Ma‸htehˍ 12

1Oˇ ve teˇ yanˇ, Yeˍsuˆ lehˬ shinˉ nyi htaˇ heh hk'aw hpanˍ k'ai ve yoˬ. Yawˇ ve awˬ la‸ g'awˇ teˇ hpaˍ awˍ meu‸ leh caˬ nu chehˆ caˇ ve yoˬ. 2Hpaˍriˍsehˇ teˇ hpaˍ mawˬ leh, Nyi-o, shinˉ nyi awˬ hk'aw lo te maˇ keunˍ te maˇ cawˇ ve awˬ ceuˬ hta‸ nawˬ ve awˬ la‸ g'awˇ teˇ hpaˍ te chehˇ ve law teh‸, yawˇ hui yawˇ hta‸ k'oˆ piˇ ve yoˬ. 3Yeˍsuˆ yawˇ hui hta‸ k'aw‸ k'oˆ piˇ ve, Daˍviˆ leh yawˇ ve awˬ chawˇ teˇ hpaˍ awˍ meu‸ ve teˇ yanˇ, yawˇ hui hk'aˬ hk'e te ve awˬ lawn hta‸ nawˬ hui maˇ g'aw jaw leh laˇ. 4Yawˇ lehˬ G'uiˬ sha ve yehˬ awˬ hk'aw lo lo‸-e leh, yawˇ awˬ to ka‸ yawˇ ve awˬ chawˇ teˇ hpaˍ ka‸ caˇ maˇ keunˍ caˇ maˇ cawˇ ve, paw hkuˇ teˇ hpaˍ ceh tiˉ caˇ keunˍ caˇ cawˇ ve tanˇ taˍ ve hkaoˍ monˇ hta‸ caˇ ve maˇ heˆ laˇ. 5Peuˬ leh, shinˉ nyi htaˇ bon yehˬ lonˉ awˬ hk'aw lo paw hkuˇ teˇ hpaˍ shinˉ nyi ve awˬ liˇ hta‸ te ya‸ ve htawˇ, yawˇ hui venˇ baˆ maˇ cawˬ ve awˬ lawn hta‸ awˬ liˇ tawˇ hkawˇ awˬ hk'aw lo nawˬ hui maˇ g'aw jaw laˇ. 6Ngaˬ nawˬ hui hta‸ k'oˆ laˇ ve, bon yehˬ lonˉ a‸ kehˉ uiˍ ve teˇ g'aˇ choˬ kaˬ chehˇ taˍ ve yoˬ. 7Tanˇ tuˬ hta‸ ngaˬ heuˆ gaˇ ve maˇ heˆ. Ha k'aˉ ve teˇ ceuˬ hta‸ ngaˬ heuˆ gaˇ ve yoˬ teh‸ k'oˆ taˍ ve tawˇ hkawˇ hta‸ nawˬ hui shiˍ ve hk'e k'o, venˇ baˆ maˇ cawˬ ve chaw hta‸ nawˬ hui venˇ baˆ taˍ tuˬ maˇ heˆ. 8Awˬ lawn k'o, chaw yaˇ ve Yaˇ hpu lehˬ, shinˉ nyi ve awˬ jawˇ mawˇ hpeh‸ ve yoˬ teh‸ k'oˆ piˇ ve yoˬ. 9Yawˇ oˇ kaˬ lo tawˆ k'ai leh yawˇ hui ve bon yehˬ awˬ hk'aw lo lo‸-e ve yoˬ. 10Oˇ kaˬ lo la‸ sheh teˇ paˉ suh ve chaw teˇ g'aˇ cawˬ ve yoˬ. Yawˇ hui Yeˍsuˆ hta‸ venˇ baˆ taˍ tuˬ, Shinˉ nyi awˬ hk'aw lo shu hta‸ gu na-e piˇ cawˇ laˇ teh‸, yawˇ hui yawˇ hta‸ na nyi ve yoˬ. 11Yawˇ yawˇ hui hta‸ k'aw‸ k'oˆ piˇ ve. Nawˬ hui awˬ hk'aw lo chaw teˇ g'aˇ g'aˇ yawˬ teˇ hkeh tiˉ cawˬ leh, shinˉ nyi htaˇ yawˬ oˇ ve teˇ hkeh miˬ k'oˍ hk'aw ce lo‸-e ve k'o, maˇ yuˬ tawˆ ve chaw teˇ g'aˇ g'aˇ cawˬ laˇ. 12Chaw yaˇ lehˬ, yawˬ a‸ kehˉ hk'aˬ ma awˬ hpfuhˇ hk'aˆ ve le. Hk'e te leh, shinˉ nyi htaˇ da‸ ve awˬ ceuˬ hta‸ te cawˇ ve yoˬ teh‸, yawˇ k'oˆ piˇ ve yoˬ. 13Oˇ htaˇ, chaw oˇ ve hta‸, Nawˬ ve la‸ sheh che hk'a teh‸, yawˇ k'oˆ piˇ ve yoˬ. Chaw oˇ ve la‸ sheh che ve teˇ yanˇ k'aw‸ da‸ la leh, awˬ nu ve teˇ paˉ hk'a shuˍ shuˍ hpeh‸ la ve yoˬ. 14Oˇ htaˇ, Hpaˍriˍsehˇ teˇ hpaˍ tawˆ k'ai leh, Yeˍsuˆ hta‸ hk'aˬ hk'e te leh g'a tiˇ pehˍ tuˬ jehˬ da‸ ve yoˬ. 15Awˬ lawn chi hta‸ Yeˍsuˆ g'a shiˍ htaˇ, yawˇ oˇ kaˬ lo tawˆ k'ai ve yoˬ. Chaw maˇ maˇ yawˇ awˬ hk'aˇ suh k'ai leh, yawˇ hui hk'a peu-eˬ hta‸ yawˇ gu na-e piˇ ve yoˬ. 16Yawˇ ve awˬ lawn shu hta‸ maˇ g'a k'aoˍ piˇ tuˬ, yawˇ hui hta‸ yawˇ tawˇ hk'a deh‸ piˇ taˍ ve yoˬ. 17Awˬ lawn chi lehˬ, tcuh kaˍ paˍ Iˉsaˍyaˆ k'oˆ taˍ ve tawˇ teˇ hkawˇ biˇ la tuˬ awˬ pon yoˬ. Yawˇ k'oˆ taˍ ve tawˇ hkawˇ lehˬ, 18Ngaˬ leuˆ yuˬ taˍ ve ngaˬ ve awˬ ceˬ teˇ g'aˇ hta‸ nyi-o. Yawˇ hta‸ ngaˬ nyi hk'aˇ suh leh ha‸ jaˇ ve yoˬ. Ngaˬ ve Awˬ ha hpu yawˇ awˬ hk'oˆ hta‸ ngaˬ chehˇ piˇ leh, suhˉ jehˬ ve awˬ lawn buiˇ shaˆ aˉ naˆ chaw hui hta‸ yawˇ k'aoˍ maˍ piˇ tuˬ yoˬ. 19Tawˇ g'awˬ da‸ ve maˇ k'oˆ, kuˬ ve maˇ k'oˆ, yawˇ maˇ te. Ya‸ k'aw k'aˉ lo yawˇ ve awˬ hkawˇ hta‸ chaw teˇ g'aˇ ka‸ maˇ g'a kaˇ 20Suhˉ jehˬ ve awˬ liˇ hta‸ g'aˇ kuiˬ lo yawˇ maˇ gaˬ tcuh sheˍ ve ceh ceh, hteh k'aˉ taˍ ve lo cehˬ hta‸ yawˇ maˇ te cheˆ. Kawˆ faiˇ awˬ caˆ mvuhˇ hk'awˇ du du te to‸ chehˇ ve hta‸ yawˇ maˇ shiˉ. 21Yawˇ ve awˬ meh awˬ hk'aw lo buiˇ shaˆ aˉ naˆ chaw hui dawˇ law tuˬ yoˬ, teh‸ k'oˆ taˍ ve yoˬ. 22Oˇ htaˇ neˇ geh taˍ ve, mehˆ cuˉ leh k'aˍ ve chaw teˇ g'aˇ hta‸ shu yawˇ geh yuˬ laˬ ve yoˬ. Yawˇ chaw k'aˍ oˇ ve hta‸ gu na-e piˇ ve pa taw, chaw k'aˍ oˇ ve tawˇ yaw g'a la leh, mehˆ mawˬ la ve yoˬ. 23Oˇ htaˇ chaw awˬ moˍ lonˉ teˇ hpaˍ anˇ jaˇ leh, Chi lehˬ Daˍviˆ ve Yaˇ hpu leh naˍ leˇ teh‸ k'oˆ da‸ ve yoˬ. 24Hpaˍriˍsehˇ teˇ hpaˍ g'a kaˇ htaˇ, Chaw chi lehˬ, neˇ jawˇ mawˇ Beˍsaˍbuˇlaˆ hta‸ g'aˇ va ve awˬ hk'aw lo ceh tiˉ neˇ teˇ hpaˍ hta‸ g'a‸ k'oˬ ve yoˬ teh‸ k'oˆ ve yoˬ. 25Yawˇ hui dawˇ chehˇ ve hta‸ yawˇ shiˍ ve pa taw, yawˇ hui hta‸ k'oˆ piˇ ve, Maˇ cawˇ maˇ hawˍ da‸ ve mvuhˇ miˬ teˇ peˆ le le luˬ k'ai sheˆ k'ai tuˬ yoˬ. Maˇ cawˇ maˇ hawˍ da‸ ve venˇ maˇ k'oˆ, yehˬ maˇ k'oˆ, yeˬ chehˇ hpeh‸ tuˬ ve maˇ heˆ. 26Saˍtanˍ lehˬ, Saˍtanˍ hta‸ g'a‸ k'oˬ ve k'o, yawˇ awˬ to hta‸ hpaˆ da‸ tuˬ te ve yoˬ. Hk'e te leh, yawˇ ve mvuhˇ miˬ hk'aˬ hk'e te yeˬ hpeh‸ tuˬ le. 27Ngaˬ lehˬ Beˍsaˍbuˇlaˆ hta‸ g'aˇ va leh neˇ teˇ hpaˍ hta‸ g'a‸ k'oˬ ve hk'e k'o, nawˬ hui ve yaˇ paˍ teˇ hpaˍ lehˬ, a shu hta‸ g'aˇ va leh g'a‸ k'oˬ ve le. Hk'e te leh, yawˇ hui lehˬ nawˬ hui ve suhˉ jehˬ shehˍ hpaˇ hpeh‸ tuˬ yoˬ. 28Ya‸ hk'aˇ, ngaˬ lehˬ G'uiˬ sha ve Awˬ ha hpu hta‸ g'aˇ va leh neˇ teˇ hpaˍ hta‸ g'a‸ k'oˬ ve k'o, G'uiˬ sha ve mvuhˇ miˬ nawˬ hui geh gaˬ la peuˬ. 29Awˬ g'aˇ uiˍ ve chaw teˇ g'aˇ hta‸ awˉ lawˉ maˇ hpeh tiˍ taˍ ve k'o, yawˇ ve aˉ hk'aw lo lo‸-e leh yawˇ ve mawˇ jeˬ hta‸ a shu hiˉ yuˬ g'a tuˬ le. Awˬ g'aˇ uiˍ ve chaw hta‸ hpeh tiˍ taˍ peuˬ htaˇ heh‸, yawˇ ve aˉ hk'aw lo lo‸-e leh mawˇ jeˬ hta‸ hiˉ yuˬ g'a tuˬ yoˬ. 30Ngaˬ hpawˇ maˇ chehˇ ve chaw lehˬ, ngaˬ ve canˇ paˍ hpawˇ chehˇ ve yoˬ. Ngaˬ geh teˇ geh maˇ g'awˆ hpoˆ ve chaw lehˬ, g'awˆ baˬ ve chaw hpeh‸ ve yoˬ. 31Hk'e te leh, ngaˬ nawˬ hui hta‸ k'oˆ laˇ ve, chaw yaˇ hui te ve venˇ baˆ teˇ ceuˬ le le leh maˇ shawˍ maˇ caˆ k'oˆ ve teˇ ceuˬ le le hta‸ hpehˇ piˇ tuˬ yoˬ. Ya‸ hk'aˇ, Awˬ ha hpu hta‸ maˇ shawˍ maˇ caˆ k'oˆ ve teˇ ceuˬ hta‸ hpehˇ piˇ tuˬ maˇ heˆ. 32Chaw yaˇ ve Yaˇ hpu hta‸ yaw ya‸ ve chaw hk'aˬ ve teˇ g'aˇ maˇ k'oˆ, yawˇ ve venˇ baˆ hta‸ hpehˇ piˇ hpeh‸ ve yoˬ. Ya‸ hk'aˇ, da‸ ve kehˬ ve Awˬ ha hpu hta‸ yaw ya‸ ve chaw hk'aˬ ve teˇ g'aˇ maˇ k'oˆ, chi teˇ ca‸ na‸ ka‸, awˬ hk'aw‸ nawˉ teˇ ca‸ na‸ ka‸, yawˇ ve venˇ baˆ hta‸ hpehˇ piˇ maˇ hpeh‸. 33Awˬ cehˬ da‸ ve k'o, awˬ shiˍ htawˇ da‸ ve yoˬ teh‸ k'oˆ loˬ. Maˇ heˆ k'o, awˬ cehˬ maˇ da‸ ve k'o, awˬ shiˍ htawˇ maˇ da‸ ve teh‸ k'oˆ loˬ. Awˬ lawn k'o, awˬ shiˍ hta‸ pa taw awˬ cehˬ hta‸ shiˍ hpeh‸ ve yoˬ. 34Vuiˬ haiˬ awˬ ceuˬ teˇ hpaˍ-oˬ, nawˬ hui chaw haiˬ hpeh‸ ve pa taw da‸ ve tawˇ hk'aˬ hk'e te yaw hpeh‸ le. Awˬ lawn k'o, nyi ma awˬ hk'aw lo hk'a biˇ cawˬ ve hk'e, maw‸ k'aw yaw tawˆ la ve yoˬ. 35Da‸ ve chaw lehˬ, a shu yawˇ da‸ ve awˬ ceuˬ doˆ taˍ kuiˬ awˬ hk'aw lo da‸ ve awˬ ceuˬ hta‸ yuˬ tawˆ la ve yoˬ. Haiˬ ve chaw lehˬ, a shu yawˇ haiˬ ve awˬ ceuˬ doˆ taˍ kuiˬ awˬ hk'aw lo haiˬ ve awˬ ceuˬ hta‸ yuˬ tawˆ la ve yoˬ. 36Ngaˬ nawˬ hui hta‸ k'oˆ laˇ ve, suhˉ jehˬ ve awˬ nyi htaˇ chaw yaˇ lehˬ, awˬ bon maˇ cawˬ ve tawˇ hk'a yaw ve teˇ hpaˍ awˬ lawn g'a k'aw‸ k'aoˍ maˍ piˇ tuˬ yoˬ. 37Awˬ lawn k'o, nawˬ ve tawˇ hkawˇ hta‸ pa taw, nawˬ venˇ baˆ taˍ ve hta‸ g'a ponˬ tuˬ yoˬ. Peuˬ leh, nawˬ ve tawˇ hkawˇ hta‸ pa taw, nawˬ ciˍ yanˍ ve hta‸ g'a hkanˍ tuˬ yoˬ. 38Oˇ htaˇ, li‸ bvuh‸ paˍ leh Hpaˍriˍsehˇ teˇ hpaˍ hpaˍ lehˬ, Saˍ la‸-oˬ, nawˬ te maˍ laˇ ve awˬ heˆ teˇ ceuˬ ceuˬ hta‸ ngaˬ hui mawˬ gaˇ ve yoˬ teh‸ yawˇ hta‸ k'oˆ piˇ ve yoˬ. 39Yawˇ yawˇ hui hta‸ k'aw‸ k'oˆ piˇ ve, Haiˬ leh te ya‸ puiˉ ve chaw chi teˇ co lehˬ, awˬ heˆ hta‸ lawˬ ve yoˬ. Tcuh kaˍ paˍ Yoˇnaˆ ve awˬ heˆ maˇ heˆ k'o, awˬ kaˍ awˬ nu awˬ heˆ teˇ ceuˬ ka‸ chaw chi teˇ co hta‸ maˇ maˍ piˇ. 40Yoˇnaˆ lehˬ, ngaˇ lonˉ g'oˇ peˬ awˬ hk'aw lo shehˆ nyi shehˆ haˉ g'a chehˇ ve hk'a shuˍ shuˍ, chaw yaˇ ve Yaˇ hpu htawˇ miˬ k'oˍ hk'aw lo shehˆ nyi shehˆ haˉ g'a chehˇ tuˬ yoˬ. 41Suhˉ jehˬ ve awˬ nyi htaˇ, Niˇnaˍveˍ venˇ yaˇ hui lehˬ, chaw chi teˇ co geh teˇ geh tu la leh, chaw chi teˇ co hta‸ suhˉ taˆ tuˬ yoˬ. Awˬ lawn k'o, Yoˇnaˆ bon maˍ ve hta‸ pa taw yawˇ hui a shu yawˇ ve venˇ baˆ hta‸ dawˇ hpfuhˆ ve yo‸. Nyi loˬ, choˬ kaˬ lo Yoˇnaˆ a‸ kehˉ uiˍ ve teˇ g'aˇ chehˇ taˍ ve yo‸. 42Suhˉ jehˬ ve awˬ nyi htaˇ, awˬ hawˉ hpawˇ mvuhˇ miˬ ve nanˇ hawˉ hkanˇ ma htawˇ, chaw chi teˇ co geh teˇ geh tu la leh, chaw chi teˇ co hta‸ suhˉ taˆ tuˬ yoˬ. Awˬ lawn k'o, yawˇ lehˬ Sawˉla‸monˍ ve cuˇ yiˍ tawˇ hkawˇ hta‸ na tuˬ, miˬ guiˬ awˬ leh meuˇ teˇ kaˬ lo tu leh laˬ ve yoˬ. Nyi loˬ, choˬ kaˬ lo Sawˉla‸monˍ a‸ kehˉ uiˍ ve teˇ g'aˇ chehˇ taˍ ve yoˬ. 43Neˇ cha‸ chiˆ teˇ hkeh lehˬ, chaw teˇ g'aˇ awˬ hk'aw lo tawˆ k'ai peuˬ hk'aw‸ nawˉ, goˇ choˆ ve chehˇ kuiˬ teˇ hpaˍ awˬ hk'aw lo ca toˇ nyi leh, g'aˇ jehˇ kuiˬ hta‸ ca ve htawˇ, maˇ mawˬ. 44Oˇ htaˇ yawˇ lehˬ, Ngaˬ tawˆ la ve ngaˬ ve yehˬ lo k'aw‸ k'o‸-e shaˍ teh‸ k'oˆ leh, yawˇ k'aw‸ gaˬ la ve teˇ yanˇ, yehˬ oˇ ve lehˬ k'awˇ lehˍ kehˬ lehˍ hk'a deh‸ gu shiˆ taˍ ve hta‸ yawˇ g'a mawˬ ve yoˬ. 45Oˇ htaˇ, yawˇ k'ai leh yawˇ a‸ kehˉ haiˬ ve awˬ kaˍ awˬ nu neˇ suhˍ hkeh hta‸ kuˬ veu laˇ peuˬ hk'aw‸ nawˉ, yawˇ hui lo‸-e leh oˇ kaˬ lo chehˇ ve yoˬ. Hk'e te leh, chaw oˇ ve awˬ hk'aw‸ nawˉ hpeh‸ la ve lehˬ, awˉ lawˉ htaˇ hpeh‸ ve a‸ kehˉ leuˉ leh haiˬ ve yoˬ. Haiˬ ve chaw chi teˇ co htawˇ, oˇ ve hk'a shuˍ shuˍ hpeh‸ la tuˬ yoˬ teh‸, Yeˍsuˆ k'oˆ ve yoˬ. 46Chaw awˬ moˍ lonˉ hta‸ yawˇ maˍ piˇ chehˇ htaˇ, yawˇ ve awˬ e leh awˬ nyi paˍ teˇ hpaˍ lehˬ, yawˇ hta‸ na‸ uˉ te da‸ gaˇ leh, awˬ baˬ hpawˇ lo huˉ taˍ ve yoˬ. 47Hk'e te leh, chaw teˇ g'aˇ yawˇ hta‸ k'oˆ piˇ ve, Nawˬ ve awˬ e leh nawˬ ve awˬ nyi paˍ teˇ hpaˍ nawˬ hta‸ na‸ uˉ te da‸ gaˇ leh, awˬ baˬ hpawˇ lo huˉ taˍ ve yoˬ. 48Yawˇ hta‸ tawˇ yaw laˇ ve chaw teˇ g'aˇ hta‸ yawˇ k'aw‸ k'oˆ piˇ ve, Ngaˬ ve awˬ e leh ngaˬ ve awˬ nyi paˍ teˇ hpaˍ a shu le teh‸ na nyi ve yoˬ. 49Oˇ htaˇ, yawˇ ve awˬ la‸ g'awˇ teˇ hpaˍ hta‸ yawˇ beˆ leh k'oˆ ve, Ngaˬ ve awˬ e leh ngaˬ ve awˬ nyi paˍ teˇ hpaˍ hta‸ nyi loˬ. 50Awˬ lawn k'o, mvuhˇ naw ma hk'oˆ chehˇ ve ngaˬ Awˬ pa ve a loˍ hta‸ hk'a te ve chaw hui lehˬ, ngaˬ ve awˬ nyi paˍ, ngaˬ ve awˬ nyi ma leh ngaˬ ve awˬ e hpeh‸ ve yoˬ teh‸ k'oˆ piˇ ve yoˬ.

will be added

X\