1 biKɔrinthi beŋ 16

1Ba hu gbalite beŋ yama haŋ ba munkii mu beŋ ba fuŋuna muŋ ba mase biya bi ka Masaala beŋ ka kuyɛkɛŋ ku ka Yudiya: beŋ kiŋ ba niya nɔŋ na tepe nthɔŋ yaŋ makɔmandeŋ ma ka biya bi ka Masaala beŋ maŋ fooma ka kuyɛkɛŋ ku ka Kaletiya ba niya. 2Sɔnde o Sɔnde wɔ o wɔ ka beŋ kiŋ ba dɛŋa kuwaŋ kɔbiri wonɔndi, mɔlɔŋ ba ti peye niŋ Masaala kɔ thiyiye thaduba, awa e wundɛ niŋ kɔsina ba haliko yaagba be tha niyɔ ba thuŋunande kɔbiri naa yaŋ see. 3Naa yaŋ see, yaŋ kɔŋ si dunkuŋ ŋathagba ka lamgbeŋ bi thanki beŋ yɛtha beŋ ŋa bindɛ ka tɔŋɔŋ ka bakalani beŋ ka Yɛrusalɛmi e ŋinda bindɛ kɛndɛ ba kata kɔbiri wo munkii ndeŋ muŋ woŋ. 4Mɛnɛ wu kiŋ wusisande ba yaŋ kaa, yaŋ kɔŋ kei iŋ bindɛ. 5Naa yaŋ thanki kɛriŋande kuyɛkɛŋ ku ka Masidoniya, yaŋ kɔŋ bena biyande ka maana, baa yaŋ boheŋ ba kɛriŋiyande ka Masidoniya. 6Thampo yaŋ kɔŋ niyɔ iŋ beŋ hintiŋ, lɔkɔ hɛ ba kuthamɔ kubunthu koŋ fooma. Ka lɔkɔ babɛina, beŋ kɔŋ yama mase ba kaa biyasi niŋ haŋ ka kɔtɔkɔi kama o kama ka bohe yaŋ ba kaaye. 7Yaŋ kiŋ ba bena kuta, wuŋ ka hɔkɔŋ ka daŋande nagbɛti, yaŋ tuteŋ thukuma ba yaŋ kɔ niyɔ iŋ beŋ ba malɔkɔ mathɔɔkuwɛ, mɛnɛ Masaala kɔŋ mɛyi. 8Yaŋ kɔŋ niyɔ ka Ɛfɛsɔsi do haaŋ malɔkɔ ma dɔma maŋ na Pɛntikɔsi maŋ tɛŋa. 9Hɛɛra huyɔhɔi hu kiŋ dondo ba wali bamandiŋ ba ka Masaala baŋ, awa wali ba kiŋ dɛ ba tɛŋɛ ba niyo, hali na niyɔi wuŋ na hadeni bibɔyɛ bi kiŋ dɛ. 10Mɛnɛ Timothi kɔŋ kɛndɛ see, yɛrɔkɔŋ niŋ ka mateete makendeŋ e beŋ niya na wundɛ kuteke nɔŋ ndɛ kiŋ ka madɔŋɔ nama ka, baa Mariki woŋ na wundɛ niyiyɛ wali, nɔŋ na yaŋ niŋ niyiyɛ wali na. 11Wɔ o wɔ ka ba niŋ yethitɔ ka detha, kɛrɛ beŋ kiŋ ba niŋ mase ba kaa biyasi nama haŋ ka kɔtɔkɔi ka mathɛbɛ, ba haliko wundɛ be duu kiyaŋ do, baa yaŋ detheŋ gboŋa ba wundɛ kɔ saa iŋ mbɛnda ntuŋ beŋ ka Kraist. 12Ba Apɔlɔsi, wɛnda ntuŋ woŋ, yaŋ bareŋ nɔŋ niŋ kɔ niya kuthɔnthɔ ba bena kaa ka maana mɛnɛ mbɛnda ntuŋ bihɛna beŋ ka Kraist, kɛrɛ wundɛ thanketa hɛ thinka yaha ba dɔma na ndɛ kɔŋ kei ka malɔkɔ maŋ maŋ. Kɛrɛ gboŋa o gboŋa mɛnɛ wundɛ kute hɛɛra baŋ, wundɛ kɔŋ kei. 13Pamɔkɔŋ, e beŋ kɔɔ wukahɛ ka lanɛya bakendeŋ baŋ. Niyɔŋ bendo thunkɛ, e beŋ niyɔ bendo kahɛ. 14Wali ndeŋ baŋ fooma niyeŋ bɛŋ ka mathimo. 15Beŋ kɔthɛŋ nda ba Sitɛfanɔsi iŋ kubɔri nama koŋ. Bindɛ bina biya bimayoŋ beŋ ka kuyɛkɛŋ ku ka Kirisi ba sikiyɔkɔ biya bi ka Masaala awa e dunkuna yɛthɛ bakɛnamɛŋ ba niya wali ba biya bi ka Masaala beŋ. Yaŋ theteke bena, mbɛndaŋ beŋ, 16ba haliko beŋ be putiyɔ biya nɔŋ beŋ beŋ naa bindɛ bena kɔtiyɔkɔ ka wali ba ka Masaala baŋ iŋ wɔ o wɔ wo ni wali iŋ bindɛ. 17Yaŋ yehitɔkɔi ba saa hu ka Sitɛfanɔsi haŋ, Fɔtunetɔsi, iŋ Akeyakɔsi. Bindɛ see thɔɔ yɔkɔŋ ba kendeŋ. 18Awa bindɛ yeheŋ yama thukuma nɔŋ na yeheŋ nthɔŋ bindɛ bena thukuma na. Biya nɔŋ beŋ beŋ bi teŋeŋ ba kothiyo. 19Makɔmandeŋ ma ka biya bi ka Masaala beŋ maŋ fooma ka kuyɛkɛŋ ku ka Esiya toŋite bena ŋamaani. Akuwila iŋ wɔtɔ nama Pirisila iŋ biya bi ka Masaala beŋ fooma bi thuŋiyande ka banka namɛŋ baŋ beŋ toŋite bena ŋamaani ŋatɔɔkɛ ŋa ka huwɛndiya. 20Mbɛnda ntuŋ beŋ dondo fooma toŋite bena ŋamaani. Maanuwandeŋ iŋ ŋamaani ŋa ka huwɛndiya. 21Yaŋ Pɔli yama gbaliyɔkɔ ŋamaani ŋaŋ ŋaŋ iŋ yɔnkɔ niŋ haŋ gbeeŋ. 22Wɔ o wɔ wo tha thimo Mariki woŋ, thadanka ka wɔ bɛina. Mariki ntuŋ woŋ, saa nda! 23Haliko mathimo ma ka Masaala maŋ ma niyɔ iŋ beŋ. 24Beŋ fooma, yaŋ toŋite bena mathimo niŋ maŋ, bendo bɔhande beŋ ka Kraist Yisɔs.

will be added

X\