1 biKɔrinthi beŋ 12

1Ba saathɛ ba hu gbalite beŋ yama ba munkiini mu ŋaye ka Yina wo ka Masaala woŋ muŋ, mbɛndaŋ beŋ, yaŋ thimoŋ ba beŋ kɔthɔ nɔndi ba ka muŋ. 2Beŋ kɔthɛŋ ba dɔma na ka lɔkɔ ba ba nde beŋ kɔthɔ Masaala na ka gboŋa baseŋa baŋ, beŋ kiŋ nde ka katitoko nama o nama ka niya kubatho dekɛŋ bi ka iŋ sii. 3Yaŋ thimoŋ ba beŋ kɔthɔ ba dɔma na wɔ o wɔ ka wo katitoko iŋ Yina wo ka Masaala woŋ wo punku tɛpa ba dɔma, na “Yisɔs kiŋ iŋ thadanka!” Awa wɔ ka nɛnɛ wo punku tɛpa ba dɔma, na “Yisɔs Mariki na,” yɔkɔŋ wɔ bɛina niyɔi wɔ katitoko iŋ Yina wo ka Masaala woŋ. 4Munkiini muhakuwande mu ka Yina wo ka Masaala woŋ muŋ mu kiŋ, kɛrɛ Yina wunthe woŋ nape ndɛ na muŋ dunkuŋ. 5Gboŋɛŋ babɔyɛ ba kiŋ ba ba niyiye Mariki woŋ wali, kɛrɛ Mariki wunthe ndɛ na niyiya wali. 6Punka hubɔyɛ huhakuwande hu kiŋ ba niye wali, kɛrɛ Masaala wunthe nape ndɛ na dunkuŋ punka hubɛina fooma ba waliŋ bahakuwande. 7Yina wo ka Masaala woŋ kɔŋ toŋineke ka gboŋa banɔndi ka wɔ o wɔ ba wuyɔhɔi wu ka biya fooma. 8Yina wo ka Masaala woŋ kɔŋ dunkuŋ wɔ wunthe huseri hu thiŋɛ iŋ kele. Ka wowuntheŋ woŋ Yina wunthe wobɛina dunkuŋ huseri hu thiŋɛ iŋ makɔthɔ. 9Yina wunthe wobɛina dunkuŋ munkii mu ka kulanɛya ka wɔ wunthe, awa ka wowuntheŋ woŋ munkii mu ka niyɔ iŋ sɛmbɛ ba puya biya. 10Ka woŋ ndɛ dunkuŋ sɛmbɛ ba niya bɛyiniŋ bathakaba, ka wowuntheŋ woŋ munkii mu ka gbonkiya thaseriŋ tha ŋaye ka Masaala. Ka woŋ wundɛ dunkuŋ hupunka hu ka kɔthɔ mahakande ma ka Yina wo ka Masaala woŋ iŋ yinɛŋ bihɛna. Ka wowuntheŋ woŋ ndɛ dunkuŋ punka hu ka gbonkiya thayuni thathɛrɛnaŋ, woŋ nɛnɛ e niŋ dunkuna punka hu ka thalintande ba bi gbonkoi ka thayuni thathɛrɛnaŋ thaŋ beŋ tɛpi baŋ. 11Kɛrɛ, bɛyiniŋ baŋ baŋ fooma, Yina wo ka Masaala woŋ wunthe napethi na bɛŋ ni. Awa ndɛ kɔŋ dunkuŋ wɔ o wɔ munkii mu thimo wundɛ ba niŋ dunkune. 12Kraist kiŋ nɔŋ kɔtɔ kunthe ku iŋ ŋafɛŋ ŋabɔyɛ; kɛrɛ kɔtɔ kunthe nape, hali na kuŋ ŋafɛŋ ŋahakuwande na. 13Nanthe hɛlɛŋ nɛna miŋ fooma, yi niyɔŋ nthɔŋ woYu maa siya bahɛna, yi niyɔŋ nthɔŋ waayi maa kɔɔrɔ, miŋ fooma biyo nde biye hu ka Masaala haŋ iŋ Yina nama wunthe woŋ ba siso ba si niyɔ ka kɔtɔ kunthe koŋ, awa Yina wunthe wobɛina, ndɛ na dunkuno miŋ nɔŋ ka thiiye miŋ niŋ. 14Kɔtɔ ku ka wɔmɛti koŋ gbeeŋ kuŋ tha yehinuwo maŋaye ka kufɛŋ kunthe, kɛrɛ maŋaye ka ŋafɛŋ ŋabɔyɛ. 15Mɛnɛ kuthaki koŋ kuna dɔmɛ, na “Yaŋ, yaŋ ka yɔnkɔ, bɛna yaŋ ka ka kɔtɔ koŋ,” wuŋ sa ni ba kuŋ thana niyɔ kufɛŋ ku ka kɔtɔ koŋ. 16Awa mɛnɛ kuiha koŋ kuna dɔmɛ, na “Yaŋ ka hooya, bɛna yaŋ ka ka kɔtɔ koŋ,” wuŋ sa ni ba kuŋ thana niyɔ kufɛŋ ku ka kɔtɔ koŋ. 17Mɛnɛ kɔtɔ kubunthu koŋ fooma niyɔi nde hooya, nama nde huŋ yuye? Awa mɛnɛ kɔtɔ koŋ fooma ku kiŋ nde kuiha, nama nde kuŋ bohe huru? 18Nɔŋ na kɔtɔ koŋ na, Masaala tɔpɔŋ kufɛŋ ndo kufɛŋ ka kɔtɔ koŋ nɔŋ na thimo wundɛ kuŋ ba topine. 19Kɔtɔ sa nde niyɔ mɛnɛ wuŋ niyɔi nde na kɔtɔ koŋ fooma kufɛŋ kunthe. 20Kɛrɛ nɔŋ na kuŋ na, ku kiŋ iŋ ŋafɛŋ ŋabɔyɛ, kɛrɛ kɔtɔ kunthe nape. 21Bɛna hooya haŋ sa tepe yɔnkɔ haŋ, na “Yi ka iŋ ba yama yi niyiyɛ.” Ba hintiŋ tɛpa na yaha haŋ hu kɔŋ tepe ŋathaki ŋaŋ, na “Yi ka iŋ ba yama yi niyiyɛ.” 22Ka kufɛŋ kukuntheŋ koŋ, miŋ sa punku niyɔ wu ka ŋafɛŋ ŋa miŋ dethi ka kɔtɔ koŋ ŋaŋ nɔŋ ŋakɔɔyuwɛ. 23Awa ŋafɛŋ ŋanɔndi ŋa miŋ dethi nɔŋ ŋɛŋ ka kolo, ŋɛna miŋ yaŋ sɛkitha lɔkɔ ba dethiteke. Ŋafɛŋ ŋanɔndi ŋa be thimiyo ba kuto ŋaŋ, ŋɛna yaŋ sekithiyo gbɛthɛŋ ba ŋɛŋ nununa. 24Malɔkɔ manɔndi ŋafɛŋ ŋayɔhɔi ka detha ŋaŋ sa nɛŋ dethitoko. Masaala na deenke nɛŋ kɔtɔ koŋ ba haliko ba yama dunkuna yiki ka ŋafɛŋ ŋa pankɛ yiki ŋaŋ. 25Bɛna, ka kɔtɔ koŋ, mahakande ka. Ŋafɛŋ ŋaŋ ŋaŋ fooma ŋa kiŋ iŋ makutɔkɔ ba ntɔ namɛŋ. 26Mɛnɛ kufɛŋ kunthe ku ka kɔtɔ koŋ kutɔkɔi wuthoonɛ, ŋafɛŋ ŋaŋ fooma ka kɔtɔ koŋ akutɔkɔ wuthoonɛ. Mɛnɛ kufɛŋ kunthe gbuŋunuwo, ŋafɛŋ ŋaŋ fooma ayehitɔkɔ. 27Beŋ fooma bena kɔtɔ ku ka Kraist koŋ, awa wɔ o wɔ ka beŋ kiŋ kufɛŋ ku ka kɔtɔ kubɛina. 28Ka makɔmande ma ka biya bi ka Masaala beŋ maŋ, Masaala kiye wɔ o wɔ ka makooye nama. Makooye mamayoŋ maŋ, wundɛ kiye bi domo beŋ na baseriŋ bithɔɔkɔ; makooye mamaye maŋ, bindɛ bi sisi thaseriŋ tha ŋaye ka Masaala; mataati maŋ, bathananini. Awa mahɛŋ mabɛina beŋ beŋ yeme: bi ni bɛyiniŋ bathakaba, bi dunkuno sɛmbɛ ba ka puya, maa ba ka mase biya, maa ba bindɛ katitɔkɔ, maa ba ka gbonkiya thayuni thathɛrɛnaŋ. 29Fooma kutɛ bindɛ baseriŋ bithɔɔkɔ, maa bi sisi thaseriŋ tha ŋaye ka Masaala, maa bathananini. Biya fooma kutɛ iŋ sɛmbɛ ba niya bɛyiniŋ bathakaba, 30maa ba puya biya, maa ba gbonkiya ka thayuni thathɛrɛnaŋ, maa ba thalintande thayuni thathɛrɛnaŋ thaŋ. 31Tutaŋ masiyi ka munkiini mu yamɛ nthɔŋ nda niyɔ kolo muŋ. Yaŋ kɔŋ nda bena see ka toŋine bɛyi ba yamɛ nthɔŋ nda kolo baŋ fooma.

will be added

X\