1 biKɔrinthi beŋ 14

1Dekiyɔkɔŋ ba niyɔ iŋ mathimo ba biya bihɛna. Tutaŋ masiyi makendeŋ ka munkiini mu ŋaye ka Yina wo ka Masaala woŋ muŋ, yameŋ ntiŋ bɛyi munkii mu ka gbonkiya thaseriŋ tha ŋaye ka Masaala. 2Wɔ wo gbonkoi ka huyuŋ huthɛrɛnaŋ wundɛ gbonkitiyandeta biya bihɛna; Masaala na wundɛ gbonkitiyande, baa wɔmɛti ka wo niŋ metho. Wundɛ kiŋ ka gbonkiya nɔndi bagbundu ŋaye ka sɛmbɛ ba ka Yina wo ka Masaala woŋ baŋ. 3Kɛrɛ wo gbonkoi thaseriŋ tha ŋaye ka Masaala thaŋ kɔŋ gbonkitiyande biyamɛti awa e dunkune bindɛ kumase, e kahina bindɛ thathukuma kaŋ thayuwa bindɛ. 4Wo gbonkoi ka huyuŋ huthɛrɛnaŋ woŋ kɔŋ hɔkɔŋ mase yɛthɛ nama nagbɛti. Kɛrɛ wo gbonkoi thaseriŋ tha ŋaye ka Masaala thaŋ mase makɔmande ma ka biya bi ka Masaala beŋ maŋ fooma. 5Yaŋ kɔŋ nde thimo ba beŋ fooma gbonkiya ka thayuni thathɛrɛnaŋ, kɛrɛ wu kɔŋ yama yaŋ niyɔ kuhita ba beŋ niyɔ iŋ munkii mu ka gbonkiya thaseriŋ tha ŋaye ka Masaala thaŋ. Baa wɔ wo gbonkoi thaseriŋ tha ŋaye ka Masaala thaŋ woŋ ndɛ yameŋ niyɔ kolo ba wɔ wo gbonkoi ka thayuni thathɛrɛnaŋ woŋ, yɔkɔŋ ba wuŋ niyɔ-ye na wɔ kiŋ kɛndɛ wo thalinande ba wundɛ tɛpi baŋ ka biya beŋ, haliko na biya beŋ fooma ka makɔmande ma ka biya bi ka Masaala maŋ beŋ kute kumase. 6Bɛna, mbɛndaŋ beŋ, mɛnɛ yaŋ see kendeŋ, mbɛ kumase ku yaŋ niyɔ kendeŋ mɛnɛ yaŋ gbonkitiyande bena ka thayuni thathɛrɛnaŋ? Hali wuyete wuŋ sa bena mase, yɔkɔŋ na yaŋ sisiyɛ bena bɛyiniŋ maŋaye ka Masaala, maa kele, maa huseri hu iŋ sɛmbɛ ŋaye ka Masaala, maa mathanani. 7Detha, hali hintiŋ munkiŋ mu thuroko muŋ mu ka iŋ sii muŋ, nɔŋ nthoriyɛŋ kiŋ maa ŋatuteŋ ŋaŋ, nama wɔ punku hakiyando ŋaiŋa ŋa bathurɔkɔ woŋ sɔŋ ŋaŋ mɛnɛ bathurɔkɔ woŋ tha hakinande kutɔŋa koŋ? 8Awa nɛna hɛlɛŋ bahɔŋ kuthuthu koŋ woŋ, mɛnɛ wundɛ tha hɔŋ nagberekethe ka thiya kurugbani beŋ haŋ, nkaana kɔsinɔkɔ ba dekiya? 9Nanthe hɛlɛŋ nɛŋ, nama wɔ metho ba yi gbonkoi mɛnɛ yi gbonkiye maseri maŋ ka huyuŋ huthɛrɛnaŋ hu be biya beŋ hakiyando? Thayimbɛŋ nda thaŋ thɛ kɔŋ hɔŋita iŋ huru. 10Thayuni thahakuwande thabɔyɛ tha kiŋ ka dunia baŋ, kɛrɛ hali na boye thɛŋ na, huyuŋ ndo huyuŋ hu kiŋ iŋ kolo nama. 11Kɛrɛ mɛnɛ yaŋ kɔita huyuŋ hu gbonkiya haŋ, wo huŋ gbonkoi woŋ kɔŋ niyɔ nɔŋ siya bahɛna kiyaŋ, awa yaŋ kɔŋ niyɔ nɔŋ siya bahɛna kɛnama. 12Awa na beŋ kufiyo ba kuta munkiini mu ka Yina wo ka Masaala woŋ muŋ, dekiyɔkɔŋ kufɛŋ ndo kufɛŋ ba niye wali munkiini mu mase ba kata ka kɔtɔkɔi makɔmande ma ka biya bi ka Masaala beŋ maŋ. 13Wɔ wo gbonkiye ka huyuŋ huthɛrɛnaŋ, wundɛ kiŋ ba niya kuraminɛ ba munkii mu ka thalintande huyuŋ hu wundɛ gbonkoi haŋ. 14Baa, mɛnɛ yaŋ niye kuraminɛ ka huyuŋ huthɛrɛnaŋ, yina wokiyaŋ woŋ yaathi kɔŋ ni kuraminɛ, kɛrɛ masiyi niŋ maŋ tha sɛkɛthi kufɛŋ ka kuraminɛ kubɛina. 15Hu nda yaŋ ni, yaŋ kɔŋ nda ni kuraminɛ iŋ yina wokiyaŋ woŋ, awa ka thinthi ka bɛina yaŋ kɔŋ ni kuraminɛ iŋ masiyi makiyaŋ maŋ; yaŋ kɔŋ nda sɔŋ iŋ yina wokiyaŋ woŋ, awa ka thinthi ka bɛina yaŋ kɔŋ sɔŋ iŋ masiyi makiyaŋ maŋ. 16Mɛnɛ beŋ thiye maamo ka yina woŋ hɔkɔŋ nagbɛti, nama wɔ be hakiyando woŋ ka mathuŋande ndeŋ maŋ dome, na “Amiina” ka thiya ndeŋ maamo haŋ ka kuraminɛ ka teete? Wundɛ ka iŋ gboŋa ba kothiye hu beŋ tɛpi haŋ. 17Hali hintiŋ na aniyɔi na wuŋ na kuraminɛ nda koŋ ayɔhɔ, kuŋ sa mase ntɔ nda woŋ hali. 18Yaŋ thiyi Masaala na maamo ba kɔthɔ ba dɔma na yaŋ yameŋ kɔ gbonkiye ka thayuni thathɛrɛnaŋ adaŋande wɔ o wɔ ka beŋ. 19Kɛrɛ ka niya Masaala na kubatho ka tha banthe ka makɔmande ma ka biya bi ka Masaala beŋ maŋ, wu kiŋ yama hita ba gbonkiya thampɛŋ thasɔhi tha biya metho haliko ba thaninuwa biya bihɛna, adaŋande ba gbonkiya thampɛŋ wuluiŋ-wuluiŋ ka thayuni thathɛrɛnaŋ. 20Mbɛndaŋ beŋ, baŋ niyɔ nɔŋ mpatiyɛŋ ka masiyi; ka kufɛŋ ku ka banɛnɔi niyɔŋ mpatiyɛŋ, kɛrɛ e beŋ niyɔ bendo tewɛ ka masiyini makendeŋ. 21Wuŋ gbalo ka magbali ma ka Masaala maŋ, na Mariki woŋ tepe, na “Maŋaye ka biya bi gbonkiye ka thayuni thahɛna kɛna yaŋ gbonkitiyande biya bikiyaŋ beŋ. Yaŋ kɔŋ gbonkiye ka thahothi tha ka thahinɛŋ, kɛrɛ hali na aniyɛ na yaŋ wuŋ, biya bikiyaŋ beŋ sa yama poniyɛ kuiha.” 22Bɛna munkii mu ka gbonkiya ka thayuni thathɛrɛnaŋ mu kiŋ ba tɔŋina sɛmbɛ ba ka Masaala baŋ ka biya bi be ni lanɛya beŋ, wuŋ ka ba biya bi niyɛ lanɛya beŋ. Awa e munkii mu ka gbonkiya thaseriŋ tha ŋaye ka Masaala thaŋ niyɔ ba bi niyɛ lanɛya beŋ, wuŋ ka ba bi be ni lanɛya beŋ. 23Mɛnɛ wuŋ niyɔi na makɔmande mabunthu maŋ fooma thuŋande ka tha banthe, awa e biya fooma bɔha gbonkiya ka thayuni thathɛrɛnaŋ, mbu na wuŋ niyɔi na wɔ wo be hakiyando maa biya bi ka iŋ kulanɛya see biyande? E bindɛ sa dɔŋ na kuso kuna thɔɔyɛ bena fooma? 24Kɛrɛ mɛnɛ biya fooma gbonkoi thaseriŋ tha ŋaye ka Masaala thaŋ, awa e wɔ wo be ni lanɛya maa wɔ wo be hakiyando kɔ biyande, wundɛ kɔŋ kutɔkɔ mathonko ma ka hakɛ nama baŋ maŋaye ka bɛyiniŋ ba yuye wundɛ baŋ. Wundɛ kɔŋ konsiŋino ŋaye ka ba yuye wundɛ baŋ fooma. 25Masiyi magbundu ma ka thukuma nama haŋ maŋ fooma mɛ kɔŋ ŋɔɔ nagberekethe, awa wundɛ kɔŋ kunthuŋ e niya Masaala na kubatho e tɛpiyɔkɔ, na “Nɔndi yaathi, Masaala kiŋ iŋ beŋ dondo.” 26Mbɛndaŋ beŋ, haŋ haŋ huna ka masiyi niŋ: naa beŋ thuŋande ba niya Masaala na kubatho, wɔ wunthe kiŋ iŋ kuiŋa, woŋ kiŋ iŋ bɛyi ba wundɛ thanani, woŋ kiŋ iŋ huseri huthɔɔkɔ hu kute wundɛ ŋaye ka Masaala, woŋ kiŋ iŋ huseri hu wundɛ ba tepe ka huyuŋ huthɛrɛnaŋ, woŋ kiŋ ba thalintande ba woŋ gbonkoi ka huyuŋ huthɛrɛnaŋ haŋ baŋ. Bɛyi o bɛyi ba beŋ ni ba kiŋ ba mase makɔmande mabunthu maŋ fooma. 27Mɛnɛ biya kiŋ ba gbonkiye ka thayuni thathɛrɛnaŋ, biya biye maa bitaati bina ba gbonkiya. Naa woŋ thanki nthɔŋ gbonkiya, woŋ gbonkoi, awa wɔ hɛna kiŋ ba kɔɔ ba thalintande ba bindɛ gbonkoi baŋ ka thayuni thathɛrɛnaŋ thaŋ. 28Mɛnɛ wɔ tha niyɔ wo thalintande ba bindɛ tɛpi baŋ, ka lɔkɔ babɛina wɔ o wɔ wo gbonkoi ka huyuŋ huthɛrɛnaŋ haŋ woŋ kiŋ ba daanɔkɔ e nda kɔ gbonkiye yɛthɛ bakɛnama iŋ Masaala. 29Biya biye maa bitaati bi kutɛ thaseriŋ ŋaye ka Masaala nɔŋ banabiŋ bina ba gbonkiya, e bibintheŋ beŋ dɔŋɔ ba kɔnsiŋina ba bindɛ gbonkoi baŋ. 30Kɛrɛ, mɛnɛ wɔ o wɔ wo dɔŋɔi ka mateete ma ka mathuŋande ndeŋ maŋ kute huseri huthɔɔkɔ ŋaye ka Masaala, wo gbonkoi woŋ kiŋ hintiŋ ba daanɔkɔ. 31Beŋ fooma punkeŋ niya hunabi ka wunthe-wunthe, ba haliko na wɔ o wɔ thanuwe e kuta kumase. 32Munkii mu ka gbonkiya thaseriŋ tha ŋaye ka Masaala thaŋ muŋ nɔŋ banabi kiŋ ba niyɔ ka makɛrɛŋ ma ka wɔ wo thɛŋ gbonkoi woŋ. 33Ba Masaala thimota ba miŋ niyɔ nayaka-yakaŋ, kɛrɛ ndɛ thimoŋ ba miŋ niyɔ ka mathɛbɛ. Nɔŋ na nthɔŋ wuŋ na ka makɔmandeni ma ka biya bi ka Masaala beŋ maŋ na fooma, 34nɛna hɛlɛŋ beŋ ba niyɔ. Yɛrɛmɛŋ beŋ bi kiŋ ba daanɔkɔ ka mateete ma ka makɔmande ndeŋ maŋ. Bindɛ ka ba mekino ba gbonkiya; nɔŋ na tepo wuŋ na ka bukuiŋ bi ka Siraŋ ba ka Musa beŋ na, bindɛ kiŋ ba niyɔ ka pothi. 35Mɛnɛ bi thimoŋ ba kɔthɔ bɛyi o bɛyi, bi kiŋ ba thɔnthiŋina biwandamɛŋ ka madɔŋɔ namɛŋ ka. Bɛyi bakuyaahu bɛna ba wɔ yɛrɛmɛ ba gbonkiya ka makɔmande ndeŋ maŋ mateete. 36Maa e ba hɔŋ wu kiŋ ba dɔma na thampa tha ka Masaala thaŋ see nde maŋaye kendeŋ? Maa e ba hɔŋ bena thankɛ bendo seeyo nde thɛŋ? 37Mɛnɛ wɔ o wɔ siyi ba dɔma na wundɛ kiŋ banabi wo ka Masaala, maa wundɛ kiŋ iŋ munkii mu ka Yina wo ka Masaala woŋ muŋ, wundɛ kiŋ ba kɔthɔ ba dɔma na hu yaŋ bena gbalite haŋ yamari na wo ŋaye ka Mariki woŋ. 38Mɛnɛ wundɛ tha poniyɛ haŋ haŋ kuiha, baŋ niŋ poniyɛ kuiha. 39Bɛna, mbɛndaŋ beŋ, tutaŋ thathukuma ka gbonkiya thaseriŋ tha ŋaye ka Masaala thaŋ nɔŋ banabiŋ, kɛrɛ baŋ pindi bi gbonkoi ka thayuni thathɛrɛnaŋ beŋ nde! 40Kɛrɛ bɛyi o bɛyi ba kiŋ ba niyo ka gboŋa bakɛnama nɔŋ na sisiyande bɛŋ ba niyo, wuŋ ka ka gboŋa banayaka-yakaŋ.

will be added

X\