1 biKɔrinthi beŋ 13

1Hali na apunkɛ na yaŋ gbonkiya thayuni tha ka biyamɛti fooma, hali hintiŋ iŋ tha ka malekɛŋ, kɛrɛ mɛnɛ yaŋ ka iŋ mathimo ba biya bihɛna, gbonkiya hukiyaŋ haŋ hu kɔŋ thɔyande nɔŋ kutɔŋa ku lɔnki ŋaiha iŋ ka munki muyuyɛ thuŋunando. 2Hali na apunkɛ na yaŋ niyɔ iŋ munkii mu ka gbonkiya thaseriŋ tha ŋaye ka Masaala, awa e yaŋ punka hakiyando bɛyiniŋ fooma bagbundu awa e yaŋ niyɔ iŋ makɔthɔ fooma, hali na apunkɛ na yaŋ niyɔ iŋ kulanɛya kutɛŋɛ ba muka ŋasɛri, kɛrɛ mɛnɛ yaŋ ka iŋ mathimo ba biya bihɛna, yaŋ ka ntha o ntha. 3Hali na adunkunɛ na yaŋ ntha o ntha ki iŋ yaŋ, haaŋ yaŋ dunkuna kɔtɔ niŋ koŋ ba toonuwo, kɛrɛ mɛnɛ yaŋ ka iŋ mathimo ba biya bihɛna, munahaŋ ndo ka ba yaŋ. 4Wɔ wo iŋ mathimo ba biya bihɛna, ndɛ kiŋ bamuyuŋ iŋ ba ni bayɔhɔi. Wundɛ ka iŋ hunaŋ; wundɛ gbuŋuneketa; wundɛ ka iŋ kukabanɛ. 5Wundɛ ka iŋ sɔŋ banɛnɔi. Wundɛ niyeta bɛyi ba yɛthɛ bakɛnama hɔkɔŋ nagbɛti, maa ba yemine. Wundɛ kosineta mathoŋ ka thukuma. 6Wundɛ ka iŋ mayehitɔkɔ ba banɛnɔi, kɛrɛ wundɛ kɔŋ yehitɔkɔ ba nɔndi baŋ. 7Wɔ wo iŋ mathimo, mathimo nama sa duu kahɛŋ; lanɛya nama, iŋ dethiteke nama ba ba see baŋ, iŋ muyuŋ nama baŋ sa thamɔ haaŋ ka wuŋ kei. 8Mathimo ntha kina ki kɔi o kɔi. Thaseriŋ thathɔɔkɔ ŋaye ka Masaala thɛ kɔŋ daŋande. Munkii mu ka gbonkiya thayuni thathɛrɛnaŋ mu kiŋ, kɛrɛ malɔkɔ mɛ kɔŋ see mu kɔŋ thanki. Munkii mu ka kɔthɔ mu kiŋ, kɛrɛ mu kɔŋ daŋande. 9Baa munkiini ntuŋ mu ka kɔthɔ iŋ mu ka thaseriŋ tha ŋaye ka Masaala thaŋ muŋ kuntheta, 10kɛrɛ naa munkiŋ muthankinuwɛ muŋ tɛŋ, munkiŋ mu be kunthu muŋ fooma mu kɔŋ daŋande. 11Naa nde yaŋ hatiyɛ, magbonkoi makiyaŋ, makutɔkɔ makiyaŋ, masiyi makiyaŋ fooma ma kiŋ nɔŋ ma ka hatiyɛ. Naa thanki nda yaŋ fuŋa, yaŋ ka nda iŋ mu yaŋ niye gboŋɛŋ ba ka huhatiniyɛ haŋ baŋ. 12Bɛyiniŋ bahɛ miŋ kutiyɔkɔ ba kiŋ nɔŋ ka wɔ dethɔkɔ ka sɛnkɛ wonahukutu. Kɛrɛ naa lɔkɔ baŋ see, miŋ kɔŋ kutande yethi iŋ yethi. Ka tete yaŋ kɔthɛta hɛ wukunthɛ. Ka malɔkɔ ma see, yaŋ kɔŋ kɔthɔ wukunthɛ nɔŋ na kɔthɛ nthɔŋ yama Masaala na wukunthɛ. 13Saanuŋ lɔkɔ babɛina ba tɛŋa, bɛyiniŋ baŋ baŋ bɛna kɔɔyɛ hintiŋ: lanɛya, iŋ dethiteke ba ba see, iŋ mathimo. Kɛrɛ mathimo mɛna yamɛ bukuya ka muŋ fooma.

will be added

X\