Ma‸htehˍ 20

1Awˬ lawn k'o, mvuhˇ naw ma mvuhˇ miˬ lehˬ, yawˇ ve a pehˉ meuˇ hko awˬ hk'aw lo kanˉ te tuˬ ve chaw hui hta‸ ca tuˬ, mvuhˇ shawˉ teˇ na‸ tawˆ k'ai ve yehˬ shehˍ hpaˇ teˇ g'aˇ hta‸ shuˍ ve yoˬ. 2Yawˇ lehˬ, teˇ nyi teˇ hteh‸ piˇ tuˬ yoˬ teh‸, kanˉ te paˍ teˇ hpaˍ geh jehˬ da‸ peuˬ hk'aw‸ nawˉ, yawˇ ve a pehˉ meuˇ hko awˬ hk'aw lo yawˇ hui hta‸ k'ai tcuh ve yoˬ. 3Mvuhˇ shawˉ aˬ laˬ hk'e k'awˇ naˍ riˍ htaˇ yawˇ k'aw‸ tawˆ k'ai leh, tcuh hk'aw lo kanˉ maˇ cawˬ leh hk'e leˇ chehˇ taˍ ve awˬ kaˍ awˬ nu chaw teˇ hpaˍ hta‸ yawˇ g'a mawˬ htaˇ, 4Nawˬ hui htawˇ ngaˬ ve a pehˉ meuˇ hko awˬ hk'aw lo k'ai-o. Keunˍ da‸ ve hk'e ngaˬ nawˬ hui hta‸ pe‸ laˇ tuˬ yoˬ teh‸, yawˇ hui hta‸ k'oˆ piˇ leh, yawˇ hui htawˇ k'ai ve yoˬ. 5Peuˬ leh, mvuhˇ law‸ k'aw tcuhˆ teˇ yanˇ leh mvuhˇ hpeu‸ hpawˇ shehˆ naˍ riˍ hk'e teˇ yanˇ, yawˇ teˇ pawˆ k'aw‸ k'ai leh oˇ ve hk'a shuˍ shuˍ te ve yoˬ. 6Mvuhˇ hpeu‸ aˬ laˬ hk'e ngaˇ naˍ riˍ teˇ yanˇ yawˇ k'aw‸ tawˆ k'ai leh, awˬ kaˍ awˬ nu chaw teˇ hpaˍ oˇ kaˬ lo huˉ chehˇ ve hta‸ g'a mawˬ htaˇ, Nawˬ hui aˬ hto‸ ma pa taw choˬ kaˬ lo teˇ nyi tanˇ vanˇ hk'e leˇ chehˇ taˍ ve le teh‸ yawˇ hui hta‸ na nyi ve yoˬ. 7Chaw teˇ g'aˇ ka‸ ngaˬ hui hta‸ maˇ ca la ve hta‸ pa taw yoˬ teh‸, yawˇ hui yawˇ hta‸ k'aw‸ k'oˆ piˇ htaˇ, Nawˬ hui htawˇ ngaˬ ve a pehˉ meuˇ hko awˬ hk'aw lo k'ai-o teh‸, yawˇ yawˇ hui hta‸ k'oˆ piˇ ve yoˬ. 8Mvuhˇ hpeu‸ la htaˇ, hko awˬ shehˍ hpaˇ lehˬ, Kanˉ te shehˍ hpaˇ hui hta‸ kuˬ hk'aw‸ leh, awˬ hk'aw‸ nawˉ leh leh ca te ve chaw hui hta‸ tanˬ leh, awˉ lawˉ peuˇ ca te ve chaw hui hk'a gaˬ awˬ hpfuhˇ piˇ-oˆ teh‸ yawˇ ve mawˇ ha‸ shaˉ shehˍ hpaˇ hta‸ k'oˆ piˇ ve yoˬ. 9Oˇ htaˇ, mvuhˇ hpeu‸ aˬ laˬ hk'e ngaˇ naˍ riˍ htaˇ kanˉ ca te ve chaw teˇ hpaˍ laˬ leh, teˇ g'aˇ le le teˇ hteh‸ g'a ve yoˬ. 10Awˉ lawˉ peuˇ ca te ve chaw teˇ hpaˍ laˬ ve teˇ yanˇ, yawˇ hui shu a‸ kehˉ leuˉ leh g'a tuˬ yoˬ teh‸ dawˇ taˍ ve ka‸, yawˇ hui htawˇ teˇ g'aˇ teˇ hteh‸ ceh tiˉ g'a ve yoˬ. 11Yawˇ hui hpu g'a ve teˇ yanˇ, yehˬ shehˍ hpaˇ hta‸ ca beu leh yawˇ hta‸ k'oˆ piˇ ve, 12Awˬ hk'aw‸ nawˉ leh leh ca te la ve chaw teˇ hpaˍ lehˬ, teˇ naˍ riˍ tiˉ g'a te ve htawˇ, ngaˬ hui teˇ nyi tanˇ vanˇ kanˉ te hkeu‸ leh mvuhˇ cha chiˆ ve hta‸ g'a hkanˍ ve chaw hui hk'a shuˍ shuˍ, nawˬ yawˇ hui hta‸ shawˍ piˇ ve law teh‸ k'oˆ piˇ ve yoˬ. 13Yawˇ hui awˬ hk'aw lo teˇ g'aˇ hta‸ yawˇ k'oˆ piˇ ve, Awˬ chawˇ-oˬ, ngaˬ nawˬ hta‸ maˇ cawˇ ve awˬ ceuˬ te laˇ ve maˇ heˆ. Teˇ hteh‸ piˇ tuˬ yoˬ teh‸ nawˬ geh ngaˬ jehˬ da‸ taˍ peuˬ maˇ heˆ laˇ. 14Nawˬ ve hpu hta‸ yuˬ leh k'ai-o. Awˬ hk'aw‸ nawˉ leh leh te ve chaw hta‸ nawˬ hk'a shuˍ shuˍ ngaˬ piˇ gaˇ ve yoˬ. 15Ngaˬ ve mawˇ hta‸ ngaˬ te gaˇ ve hk'e te maˇ cawˇ leh laˇ. Ngaˬ shu hta‸ ha k'aˉ leh piˇ ve pa taw nawˬ nyi ma naˬ leh laˇ teh‸, k'aw‸ k'oˆ piˇ ve yoˬ. 16Oˇ ve hk'a shuˍ shuˍ, shu awˬ hk'aw‸ nawˉ chehˇ ve chaw lehˬ, shu awˬ g'u suhˍ g'a k'aw‸ chehˇ tuˬ yoˬ. Shu awˬ g'uˇ suhˍ chehˇ ve chaw lehˬ, shu awˬ hk'aw‸ nawˉ g'a k'aw‸ chehˇ tuˬ yoˬ teh‸, Yeˍsuˆ k'oˆ ve yoˬ. 17Peuˬ leh Yeˍsuˆ Yeˍruˆsaˍlehnˍ venˇ lo k'ai chehˇ htaˇ, awˬ la‸ g'awˇ teˇ chi nyiˇ g'aˇ hta‸ tiˉ kuˬ veu leh, ya‸ k'aw k'aˉ lo yawˇ yawˇ hui hta‸ k'oˆ piˇ ve, 18Ngaˬ hui Yeˍruˆsaˍlehnˍ venˇ lo k'ai chehˇ ve yoˬ. Chaw yaˇ ve Yaˇ hpu lehˬ, paw hkuˇ lonˉ hui leh li‸ bvuh‸ paˍ hui ve la‸ sheh awˬ hk'aw lo chiˇ a‸ ve hta‸ g'a hkanˍ leh, yawˇ g'a suh tuˬ ve yawˇ hui yawˇ hta‸ suhˉ taˆ tuˬ yoˬ. 19Maˇ shawˍ maˇ caˆ te ve, jaw‸ ve, la‸ ka hk'oˆ lo hta‸ pehˍ ve, chi teˇ hpaˍ hta‸ g'a hkanˍ tuˬ, buiˇ shaˆ aˉ naˆ chaw hui ve la‸ sheh awˬ hk'aw lo yawˇ hta‸ chiˇ a‸ piˇ tuˬ yoˬ. Peuˬ leh, shehˆ nyi teˇ nyi gaˬ k'o, yawˇ k'aw‸ te‸ tu la tuˬ yoˬ teh‸ k'oˆ ve yoˬ. 20Oˇ htaˇ, Zeˍbeˍdehˇ ve yaˇ paˍ hui ve awˬ e leh yawˇ ve yaˇ paˍ nyiˇ g'aˇ Yeˍsuˆ geh laˬ leh, awˬ e yawˇ hta‸ oˉ k'oˍ pui leh teˇ ceuˬ lawˬ ve yoˬ. 21Nawˬ aˬ hto‸ ma heuˆ gaˇ ve le teh‸, Yeˍsuˆ na nyi htaˇ, yaˇ miˇ oˇ ve lehˬ, Nawˬ ve mvuhˇ miˬ awˬ hk'aw lo ngaˬ ve yaˇ paˍ chi nyiˇ g'aˇ hta‸ nawˬ ve la‸ sha paˉ teˇ g'aˇ, la‸ mehˍ paˉ teˇ g'aˇ a ciˉ mui piˇ lawˬ-o‸ teh‸ k'oˆ ve yoˬ. 22Yeˍsuˆ k'oˆ ve, Nawˬ hui aˬ hto‸ ma hta‸ lawˬ ve nawˬ hui maˇ shiˍ. Ngaˬ g'a dawˬ tuˬ ve kawˆ hta‸ nawˬ hui dawˬ hpeh‸-aw laˇ teh‸ na nyi htaˇ, Dawˬ hpeh‸-aw teh‸ yawˇ hui k'aw‸ k'oˆ piˇ ve yoˬ. 23Ngaˬ ve kawˆ hta‸ nawˬ hui g'a dawˬ tuˬ yoˬ. Ya‸ hk'aˇ, ngaˬ ve la‸ sha paˉ la‸ mehˍ paˉ g'a mui tuˬ ngaˬ pe‸ laˇ maˇ hpeh‸. Ngaˬ ve Awˬ pa gu taˍ ve chaw hui ceh tiˉ g'a mui tuˬ yoˬ teh‸, yawˇ hui hta‸ k'oˆ piˇ ve yoˬ, 24Awˬ lawn chi hta‸ awˬ kaˍ awˬ nu tcuh yaˇ teˇ chi g'aˇ g'a kaˇ htaˇ, awˬ viˉ awˬ nyi oˇ ve nyiˇ g'aˇ hta‸ yawˇ hui nyi ma zuhˆ ve yoˬ. 25Yeˍsuˆ yawˇ hui hta‸ kuˬ yuˬ leh k'oˆ piˇ ve, Buiˇ shaˆ aˉ naˆ chaw hui ve jawˇ mawˇ teˇ hpaˍ lehˬ, yawˇ hui awˬ hk'oˆ uˉ peunˍ leh, yawˇ hui ve chaw uiˍ teˇ hpaˍ lehˬ, yawˇ hui hta‸ nyiˉ te ve hta‸ nawˬ hui shiˍ ve yoˬ. 26Ya‸ hk'aˇ, nawˬ hui awˬ hk'aw lo chi hk'e maˇ g'a te. Nawˬ hui awˬ hk'aw lo chaw uiˍ hpeh‸ gaˇ ve chaw hk'aˬ ve teˇ g'aˇ maˇ k'oˆ, yawˇ nawˬ hui ve awˬ ceˬ g'a te ve yoˬ. 27Nawˬ hui awˬ hk'aw lo awˬ hoˉ te gaˇ ve chaw hk'aˬ ve te g'aˇ maˇ k'oˆ, chaw yaˇ ve Yaˇ hpu hk'a shuˍ shuˍ, nawˬ hui awˬ pon yawˇ lehˬ vuiˬ taˍ ve awˬ ceˬ g'a hpeh‸ ve yoˬ. 28Awˬ lawn k'o, chaw yaˇ ve Yaˇ hpu lehˬ, shu yawˇ awˬ pon kanˉ te tuˬ laˬ ve maˇ heˆ. Yawˇ shu awˬ pon kanˉ te tuˬ laˬ leh, chaw maˇ maˇ hta‸ htaiˍ hk'aw‸ piˇ tuˬ yawˇ ve a sha‸ piˇ tuˬ awˬ pon laˬ ve yoˬ teh‸ k'oˆ ve yoˬ. 29Yeˍriˆhkoˇ venˇ awˬ hk'aw lo yawˇ hui tawˆ k'ai chehˇ htaˇ, chaw awˬ moˍ lonˉ yawˇ awˬ hk'aˇ suh k'ai ve yoˬ. 30Oˇ htaˇ ya‸ k'aw paˇ lo mui chehˇ ve mehˆ cuˉ paˍ nyiˇ g'aˇ lehˬ, Yeˍsuˆ yawˇ huiˉ maˬ awˬ paˇ lo k'ai chehˇ ve awˬ lawn hta‸ yawˇ huiˉ maˬ g'a kaˇ htaˇ, Daˍviˆ ve Yaˇ hpu Jawˇ mawˇ-oˬ, ngaˬ huiˉ maˬ hta‸ ha k'aˉ laˇ-oˆ teh‸ kuˬ ve yoˬ. 31Chaw awˬ moˍ lonˉ yawˇ huiˉ maˬ hta‸, Ta‸ iˉ chehˇ-oˆ teh‸ deˇ piˇ ve htawˇ, yawˇ huiˉ maˬ lehˬ, Daˍviˆ ve Yaˇ hpu Jawˇ mawˇ-oˬ, ngaˬ huiˉ maˬ hta‸ ha k'aˉ laˇ-oˆ teh‸, leuˉ leh k'aw‸ kuˬ ve yoˬ. 32Oˇ htaˇ, Yeˍsuˆ huˉ taˍ leh yawˇ huiˉ maˬ hta‸ kuˬ leh, Nawˬ huiˉ maˬ awˬ pon ngaˬ hta‸ aˬ hto‸ ma te tcuh laˇ gaˇ ve le teh‸ na nyi ve yoˬ. 33Yawˇ huiˉ maˬ lehˬ, Jawˇ mawˇ-oˬ, ngaˬ huiˉ maˬ ve mehˆ shiˍ hta‸ hpaw laˇ-oˆ teh‸ yawˇ hta‸ k'oˆ piˇ ve yoˬ. 34Oˇ htaˇ, Yeˍsuˆ yawˇ huiˉ maˬ hta‸ ha k'aˉ leh, yawˇ huiˉ maˬ ve mehˆ shiˍ hta‸ htawˇ ve yoˬ. Teˇ cawˬ haˉ yawˇ huiˉ maˬ mehˆ mawˬ la leh yawˇ awˬ hk'aˇ suh k'ai ve yoˬ.

will be added

X\