Ma‸htehˍ 27

1Mvuhˇ htiˇ la ve teˇ yanˇ, paw hkuˇ lonˉ hui leh Yuˇda‸ chaw hui ve awˬ hoˉ chaw mawˇ hui hk'a peu-eˬ, Yeˍsuˆ hta‸ tiˇ pehˍ tuˬ jehˬ da‸ ve yoˬ. 2Peuˬ leh, yawˇ hui yawˇ hta‸ hpeh peuˬ hk'aw‸ nawˉ sheh veu leh, mvuhˇ miˬ jawˇ mawˇ lonˉ Piˉla‸ ve la‸ hk'aw lo yawˇ hta‸ chiˇ a‸ piˇ ve yoˬ. 3Oˇ htaˇ yawˇ hta‸ chiˇ a‸ shehˍ hpaˇ Yuˇda‸ teˇ g'aˇ lehˬ, Yeˍsuˆ hta‸ tiˇ pehˍ tuˬ shu suhˉ taˆ ve hta‸ g'a mawˬ htaˇ, yawˇ k'aw‸ dawˇ hpfuhˆ leh, hpu oˇ ve shehˆ chi hteh‸ hta‸ paw hkuˇ lonˉ teˇ hpaˍ leh awˬ hoˉ chaw mawˇ teˇ hpaˍ geh k'aw‸ yuˬ laˬ leh k'oˆ ve, 4Venˇ baˆ maˇ cawˬ ve chaw hta‸ ngaˬ chiˇ a‸ piˇ peuˬ ve pa taw, ngaˬ venˇ baˆ te peuˬ teh‸ k'oˆ ve yoˬ. Yawˇ hui k'aw‸ k'oˆ ve, Chi ve ngaˬ hui hta‸ hk'aˬ hk'e caˉ da‸ le. Nawˬ ve kanˉ hta‸ nawˬ hk'aˇ nawˬ nyi-o teh‸ k'oˆ piˇ ve yoˬ. 5Hpu oˇ ve hta‸ bon yehˬ lonˉ awˬ hk'aw lo baˬ keu taˉ peuˬ hk'aw‸ nawˉ yawˇ tawˆ k'ai leh, yawˇ hk'aˇ yawˇ k'awˍ peˍ ca nyiˉ pehˍ ve yoˬ. 6Paw hkuˇ lonˉ teˇ hpaˍ hpu oˇ ve hta‸ yuˬ leh, Hpu chi lehˬ, awˬ suhˍ ve awˬ hpfuhˇ hpeh‸ ve pa taw, hpu tanˇ geh hkaw‸ da‸ maˇ cawˇ teh‸ k'oˆ ve yoˬ. 7Hk'e te leh, yawˇ hui jehˬ da‸ peuˬ hk'aw‸ nawˉ, hkehˉ chaw teˇ hpaˍ hta‸ tuˍ piˇ tuˬ, hpu oˇ ve hta‸ yuˬ leh mu‸ hk'u te shehˍ hpaˇ ve miˬ guiˬ teˇ peˆ hta‸ vuiˬ taˍ ve yoˬ. 8Hk'e te leh, ya‸ nyi hk'a gaˬ miˬ guiˬ oˇ ve teˇ peˆ hta‸ Awˬ suhˍ miˬ guiˬ teh‸ k'oˆ ve yoˬ. 9Oˇ htaˇ, tcuh kaˍ paˍ Yeˍraˍmiˆ k'oˆ taˍ ve hk'e biˇ la ve yoˬ. Yawˇ k'oˆ ve, Iˉsaˍreˍlaˆ chaw teˇ hpaˍ hpaˍ awˬ hpfuhˇ k'oˆ cheˆ taˍ ve, chaw teˇ g'aˇ ve awˬ hpfuhˇ hpu shehˆ chi hta‸ yuˬ leh, 10Jawˇ mawˇ G'uiˬ sha ngaˬ hta‸ tawˇ piˇ taˍ laˇ ve hk'e, mu‸ hk'u te shehˍ hpaˇ ve miˬ guiˬ teˇ peˆ hta‸ yawˇ hui vuiˬ ve yoˬ. 11Yeˍsuˆ lehˬ, mvuhˇ miˬ jawˇ mawˇ lonˉ mehˆ g'uˇ suhˍ huˉ chehˇ htaˇ, mvuhˇ miˬ jawˇ mawˇ lonˉ k'oˆ ve, Nawˬ lehˬ Yuˇda‸ chaw hui ve Hkunˉ hawˉ hkanˇ yoˬ laˇ teh‸ na nyi ve yoˬ. Yoˬ, nawˬ k'oˆ ve hk'e yoˬ teh‸, Yeˍsuˆ yawˇ hta‸ k'aw‸ k'oˆ piˇ ve yoˬ. 12Paw hkuˇ lonˉ leh awˬ hoˉ chaw mawˇ teˇ hpaˍ yawˇ awˬ hk'oˆ hta‸ venˇ baˆ taˍ ve teˇ yanˇ, yawˇ te‸ chiˉ ka‸ maˇ k'aw‸ k'oˆ. 13Oˇ htaˇ, jawˇ mawˇ Piˉla‸ lehˬ, Nawˬ awˬ lawn yawˇ hui shaˉ hkiˆ hk'aˬ hk'e hkanˍ chehˇ ve hta‸ nawˬ maˇ kaˇ laˇ teh‸, yawˇ hta‸ k'oˆ piˇ ve yoˬ. 14Ya‸ hk'aˇ, yawˇ lehˬ tawˇ teˇ peu-eˍ ka‸ maˇ yaw hk'aw‸ ve pa taw, mvuhˇ miˬ jawˇ mawˇ lonˉ anˇ jaˇ ve yoˬ. 15Pawehˇ oˇ ve hta‸ te ve teˇ yanˇ, htawnˍ hk'aw chehˇ ve chaw teˇ hpaˍ awˬ hk'aw lo, chaw chi ma ve nyi ma cawˇ ve chaw teˇ g'aˇ hta‸ mvuhˇ miˬ jawˇ mawˇ lonˉ hpehˇ piˇ ve awˬ liˇ cawˬ ve yoˬ. 16Oˇ htaˇ, htawnˍ hk'aw chehˇ ve chaw teˇ hpaˍ awˬ hk'aw lo, awˬ meh bvuhˬ ve Baˍraˍbaˆ meh ve chaw teˇ g'aˇ cawˬ ve yoˬ. 17Hk'e te leh, yawˇ hui hpawnˬ da‸ chehˇ htaˇ, jawˇ mawˇ Piˉla‸ k'oˆ ve, Nawˬ hui awˬ pon a shu hta‸ hpehˇ tcuh gaˇ le. Baˍraˍbaˆ hta‸ laˇ, maˇ heˆ k'o Hkri‸ teh‸ k'oˆ ve Yeˍsuˆ hta‸ laˇ teh‸, yawˇ hui hta‸ na nyi ve yoˬ. 18Awˬ lawn k'o, yawˇ hui Yeˍsuˆ hta‸ hkawehˉ ve nyi ma cawˬ ve pa taw yawˇ hta‸ chiˇ a‸ laˇ ve hta‸ jawˇ mawˇ Piˉla‸ shiˍ ve yoˬ. 19Peuˬ leh, suhˉ jehˬ kuiˬ k'aw jaw hk'oˆ lo yawˇ mui chehˇ htaˇ, yawˇ ve awˬ miˇ ma yawˇ hta‸ tawˇ chi hk'e shanˍ piˇ ve, Hteˇ ve cawˇ ve chaw chi teˇ g'aˇ hta‸ te‸ chiˉ taˇ te. Awˬ lawn k'o, ya‸ nyi yawˇ hta‸ pa taw ngaˬ zuh‸ maˆ ve awˬ hk'aw lo g'a tu‸ hkanˍ jaˇ peuˬ teh‸, tawˇ shanˍ feu piˇ ve yoˬ. 20Baˍraˍbaˆ hta‸ lawˬ yuˬ leh Yeˍsuˆ hta‸ tiˇ pehˍ tuˬ, paw hkuˇ lonˉ hui leh awˬ hoˉ chaw mawˇ teˇ hpaˍ lehˬ, chaw chi ma ve hta‸ awˬ g'aˇ g'aˇ hte‸ piˇ ve yoˬ. 21Mvuhˇ miˬ jawˇ mawˇ lonˉ lehˬ, Chaw chi nyiˇ g'aˇ awˬ hk'aw lo nawˬ hui awˬ pon hk'aˬ ve teˇ g'aˇ hta‸ hpehˇ tcuh gaˇ le teh‸, yawˇ hui hta‸ k'aw‸ na nyi htaˇ, Baˍraˍbaˆ hta‸ yoˬ teh‸ yawˇ hui k'aw‸ k'oˆ piˇ ve yoˬ. 22Jawˇ mawˇ Piˉla‸ lehˬ, Hk'e te k'o, Hkri‸ teh‸ k'oˆ ve Yeˍsuˆ hta‸ ngaˬ hk'aˬ hk'e g'a te tuˬ le teh‸, yawˇ hui hta‸ na nyi htaˇ, Yawˇ hta‸ la‸ ka hk'oˆ lo hta‸ pehˍ loˬ teh‸ yawˇ hui hk'a peu-eˬ k'oˆ ve yoˬ. 23Yawˇ k'aw‸ k'oˆ ve, Aˬ hto‸ ma pa taw le. Yawˇ haiˬ ve aˬ hto‸ ma teˇ ceuˬ hta‸ te ve le teh‸ na nyi htaˇ, Yawˇ hta‸ la‸ ka hk'oˆ lo hta‸ pehˍ loˬ teh‸, yawˇ hui leuˉ leh g'aˇ hte‸ k'aw‸ kuˬ ve yoˬ. 24Jawˇ mawˇ Piˉla‸ lehˬ, yawˇ te‸ chiˉ te maˇ g'a ve awˬ hk'oˆ ka‸, shu duiˆ-ehˍ shaˇ-ehˍ te tawˆ la ve hta‸ g'a mawˬ htaˇ, yawˇ iˉ kaˆ yuˬ leh chaw awˬ moˍ lonˉ mehˆ g'uˇ suhˍ la‸ sheh tsuhˇ leh k'oˆ ve, Chaw chi teˇ g'aˇ ve awˬ suhˍ ngaˬ awˬ hk'oˆ hta‸ taˇ gaˬ la piˇ. Nawˬ hui hk'aˇ nawˬ hui te-o teh‸ k'oˆ piˇ ve yoˬ. 25Chaw hk'a peu-eˬ k'aw‸ k'oˆ ve, Yawˇ ve awˬ suhˍ ngaˬ hui leh ngaˬ hui ve awˬ yaˇ awˬ duˬ teˇ hpaˍ awˬ hk'oˆ hta‸ gaˬ la piˇ-oˆ teh‸ k'oˆ ve yoˬ. 26Oˇ htaˇ jawˇ mawˇ Piˉla‸ lehˬ, yawˇ hui awˬ pon Baˍraˍbaˆ hta‸ hpehˇ piˇ leh, Yeˍsuˆ hta‸ jaw‸ peuˬ hk'aw‸ nawˉ la‸ ka hk'oˆ lo hta‸ pehˍ tuˬ chiˇ a‸ piˇ ve yoˬ. 27Oˇ htaˇ mvuhˇ miˬ jawˇ mawˇ lonˉ ve ma‸ yaˇ teˇ hpaˍ lehˬ, Yeˍsuˆ hta‸ hawˉ yehˬ awˬ hk'aw lo shiˍ k'ai leh, ma‸ yaˇ teˇ ta‸ hk'a peu-eˬ hta‸ Yeˍsuˆ geh hpawnˬ la piˇ ve yoˬ. 28Yawˇ hui yawˇ ve aˉ po‸ hta‸ k'ehˆ baˬ leh, nyiˉ-ehˍ ve aˉ po‸ zuhˬ ma yawˇ hta‸ deh piˇ ve yoˬ. 29Aˉ chuˇ te hta‸ yuˬ leh shi uˉ tcuhˍ hk'e te g'a‸ leh, yawˇ ve oˉ k'oˍ hta‸ hk'awˆ piˇ ve yoˬ. Yawˇ la‸ sha paˉ ve la‸ sheh hk'aw lo, lo taˬ teˇ taˬ vawˆ taˍ tcuh leh, yawˇ mehˆ g'uˇ suhˍ hkui tcuhˉ teh leh k'oˆ ve, Yuˇda‸ ve hkunˉ hawˉ hkanˇ-oˬ, nawˬ awˬ bon uiˍ piˇ-oˆ teh‸, yawˇ hta‸ maˇ shawˍ maˇ caˆ te leh k'oˆ guiˇ ve yoˬ. 30Yawˇ hta‸ ciˉ g'uiˇ hpe‸ pfuhˍ leh, lo taˬ oˇ ve hta‸ yawˇ hui k'aw‸ yuˬ leh yawˇ ve oˉ k'oˍ hta‸ dawˆ ve yoˬ. 31Yawˇ hta‸ maˇ shawˍ maˇ caˆ te peuˬ hk'aw‸ nawˉ, aˉ po‸ zuhˬ ma hta‸ yawˇ hui k'ehˆ baˬ leh, yawˇ ve veu‸ k'aˇ hta‸ k'aw‸ feuˉ piˇ ve yoˬ. Oˇ htaˇ, la‸ ka hk'oˆ lo hta‸ pehˍ tuˬ yawˇ hta‸ sheh k'ai ve yoˬ. 32Yawˇ hui tawˆ k'ai chehˇ htaˇ, Siˉ monˍ meh ve Kuˇreˍneˍ venˇ yaˇ teˇ g'aˇ hta‸ mawˬ ve yoˬ. Yawˇ hui yawˇ hta‸ nyiˉ leh Yeˍsuˆ ve la‸ ka hta‸ taˆ tcuh ve yoˬ. 33Gawˇlaˍgawˇtaˆ meh ve chehˇ kuiˬ lo yawˇ hui gaˬ la ve yoˬ. Awˬ meh oˇ ve tcuhˉ kuiˬ lehˬ, oˉ koˆ teh‸ k'oˆ ve yoˬ. 34Hk'aˇ ve naˆ tsuhˇ hkaw‸ taˍ ve a pehˉ meuˇ g'uiˬ yawˇ hui yawˇ hta‸ taw piˇ ve htawˇ, yawˇ leh‸ nyi sheˬ leh maˇ dawˬ. 35Yawˇ hui yawˇ hta‸ la‸ ka hk'oˆ lo hta‸ keu peuˬ htaˇ, yawˇ hui kuˇ da‸ leh yawˇ ve veu‸ k'aˇ teˇ hpaˍ hta‸ pehˬ yuˬ ve yoˬ. 36Hk'e te leh, yawˇ hui oˇ kaˬ lo mui leh yawˇ hta‸ shaw taˍ ve yoˬ. 37Chaw chi lehˬ, Yuˇda‸ chaw hui ve Hkunˉ hawˉ hkanˇ Yeˍsuˆ yoˬ teh‸, yawˇ hta‸ venˇ baˆ taˍ ve li‸ yawˇ hui bvuh‸ leh, yawˇ ve oˉ k'oˍ awˬ hk'oˆ lo nehˉ taˍ ve yoˬ. 38Oˇ htaˇ, yawˇ geh teˇ geh chaw hk'awˇ nyiˇ g'aˇ hta‸ htawˇ, la‸ sha paˉ teˇ g'aˇ, la‸ mehˍ paˉ teˇ g'aˇ, la‸ ka hk'oˆ lo hta‸ keu taˍ ve yoˬ. 39K'ai chehˇ laˬ chehˇ ve chaw teˇ hpaˍ lehˬ, yawˇ hta‸ maˇ shawˍ maˇ caˆ k'oˆ leh, a shu yawˇ ve oˉ k'oˍ hiˆ leh k'oˆ ve, 40Bon yehˬ lonˉ hta‸ te luˬ leh shehˆ nyi awˬ hk'aw lo k'aw‸ te g'a ve chaw-oˬ, nawˬ awˬ to hta‸ ponˬ piˇ-oˆ. Nawˬ G'uiˬ sha ve Yaˇ hpu yoˬ k'o, la‸ ka hk'oˆ lo ya‸ la-o teh‸ k'oˆ piˇ ve yoˬ. 41Paw hkuˇ lonˉ hui lehˬ, li‸ bvuh‸ paˍ leh awˬ hoˉ chaw mawˇ teˇ hpaˍ geh teˇ geh chi hk'a shuˍ shuˍ yawˇ hta‸ k'oˆ guiˇ g'uiˬ guiˇ ve yoˬ. 42Yawˇ hui k'oˆ ve, Shu hta‸ yawˇ htaiˍ hk'aw‸ g'a ve yoˬ. Yawˇ awˬ to hta‸ yawˇ htaiˍ hk'aw‸ maˇ g'a. Yawˇ lehˬ Iˉsaˍreˍlaˆ ve Hkunˉ hawˉ hkanˇ yoˬ. Hk'e te leh, yawˇ la‸ ka hk'oˆ lo ya‸ la piˇ sheˍ. Oˇ htaˇ heh‸, ngaˬ hui yawˇ hta‸ yonˍ tuˬ yoˬ. 43Yawˇ lehˬ G'uiˬ sha hta‸ cuˇ ve yoˬ. Ngaˬ lehˬ G'ui sha ve Yaˇ hpu yoˬ teh‸ yawˇ k'oˆ taˍ peuˬ. Hk'e te leh G'uiˬ sha yawˇ hta‸ nyi ma cawˇ k'o, G'uiˬ sha yawˇ hta‸ ponˬ piˇ lawˬ-o‸ teh‸, yawˇ hui k'oˆ ve yoˬ. 44Yawˇ geh teˇ geh la‸ ka hk'oˆ lo hta‸ keu taˍ ve chaw hk'awˇ nyiˇ g'aˇ htawˇ, oˇ ve hk'a shuˍ shuˍ yawˇ hta‸ maˇ shawˍ maˇ caˆ k'oˆ ve yoˬ. 45Mvuhˇ law‸ k'aw tcuhˆ htaˇ ka‸ tanˬ leh mvuhˇ hpeu‸ hpawˇ shehˆ naˍ riˍ hk'a gaˬ, miˬ guiˬ hk'a peu-eˬ naˆ ho‸ lehˍ hpeh‸ sheˬ ve yoˬ. 46Mvuhˇ hpeu‸ hpawˇ shehˆ naˍ riˍ hk'e gaˬ htaˇ, Yeˍsuˆ awˬ hkawˇ bvuhˬ chaweh te leh, Eˇliˆ, Eˇliˆ, laˍmaˍ saˍbaˆtaˍniˍ teh‸ kuˬ ve yoˬ. Tcuhˉ kuiˬ lehˬ, Ngaˬ ve G'uiˬ sha-oˬ, ngaˬ ve G'uiˬ sha-oˬ, aˬ hto‸ ma te nawˬ ngaˬ hta‸ baˬ taˉ laˇ ve le teh‸ k'oˆ ve yoˬ. 47Oˇ kaˬ lo huˉ chehˇ ve chaw teˇ hpaˍ hpaˍ tawˇ oˇ ve hta‸ g'a kaˇ htaˇ, Chi hpaˇ lehˬ, Eˇliˇya‸ hta‸ kuˬ ve teh‸ k'oˆ ve yoˬ. 48Yawˇ hui awˬ hk'aw lo chaw teˇ g'aˇ teˇ cawˬ haˉ g'uiˇ k'ai leh, laˇ tsuhˇ g'uiˬ mvuhˬ teˇ maˬ hta‸ yuˬ leh, ci ve awˬ g'uiˬ awˬ hk'aw lo tuˍ peuˬ hk'aw‸ nawˉ, lo taˬ hta‸ choˆ leh, yawˇ hta‸ taw piˇ ve yoˬ. 49Ya‸ hk'aˇ, awˬ kaˍ awˬ nu chaw teˇ hpaˍ k'oˆ ve, Taˇ te sheˍ. Eˇliˇya‸ yawˇ htaˬ ca htaiˍ hk'aw‸ la tuˬ leh naˍ, nyi taˍ shaˍ teh‸ k'oˆ ve yoˬ. 50Yeˍsuˆ awˬ hkawˇ bvuhˬ chaweh teˇ pawˆ k'aw‸ kuˬ leh shaˉ cheˆ ve yoˬ. 51Oˇ htaˇ bon yehˬ lonˉ ve hpaˬ kaˍ lehˬ, awˬ na te leh awˬ hawˉ lo hk'a gaˬ nyiˇ hkoˇ tzuh‸ sheˬ ve yoˬ. Miˬ hiˆ leh, haˉ pui teˇ hpaˍ htawˇ hkoˇ sheˬ ve yoˬ. 52Tuˍ hpfuh teˇ hpaˍ hpaw sheˬ leh, suh taˍ peuˬ ve Hkri‸ yaˇ laiˉ g'aˇ awˬ to k'aw‸ te‸ tu la ve yoˬ. 53Yeˍsuˆ k'aw‸ te‸ tu la peuˬ hk'aw‸ nawˉ, yawˇ hui tuˍ hpfuh hk'aw lo tawˆ la leh, da‸ kehˬ ve venˇ hk'aw lo‸-e leh, chaw laiˉ g'aˇ yawˇ hui hta‸ g'a mawˬ ve yoˬ. 54Ma‸ poˍ leh yawˇ geh Yeˍsuˆ hta‸ shaw chehˇ ve ma‸ yaˇ teˇ hpaˍ lehˬ, miˬ hiˆ ve leh hk'a hpeh‸ la ve awˬ ceuˬ teˇ hpaˍ hta‸ g'a mawˬ htaˇ, yawˇ hui kawˆ jaˇ leh, Chi hpaˇ lehˬ, awˬ tehˬ awˬ na G'uiˬ sha ve yaˇ hpu teˇ g'aˇ hpeh‸ ve yoˬ teh‸ k'oˆ ve yoˬ. 55Oˇ kaˬ a ciˉ vuiˇ kuiˬ lo yaˇ miˇ laiˉ g'aˇ htawˇ chehˇ leh nyi taˍ ve yoˬ. Yawˇ hui lehˬ, Yeˍsuˆ Gaˍliˍlehˇ mvuhˇ miˬ awˬ hk'aw lo tawˆ la htaˇ, yawˇ awˬ hk'aˇ suh k'ai leh yawˇ hta‸ te caˍ te taw piˇ ve yaˇ miˇ teˇ hpaˍ yoˬ. 56Yawˇ hui awˬ hk'aw lo, Maˍriˆ Maˍgaˍdaˍlaˆ, Yaˍkoˆ leh Yoˇseh‸ ve awˬ e Maˍriˆ leh, Zeˍbeˍdehˇ ve awˬ yaˇ paˍ hui ve awˬ e, chi teˇ hpaˍ chehˇ taˍ ve yoˬ. 57Mvuhˇ hpeu‸ la htaˇ, Aˍriˆma‸htehˍ venˇ yaˇ Yoˇseh‸ meh ve paw sha paˍ teˇ g'aˇ laˬ ve yoˬ. Yawˇ lehˬ, Yeˍsuˆ ve awˬ la‸ g'awˇ hpeh‸ ve yoˬ. 58Yawˇ jawˇ mawˇ Piˉla‸ geh k'ai leh, Yeˍsuˆ ve awˬ to hta‸ lawˬ ve yoˬ. Oˇ htaˇ, yawˇ hta‸ piˇ tuˬ jawˇ mawˇ Piˉla‸ tawˇ piˇ ve yoˬ. 59Hk'e te leh Yoˇseh‸ lehˬ, Yeˍsuˆ ve awˬ to hta‸ yuˬ k'ai peuˬ hk'aw‸ nawˉ, da‸ kehˬ ve hpa hpu yuˬ htiˆ sheˬ leh, haˉ pui htawˆ taˍ ve, 60yawˇ ve tuˍ hpfuh awˬ suhˉ awˬ hk'aw lo keu taˍ ve yoˬ. Tuˍ hpfuh awˬ hk'oˇ meuˇ lo uiˍ jaˇ ve haˉ pui teˇ shiˍ hta‸ hpfuhˆ tsuhˇ taˉ leh k'o‸-e ve yoˬ. 61Oˇ kaˬ lo Maˍriˆ Maˍgaˍdaˍlaˆ leh awˬ kaˍ awˬ nu Maˍriˆ teˇ g'aˇ, tuˍ hpfuh awˬ g'uˇ suhˍ maˇ vuiˇ maˇ neˇ kuiˬ lo mui chehˇ taˍ ve yoˬ. 62Pawehˇ te tuˬ gu ve awˬ nyi peuˬ leh, awˬ hk'aw‸ nawˉ teˇ nyi htaˇ, paw hkuˇ lonˉ hui leh Hpaˍriˍsehˇ teˇ hpaˍ jawˇ mawˇ Piˉla‸ geh hpawnˬ k'ai leh k'oˆ ve, 63Jawˇ mawˇ-oˬ, heˍ puiˉ ve chaw chi teˇ g'aˇ lehˬ, yawˇ te‸ chehˇ htaˇ, Shehˆ nyi peuˬ k'o ngaˬ k'aw‸ te‸ tu la tuˬ yoˬ teh‸, yawˇ k'oˆ taˍ ve hta‸ ngaˬ hui dawˇ nawˇ ve yoˬ. 64Hk'e te leh, yawˇ ve awˬ la‸ g'awˇ teˇ hpaˍ yawˇ hta‸ ca hk'awˇ yuˬ leh, Yawˇ suh kuiˬ lo k'aw‸ te‸ tu la peuˬ teh‸, chaw chi ma ve hta‸ maˇ g'a ca k'oˆ piˇ tuˬ, shehˆ nyi hk'a gaˬ tuˍ hpfuh oˇ ve hta‸ hk'a deh‸ shaw taˍ tuˬ tawˇ piˇ-oˆ. Maˇ heˆ k'o, awˉ lawˉ heˍ ve a‸ kehˉ awˬ hk'aw‸ nawˉ heˍ ve lehˬ, leuˉ leh jaˇ tuˬ yoˬ teh‸ k'oˆ ve yoˬ. 65Jawˇ mawˇ Piˉla‸ lehˬ, Nawˬ hui geh shaw shehˍ hpaˇ teˇ hpaˍ cawˬ ve yoˬ. K'ai leh nawˬ hui te g'a ve hk'e, hk'a deh‸ te leh shaw tcuh-o teh‸, yawˇ hui hta‸ k'aw‸ k'oˆ piˇ ve yoˬ. 66Hk'e te leh yawˇ hui k'ai leh, tuˍ hpfuh hta‸ shu hpaw maˇ g'a tuˬ haˉ pui shiˍ hta‸ yinˉ tcuhˉ sheˬ leh, shaw shehˍ hpaˇ hui hta‸ shaw tcuh taˍ ve yoˬ.

will be added

X\