Ma‸htehˍ 26

1Awˬ lawn oˇ ve hk'a peu-eˬ hta‸ Yeˍsuˆ k'oˆ peuˬ hk'aw‸ nawˉ, yawˇ ve awˬ la‸ g'awˇ hui hta‸ yawˇ k'oˆ piˇ ve, 2Nyiˇ nyi peuˬ k'o, Paˍsaˍhkaˍ pawehˇ gaˬ la tuˬ ve hta‸ nawˬ hui shiˍ ve yoˬ. Chaw yaˇ ve Yaˇ hpu hta‸ la‸ ka hk'oˆ lo hta‸ peh tuˬ, shu chiˇ a‸ piˇ ve hta‸ yawˇ g'a hkanˍ tuˬ yoˬ teh‸ k'oˆ ve yoˬ. 3Oˇ htaˇ, paw hkuˇ lonˉ hui leh Yuˇda‸ chaw teˇ hpaˍ awˬ hk'aw lo awˬ hoˉ chaw mawˇ hui lehˬ, Kaˍyaˍhpaˆ meh ve paw hkuˇ lonˉ ve shaˉ nanˉ lo hpawnˬ da‸ leh, 4hk'aˬ hk'e te leh heˍ ve awˬ hk'aw lo Yeˍsuˆ hta‸ hpeh yuˬ leh tiˇ pehˍ tuˬ yawˇ hui jehˬ da‸ ve yoˬ. 5Ya‸ hk'aˇ yawˇ hui lehˬ, Chaw chi ma ve duiˆ-ehˍ shaˇ-ehˍ maˇ g'a hpeh‸ la tuˬ, pawehˇ te ve awˬ yanˇ awˬ hk'aw lo taˇ te teh‸ k'oˆ da‸ ve yoˬ. 6Yeˍsuˆ lehˬ Beˍtaˍniˆ hk'aˆ hk'aw hkiˬ tu‸ paˍ Siˉmonˍ ve aˉ hk'aw lo chehˇ taˍ htaˇ, 7yaˇ miˇ teˇ g'aˇ yawˇ geh laˬ ve yoˬ. Yawˇ lehˬ, awˬ hpfuhˇ hk'aˆ jaˇ ve naˍ manˇ hawnˉ keu taˍ ve hpuˉ-ehˍ ve haˉ pui kaw teˇ maˬ yuˬ laˬ leh, hpui lawˇ paˇ lo Yeˍsuˆ mui caˇ chehˇ htaˇ, yawˇ ve oˉ k'oˍ hta‸ naˍ manˇ hawnˉ ngeuˍ pfuhˍ piˇ ve yoˬ. 8Yawˇ chi hk'e te ve hta‸ awˬ la‸ g'awˇ hui g'a mawˬ htaˇ, yawˇ hui nyi ma zuhˆ leh k'oˆ ve, Aˬ hto‸ ma te awˬ bon maˇ cawˬ ve awˬ hk'aw lo chi hta‸ yehˇ baˬ ve le. 9Naˍ manˇ hawnˉ chi ve hta‸ awˬ hpfuhˇ maˇ chaweh hawˇ leh haˍ yaˇ g'awˇ yaˇ hui hta‸ pehˬ piˇ hpeh‸ ve yoˬ teh‸ k'oˆ ve yoˬ. 10Ya‸ hk'aˇ, Yeˍsuˆ chi hta‸ shiˍ leh yawˇ hui hta‸ k'oˆ piˇ ve, Yaˇ miˇ chi hta‸ aˬ hto‸ ma te sho‸ sha‸ piˇ ve le. Yawˇ ngaˬ hta‸ da‸ ve teˇ ceuˬ te laˇ peuˬ. 11Haˍ ve g'awˇ ve chaw teˇ hpaˍ nawˬ hui geh hk'aˬ htaˆ ka‸ chehˇ taˍ ve yoˬ. Ya‸ hk'aˇ, ngaˬ nawˬ hui geh hk'aˬ htaˆ ka‸ chehˇ tuˬ ve maˇ heˆ. 12Naˍ manˇ hawnˉ chi ngaˬ awˬ to hta‸ ngeuˍ pfuhˍ laˇ ve lehˬ, ngaˬ awˬ to hta‸ tuˍ laˇ tuˬ ve awˬ pon yawˇ gu taˍ ve yoˬ. 13Ngaˬ nawˬ hui hta‸ awˬ tehˬ awˬ na k'oˆ laˇ ve, ha lehˬ ve bon hkawˇ chi, miˬ guiˬ teˇ kaˬ le le lo ca maˍ piˇ ve teˇ yanˇ, yaˇ miˇ chi hta‸ dawˇ nawˇ tuˬ awˬ pon yawˇ te taˍ ve kanˉ chi hta‸ k'aoˍ maˍ piˇ tuˬ yoˬ teh‸ k'oˆ ve yoˬ. 14Oˇ htaˇ, awˬ la‸ g'awˇ teˇ chi nyiˇ g'aˇ awˬ hk'aw lo, Yuˇda‸ Iˉsaˍkaˍriˍoˆ meh ve teˇ g'aˇ paw hkuˇ lonˉ hui geh k'ai leh, 15Nawˬ hui ve la‸ sheh awˬ hk'aw lo ngaˬ yawˇ hta‸ chiˇ a‸ laˇ ve k'o, ngaˬ hta‸ hk'aˬ ma pe‸ laˇ tuˬ le teh‸ k'oˆ ve yoˬ. Hk'e te leh, yawˇ hui yawˇ hta‸ hpu shehˆ chi hteh‸ piˇ ve yoˬ. 16Oˇ teˇ hkui hta‸ tanˬ leh, Yeˍsuˆ hta‸ chiˇ a‸ piˇ tuˬ, da‸ ve awˬ yanˇ hta‸ Yuˇda‸ ca chehˇ ve yoˬ. 17Hkaoˍ monˇ awˬ hk'aw lo diˇ maˇ keu ve pawehˇ awˉ lawˉ teˇ nyi htaˇ, awˬ la‸ g'awˇ teˇ hpaˍ Yeˍsuˆ geh laˬ leh k'oˆ ve, Paˍsaˍhkaˍ pawehˇ caˇ tuˬ, nawˬ awˬ pon hk'aˬ lo teˇ kaˬ gu tcuh laˇ gaˇ ve le teh‸ na nyi ve yoˬ. 18Yawˇ lehˬ, Venˇ awˬ hk'aw lo chaw oˇ ve hpaˇ geh k'ai leh, Saˍ la‸ k'oˆ laˇ ve, Ngaˬ ve awˬ yanˇ neˇ la peuˬ. Nawˬ ve yehˬ awˬ hk'aw lo ngaˬ ve awˬ la‸ g'awˇ hui geh teˇ geh Paˍsaˍhkaˍ pawehˇ hta‸ ngaˬ caˇ tuˬ yoˬ ceˇ teh‸ yawˇ hta‸ k'oˆ piˇ-oˆ. 19Oˇ htaˇ, Yeˍsuˆ tcuh ve hk'e awˬ la‸ g'awˇ teˇ hpaˍ te leh, Paˍsaˍhkaˍ pawehˇ caˇ tuˬ awˬ pon ca gu ve yoˬ. 20Mehˆ muiˉ naˆ la htaˇ, awˬ la‸ g'awˇ teˇ chi nyiˇ g'aˇ geh hpui lawˇ paˇ lo yawˇ mui caˇ ve yoˬ. 21Yawˇ hui caˇ chehˇ htaˇ yawˇ k'oˆ ve, Ngaˬ nawˬ hui hta‸ awˬ tehˬ awˬ na k'oˆ laˇ ve, nawˬ hui awˬ hk'aw lo teˇ g'aˇ ngaˬ hta‸ chiˇ a‸ tuˬ yoˬ. 22Yawˇ hui dawˇ haˍ jaˇ leh, Jawˇ mawˇ-oˬ, ngaˬ laˇ teh‸ teˇ g'aˇ peuˬ teˇ g'aˇ yawˇ hta‸ na nyi ve yoˬ. 23Yawˇ k'aw‸ k'oˆ ve, Ngaˬ geh teˇ hkehˇ tiˉ hkaˆ caˇ ve chaw teˇ g'aˇ lehˬ, ngaˬ hta‸ chiˇ a‸ tuˬ yoˬ. 24Chaw yaˇ ve Yaˇ hpu lehˬ, yawˇ ve awˬ lawn bvuh‸ taˍ ve hk'e yawˇ g'a k'o‸-e tuˬ yoˬ. Ya‸ hk'aˇ, chaw yaˇ ve Yaˇ hpu hta‸ chiˇ a‸ ve chaw teˇ g'aˇ lehˬ, g'a dawˇ haˍ jaˇ tuˬ yoˬ. Chaw oˇ ve maˇ paw la ve hk'e k'o, yawˇ awˬ pon da‸ leuˉ ve yoˬ teh‸ k'oˆ ve yoˬ. 25Yawˇ hta‸ chiˇ a‸ shehˍ hpaˇ Yuˇda‸ lehˬ, Jawˇ mawˇ-oˬ, ngaˬ laˇ teh‸ na nyi htaˇ, Yoˬ, nawˬ k'oˆ ve hk'e yoˬ teh‸, Yeˍsuˆ yawˇ hta‸ k'aw‸ k'oˆ piˇ ve yoˬ. 26Yawˇ hui caˇ chehˇ htaˇ, Yeˍsuˆ hkaoˍ monˇ hta‸ yuˬ leh bon hta‸ chiˇ mvuh ve yoˬ. Peuˬ leh yawˇ hkaoˍ monˇ hta‸ hk'eh‸ leh, awˬ la‸ g'awˇ hui hta‸ yawˇ piˇ leh k'oˆ ve, Yuˬ leh caˇ-oˆ. Chi lehˬ ngaˬ ve awˬ to yoˬ teh‸ k'oˆ piˇ ve yoˬ. 27Kawˆ hta‸ htawˇ yawˇ yuˬ leh bon hta‸ chiˇ mvuh peuˬ hk'aw‸ nawˉ yawˇ hui hta‸ piˇ leh k'oˆ ve, Nawˬ hui hk'a peu-eˬ chi hta‸ dawˬ-o‸. 28Awˬ lawn k'o, chi lehˬ ka ti‸ shaˉ caˆ hta‸ caˉ da‸ ve ngaˬ ve awˬ suhˍ yoˬ. Venˇ baˆ hpehˇ hk'a tuˬ, chaw maˇ maˇ awˬ pon ngaˬ ve awˬ suhˍ hta‸ ngeuˍ pfuhˍ ve yoˬ. 29Nawˬ hui hta‸ ngaˬ k'oˆ laˇ ve, ngaˬ Awˬ pa ve mvuhˇ miˬ awˬ hk'aw lo nawˬ hui geh teˇ geh a pehˉ meuˇ g'uiˬ awˬ suhˉ hta‸ ngaˬ g'a dawˬ tuˬ ve awˬ nyi hk'a gaˬ, ngaˬ a pehˉ meuˇ g'uiˬ hta‸ maˇ k'aw‸ dawˬ teh‸, yawˇ hui hta‸ k'oˆ piˇ ve yoˬ. 30Peuˬ leh yawˇ hui k'a muiˬ hkawˇ k'a peuˬ hk'aw‸ nawˉ, yawˇ hui tawˆ-e leh Shaˍlonˍ hk'aw lo k'ai ve yoˬ. 31Oˇ htaˇ Yeˍsuˆ yawˇ hui hta‸ k'oˆ piˇ ve, Ya‸ puiˉ nawˬ hui hk'a peu-eˬ ngaˬ hta‸ pa taw nyi ma luˬ tuˬ yoˬ. Awˬ lawn k'o, Yawˬ hawˉ paˍ hta‸ ngaˬ dawˆ pehˍ leh, yawˬ teˇ hpaˍ hpaˆ da‸ leh teˇ kaˬ teˇ hkeh hpaw k'ai tuˬ yoˬ teh‸, Li‸ hpu hk'aw bvuh‸ taˍ ve yoˬ. 32Ya‸ hk'aˇ ngaˬ k'aw‸ te‸ tu la peuˬ hk'aw‸ nawˉ, nawˬ hui g'uˇ suhˍ Gaˍliˍlehˇ mvuhˇ miˬ lo ngaˬ k'ai tuˬ yoˬ teh‸ k'oˆ ve yoˬ. 33Peˍtruˆ k'oˆ ve, Nawˬ hta‸ pa taw shu hk'a peu-eˬ nyi ma luˬ htawˇ, ngaˬ lehˬ hk'aˬ htaˆ ka‸ nyi ma maˇ luˬ teh‸, yawˇ hta‸ k'oˆ piˇ ve yoˬ. 34Yeˍsuˆ yawˇ hta‸ k'oˆ piˇ ve, Ngaˬ nawˬ hta‸ awˬ tehˬ awˬ na k'oˆ laˇ ve, ya‸ puiˉ g'aˆ hpfuh maˇ bvuhˬ sheˍ htaˇ, nawˬ ngaˬ hta‸ shehˆ pawˆ hk'a gaˬ chiˇ baˬ tuˬ yoˬ. 35Peˍtruˆ lehˬ, Nawˬ geh teˇ geh ngaˬ g'a suh ve htawˇ, nawˬ hta‸ ngaˬ maˇ chiˇ baˬ taˬ teh‸ yawˇ hta‸ k'oˆ piˇ ve yoˬ. Awˬ la‸ g'awˇ hk'a peu-eˬ htawˇ oˇ hk'e k'oˆ ve yoˬ. 36Oˇ htaˇ Yeˍsuˆ lehˬ, yawˇ hui geh teˇ geh k'ai leh, Geˍseˍmaˍniˆ meh ve teˇ kaˬ lo gaˬ ve yoˬ. Yawˇ k'oˆ ve, Ngaˬ awˬ g'uˇ suhˍ lo bon ca lawˬ htaˇ, nawˬ hui choˬ kaˬ lo mui taˍ-o‸ teh‸, awˬ la‸ g'awˇ hui hta‸ k'oˆ piˇ ve yoˬ. 37Peuˬ leh, Peˍtruˆ leh Zeˍbeˍdehˇ ve awˬ yaˇ paˍ nyiˇ g'aˇ hta‸ yawˇ shiˍ veu ve yoˬ. Oˇ htaˇ, yawˇ nyi ma dawˇ haˍ jaˇ, sho‸ sha‸ jaˇ la leh, 38yawˇ hui hta‸ k'oˆ piˇ ve, Ngaˬ nyi ma dawˇ haˍ jaˇ ve suh la yoˬ. Choˬ kaˬ lo chehˇ taˍ leh ngaˬ geh teˇ geh shaw taˍ-o‸. 39Peuˬ leh, yawˇ awˬ g'uˇ suhˍ a ciˉ k'ai leh, yawˇ mehˆ hpfuhˇ miˬ chaˇ hk'oˆ boˆ sheˬ leh k'oˆ ve, Ngaˬ pa-oˬ, kawˆ chi hta‸ ngaˬ ponˬ k'ai hpeh‸ ve k'o, ponˬ k'ai tcuh laˇ-oˆ. Ya‸ hk'aˇ, ngaˬ a loˍ cawˇ ve hk'e taˇ hpeh‸ piˇ. Nawˬ a loˍ cawˇ ve hk'e hpeh‸ piˇ-oˆ teh‸ bon lawˬ ve yoˬ. 40Awˬ la‸ g'awˇ hui geh yawˇ k'aw‸ la leh, yawˇ hui zuh‸ muiˉ k'a chehˇ ve hta‸ g'a mawˬ htaˇ, Peˍtruˆ hta‸ k'oˆ piˇ ve, Teˇ naˍ riˍ ceh ka‸ nawˬ hui ngaˬ geh shaw taˍ maˇ hpeh‸ laˇ. 41Nawˬ hui beˬ ve lawˇ ve awˬ hk'aˇ suh maˇ g'a k'ai tuˬ bon lawˬ leh shaw taˍ-o‸. Ngaˬ hui te gaˇ ve nyi ma cawˬ htawˇ, awˬ suhˍ awˬ shaˍ lehˬ, awˬ g'aˇ nuˇ ve yoˬ teh‸ k'oˆ ve yoˬ. 42Yawˇ teˇ pawˆ k'aw‸ k'ai leh, Ngaˬ Pa-oˬ, kawˆ chi hta‸ ngaˬ maˇ dawˬ leh ponˬ maˇ hpeh‸ ve k'o, nawˬ a loˍ cawˇ ve hk'e hpeh‸ la piˇ-oˆ teh‸, bon k'aw‸ lawˬ ve yoˬ. 43Yawˇ teˇ pawˆ k'aw‸ k'aw‸ la htaˇ, yawˇ hui zuh‸ muiˉ geu‸ jaˇ ve pa taw zuh‸ muiˉ k'a chehˇ ve hta‸ yawˇ g'a mawˬ ve yoˬ. 44Peuˬ leh, yawˇ yawˇ hui hta‸ teh taˉ leh teˇ pawˆ k'aw‸ k'ai ve yoˬ. Awˬ g'uˇ suhˍ htaˇ yawˇ lawˬ ve hk'a shuˍ shuˍ, shehˆ pawˆ teˇ pawˆ bon k'aw‸ lawˬ ve yoˬ. 45Oˇ htaˇ, awˬ la‸ g'awˇ hui geh yawˇ k'aw‸ la leh k'oˆ piˇ ve, Nawˬ hui zuh‸ muiˉ k'a leh g'aˇ jehˇ chehˇ sheˍ laˇ. Nyi loˬ, chaw yaˇ ve Yaˇ hpu lehˬ, chaw haiˬ hui ve la‸ hk'aw lo chiˇ a‸ ve hta‸ g'a hkanˍ ve awˬ yanˇ gaˬ la peuˬ. 46Tu, k'ai-a veuˬ. Nyi loˬ, ngaˬ hta‸ chiˇ a‸ shehˍ hpaˇ awˬ paˇ lo gaˬ la peuˬ teh‸ k'oˆ ve yoˬ. 47Yawˇ tawˇ yaw chehˇ htaˇ, tcuh yaˇ teˇ chi nyiˇ g'aˇ awˬ hk'aw lo Yuˇda‸ meh ve teˇ g'aˇ laˬ leh, aˉ htaw pfuhˇ leh suhˆ taˬ taˆ ve chaw awˬ moˍ lonˉ htawˇ yawˇ geh teˇ geh laˬ ve yoˬ. Chaw awˬ moˍ lonˉ oˇ ve lehˬ, paw hkuˇ lonˉ hui leh Yuˇda‸ chaw hui ve awˬ hoˉ chaw mawˇ teˇ hpaˍ tcuh peu laˇ ve chaw hpeh‸ ve yoˬ. 48Yawˇ hta‸ chiˇ a‸ piˇ shehˍ hpaˇ teˇ g'aˇ lehˬ, yawˇ hui hta‸ awˬ heˆ chi hk'e te tuˬ k'oˆ piˇ taˍ ve, Ngaˬ boˆ nu ve chaw teˇ g'aˇ lehˬ yawˇ yoˬ. Yawˇ hta‸ yuˬ tiˍ taˍ-o‸. 49Oˇ htaˇ yawˇ Yeˍsuˆ geh teˇ cawˬ haˉ k'ai leh, Jawˇ mawˇ-oˬ, awˬ bon uiˍ piˇ-oˆ teh‸ k'oˆ leh, yawˇ hta‸ boˆ nu ve yoˬ. 50Yeˍsuˆ lehˬ, Awˬ chawˇ-oˬ, nawˬ dawˇ taˍ leh laˬ ve hk'e te-o teh‸, yawˇ hta‸ k'oˆ piˇ ve yoˬ. Oˇ htaˇ, yawˇ hui Yeˍsuˆ hta‸ vawˆ leh yuˬ tiˍ taˍ ve yoˬ. 51Yeˍsuˆ geh chehˇ ve chaw hui awˬ hk'aw lo teˇ g'aˇ lehˬ, yawˇ ve aˉ htaw g'awˬ tawˆ leh paw hkuˇ lonˉ vuiˬ taˍ ve awˬ ceˬ hta‸ chaw leh, naˍ paw cheˆ ve yoˬ. 52Oˇ htaˇ Yeˍsuˆ yawˇ hta‸ k'oˆ piˇ ve, Nawˬ ve aˉ htaw hta‸ awˬ hpui awˬ hk'aw lo k'aw‸ hk'aw‸ keu-o. Awˬ lawn k'o, aˉ htaw hk'a yehˇ ve chaw hk'a peu-eˬ lehˬ, aˉ htaw hta‸ pa taw luˬ k'ai tuˬ yoˬ. 53Mvuhˇ naw ma tcuh yaˇ teˇ chi nyiˇ moˍ awˬ hk'oˆ ka‸ ngaˬ geh peu laˇ tuˬ, chi beu‸ ngaˬ Awˬ pa geh lawˬ maˇ g'a teh‸ nawˬ dawˇ ve laˇ. 54Ya‸ hk'aˇ ngaˬ oˇ hk'e lawˬ ve k'o, chi hk'e g'a hpeh‸ la tuˬ yoˬ teh‸ bvuh‸ taˍ ve Li‸ hpu teˇ hpaˍ hk'aˬ hk'e te biˇ la tuˬ le teh‸ k'oˆ ve yoˬ. 55Awˬ yanˇ oˇ ve awˬ hk'aw lo Yeˍsuˆ chaw awˬ moˍ lonˉ teˇ hpaˍ hta‸ k'oˆ piˇ ve, Nawˬ hui lehˬ, chaw hk'awˇ hta‸ ca hpeh yuˬ ve hk'e aˉ htaw leh suhˆ taˬ teˇ hpaˍ yuˬ veu laˇ leh, ngaˬ hta‸ ca hpeh la ve laˇ. Teˇ nyi le le bon yehˬ lonˉ awˬ hkaw lo ngaˬ mui taˍ leh maˍ piˇ chehˇ ve htawˇ, nawˬ hui ngaˬ hta‸ maˇ hpeh yuˬ. 56Ya‸ hk'aˇ chi hk'e hpeh‸ la ve hk'a peu-eˬ lehˬ, G'uiˬ sha ve tcuh kaˍ paˍ hui ve li‸ teˇ hpaˍ hta‸ biˇ la tuˬ awˬ pon yoˬ teh‸ k'oˆ ve yoˬ. Oˇ htaˇ, awˬ la‸ g'awˇ hk'a peu-eˬ yawˇ hta‸ baˬ taˉ leh hpaw-e ve yoˬ. 57Yeˍsuˆ hta‸ hpeh yuˬ ve chaw teˇ hpaˍ lehˬ, li‸ bvuh‸ paˍ hui leh awˬ hoˉ chaw mawˇ teˇ hpaˍ hpawnˬ da‸ kuiˬ lo, paw hkuˇ lonˉ Kaˍyaˍhpaˆ geh yawˇ hta‸ yuˬ k'ai ve yoˬ. 58Peˍtruˆ lehˬ, paw hkuˇ lonˉ ve shaˉ nanˉ awˬ paˇ lo ko taˍ kuiˬ teˇ kaˬ hk'a gaˬ Yeˍsuˆ awˬ hk'aˇ suh a ciˉ vuiˇ kuiˬ lo k'ai leh, awˬ lawn chi awˬ leh meuˇ hk'a gaˬ g'a shiˍ g'a mawˬ tuˬ, yawˇ lo‸-e leh shaw shehˍ hpaˇ teˇ hpaˍ geh mui taˍ ve yoˬ. 59Paw hkuˇ lonˉ teˇ hpaˍ leh jehˬ da‸ shehˍ hpaˇ awˬ moˍ hk'a peu-eˬ lehˬ, Yeˍsuˆ hta‸ g'a tiˇ pehˍ tuˬ, yawˇ awˬ lawn maˇ heˆ heˆ ve shaˉ hkiˆ hkanˍ shehˍ hpaˇ teˇ hpaˍ hta‸ yawˇ hui ca ve yoˬ. 60Maˇ heˆ heˆ ve shaˉ hkiˆ hkanˍ shehˍ hpaˇ maˇ maˇ tu la leh awˬ g'uˇ suhˍ lo laˬ ve htawˇ, jehˬ shehˍ hpaˇ hui shaˉ hkiˆ ca maˇ mawˬ. Awˬ leh meuˇ gaˬ htaˇ, maˇ heˆ heˆ ve shaˉ hkiˆ hkanˍ shehˍ hpaˇ nyiˇ g'aˇ awˬ g'uˇ suhˍ lo laˬ leh k'oˆ ve, 61Chi hpaˇ yawˇ k'oˆ ve, G'uiˬ sha ve bon yehˬ lonˉ hta‸ ngaˬ te luˬ leh, shehˆ nyi awˬ hk'aw lo k'aw‸ te g'a ve yoˬ ceˇ teh‸, yawˇ huiˉ maˬ shaˉ hkiˆ hkanˍ ve yoˬ. 62Oˇ htaˇ paw hkuˇ lonˉ tu la leh, Nawˬ te‸ chiˉ ka‸ maˇ yaw hk'aw‸ ve laˇ. Chaw chi teˇ hpaˍ nawˬ awˬ lawn aˬ hto‸ ma shaˉ hkiˆ hkanˍ ve le teh‸ yawˇ hta‸ k'oˆ piˇ ve yoˬ. 63Ya‸ hk'aˇ, Yeˍsuˆ ta‸ iˉ chehˇ taˍ ve yoˬ. Paw hkuˇ lonˉ yawˇ hta‸ k'aw‸ k'oˆ piˇ ve, G'uiˬ sha ve Yaˇ hpu Hkri‸ teh‸ k'oˆ ve teˇ g'aˇ lehˬ, nawˬ yoˬ laˇ. Ngaˬ hui hta‸ hto laˇ tuˬ, te‸ chehˇ ve G'uiˬ sha mehˆ g'uˇ suhˍ ngaˬ nawˬ hta‸ hkanˍ tcuh laˇ ve yoˬ teh‸ k'oˆ ve yoˬ. 64Yeˍsuˆ k'aw‸ k'oˆ ve, Yoˬ, nawˬ k'oˆ ve hk'e yoˬ. Chi hk'oˆ ka‸ ngaˬ nawˬ hui hta‸ k'oˆ laˇ ve, chi hk'aw‸ nawˉ k'o chaw yaˇ ve Yaˇ hpu lehˬ, Kanˇ paˆ awˬ shehˍ hpaˇ ve la‸ sha paˉ lo mui leh, mvuhˇ naw ma ve moˬ hta‸ ciˇ ya‸ la ve hta‸ nawˬ hui g'a mawˬ tuˬ yoˬ teh‸, yawˇ hta‸ k'oˆ piˇ ve yoˬ. 65Oˇ htaˇ paw hkuˇ lonˉ yawˇ ve veu‸ k'aˇ hta‸ tzuh‸ suhˍ leh k'oˆ ve, Yawˇ lehˬ G'uiˬ sha hta‸ maˇ shawˍ maˇ caˆ k'oˆ peuˬ. Ngaˬ hui aˬ hto‸ ma shaˉ hkiˆ k'aw‸ loˍ sheˍ le.Yawˇ G'uiˬ sha hta‸ maˇ shawˍ maˇ caˆ k'oˆ ve hta‸ chi beu‸ nawˬ hui g'a kaˇ peuˬ. 66Nawˬ hui hk'aˬ hk'e dawˇ le teh‸ na nyi htaˇ, Yawˇ lehˬ suh keunˍ ve yoˬ teh‸ yawˇ hui k'aw‸ k'oˆ piˇ ve yoˬ. 67Oˇ htaˇ, yawˇ ve mehˆ hpfuhˇ hta‸ yawˇ hui ciˉ g'uiˇ hpe‸ pfuhˍ leh yawˇ hta‸ chu-iˬ ve yoˬ. 68Teˇ hpaˍ hpaˍ yawˇ hta‸ hta leh k'oˆ ve, Hkri‸-oˬ, nawˬ hta‸ a shu dawˆ laˇ ve le. G'uiˬ sha ve tcuh kaˍ paˍ hk'e te leh ngaˬ hui hta‸ hto laˇ-oˆ teh‸ k'oˆ ve yoˬ. 69Oˇ htaˇ Peˍtruˆ lehˬ, shaˉ nanˉ awˬ paˇ lo ko taˍ kuiˬ awˬhk'aw hpawˇ lo mui chehˇ ve yoˬ. Awˬ ceˬ ma teˇ g'aˇ yawˇ geh laˬ leh, Nawˬ htawˇ Gaˍliˍlehˇ chaw Yeˍsuˆ geh chehˇ ve yoˬ teh‸ k'oˆ ve yoˬ. 70Ya‸ hk'aˇ yawˇ hui hk'a peu-eˬ mehˆ g'uˇ suhˍ Peˍtruˆ g'awˬ hk'aˆ leh, Nawˬ k'oˆ ve hta‸ ngaˬ maˇ shiˍ teh‸ k'oˆ ve yoˬ. 71Peuˬ leh, Peˍtruˆ ko taˍ kuiˬ yehˬ miˉ awˬ baˬ lo tawˆ k'ai htaˇ, awˬ kaˍ awˬ nu awˬ ceˬ ma teˇ g'aˇ yawˇ hta‸ mawˬ leh, Chi hpaˇ lehˬ, Naˍzaˍrehˆ chaw Yeˍsuˆ geh chehˇ ve yoˬ teh‸, oˇ kaˬ lo chehˇ taˍ ve chaw hui hta‸ k'oˆ piˇ ve yoˬ. 72Yawˇ teˇ pawˆ k'aw‸ g'awˬ hk'aˆ leh, Chaw oˇ ve hta‸ ngaˬ maˇ shiˍ teh‸ k'oˆ leh hkanˍ ve yoˬ. 73Awˬ hk'aw‸ nawˉ maˇ maw maw gaˬ leh, oˇ kaˬ lo huˉ chehˇ ve chaw teˇ hpaˍ Peˍtruˆ geh laˬ leh, Nawˬ htawˇ awˬ tehˬ awˬ na yawˇ hui awˬ hk'aw lo ve chaw teˇ g'aˇ hpeh‸ ve yoˬ. Awˬ lawn k'o, nawˬ tawˇ yaw ve hkawˇ hta‸ na ve ceh ka‸, ngaˬ hui shiˍ ve yoˬ teh‸, yawˇ hta‸ k'oˆ piˇ ve yoˬ. 74Oˇ htaˇ yawˇ awˬ to hta‸ yawˇ hkeu leh, Chaw oˇ ve hta‸ ngaˬ maˇ shiˍ teh‸ k'oˆ leh hkanˍ ve yoˬ. Teˇ cawˬ haˉ g'aˆ hpfuh bvuhˬ la ve yoˬ. 75G'aˆ hpfuh maˇ bvuhˬ sheˍ htaˇ nawˬ ngaˬ hta‸ shehˆ pawˆ hk'a gaˬ chiˇ baˬ tuˬ yoˬ teh‸, Yeˍsuˆ k'oˆ piˇ taˍ ve hta‸ Peˍtruˆ dawˇ nawˇ la ve yoˬ. Oˇ htaˇ, yawˇ tawˆ k'ai leh g'aˇ hte‸ hawˬ ve yoˬ.

will be added

X\