Maˍkuˆ 5

1Hk'e te leh, g'uiˬ po coˇ paˉ, Gaˍdaˍ raˆ mvuhˇ miˬ lo yawˇ hui gaˬ ve yoˬ. 2Yeˍsuˆ haw lo‸ k'oˍ awˬ hk'aw lo tawˆ la htaˇ, neˇ cha‸ chiˆ geh ve chaw teˇ g'aˇ lehˬ, teˇ cawˬ haˉ chaw tuˍ hpfuh lo tawˆ la leh yawˇ hta‸ ca ha‸ la ve yoˬ. 3Chaw oˇ ve lehˬ, chaw tuˍ hpfuh teˇ hpaˍ cawˬ kuiˬ lo tiˉ chehˇ taˍ ve yoˬ. Chaw teˇ g'aˇ ka‸ yawˇ hta‸ hpeh tiˍ taˍ maˇ g'a. Sho caˆ yuˬ leh hpeh tiˍ taˍ ve ka‸ maˇ g'a. 4Awˬ lawn k'o, laiˉ pawˆ shu yawˇ hta‸ sho kawˬ sho caˆ yuˬ hpeh tiˍ taˍ htawˇ, yawˇ sho caˆ hta‸ g'awˬ cheˆ leh, sho kawˬ hta‸ awˉ hteh ve yoˬ. Chaw teˇ g'aˇ ka‸ yawˇ hta‸ meuˇ la tuˬ te maˇ g'a. 5Tuˍ hpfuh teˇ hpaˍ lo maˇ k'oˆ, hk'aw pui hk'oˆ lo maˇ k'oˆ, mvuhˇ law‸ k'aw mvuhˇ hpeu‸ hk'aˬ htaˆ ka‸ yawˇ kuˬ chehˇ ve yoˬ. Yawˇ awˬ to hta‸ ka‸, haˉ pui shiˍ yuˬ leh gui htu-iˍ chehˇ ve yoˬ. 6Yeˍsuˆ vuiˇ kuiˬ lo laˬ chehˇ ve hta‸ chaw oˇ ve g'a mawˬ htaˇ, yawˇ geh g'uiˇ laˬ leh yawˇ hta‸ oˉ k'oˍ pui ve yoˬ. 7Yawˇ awˬ hkawˇ bvuhˬ chaweh kuˬ leh k'oˆ ve, Mvuh jaˇ ve G'uiˬ sha ve Yaˇ hpu Yeˍsuˆ-oˬ, nawˬ ngaˬ hta‸ hk'aˬ hk'e caˉ da‸ le. Nawˬ ngaˬ hta‸ maˇ g'a fawˉ mehˍ tuˬ, G'uiˬ sha mehˆ g'uˇ suhˍ ngaˬ nawˬ hta‸ lawˬ hkawˉ ve yoˬ teh‸ k'oˆ piˇ ve yoˬ. 8Awˬ lawn k'o, Neˇ cha‸ chiˆ-oˬ, yawˇ awˬ hk'aw lo tawˆ k'ai-o teh‸, Yeˍsuˆ yawˇ hta‸ k'oˆ piˇ ve hta‸ pa taw yoˬ. 9Nawˬ aˬ hto‸ ma meh le teh‸, Yeˍsuˆ yawˇ hta‸ na nyi htaˇ, Ngaˬ hui maˇ jaˇ ve pa taw, ngaˬ ve awˬ meh lehˬ Leˍjonˍ yoˬ teh‸, yawˇ Yeˍsuˆ hta‸ k'aw‸ k'oˆ piˇ ve yoˬ. 10Mvuhˇ miˬ oˇ ve awˬ hk'aw lo yawˇ hui hta‸ maˇ g'a g'a‸ tawˆ tuˬ, yawˇ Yeˍsuˆ hta‸ g'aˇ hte‸ lawˬ hkawˉ ve yoˬ. 11Hk'aw oˇ ve awˬ ba‸ le lo, va‸ moˍ lonˉ k'aˆ caˇ chehˇ ve yoˬ. 12Hk'e te leh, neˇ teˇ hpaˍ yawˇ hta‸ lawˬ hkawˉ ve, Va‸ oˇ ve teˇ hpaˍ awˬ hk'aw lo ngaˬ hui g'a lo‸-e tuˬ, ngaˬ hui hta‸ k'ai tcuh laˇ-oˆ teh‸ k'oˆ piˇ ve yoˬ. 13Oˇ htaˇ, Yeˍsuˆ yawˇ hui hta‸ k'ai tcuh ve yoˬ. Neˇ cha‸ chiˆ teˇ hpaˍ tawˆ k'ai leh va‸ oˇ ve teˇ hpaˍ awˬ hk'aw lo lo‸-e ve yoˬ. Va‸ awˬ moˍ lonˉ lehˬ, miˬ haˍ kuiˬ lo g'aˇ hte‸ g'uiˇ ya‸-e leh, g'uiˬ po hk'aw lo lo‸-e leh k'a suh peuˬ sheˬ ve yoˬ. Va‸ oˇ ve teˇ hpaˍ, aˬ laˬ hk'e nyiˇ hinˉ hkeh cawˬ ve yoˬ. 14Va‸ hawˉ paˍ teˇ hpaˍ g'uiˇ k'o‸-e leh, awˬ lawn oˇ ve hta‸ venˇ hk'aˆ teˇ hpaˍ awˬ hk'aw lo ca hto piˇ ve yoˬ. Hk'e te leh, hk'aˬ hk'e hpeh‸ la ve awˬ lawn hta‸ g'a shiˍ tuˬ, chaw teˇ hpaˍ ca nyi la ve yoˬ. 15Yawˇ hui Yeˍsuˆ geh gaˬ la htaˇ, neˇ cha‸ chiˆ Leˍjonˍ geh ve chaw teˇ g'aˇ veu‸ k'aˇ veu‸ deh leh mui chehˇ ve hta‸ yawˇ hui g'a mawˬ ve yoˬ. Yawˇ ve nyi ma awˉ lawˉ htaˇ hk'a shuˍ shuˍ k'aw‸ da‸ la ve hta‸ htawˇ yawˇ hui g'a mawˬ leh kawˆ jaˇ ve yoˬ. 16G'a mawˬ taˍ ve chaw teˇ hpaˍ lehˬ, neˇ geh ve chaw awˬ lawn leh va‸ teˇ hpaˍ hk'aˬ hk'e hpeh‸ la ve awˬ lawn, ca nyi la ve chaw hui hta‸ k'aoˍ maˍ piˇ ve yoˬ. 17Hk'e te leh, yawˇ hui ve mvuhˇ miˬ teˇ tawn awˬ hk'aw lo tawˆ k'ai tuˬ, yawˇ hui Yeˍsuˆ hta‸ lawˬ hkawˉ ve yoˬ. 18Yeˍsuˆ haw lo‸ k'oˍ awˬ hk'aw lo lo‸-e ve teˇ yanˇ, neˇ cha‸ chiˆ geh jaw ve chaw chi teˇ g'aˇ lehˬ, yawˇ geh chehˇ tuˬ lawˬ hkawˉ ve yoˬ. 19Yeˍsuˆ yawˇ hta‸ maˇ chehˇ tcuh. Ya‸ hk'aˇ yawˇ hta‸ k'oˆ piˇ ve, Nawˬ aˉ hk'aw k'o‸-e leh, Jawˇ mawˇ G'ui sha nawˬ hta‸ hk'aˬ ma ga laˇ leh ha k'aˉ laˇ ve awˬ lawn, nawˬ ve awˬ ceuˬ awˬ hk'aˇ teˇ hpaˍ hta‸ ca k'aoˍ maˍ piˇ-oˆ teh‸ k'oˆ piˇ ve yoˬ. 20Hk'e te leh yawˇ tawˆ k'ai leh, Yeˍsuˆ yawˇ hta‸ hk'aˬ ma ga laˇ peuˬ ve awˬ lawn, Deˍkaˍpawˇliˆ mvuhˇ miˬ awˬ hk'aw lo yawˇ g'aˇ hte‸ ca k'aoˍ maˍ piˇ ve pa taw, chaw hk'a peu-eˬ anˇ jaˇ ve yoˬ. 21Yeˍsuˆ haw lo‸ k'oˍ ciˇ leh g'uiˬ po coˇ paˉ lo k'aw‸ hkanˍ k'ai ve yoˬ. Yawˇ g'uiˬ po paˇ chehˇ taˍ htaˇ, chaw awˬ moˍ lonˉ yawˇ geh hpawnˬ la ve yoˬ. 22Oˇ htaˇ, Yaˍiˉruˆ meh ve bon yehˬ awˬ hoˉ te ve teˇ g'aˇ laˬ leh Yeˍsuˆ hta‸ mawˬ htaˇ, yawˇ ve hkui paˇ lo boˆ sheˬ ve yoˬ. 23Yawˇ Yeˍsuˆ hta‸ k'oˆ piˇ ve, Ngaˬ ve yaˇ miˇ ehˉ suh la paˇ neˇ ve yoˬ. Yawˇ na-e la leh a sha‸ g'a te‸ tuˬ, nawˬ laˬ leh yawˇ awˬ hk'oˆ hta‸ la‸ sheh a ciˉ ca taˍ piˇ la-o teh‸, g'aˇ hte‸ lawˬ hkawˉ ve yoˬ. 24Hk'e te leh, yawˇ Yaˍiˉruˆ geh k'ai ve yoˬ. Chaw awˬ moˍ lonˉ yawˇ hk'aˇ suh k'ai leh, yawˇ hta‸ buiˆ heuˆ ca‸ heuˆ chehˇ ve yoˬ. 25Teˇ chi nyiˇ hk'aw‸ hk'a gaˬ awˬ suhˍ ya‸ la chehˇ ve yaˇ miˇ teˇ g'aˇ cawˬ ve yoˬ. 26Naˆ tsuhˇ shehˍ hpaˇ laiˉ g'aˇ ve la‸ sheh awˬ hk'aw lo yawˇ laiˉ ceuˬ g'a hkanˍ jaˇ peuˬ. Yawˇ hk'a cawˬ ve hk'a peu-eˬ hta‸ yehˇ peuˬ htawˇ, yawˇ a ciˉ ka‸ maˇ na-e la ve awˬ hk'oˆ, a naˍ oˇ ve shaˬ te shaˬ k'aw‸ jaˇ la ve yoˬ. 27Yawˇ Yeˍsuˆ awˬ lawn g'a kaˇ jaw ve yoˬ. Hk'e te leh, chaw awˬ moˍ lonˉ awˬ hk'aw lo yawˇ Yeˍsuˆ awˬ hk'aw‸ nawˉ hpawˇ lo laˬ leh, yawˇ ve veu‸ k'aˇ hta‸ ca htawˇ ve yoˬ. 28Awˬ lawn k'o, Yawˇ ve veu‸ k'aˇ hta‸ ceh ngaˬ g'a htawˇ ve k'o, ngaˬ na-e la tuˬ yoˬ teh‸ yawˇ k'oˆ ve yoˬ. 29Oˇ htaˇ, yawˇ awˬ suhˍ ya‸ la ve teˇ cawˬ haˉ cheh sheˬ leh, yawˇ na-e la peuˬ ve hta‸ yawˇ awˬ to shiˍ ve yoˬ. 30Yeˍsuˆ yawˇ ve awˬ to awˬ hk'aw lo kanˇ paˆ tawˆ k'ai ve hta‸ teˇ cawˬ haˉ g'a shiˍ ve pa taw, chaw awˬ moˍ lonˉ hta‸ yawˇ hpfuhˆ nyi leh, Ngaˬ ve veu‸ k'aˇ hta‸ a shu htawˇ ve le teh‸ na nyi ve yoˬ. 31Yawˇ ve awˬ la‸ g'awˇ teˇ hpaˍ lehˬ, Chaw awˬ moˍ lonˉ nawˬ hta‸ buiˆ heuˆ ca‸ heuˆ chehˇ ve hta‸ nawˬ mawˬ chehˇ ve ka‸, Ngaˬ hta‸ a shu htawˇ ve le teh‸ na nyi ve laˇ teh‸, Yeˍsuˆ hta‸ k'aw‸ k'oˆ piˇ ve yoˬ. 32Yawˇ hta‸ htawˇ laˇ ve chaw hta‸ g'a mawˬ tuˬ Yeˍsuˆ hk'a caw zuhˇ nyi chehˇ ve yoˬ. 33Yaˇ miˇ oˇ ve lehˬ, yawˇ awˬ hk'aw lo hk'aˬ hk'e hpeh‸ la ve awˬ lawn hta‸ shiˍ ve pa taw, yawˇ kawˆ cheˇ chehˇ ve yoˬ. Yawˇ Yeˍsuˆ geh laˬ leh yawˇ mehˆ g'uˇ suhˍ boˆ sheˬ leh, awˬ lawn hk'a peu-eˬ yawˇ hta‸ hteˇ lehˍ hto piˇ ve yoˬ. 34Yeˍsuˆ yawˇ hta‸ k'oˆ piˇ ve, Yaˇ miˇ-oˬ, nawˬ yonˍ ve teˇ ceuˬ lehˬ, nawˬ hta‸ na-e la piˇ peuˬ. Dawˇ sha ve awˬ hk'aw lo k'o‸-e loˬ. Nawˬ hta‸ chehˇ sha la piˇ peuˬ teh‸ k'oˆ piˇ ve yoˬ. 35Yawˇ oˇ hk'e k'oˆ chehˇ htaˇ, bon yehˬ awˬ hoˉ teˇ g'aˇ ve yehˬ lo laˬ ve chaw teˇ hpaˍ k'oˆ ve, Nawˬ ve yaˇ miˇ suh peuˬ. Aˬ hto‸ ma te Saˍ la‸ hta‸ k'aw‸ sho‸ sha‸ piˇ ve le. 36Tawˇ hkawˇ oˇ ve hta‸ Yeˍsuˆ maˇ na leh, bon yehˬ awˬ hoˉ teˇ g'aˇ hta‸, Taˇ dawˇ haˍ. Yonˍ ve tiˇ te-o teh‸ k'oˆ piˇ ve yoˬ. 37Peˍtruˆ, Yaˍkoˆ leh Yaˍkoˆ ve awˬ nyi paˍ Yoˇhanˬ, yawˇ hui shehˆ g'aˇ maˇ heˆ k'o, awˬ kaˍ awˬ nu chaw teˇ g'aˇ hta‸ ka‸ yawˇ awˬ hk'aˇ suh maˇ laˬ tcuh. 38Yawˇ bon yehˬ awˬ hoˉ teˇ g'aˇ ve yehˬ lo gaˬ la htaˇ, shu duiˆ-ehˍ shaˇ-ehˍ te leh, g'aˇ hte‸ hawˬ leh paˆ hawˬ chehˇ ve hta‸ yawˇ g'a mawˬ ve yoˬ. 39Yeˍsuˆ aˉ hk'aw lo‸-e leh, Nawˬ hui aˬ hto‸ ma te duiˆ-ehˍ shaˇ-ehˍ te leh hawˬ chehˇ ve le. Yaˇ ehˉ chi suh ve maˇ heˆ. Yawˇ zuh‸ muiˉ k'a chehˇ ve yoˬ teh‸ yawˇ hui hta‸ k'oˆ piˇ ve yoˬ. 40Oˇ htaˇ, yawˇ hui Yeˍsuˆ hta‸ hpawnˬ g'uiˬ ve yoˬ. Yeˍsuˆ yawˇ hui hk'a peu-eˬ hta‸ g'a‸ tawˆ sheˬ leh, yaˇ ehˉ ve awˬ pa awˬ e leh yawˇ geh laˬ ve chaw teˇ hpaˍ hta‸ shiˍ veu leh, yaˇ ehˉ teh taˍ kuiˬ lo lo‸-e ve yoˬ. 41Oˇ htaˇ, Yeˍsuˆ yaˇ miˇ ehˉ ve la‸ sheh hta‸ vawˆ leh k'oˆ ve, Taˍliˇtaˍkuˇmiˆ. Tawˇ oˇ ve tcuhˉ kui lehˬ, Yaˇ miˇ-oˬ, ngaˬ nawˬ hta‸ k'oˆ laˇ ve, tu la-o teh‸ k'oˆ ve yoˬ. 42Oˇ htaˇ, yaˇ miˇ ehˉ oˇ ve teˇ cawˬ haˉ tu la leh, ya‸ k'aw toˇ k'ai ve yoˬ. Awˬ lawn k'o, yawˇ a sha‸ teˇ chi nyiˇ hk'aw‸ gaˬ peuˬ. Chaw oˇ ve teˇ hpaˍ dawˇ maˇ tawˆ leh anˇ jaˇ ve yoˬ. 43Awˬ lawn oˇ ve hta‸ shu teˇ g'aˇ ka‸ maˇ g'a shiˍ tuˬ, Yeˍsuˆ yawˇ hui hta‸ g'aˇ hte‸ tawˇ piˇ peuˬ leh, Yaˇ miˇ ehˉ hta‸ caˇ tuˬ caˍ piˇ-oˆ teh‸, yawˇ hui hta‸ k'oˆ piˇ ve yoˬ.

will be added

X\