1 biKɔrinthi beŋ 1

1Yama Pɔli na wo thiyo iŋ Masaala ŋaye ka mamɛyi nama maŋ ba niyo baseri wothɔɔkɔ wo ka Kraist Yisɔs. Sosɛthɛnisi, wɛnda ntuŋ woŋ, thɔɔtɔi yama ka gbala kuthagba koŋ koŋ baŋ. 2Yaŋ gbale kuthagba koŋ koŋ ka makɔmande ma ka biya bi ka Masaala beŋ maŋ ka mɛti ba ka Kɔrinthi, ka biya beŋ fooma bi thiyi Masaala beŋ e bindɛ dɛŋa kuwaŋ thɔɔkɔ, bi biyɔi nda wundɛ beŋ saathɛ ba bɔhande namɛŋ haŋ iŋ Kraist Yisɔs, thiitaŋ biya fooma kama o kama bi ni kubatho Mariki ntuŋ woŋ Yisɔs Kraist, wo Mariki ntuŋ woŋ ka nanthe. 3Nɔŋ Masaala, Fanda ntuŋ woŋ, iŋ Mariki ntuŋ woŋ Yisɔs Kraist toŋine bena mathimo e bena dunkune mathɛbɛ. 4Tima o tima yaŋ kɔŋ thiyi Masaala na maamo ba beŋ ba mathimo ma toŋine wundɛ bena maŋ ka bɔhande ndeŋ haŋ iŋ Kraist Yisɔs. 5Baa ŋaye ka bɔhande ndeŋ haŋ iŋ Kraist, beŋ see niyɔ dinhaŋiŋ ka ntha o ntha thiitaŋ kele hu ka gbonkiya iŋ hu ka makɔthɔ fooma. 6Huseri hu ba Kraist haŋ see kɔɔ wukahɛ ka thathukuma thakendeŋ thaŋ 7haaŋ beŋ tha buthuru ba kuta thaduba thanthe ka yumba hu beŋ yumbu Mariki wokɛntuŋ woŋ Yisɔs Kraist woŋ haŋ ba saa, awa 8Masaala kɔŋ bena kiyi wukahɛ haaŋ ka mapeye maŋ haliko beŋ be niyɔ bendo ka iŋ ka boho thɛkɛ ka lɔkɔ ba Mariki ntuŋ woŋ Yisɔs Kraist see. 9Masaala, wo thiyɛ bena woŋ ba si niyɔ mabɔhande iŋ hati nama woŋ Yisɔs Kraist, Mariki ntuŋ woŋ, wɔ yɔhɔi niyo lanɛya na. 10Maŋaye ka mayoho ma dunkuno yaŋ iŋ Mariki woŋ Yisɔs Kraist maŋ, yaŋ theteke bena, mbɛndaŋ beŋ, ba beŋ bohinande haliko mahakuwande ma be tha niyɔ ka mateete ndeŋ. Bohinandeŋ nagbati e beŋ niyɔ masiyi manthe iŋ madɛɛnki manthe. 11Baa biya binɔndi bi ŋaye ka banka ba ka Kaloi tepe yama nagberekethe ba dɔma na ŋayuŋandeŋ ŋa kiŋ ka mateete makendeŋ. 12Yaŋ tɛpɛŋ hɛ nagberekethe ba dɔma na, ka mateete makendeŋ, woŋ kɔŋ dɔŋ, na “Yaŋ kiŋ ba Pɔli”; e woŋ dɔma, na “Yaŋ kiŋ ba Apɔlɔsi”; woŋ dɔma, na “Yaŋ, yaŋ kiŋ ba Pita”; woŋ dome, na “Yaŋ kiŋ ba Kraist.” 13E Kraist ba haninuwando? E Pɔli na tukɛ ka kuyeŋ kubariŋande koŋ? E ka keŋ ku ka Pɔli kɛna biiyo nde beŋ biye hu ka Masaala haŋ? 14Yaŋ thiyi Masaala na maamo ba dɔma na yaŋ tha biye wɔ wunthe ka beŋ yɔkɔŋ Kirisipɔsi iŋ Keiyusi. 15Huna, wɔ ka ka beŋ wo tɛpi ba dɔma na ndɛ biyo nde iŋ yaŋ maa bakarandeŋ wokiyaŋ na wundɛ. 16Inhiiŋ, yaŋ simɔkɔi, yaŋ biye nde Sitɛfanɔsi na iŋ kubɔri nama, kɛrɛ yaŋ simeketa mɛnɛ yaŋ biye nde nda wɔ wohɛna daŋandeŋ bi tepe yaŋ beŋ beŋ. 17Kraist tha nde yama ŋindi ba biye biya, kɛrɛ wundɛ ŋindi yama ba tepe biya Huseri Huyɔhɔi haŋ. Wuŋ ka ntiŋ nde na ba huŋ tepe ka kele hu ka wɔmɛti, ba haliko tuka hu ka Kraist haŋ ka kuyeŋ kubariŋande koŋ hu be tha kanita kolo nama baŋ. 18Huseri hu ka tuka hu ka Kraist haŋ ka kuyeŋ kubariŋande koŋ hu kiŋ mayɛini ka bi kɔɔyɛ ka piriŋa haŋ beŋ. Ka miŋ nɛnɛ, mindo kɔɔyɛ ka niyo kisi haŋ beŋ, huna sɛmbɛ ba ka Masaala baŋ. 19Magbali ma ka Masaala maŋ tepe, na “Yaŋ kɔŋ teeti kele hu ka biya bikele beŋ haŋ, e yaŋ dapinuwande makɔthɔ ma ka bakarani beŋ maŋ.” 20Ka lɔkɔ babɛina, nama biya bikele beŋ kooye? maa bakarani beŋ? maa biya bi thɔi gbonkiya beŋ ka dunia baŋ baŋ? Masaala tɔŋɔŋ nagberekethe ba dɔma na kele hu ka dunia baŋ haŋ, hu kiŋ huthɔkɔi napɔdɔ! 21Ba Masaala, ŋaye ka kele nama haŋ, wundɛ ni na sa niŋ biya punku kothiye ŋaye ka kele hu ka huwɔmɛtiya haŋ. Kɛrɛ wundɛ dɛɛnki ba niye biya kisi bi niyɛ niŋ lanɛya beŋ ŋaye ka huseri hu biya dɔŋ haŋ na huthɔkɔi, hu miŋ ni kɛwandi haŋ. 22BiYusu beŋ bi kiŋ iŋ kufiyo ba kutiyɔkɔ bɛyiniŋ bathakaba e biya bi ka siyani bahɛna baŋ beŋ kɔ kaa kaŋ deethuwa kele. 23Kɛrɛ miŋ, miŋ kɔŋ ni Kraist na kɛwandi, wo tukɛ ka kuyeŋ kubariŋande koŋ woŋ, huseri hu be biYusu beŋ thimo ba poniyɛ kuiha haŋ, siyani bahɛna baŋ nɛnɛ, na huseri huthɔkɔi. 24Kɛrɛ ba bindɛ bi thanki Masaala thiya beŋ, biYusu yo siyani bahɛna yo, huseri haŋ haŋ huna Kraist wo sɛmbɛ ba ka Masaala baŋ woŋ iŋ kele nama haŋ. 25Ba wu biya siyi wuŋ ba wuŋ niyɔ thɔkɔ hu ka Masaala haŋ wu yameŋ kaye-kaye ba kele hu ka wɔmɛti, awa wu biya siyi wuŋ ba wuŋ niyɔ kɔɔyuwa nama haŋ wu yameŋ kaye-kaye ba sɛmbɛ ba ka wɔmɛti. 26Ka tete, mbɛndaŋ beŋ, simɔkɔŋ hɛ na nde beŋ ka malɔkɔ ma thiyi bena Masaala. Ka madethi ma ka huwɔmɛtiya haŋ maŋ, bendo thahuwɔi bina nde bendo kele, bendo iŋ sɛmbɛ, bendo iŋ makooye mamandiŋ. 27Masaala, ŋaye ka madɛɛnki nama maŋ, yɛthi wu simeke biya bi ka dunia baŋ ba wuŋ niyɔ wuthɔkɔi, ba thiminuwa dɛkuiŋ bikele beŋ, awa e yɛtha wumayɛini wuŋ ba thiminuwe dɛkuiŋ biya bibasɛmbɛŋ beŋ. 28Wundɛ yɛthi wuthathinɔkɔi wuŋ e biya wuŋ yethitɔ ka masiyi e tɛpa na ntha kutɛ, ba teetuwe wu simeke dunia baŋ ba wuŋ niyɔ ntha kikolo. 29Wuŋ, wuŋ thɔyande ba dɔma na wɔ ka wo punku ba niyɔkɔ kaba ka yethi hu ka Masaala. 30Masaala na thɛrinɛ siini ba iŋ beŋ baŋ na bɔhande beŋ iŋ Kraist Yisɔs, wo ni Masaala ba wundɛ niyɔ kele hukɛntuŋ haŋ woŋ, wo niyɛ ba mina Masaala kuta woŋ nɔŋ biya bithumbɛ, e mina mɛthina maŋaye ka banɛnɔi e mina kiya kuyankaŋ. 31Huna, nɔŋ na tepe nthɔŋ magbali ma ka Masaala maŋ na, na “Wɔ o wɔ wo thimo ba niyɔkɔ kaba, wundɛ niyekeŋ kaba ba ba thanki Mariki woŋ niya baŋ.”

will be added

X\