Ma‸htehˍ 25

1Peuˬ leh, mvuhˇ naw ma mvuhˇ miˬ lehˬ, a shu yawˇ ve kawˆ faiˇ hta‸ yuˬ leh awˬ miˇ ma heuˆ shehˍ hpaˇ hta‸ ca ha‸ yuˬ ve yaˇ miˇ haˉ teˇ chi g'aˇ hta‸ shuˍ ve yoˬ. 2Yawˇ hui awˬ hk'aw lo ngaˇ g'aˇ lehˬ cuˇ yiˍ maˇ cawˬ leh, ngaˇ g'aˇ lehˬ cuˇ yiˍ cawˬ ve yoˬ. 3Awˬ lawn k'o, cuˇ yiˍ maˇ cawˬ ve teˇ hpaˍ lehˬ, a shu yawˇ ve kawˆ faiˇ hta‸ yuˬ k'ai htaˇ, naˍ manˇ maˇ yuˬ k'ai. 4Ya‸ hk'aˇ, cuˇ yiˍ cawˬ ve teˇ hpaˍ lehˬ, a shu yawˇ ve kawˆ faiˇ geh teˇ geh naˍ manˇ kaw hta‸ htawˇ yuˬ k'ai ve yoˬ. 5Awˬ miˇ ma heuˆ shehˍ hpaˇ haˆ haˆ maˇ laˬ ve pa taw, yawˇ hui hk'a peu-eˬ zuh‸ muiˉ jo leh, zuh‸ muiˉ k'a sheˬ ve yoˬ. 6Shehˍ k'aw hkui htaˇ gaˬ leh, Nyi loˬ, awˬ miˇ ma heuˆ shehˍ hpaˇ laˬ peuˬ. Yawˇ hta‸ ca ha‸ yuˬ loˬ teh‸, shu kuˬ hk'a laˇ ve yoˬ. 7Oˇ htaˇ, yaˇ miˇ haˉ oˇ ve teˇ hpaˍ tu la leh, a shu yawˇ ve kawˆ faiˇ hta‸ gu tuˉ ve yoˬ. 8Cuˇ yiˍ maˇ cawˬ ve ngaˇ g'aˇ lehˬ, Ngaˬ hui ve kawˆ faiˇ suh la paˇ neˇ ve pa taw, nawˬ hui ve naˍ manˇ a ciˉ pe‸ laˇ-oˆ teh‸, cuˇ yiˍ cawˬ ve ngaˇ g'aˇ hta‸ k'oˆ piˇ ve yoˬ. 9Ya‸ hk'aˇ, cuˇ yiˍ cawˬ ve teˇ hpaˍ lehˬ, Ngaˬ hui awˬ pon leh nawˬ hui awˬ pon naˍ manˇ maˇ law‸ hehˉ. Naˍ manˇ hawˇ shehˍ hpaˇ geh k'ai leh, nawˬ hui awˬ pon ca vuiˬ-o‸ teh‸ k'aw‸ k'oˆ piˇ ve yoˬ. 10Yawˇ hui ca vuiˬ chehˇ ve teˇ yanˇ, awˬ miˇ ma heuˆ shehˍ hpaˇ laˬ leh, gu taˍ hehnˇ taˍ ve chaw teˇ hpaˍ hkehˉ caˇ kuiˬ lo yawˇ geh teˇ geh lo‸-e peuˬ hk'aw‸ nawˉ, yehˬ miˉ hoˆ taˍ ve yoˬ. 11Awˬ hk'aw‸ nawˉ, yaˇ miˇ haˉ oˇ ve ngaˇ g'aˇ k'aw‸ la leh, Jawˇ mawˇ-oˬ, Jawˇ mawˇ-oˬ, ngaˬ hui hta‸ yehˬ miˉ a ciˉ hpaw laˇ-oˆ teh‸ k'oˆ ve yoˬ. 12Ya‸ hk'aˇ yawˇ lehˬ, Ngaˬ nawˬ hui hta‸ awˬ tehˬ awˬ na k'oˆ laˇ ve, ngaˬ nawˬ hui hta‸ maˇ shiˍ teh‸, k'aw‸ k'oˆ piˇ ve yoˬ. 13Hk'e te leh, awˬ nyi hta‸ maˇ k'oˆ, awˬ yanˇ hta‸ maˇ k'oˆ, nawˬ hui maˇ shiˍ ve pa taw hk'a deh‸ shaw taˍ-o‸. 14Awˬ lawn k'o, awˬ yanˇ oˇ ve lehˬ, chaw teˇ g'aˇ awˬ kaˍ awˬ nu mvuhˇ miˬ lo k'ai-a teh‸ te ve teˇ yanˇ, yawˇ ve awˬ ceˬ teˇ hpaˍ hta‸ kuˬ leh, yawˇ ve mawˇ jeˬ yawˇ hui hta‸ chiˇ a‸ piˇ taˉ ve hta‸ shuˍ tuˬ yoˬ. 15Yawˇ hui puiˉ ve hpeh‸ ve hta‸ yawˇ nyi leh, teˇ g'aˇ hta‸ hpu ngaˇ hinˉ, teˇ g'aˇ hta‸ nyiˇ hinˉ leh teˇ g'aˇ hta‸ teˇ hinˉ piˇ taˉ leh tawˆ k'ai ve yoˬ. 16Oˇ htaˇ, hpu ngaˇ hinˉ g'a ve teˇ g'aˇ lehˬ, teˇ cawˬ haˉ k'ai leh ca kaˬ ve pa taw, awˬ yawˬ ngaˇ hinˉ k'aw‸ g'a ve yoˬ. 17Oˇ ve hk'a shuˍ shuˍ, hpu nyiˇ hinˉ g'a ve chaw teˇ g'aˇ htawˇ, awˬ yawˬ nyiˇ hinˉ k'aw‸ g'a ve yoˬ. 18Ya‸ hk'aˇ, hpu teˇ hinˉ g'a ve chaw teˇ g'aˇ lehˬ, yawˇ ve awˬ shehˍ hpaˇ ve hpu hta‸ yuˬ leh miˬ k'oˍ ca duˇ faˉ taˍ ve yoˬ. 19Awˬ yanˇ maw peuˬ hk'aw‸ nawˉ, awˬ ceˬ oˇ ve teˇ hpaˍ ve awˍ shehˍ hpaˇ k'aw‸ la leh, yawˇ yawˇ hui geh hpu caˇ lanˇ shawˍ nyi ve yoˬ. 20Hpu ngaˇ hinˉ g'a taˍ ve awˬ ceˬ teˇ g'aˇ laˬ leh, awˬ yawˬ ngaˇ hinˉ hteh‸ ka‸ yuˬ veu laˇ leh k'oˆ ve, Jawˇ mawˇ-oˬ, nawˬ ngaˬ hta‸ hpu ngaˇ hinˉ pe‸ taˉ laˇ ve yoˬ. Nyi-o, awˬ yawˬ ngaˇ hinˉ hteh‸ ngaˬ k'aw‸ g'a peuˬ teh‸ k'oˆ ve yoˬ. 21Yawˇ ve awˬ shehˍ hpaˇ lehˬ, Da‸ ve yoˬ. Na yuˬ puiˉ leh da‸ ve awˬ ceˬ-oˬ, i ve teˇ ceuˬ awˬ hk'aw lo nawˬ na yuˬ puiˉ ve pa taw, maˇ ve awˬ hk'oˆ ngaˬ nawˬ hta‸ teh taˍ tuˬ yoˬ. Nawˬ ve awˬ shehˍ hpaˇ ha lehˬ ve hk'e, nawˬ htawˇ ha lehˬ chehˇ-oˆ teh‸, yawˇ hta‸ k'oˆ piˇ ve yoˬ. 22Hpu nyiˇ hinˉ g'a taˍ ve awˬ ceˬ teˇ g'aˇ htawˇ laˬ leh, Jawˇ mawˇ-oˬ, nawˬ ngaˬ hta‸ hpu nyiˇ hinˉ pe‸ taˉ laˇ ve yoˬ. Nyi-o, awˬ yawˬ nyiˇ hinˉ hteh‸ ngaˬ k'aw‸ g'a peuˬ teh‸ k'oˆ ve yoˬ. 23Yawˇ ve awˬ shehˍ hpaˇ lehˬ, Da‸ ve yoˬ. Na yuˬ puiˉ leh da‸ ve awˬ ceˬ-oˬ, i ve teˇ ceuˬ awˬ hk'aw lo nawˬ na yuˬ puiˉ ve pa taw, maˇ ve awˬ hk'oˆ ngaˬ nawˬ hta‸ teh taˍ tuˬ yoˬ. Nawˬ ve awˬ shehˍ hpaˇ ha lehˬ ve hk'e, nawˬ htawˇ ha lehˬ chehˇ-oˆ teh‸, yawˇ hta‸ k'oˆ piˇ ve yoˬ. 24Hpu teˇ hinˉ g'a taˍ ve awˬ ceˬ teˇ g'aˇ htawˇ laˬ leh, Jawˇ mawˇ-oˬ, nawˬ lehˬ te haˍ ve chaw teˇ g'aˇ hpeh‸ ve hta‸ ngaˬ shiˍ ve yoˬ. Nawˬ maˇ sheˍ kuiˬ lo nawˬ g'eu‸ yuˬ leh, nawˬ maˇ hpeuˇ baˬ kuiˬ lo nawˬ shaw hpoˆ ve hta‸ ngaˬ shiˍ ve yoˬ. 25Hk'e te leh ngaˬ kawˆ ve pa taw, nawˬ ve hpu hta‸ miˬ k'oˍ hk'aw duˇ faˉ taˍ ve yoˬ. Nyi-o, nawˬ ve mawˇ nawˬ hta‸ k'aw‸ pe‸ laˇ ve yoˬ teh‸ k'oˆ piˇ ve yoˬ. 26Awˬ shehˍ hpaˇ k'aw‸ k'oˆ ve, Haiˬ ve leh bawˬ ve awˬ ceˬ-oˬ, maˇ sheˍ kuiˬ lo ngaˬ g'eu‸ yuˬ leh, maˇ hpeuˇ baˬ kuiˬ lo ngaˬ shaw hpoˆ ve hta‸ nawˬ shiˍ ve k'o, 27hpu chi ve hta‸ yuˬ leh hpu chiˇ piˇ shehˍ hpaˇ hui hta‸ chiˇ piˇ cawˇ ve yoˬ. Oˇ hk'e te ve k'o, ngaˬ k'aw‸ la ve teˇ yanˇ ngaˬ ve hpu chi ve leh awˬ yawˬ hta‸ ngaˬ k'aw‸ g'a tuˬ yoˬ. 28Hk'e te leh, hpu teˇ hinˉ hta‸ yawˇ geh yuˬ hk'aw‸ leh, hpu teˇ meunˍ cawˬ ve chaw teˇ g'aˇ hta‸ piˇ-oˆ. 29Awˬ lawn k'o, cawˬ ve chaw teˇ g'aˇ le le hta‸ k'aw‸ htehˍ piˇ leh, yawˇ maˇ maˇ cawˬ tuˬ yoˬ. Ya‸ hk'aˇ, maˇ cawˬ ve chaw geh, yawˇ hk'a cawˬ ve hta‸ ka‸ k'aw‸ yuˬ tawˆ sheˬ tuˬ yoˬ. 30Awˬ bon maˇ cawˬ ve awˬ ceˬ teˇ g'aˇ hta‸ awˬ baˬ hpawˇ naˆ ho‸ kuiˬ lo baˬ keu-o. Oˇ kaˬ lo hk'a chehˇ ve chaw hui hawˬ leh ciˬ geu‸ tuˬ yoˬ teh‸, awˬ shehˍ hpaˇ k'oˆ ve yoˬ. 31Chaw yaˇ ve Yaˇ hpu lehˬ, yawˇ ve awˬ me‸ awˬ hponˇ awˬ hk'aw lo laˬ leh, mvuhˇ naw ma tcuh yaˇ hk'a peu-eˬ yawˇ geh laˬ ve teˇ yanˇ, yawˇ ve awˬ me‸ awˬ hponˇ cawˬ ve k'aw jaw awˬ hk'oˆ yawˇ mui tuˬ yoˬ. 32Oˇ htaˇ, chaw ceuˬ hk'a peu-eˬ yawˇ mehˆ g'uˇ suhˍ hpawnˬ la leh, yawˬ hawˉ paˍ, yawˬ leh aˉ che‸ hta‸ pehˬ da‸ ve hk'e, yawˇ yawˇ hui hta‸ pehˬ da‸ tuˬ yoˬ. 33Yawˬ teˇ hpaˍ hta‸ yawˇ ve la‸ sha paˉ taˍ leh, aˉ che‸ teˇ hpaˍ hta‸ la‸ mehˍ paˉ taˍ tuˬ yoˬ. 34Oˇ htaˇ, la‸ sha paˉ chehˇ ve chaw hui hta‸ Hkunˉ hawˉ hkanˇ chi hk'e k'oˆ piˇ tuˬ yoˬ. Ngaˬ Awˬ pa geh awˬ bon g'a ve chaw teˇ hpaˍ-oˬ, laˬ-o‸. Miˬ guiˬ te hpanˍ htaˇ ka‸ nawˬ hui awˬ pon gu taˍ ve mvuhˇ miˬ awˬ hk'aw lo laˬ chehˇ la-o. 35Awˬ lawn k'o, ngaˬ awˍ meu‸ ve teˇ yanˇ, nawˬ hui ngaˬ hta‸ awˍ caˍ laˇ ve yoˬ. Ngaˬ iˉ kaˆ shiˉ ve teˇ yanˇ, nawˬ hui ngaˬ hta‸ iˉ kaˆ taw laˇ ve yoˬ. Ngaˬ hkehˉ chaw hpeh‸ ve teˇ yanˇ, nawˬ hui ngaˬ hta‸ ha‸ yuˬ laˇ ve yoˬ. 36Ngaˬ veu‸ k'aˇ maˇ cawˬ ve teˇ yanˇ, nawˬ hui ngaˬ hta‸ veu‸ k'aˇ feuˉ laˇ ve yoˬ, Ngaˬ chehˇ haˍ ve teˇ yanˇ, nawˬ hui ngaˬ hta‸ nyi laˇ ga laˇ ve yoˬ. Ngaˬ htawnˍ hk'aw chehˇ ve teˇ yanˇ, nawˬ hui ngaˬ hta‸ ca nyi la ve yoˬ teh‸ yawˇ k'oˆ piˇ tuˬ yoˬ. 37Oˇ htaˇ, hteˇ ve cawˇ ve chaw hui yawˇ hta‸ chi hk'e k'aw‸ k'oˆ piˇ tuˬ yoˬ. Jawˇ mawˇ-oˬ, nawˬ awˍ meu‸ ve hta‸ ngaˬ hui g'a mawˬ leh awˍ caˍ laˇ ve hk'aˬ htaˆ le. Nawˬ iˉ kaˆ shiˉ ve hta‸ ngaˬ hui g'a mawˬ leh iˉ kaˆ taw laˇ ve hk'aˬ htaˆ le. 38Nawˬ hkehˉ chaw hpeh‸ ve hta‸ ngaˬ hui g'a mawˬ leh ha‸ yuˬ laˇ ve hk'aˬ htaˆ le. Veu‸ k'aˇ maˇ cawˬ leh veu‸ k'aˇ feuˉ laˇ ve hk'aˬ htaˆ le. 39Nawˬ chehˇ haˍ ve maˇ k'oˆ, htawnˍ hk'aw chehˇ ve maˇ k'oˆ, ngaˬ hui g'a mawˬ leh nawˬ hta‸ ca nyi la ve hk'aˬ htaˆ le teh‸ k'aw‸ k'oˆ piˇ tuˬ yoˬ. 40Oˇ htaˇ, Hkunˉ hawˉ hkanˇ lehˬ, Ngaˬ nawˬ hui hta‸ awˬ tehˬ awˬ na k'oˆ laˇ ve, ngaˬ awˬ viˉ awˬ nyi chi teˇ hpaˍ awˬ hk'aw lo i jaˇ ve chaw teˇ g'aˇ hta‸ nawˬ hui te piˇ ve pa taw, ngaˬ hta‸ te laˇ ve yoˬ teh‸, yawˇ hui hta‸ k'aw‸ k'oˆ piˇ tuˬ yoˬ. 41Oˇ htaˇ, la‸ mehˍ paˉ chehˇ ve chaw hui hta‸ yawˇ chi hk'e k'oˆ piˇ tuˬ yoˬ. Hkeu ve hta‸ g'a hkanˍ ve chaw hui-oˬ, ngaˬ hta‸ hpaˆ da‸ leh, neˇ haiˬ leh yawˇ ve tcuh yaˇ hui awˬ pon gu taˍ ve co co taiˍ taiˍ to‸ chehˇ ve aˬ miˍ awˬ hk'aw lo lo‸-e loˬ. 42Awˬ lawn k'o, ngaˬ awˍ meu‸ ve teˇ yanˇ nawˬ hui ngaˬ hta‸ maˇ caˍ laˇ. Ngaˬ iˉ kaˆ shiˉ ve teˇ yanˇ, nawˬ hui ngaˬ hta‸ iˉ kaˆ maˇ taw laˇ. 43Ngaˬ hkehˉ chaw hpeh‸ ve teˇ yanˇ, nawˬ hui ngaˬ hta‸ maˇ ha‸ yuˬ laˇ. Ngaˬ veu‸ k'aˇ maˇ cawˬ ve teˇ yanˇ, nawˬ hui ngaˬ hta‸ veu‸ k'aˇ maˇ feuˉ laˇ. Ngaˬ chehˇ haˍ ve teˇ yanˇ maˇ k'oˆ, htawnˍ hk'aw chehˇ ve teˇ yanˇ maˇ k'oˆ, nawˬ hui ngaˬ hta‸ maˇ ca nyi la teh‸ k'oˆ piˇ tuˬ yoˬ. 44Oˇ htaˇ yawˇ hui lehˬ, Jawˇ mawˇ-oˬ, nawˬ awˍ meu‸ ve, iˉ kaˆ shiˉ ve, hkehˉ chaw hpeh‸ ve, veu‸ k'aˇ maˇ cawˬ ve, chehˇ haˍ ve, htawnˍ hk'aw chehˇ ve hta‸ ngaˬ hui g'a mawˬ leh, nawˬ hta‸ maˇ ga laˇ ve hk'aˬ htaˆ le teh‸, yawˇ hta‸ k'aw‸ k'oˆ piˇ tuˬ yoˬ. 45Oˇ htaˇ yawˇ lehˬ, Ngaˬ nawˬ hui hta‸ awˬ tehˬ awˬ na k'oˆ laˇ ve, chaw chi teˇ hpaˍ awˬ hk'aw lo i jaˇ ve chaw teˇ g'aˇ hta‸ nawˬ hui maˇ te piˇ ve pa taw, ngaˬ hta‸ nawˬ hui maˇ te laˇ ve yoˬ teh‸, yawˇ hui hta‸ k'aw‸ k'oˆ piˇ tuˬ yoˬ. 46Yawˇ hui lehˬ, co co taiˍ taiˍ ciˍ yanˍ ve awˬ hk'aw lo lo‸-e tuˬ yoˬ. Ya‸ hk'aˇ, hteˇ ve cawˇ ve chaw hui lehˬ, co co taiˍ taiˍ te‸ ve awˬ hk'aw lo lo‸-e tuˬ yoˬ teh‸, Yeˍsuˆ k'oˆ piˇ ve yoˬ.

will be added

X\