1 biKɔrinthi beŋ 10

1Mbɛndaŋ beŋ, yaŋ thimoŋ ba beŋ siyuwa ba niyɔi nde ka mbembɛŋ bikɛntuŋ beŋ bi nde yeŋ Musa na beŋ. Bindɛ fooma bi kiŋ nde ka pamo iŋ wuruma haŋ, awa bindɛ thuhande Mankɔ Mapothɛ maŋ ka thɛbina thukuma. 2Ka wuruma haŋ iŋ ka Mankɔ Mapothɛ maŋ kɛna biiyo nde bindɛ ba sikino bayeni bi ka Musa. 3Bindɛ fooma thɔŋ muthɔŋ mu dunkuno bindɛ iŋ Yina wo ka Masaala woŋ muŋ, 4awa e bindɛ fooma thiiye muthiiye mu dunkuno bindɛ iŋ Yina wo ka Masaala woŋ muŋ. Bindɛ thiiye maŋaye ka raka hu ka Yina woŋ hu nde kaande iŋ bindɛ haŋ, awa raka hubɛina nde huna Kraist. 5Kɛrɛ halisa bi tha yeheŋ Masaala na thukuma ka mateete makɛnamɛŋ beŋ bina yamɛ, bɛna nɛnɛ ŋabeli namɛŋ ŋaŋ pankitinuwando ka wula baŋ. 6Awa bɛyiniŋ baŋ baŋ fooma kiŋ mathɔyande ba miŋ. Ba kiŋ ba mina yela ba haliko miŋ be tha niyɔ kufiyo ku ka niya bɛyiniŋ banɛnɔi, nɔŋ na ni nde bindɛ na. 7Baŋ ni kubatho dekɛŋ, nɔŋ na ni nde binɔndi ka bindɛ na. Magbali ma ka Masaala maŋ tepe nde, na “Biya beŋ dɔŋɔi ba thɔma iŋ ba thiiye; kɛna ŋaye bindɛ ka kama iŋ ka niya ŋabɛi.” 8Miŋ ka ba niyɔ iŋ mathonko ma ka niya ŋabɛi nɔŋ na nde binɔndi na ka mateete namɛŋ na, awa ka gbɛɛŋ wunthe biya wuluiŋ kɔnthɔ kaye iŋ bitaati bina tukɛ. 9Miŋ ka ba gbɛriŋina Mariki woŋ, nɔŋ na ni nde binɔndi ka bindɛ na, awa e bindɛ nɛnɛ kooruwo iŋ bikɛkɛni. 10Miŋ ka ba gbonkiyɔkɔ nɔŋ na ni nde binɔndi ka bindɛ na, awa bindɛ nɛnɛ teetuwo iŋ Maleka wo iŋ sɛmbɛ ba ka tuka haŋ baŋ woŋ. 11Bɛyiniŋ baŋ baŋ fooma niyɔi nde kɛnamɛŋ ba bɛ be niyɔ mathɔyande ba biya bihɛna, awa bɛŋ gbalo nde ba bɛ be niyɔ kuyeli ba miŋ, baa miŋ kiŋ nda ka malɔkɔ ma thuriyande iŋ mapeye ma ka dunia bahɛ baŋ. 12Wɔ o wɔ wo simɔkɔ ba dɔma na wundɛ kooyeŋ wukahɛ, ndɛ niyɛŋ kuthɛgbɛ haliko ndɛ be tha ŋɔti. 13Kugbɛrɛŋɛŋ ndo kugbɛrɛŋɛŋ ku pɛnkɛ nda bena, kɔthɔŋ ba dɔma na ku bareŋ pɛnka biya bihɛna. Kɛrɛ Masaala kɔŋ thiŋiŋ lahiri nama baŋ, awa ndɛ sa mɛyi ba beŋ gberiŋino kugbɛrɛŋɛŋ ku sa beŋ punku. Ka malɔkɔ ma beŋ gbɛriŋina, wundɛ kɔŋ bena dunkuŋ sɛmbɛ ba beŋ punku niye kuthithi, awa e bena dunkune gboŋa ba beŋ punku funke. 14Bɛna, mbɛndaŋ beŋ, thokiyeŋ niya kubatho dekɛŋ. 15Yaŋ kɔŋ bena gbonkitiyande nɔŋ biya bi iŋ kele. Kɔnsiŋiniyɔkɔŋ ba hu yaŋ bena see ka gbonkitiyande haŋ. 16Kɔɔpu hu miŋ niye wali ka Thɔma hu ka Mariki woŋ haŋ awa hu miŋ thiyiyɛ Masaala na maamo haŋ, naa miŋ thiiye maŋaye ka huŋ sɛkitha huna miŋ sɛkɛthi kufɛŋ ka wasi ba ka Kraist baŋ. Awa kutoŋ ku miŋ thinkuwande koŋ, naa miŋ thɔŋ kuŋ, miŋ sekithe kufɛŋ ka kɔtɔ ku ka Kraist koŋ. 17Saathɛ ba na niyɔi wuŋ kutoŋ kunthe nape kuna iŋ miŋ, miŋ fooma, hali na miŋ mindo bɔyɛ na, miŋ kiŋ kɔtɔ kunthe, baa miŋ hanuwande kutoŋ kunthe kubɛina. 18Simɔkɔŋ hɛ biIsirɛli beŋ; biya bi thɔŋ mu dunkuna saraka muŋ sekithe kufɛŋ ka kubatho ku ka Masaala ku niya ka bɛsɛ baŋ koŋ. 19E ba hɔŋ yaŋ kiŋ ka mase ba dɔma na deka kiŋ ntha kikolo maa muthɔma mu dunkuno kɛnama muŋ? 20Ade. Tɛpa na yaŋ tɛpi na ntha ki dunkuno saraka ka bɛsɛ ba ka biya bi be ni Masaala na kubatho ka gboŋa baseŋa baŋ beŋ muŋ dunkuno ka mbayiŋ beŋ. Awa yaŋ thimota ba beŋ sɛkitha kufɛŋ ka mbayiŋ. 21Beŋ sa thiiye ka kɔɔpu hu ka Mariki woŋ haŋ e beŋ hɛlɛŋ thiiye ka kɔɔpu hu ka mbayiŋ. Beŋ sa thɔŋ Thɔma hu ka Mariki woŋ haŋ e beŋ hɛlɛŋ ka thɔma thɔma hu ka mbayiŋ beŋ haŋ. 22E miŋ thimoŋ ba niya ba Mariki woŋ niyɔ hunaŋ? E miŋ simekeŋ ba dɔma na miŋ yameŋ niŋ ka sɛmbɛ? 23Biya binɔndi kɔŋ tɛpi, na “Miŋ mɛkino ba niya bɛyi o bɛyi.” Huŋ nɔndi bɛna, kɛrɛ ntha o ntha kutɛ kiyɔhɔi ba beŋ. Bindɛ kɔŋ tɛpi, na “Miŋ mɛkino ba niya bɛyi o bɛyi.” Kɛrɛ bɛyi o bɛyi kutɛ sisi kumase. 24Baŋ deethiyɔkɔ wuyɔhɔi tima o tima ba yɛthɛ bakendeŋ, kɛrɛ deethuwaŋ hɛlɛŋ nɛnɛ ba biya bihɛna. 25Thɔma ntha o ntha ki thimo yi ki niya gbɔŋ ka bara baŋ niyo gbɔŋ ka, awa ba kaho ba thɔnthiŋina mɛnɛ ba niyɔi saraka bɛna. 26Nɔŋ na tepe magbali ma ka Masaala maŋ, na “Dunia baŋ iŋ ntha o ntha ki ndɛ, Masaala na biyɛ.” 27Mɛnɛ wɔ ka iŋ lanɛya ka Mariki woŋ thiyi yina ka thɔma awa e yi mɛya, thɔma ntha o ntha ki wundɛ yina dunkune, awa ba kaho ba thɔnthiŋina. 28Kɛrɛ mɛnɛ wɔ tepe yina, na “Muthɔma muŋ muŋ dunkuno nda ka dekɛŋ beŋ.” Ka lɔkɔ babɛina, ba thɔŋ muthɔŋ mubɛina ba saathɛ ba wo tepe yina woŋ iŋ ba wɔ be tha kutɔkɔ mathonko ka thukuma. 29Wuŋ ka ntiŋ nde na ba yi, kɛrɛ ba ntɔ nda woŋ be tha kutɔkɔ mathonko ka thukuma nama haŋ. Wɔ nɔndi kɔŋ tete thɔnthɔŋɔŋ, na “Mbɛ ba sako bakiyaŋ baŋ ba niya ba thimo yaŋ pindo iŋ makutɔkɔ ma ka thukuma hu ka wɔ hɛna? 30Mɛnɛ yaŋ thiyi Masaala na maamo ba muthɔma mukiyaŋ, mbɛ ba yama wɔ thari-tharine ba muthɔma mu thanki yaŋ thiye Masaala na maamo?” 31Kɛrɛ, ba nda gbanthina, yaŋ kɔŋ tɛpi, na bɛyi o bɛyi ba yi ni, wu niyɔiŋ nthɔŋ na thɔma huna, maa thiiye huna, niye wuŋ fooma ba haliko Masaala be dunkuno yiki. 32Dɔŋɔ na sa yi sise thɔrɔ ka biYusu beŋ maa ka siyani bahɛna baŋ maa ka biya bi ka Masaala bi niyɛ lanɛya ka Kraist beŋ. 33Niya nɔŋ na ni yaŋ na: Yaŋ yole ba yehina wɔ o wɔ thukuma ka bɛyi o bɛyi ba yaŋ ni. Yaŋ tha hɔkɔŋ deethi ba wuyɔhɔi wukiyaŋ wuthɔ, kɛrɛ yaŋ deethi ba wuyɔhɔi wu ba biya fooma ba haliko bi be niyɔ kisi.

will be added

X\