Ma‸htehˍ 24

1Yeˍsuˆ bon yehˬ lonˉ awˬ hk'aw lo tawˆ k'ai ve teˇ yanˇ, bon yehˬ lonˉ hta‸ caˉ da‸ ve yehˬ teˇ hpaˍ yawˇ hta‸ beˆ maˍ piˇ tuˬ, yawˇ ve awˬ la‸ g'awˇ teˇ hpaˍ yawˇ geh laˬ ve yoˬ. 2Yeˍsuˆ yawˇ hui hta‸ k'oˆ piˇ ve, Chi hk'a peu-eˬ hta‸ nawˬ hui mawˬ ve maˇ heˆ laˇ. Ngaˬ nawˬ hui hta‸ awˬ tehˬ awˬ na k'oˆ laˇ ve, yehˬ chi teˇ hpaˍ haˉ pui teˇ shiˍ awˬ hk'oˆ teˇ shiˍ maˇ cawˬ htaˇ hk'a gaˬ shu te luˬ tuˬ yoˬ. 3Oˇ htaˇ, yawˇ Shaˍlonˍ hk'aw hk'oˆ lo mui chehˇ ve teˇ yanˇ, awˬ la‸ g'awˇ teˇ hpaˍ ceh tiˉ yawˇ geh laˬ leh, Awˬ ceuˬ oˇ ve teˇ hpaˍ hk'aˬ htaˆ hpeh‸ la tuˬ le. Nawˬ k'aw‸ ya‸ la tuˬ ve leh, miˬ guiˬ chi awˬ yanˇ leh tuˬ ve awˬ heˆ hk'aˬ hk'e hpehˬ tawˆ la tuˬ ve le. Ngaˬ hui hta‸ a ciˉ hto laˇ-oˆ teh‸ k'oˆ piˇ ve yoˬ. 4Yeˍsuˆ yawˇ hui hta‸ k'aw‸ k'oˆ piˇ ve, Chaw teˇ g'aˇ ka‸ nawˬ hui hta‸ maˇ g'a heˍ yuˬ beˬ yuˬ tuˬ, shaˍ ti‸ taˍ-o‸. 5Awˬ lawn k'o, chaw maˇ maˇ ngaˬ ve awˬ meh hta‸ pfuhˇ laˬ leh, Ngaˬ lehˬ Hkri‸ yoˬ teh‸ k'oˆ leh, chaw maˇ maˇ hta‸ heˍ yuˬ beˬ yuˬ tuˬ yoˬ. 6Ma‸ bawˆ ve leh bawˆ da‸-a teh‸ te chehˇ ve awˬ lawn hta‸ nawˬ hui g'a kaˇ tuˬ yoˬ. Ya‸ hk'aˇ, nawˬ hui maˇ g'a kawˆ cheˇ tuˬ shaˍ ti‸ taˍ-o‸. Awˬ lawn k'o, awˬ ceuˬ chi teˇ hpaˍ hpeh‸ la ve htawˇ, awˬ leh meuˇ maˇ gaˬ sheˍ. 7Chaw teˇ ceuˬ leh teˇ ceuˬ, mvuhˇ miˬ teˇ peˆ leh teˇ peˆ ya‸ da‸ jiˆ da‸ tuˬ yoˬ. Meu‸ ve kaˆ ve leh miˬ hiˆ ve teˇ hpaˍ teˇ kaˬ peuˬ teˇ kaˬ lo hpeh‸ la tuˬ yoˬ. 8Chi hk'a peu-eˬ lehˬ, tu‸ ve hkanˍ ve awˬ hkuiˉ puiˍ ceh tiˉ hpeh‸ sheˍ ve yoˬ. 9Oˇ htaˇ, fawˉ mehˍ ve hta‸ g'a hkanˍ tuˬ, shu nawˬ hui hta‸ chiˇ a‸ piˇ leh, nawˬ hui hta‸ tiˇ pehˍ tuˬ yoˬ. Ngaˬ ve awˬ meh hta‸ pa taw chaw ceuˬ hk'a peu-eˬ nawˬ hui hta‸ canˇ tuˬ yoˬ. 10Oˇ htaˇ, chaw maˇ maˇ hkui htiˇ poˬ paiˍ tuˬ yoˬ. Yawˇ hui teˇ g'aˇ leh teˇ g'aˇ chiˇ a‸ da‸ leh, teˇ g'aˇ leh teˇ g'aˇ canˇ da‸ tuˬ yoˬ. 11Maˇ heˆ heˆ ve tcuh kaˍ paˍ teˇ hpaˍ htawˇ maˇ maˇ tawˆ la leh, chaw maˇ maˇ hta‸ heˍ yuˬ beˬ yuˬ tuˬ yoˬ. 12Haiˬ ve awˬ ceuˬ cawˬ maˇ la ve pa taw, chaw maˇ maˇ ha‸ pehnˇ ve teˇ ceuˬ i k'ai yawnˇ k'ai tuˬ yoˬ. 13Ya‸ hk'aˇ, awˬ leh hk'a gaˬ yeˬ chehˇ ve chaw lehˬ, htaiˍ hk'aw‸ ve hta‸ g'a tuˬ yoˬ. 14Chaw ceuˬ hk'a peu-eˬ awˬ pon shaˉ hkiˆ hpeh‸ tuˬ, G'uiˬ sha ve mvuhˇ miˬ hta‸ caˉ da‸ ve ha lehˬ ve bon hkawˇ chi, miˬ guiˬ hk'oˆ teˇ kaˬ le le lo ca maˍ piˇ tuˬ yoˬ. Oˇ ve hk'aw‸ nawˉ, awˬ leh meuˇ gaˬ la tuˬ yoˬ. 15Hk'e te leh, tcuh kaˍ paˍ Daˍyeˍlaˆ k'oˆ taˍ ve hk'e, te luˬ te sheˆ puiˉ ve cha‸ chiˆ ve awˬ ceuˬ lehˬ, da‸ kehˬ ve chehˇ kuiˬ awˬ hk'aw lo huˉ chehˇ ve hta‸ nawˬ hui g'a mawˬ ve teˇ yanˇ, (li‸ chi hta‸ g'aw ve chaw lehˬ shiˍ-o‸.) 16oˇ htaˇ, Yuˇda‸ mvuhˇ miˬ awˬ hk'aw lo chehˇ ve chaw hui hk'aw hk'oˆ lawˬ hk'oˆ lo hpaw-e loˬ. 17Yehˬ awˬ hk'oˆ lo chehˇ ve chaw a shu yawˇ ve yehˬ awˬ hk'aw lo mawˇ ca yuˬ tuˬ, taˇ k'aw‸ ya‸-e. 18Heh hk'aw chehˇ ve chaw htawˇ, a shu yawˇ ve veu‸ k'aˇ ca k'aw‸ yuˬ tuˬ taˇ k'o‸-e. 19Awˬ yanˇ oˇ ve awˬ hk'aw lo, yaˇ hu ma leh cuˉ dawˬ ve yaˇ ehˉ cawˬ ve chaw hui lehˬ, g'a dawˇ haˍ jaˇ tuˬ yoˬ. 20Nawˬ hui g'a hpaw-e ve awˬ yanˇ lehˬ, mvuhˇ kaˆ yanˇ maˇ k'oˆ, shinˉ nyi htaˇ maˇ k'oˆ, maˇ g'a cawˇ tuˬ bon lawˬ-o‸. 21Awˬ lawn k'o, miˬ guiˬ hta‸ te hpanˍ ve teˇ nyi hta‸ tanˬ leh ya‸ nyi hk'a gaˬ maˇ hpeh‸ la jaw sheˍ leh, awˬ hk'aw‸ nawˉ ka‸ maˇ k'aw‸ hpeh‸ la tuˬ ve tu‸ jaˇ hkanˍ jaˇ ve teˇ ceuˬ lehˬ, oˇ htaˇ hpeh‸ la tuˬ yoˬ. 22Awˬ yanˇ oˇ ve maˇ ngeh piˇ lawˬ ve k'o, chaw teˇ g'aˇ ka‸ ponˬ maˇ hpeh‸. Ya‸ hk'aˇ, leuˆ yuˬ taˍ ve chaw teˇ hpaˍ hta‸ pa taw, awˬ yanˇ oˇ ve hta‸ ngeh piˇ lawˬ tuˬ yoˬ. 23Oˇ htaˇ, chaw teˇ g'aˇ g'aˇ lehˬ, Nyi-o, Hkri‸ choˬ kaˬ lo chehˇ taˍ ve yoˬ, oˇ kaˬ lo chehˇ taˍ ve yoˬ teh‸ nawˬ hui hta‸ k'oˆ laˇ ve k'o taˇ yonˍ. 24Awˬ lawn k'o, maˇ heˆ heˆ ve Hkri‸ leh maˇ heˆ heˆ ve tcuh kaˍ paˍ teˇ hpaˍ tawˆ la tuˬ yoˬ. Yawˇ hui lehˬ, hpeh‸ ve k'o leuˆ yuˬ taˍ ve chaw teˇ hpaˍ hta‸ htawˇ heˍ yuˬ beˬ yuˬ g'a tuˬ, uiˍ ve anˇ tuˬ leh awˬ heˆ teˇ hpaˍ hta‸ te maˍ piˇ tuˬ yoˬ. 25Nyi loˬ, maˇ hpeh‸ la sheˍ htaˇ ka‸, ngaˬ nawˬ hui hta‸ k'oˆ taˉ laˇ ve yoˬ. 26Hk'e te leh yawˇ hui lehˬ, Nyi loˬ, yawˇ heh puiˉ hk'aw lo chehˇ taˍ ve yoˬ teh‸ k'oˆ ve ka‸ taˇ k'ai. Bawehˇ awˬ hk'aw lo yawˇ chehˇ taˍ ve yoˬ teh‸ k'oˆ ve ka‸ taˇ yonˍ. 27Awˬ lawn k'o, mvuhˇ tiˉ po-e‸ lehˬ mvuhˇ nyi tawˆ hpawˇ lo ba la leh mvuhˇ nyi k'ehˬ hpawˇ lo gaˬ ve hk'e, chaw yaˇ ve Yaˇ hpu k'aw‸ ya‸ la tuˬ ve lehˬ, chi hk'a shuˍ shuˍ hpeh‸ tuˬ yoˬ. 28Suh taˍ ve awˬ to hk'a cawˬ kuiˬ lo, naˬ beuˬ ngaˆ teˇ hpaˍ hpawnˬ la tuˬ yoˬ. 29Tu‸ ve hkanˍ ve awˬ yanˇ oˇ ve peuˬ hk'aw‸ nawˉ, teˇ cawˬ haˉ mvuhˇ nyi naˆ ho‸ k'ai leh, ha pa htawˇ awˬ g'euˆ maˇ k'aw‸ ba. Meu‸ keu shiˍ teˇ hpaˍ mvuhˇ naw ma lo ce la leh, mvuhˇ naw ma ve kanˇ paˆ teˇ hpaˍ htawˇ hiˆ hiˆ naˇ naˇ k'ai tuˬ yoˬ. 30Oˇ htaˇ, chaw yaˇ ve Yaˇ hpu ve awˬ heˆ lehˬ, mvuhˇ naw ma lo tawˆ la tuˬ yoˬ. Miˬ guiˬ hk'oˆ lo chaw ceuˬ hk'a peu-eˬ paˆ hawˬ leh, chaw yaˇ ve Yaˇ hpu lehˬ, uiˍ ve awˬ me‸ awˬ hponˇ leh kanˇ paˆ cawˬ ve awˬ hk'aw lo, mvuhˇ naw ma ve moˬ hta‸ ciˇ ya‸ la ve hta‸ yawˇ hui g'a mawˬ tuˬ yoˬ. 31Peuˬ leh, behˬ heh ma awˬ hkawˇ bvuhˬ chaweh meuˆ leh, yawˇ yawˇ ve mvuhˇ naw ma tcuh yaˇ teˇ hpaˍ hta‸ k'ai tcuh tuˬ yoˬ. Yawˇ hui lehˬ, mvuhˇ awˇ ceˍ miˬ awˍ hpawˇ lo yawˇ leuˆ yuˬ taˍ ve chaw hui hta‸ hpawnˬ da‸ piˇ tuˬ yoˬ. 32Maˉ nawˆ cehˬ hta‸ tehˆ maˍ ve tawˇ pa haˉ chi hta‸ henˇ yuˬ-o‸. Awˬ tuˍ tuˍ la leh, awˬ caˍ caˍ la ve teˇ yanˇ, mvuhˇ cha hkui yanˇ gaˬ la paˇ neˇ peuˬ ve hta‸ nawˬ hui shiˍ ve yoˬ. 33Chi hk'a shuˍ shuˍ, awˬ ceuˬ chi hk'a peu-eˬ hpeh‸ la chehˇ ve hta‸ nawˬ hui g'a mawˬ ve teˇ yanˇ, yawˇ lehˬ yehˬ miˉ hpe‸ awˬ paˇ lo gaˬ la peuˬ ve hta‸ nawˬ hui shiˍ-o‸. 34Ngaˬ nawˬ hui hta‸ awˬ tehˬ awˬ na k'oˆ laˇ ve, chi teˇ co maˇ ponˬ k'ai sheˍ htaˇ, awˬ ceuˬ chi hk'a peu-eˬ hpeh‸ la tuˬ yoˬ. 35Mvuhˇ naw ma leh miˬ naˆ ma mehˉ k'ai tuˬ yoˬ. Ya‸ hk'aˇ, ngaˬ ve tawˇ hkawˇ lehˬ maˇ mehˉ k'ai taˬ. 36Awˬ nyi awˬ haˉ oˇ ve hta‸ chaw teˇ g'aˇ ka‸ maˇ shiˍ. Mvuhˇ naw ma tcuh yaˇ hui ka‸, Yaˇ hpu ka‸ maˇ shiˍ. Awˬ pa teˇ g'aˇ tiˉ shiˍ ve yoˬ. 37Chaw yaˇ ve Yaˇ hpu k'aw‸ ya‸ la tuˬ ve lehˬ, Noˉa‸ ve awˬ co-e htaˇ hk'a shuˍ shuˍ hpeh‸ tuˬ yoˬ. 38Awˬ lawn k'o, Noˉa‸ haw lo‸ k'oˍ hk'aw lo‸-e ve teˇ nyi hk'a gaˬ, iˉ kaˆ maˇ htonˍ sheˍ ve awˬ yanˇ awˬ hk'aw lo, yawˇ hui lehˬ caˇ ve dawˬ ve, awˬ hpawˇ awˬ miˇ heuˆ da‸ leh ka piˇ ve, chi hk'e te chehˇ ve yoˬ. 39Iˉ kaˆ htonˍ la leh yawˇ hui hta‸ poˬ chiˇ veu htaˇ hk'a gaˬ yawˇ hui maˇ shiˍ ve hk'e, chaw yaˇ ve Yaˇ hpu k'aw‸ ya‸ la ve teˇ yanˇ, chi hk'a shuˍ shuˍ hpeh‸ tuˬ yoˬ. 40Oˇ htaˇ, chaw nyiˇ g'aˇ heh hk'aw lo teˇ geh chehˇ taˍ ve teˇ yanˇ, teˇ g'aˇ hta‸ shiˍ veu leh teˇ g'aˇ hta‸ teh taˉ tuˬ yoˬ. 41Yaˇ miˇ nyiˇ g'aˇ teˇ geh haˉ pui mawˍ geuˆ chehˇ ve teˇ yanˇ, teˇ g'aˇ hta‸ shiˍ veu leh teˇ g'aˇ hta‸ teh taˉ tuˬ yoˬ. 42Hk'e te leh, nawˬ ve Awˬ jawˇ mawˇ hk'aˬ ve teˇ nyi k'aw‸ gaˬ la tuˬ ve hta‸ nawˬ hui maˇ shiˍ ve pa taw shaw taˍ-o‸. 43Yehˬ shehˍ hpaˇ lehˬ, chaw hk'awˇ laˬ tuˬ ve awˬ yanˇ hta‸ shiˍ taˍ ve hk'e k'o, yawˇ ve yehˬ awˬ hk'aw lo chaw hk'awˇ maˇ g'a lo‸ la tuˬ yawˇ shaw taˍ tuˬ yoˬ teh‸ nawˬ hui shiˍ-o‸. 44Hk'e te leh, nawˬ hui htawˇ hk'a deh‸ gu taˍ hehnˇ taˍ-o‸. Awˬ lawn k'o, naw hui maˇ dawˇ maˇ gaˇ ve awˬ yanˇ awˬ hk'aw lo, chaw yaˇ ve Yaˇ hpu k'aw‸ ya‸ la tuˬ yoˬ. 45Ka ti‸ yeˬ leh cuˇ yiˍ cawˬ ve awˬ ceˬ teˇ g'aˇ lehˬ, a shu le. Awˬ shehˍ hpaˇ ve yehˬ yaˇ k'a yaˇ teˇ hpaˍ hta‸ awˬ yanˇ cawˇ lehˍ caˇ tuˬ dawˬ tuˬ pehˬ piˇ tuˬ awˬ pon, yawˇ ve awˬ shehˍ hpaˇ lehˬ awˬ ceˬ oˇ ve hta‸ awˬ hoˉ te tcuh ve yoˬ. 46Awˬ ceˬ teˇ g'aˇ chi hk'e te chehˇ ve hta‸ yawˇ ve awˬ shehˍ hpaˇ k'aw‸ gaˬ la leh g'a mawˬ ve k'o, awˬ ceˬ oˇ ve lehˬ awˬ bon uiˍ ve yoˬ. 47Ngaˬ nawˬ hui hta‸ awˬ tehˬ awˬ na k'oˆ laˇ ve, awˬ shehˍ hpaˇ lehˬ, yawˇ ve mawˇ jeˬ hk'a peu-eˬ awˬ hk'oˆ awˬ ceˬ oˇ ve hta‸ awˬ hoˉ te tcuh tuˬ yoˬ. 48Ya‸ hk'aˇ, haiˬ ve awˬ ceˬ lehˬ, Ngaˬ ve awˬ jawˇ mawˇ haˆ haˆ maˇ k'aw‸ la taˬ teh‸ yawˇ ve nyi ma hk'aw dawˇ leh, 49awˬ kaˍ awˬ nu awˬ ceˬ teˇ hpaˍ hta‸ dawˆ leh, tzuhˬ dawˬ bvuhˆ ve chaw hui geh caˇ chehˇ dawˬ chehˇ ve k'o, 50awˬ ceˬ oˇ ve maˇ dawˇ maˇ gaˇ ve awˬ nyi, maˇ shiˍ ve awˬ yanˇ awˬ hk'aw lo, yawˇ ve awˬ shehˍ hpaˇ k'aw‸ gaˬ la leh, 51yawˇ hta‸ hehnˇ chaweh ciˍ yanˍ piˇ leh chaw heˍ paˍ teˇ hpaˍ geh chehˇ piˇ lawˬ tuˬ yoˬ. Oˇ kaˬ lo hk'a chehˇ ve chaw hui hawˬ leh ciˬ geu‸ tuˬ yoˬ.

will be added

X\