Roˉma‸ 13

1Chaw teˇ g'aˇ le le uˉ peunˍ shehˍ hpaˇ teˇ hpaˍ awˬ hawˉ lo hk'a deh‸ chehˇ-oˆ. Awˬ lawn k'o, G'uiˬ sha geh g'a ve maˇ heˆ k'o, uˉ peunˍ tuˬ kanˇ paˆ maˇ cawˬ. Yawˇ hui cawˬ taˍ ve kanˇ paˆ teˇ hpaˍ G'uiˬ sha teh taˍ ve yoˬ. 2Hk'e te leh, uˉ peunˍ shehˍ hpaˇ teˇ hpaˍ hta‸ hpfuhˆ ve chaw lehˬ, G'uiˬ sha teh taˍ ve aˉ yaˇ hta‸ tawˍ taˍ shehˍ hpaˇ hpeh‸ ve yoˬ. Tawˍ taˍ ve chaw hui lehˬ, ciˍ yanˍ ve hta‸ g'a hkanˍ tuˬ yoˬ. 3Awˬ lawn k'o, da‸ ve kanˉ hta‸ te ve chaw teˇ hpaˍ lehˬ, jawˇ mawˇ teˇ hpaˍ hta‸ kawˆ tuˬ maˇ cawˬ. Haiˬ ve hta‸ te ve chaw teˇ hpaˍ lehˬ kawˆ tuˬ cawˬ ve yoˬ. Uˉ peunˍ shehˍ hpaˇ teˇ hpaˍ hta‸ kawˆ tuˬ maˇ cawˬ ve chaw hpeh‸ gaˇ laˇ. Da‸ ve hta‸ te-o. Chi hk'e te ve k'o, yawˇ nawˬ hta‸ chiˇ mvuh tuˬ yoˬ. 4Nawˬ awˬ pon awˬ bon cawˬ tuˬ, yawˇ G'uiˬ sha ve awˬ ceˬ hpeh‸ ve yoˬ. Ya‸ hk'aˇ, nawˬ haiˬ ve hta‸ te ve k'o, kawˆ chehˇ-oˆ. Awˬ lawn k'o, yawˇ lehˬ aˉ htaw hk'e leˇ pfuhˇ taˍ ve maˇ heˆ. Awˬ haiˬ hk'a te ve chaw hui hta‸ ciˍ yanˍ piˇ tuˬ, yawˇ lehˬ G'uiˬ sha ve awˬ ceˬ hpeh‸ ve yoˬ. 5Hk'e te leh, uˉ peunˍ shehˍ hpaˇ awˬ hawˉ lo hk'a deh‸ chehˇ-oˆ. Ciˍ yanˍ ve hta‸ kawˆ ve pa taw ceh tiˉ maˇ heˆ. Nawˬ ve shiˍ puiˉ ve nyi ma htawˇ, dawˇ sha hpeh‸ tuˬ hk'a deh‸ chehˇ-oˆ. 6Chi hta‸ pa taw, nawˬ hui a moˇ ka‸ keu piˇ chehˇ ve yoˬ. Awˬ lawn k'o, uˉ peunˍ shehˍ hpaˇ teˇ hpaˍ lehˬ, G'uiˬ sha ve kanˉ te shehˍ hpaˇ hpeh‸ leh kanˉ chi ve hta‸ yawˇ hui hk'aˬ htaˆ ka‸ te tcuhˉ taˍ ve yoˬ. 7Yawˇ hui hk'a peu-eˬ hta‸ piˇ keunˍ piˇ cawˇ ve hk'e piˇ-oˆ. A moˇ shaw ve chaw hui hta‸ a moˇ keu piˇ-oˆ. Awˬ hkawnˍ shaw ve chaw hui hta‸ awˬ hkawnˍ keu piˇ-oˆ. Kawˆ keunˍ ve chaw hui hta‸ kawˆ-oˆ. Yawˆ yan keunˍ ve chaw hui hta‸ yawˆ yan-o. 8Jeˬ a ciˉ ka‸ taˇ pfuhˇ. Ya‸ hk'aˇ, teˇ g'aˇ leh teˇ g'aˇ ha‸ da‸ ve jeˬ teˇ ceuˬ hta‸ pfuhˇ taˍ-o‸. Awˬ lawn k'o, awˬ paˇ awˬ kui chehˇ ve chaw hui hta‸ ha‸ ve chaw lehˬ, awˬ liˇ tawˇ hkawˇ hta‸ te biˇ peuˬ. 9Haˉ chawˇ haˉ paˆ maˇ g'a te, chaw hta‸ maˇ g'a tiˇ pehˍ, shu ve mawˇ hta‸ maˇ g'a hk'awˇ, shu mawˇ shu jeˬ hta‸ maˇ g'a sheˉ lai teh‸ k'oˆ taˍ ve awˬ liˇ tawˇ hkawˇ teˇ hpaˍ maˇ k'oˆ, awˬ kaˍ awˬ nu cawˬ taˍ ve awˬ liˇ tawˇ hkawˇ teˇ hpaˍ htawˇ maˇ k'oˆ, tawˇ chi hk'a peu-eˬ lehˬ, Nawˬ awˬ to hta‸ ha‸ ve hk'e, awˬ paˇ awˬ kui chehˇ ve chaw teˇ hpaˍ hta‸ ha‸-o‸ teh‸ k'oˆ taˍ ve teˇ hkawˇ awˬ hk'aw lo biˇ la ve yoˬ. 10Ha‸ ve teˇ ceuˬ lehˬ, awˬ paˇ awˬ kui chehˇ ve chaw hta‸ awˬ haiˬ maˇ te. Hk'e te leh, ha‸ ve teˇ ceuˬ lehˬ, awˬ liˇ tawˇ hkawˇ hta‸ te biˇ ve yoˬ. 11Chi hk'oˆ ka‸, chi beu‸ awˬ yanˇ lehˬ nawˬ hui zuh‸ nawˇ la tuˬ ve awˬ yanˇ gaˬ peuˬ ve hta‸ nawˬ hui shiˍ chehˇ ve yoˬ. Awˬ lawn k'o, ngaˬ hui awˉ lawˉ yonˍ gehˇ ve teˇ yanˇ a‸ kehˉ, chi beu‸ htaiˍ hk'aw‸ ve teˇ ceuˬ leuˉ leh ngaˬ hui hta‸ neˇ la peuˬ. 12Mvuhˇ hpeu‸ awˬ yanˇ peuˬ la paˇ neˇ leh, mvuhˇ law‸ k'aw awˬ yanˇ gaˬ la paˇ neˇ ve yoˬ. Hk'e te leh, naˆ ho‸ ve hta‸ caˉ da‸ ve kanˉ teˇ hpaˍ hta‸ k'ehˆ baˬ taˉ leh, awˬ g'euˆ hta‸ caˉ da‸ ve la‸ caˉ teˇ hpaˍ hta‸ veu‸ deh-a veuˬ. 13Ha lehˬ tuˬ te ponˬ te leuˉ leh tzuhˬ dawˬ bvuhˆ ve, haˉ chawˇ haˉ paˆ te leh te ponˬ te leuˉ ve, shu hta‸ ya‸ da‸ jiˆ da‸ leh hkawehˉ ve, chi teˇ hpaˍ hta‸ taˇ te. Mvuhˇ law‸ k'aw htaˇ te keunˍ ve teˇ hpaˍ hta‸ ngaˬ hui te-a veuˬ. 14Chi hk'oˆ ka‸, Jawˇ mawˇ Yeˍsuˆ Hkri‸ hta‸ veu‸ deh-o. Awˬ suhˍ awˬ shaˍ a loˍ awˬ hk'aˇ suh te k'ai tuˬ te‸ chiˉ taˇ gu taˍ.

will be added

X\