛ sa punku kuta munkii mu ŋaye ka Yina wo ka Masaala woŋ muŋ. Wɔ nɔŋ woŋ baŋ, wundɛ sa punku metho munkii muŋ muŋ baŋ hali. Munkii muŋ muŋ mu kiŋ mayɛini ka kuwaŋ nama koŋ, baa kolo ba ka munkii mu ka Yina wo ka Masaala woŋ muŋ sa detho ka makɔɔ ma ka huwɔmɛtiya; ka makɔɔ ma ka Yina wo Masaala woŋ nagbɛti kɛna muŋ ba detho. 15Wɔ o wɔ wo kɛriŋiya iŋ Yina wo ka Masaala woŋ kɔŋ punku kɔnsiŋina bɛyi o bɛyi, kɛrɛ wɔ o wɔ ka wo punku niŋ kɔnsiŋina. 16Nɔŋ na tepe magbali ma ka Masaala maŋ na, na “Nkaana kɔthɛ masiiyi ma ka Mariki woŋ maŋ? Nkaana niŋ punku dunkune kuyeli?” Kɛrɛ miŋ, miŋ kiŋ iŋ thukuma hu ka Kraist haŋ.

will be added

X\